a10:14Liv 11:1-47; Ese 4:14
b10:15Mak 7:15, 19
c10:26Apo 14:13-15; Pal 19:10
d10:34Lap 10:17; Rom 2:11
e10:37Mat 4:12-17
f10:38Mat 3:16; Luk 4:17-21
g10:41Luk 24:42‑43; Apo 1:8
h10:42Apo 17:31; 1Pi 4:5
i10:43Ais 53:5-6; Iel 31:34; Apo 2:38
j10:44Apo 11:15, 15:8
k10:46Apo 2:4, 19:6
l10:48Apo 19:5

Acts 10

Kolunelio Musova Itema Vile sou Mu'avalou Pita

Itema vile muxolu ne Kaisalia ualasou lexe Kolunelio anu tila noxi'a ta mitema sou 'oto'oto. No nano no anu la'oluxa'a ilemo lexe ta mitema sou 'oto'oto noxi'a ta Itali. Anu itema ne ilo'a ane'i mukalusi e mixolu no tani noxou ne mimama'u mo mixolu no laaxu Lataua mo mimulinu 'ilixo noxou Lataua laixe, anu ulavusou uitinu lamoli mo mimii ulai sou usu'uline'i ta mitema ne Iutaia ane i'a mimii uasi, mo mulavusou ukilaka noxou Lataua utotomu. Xe no voxo vile no anu aso iou tatalu no 'olo'olovoxo, la anu mumaisou mii vile loxo aipiepiena, la anu mumaisou angelo vile noxou Lataua mune'e mupalaa noxou io muvikala lexe, “Kolunelio.” La Kolunelio mumatakisou ne no 'a 'umesi ia mutali'i lexe, “Mii ma'ia ne, Tila?” La angelo mukolinu tali'iou aloxo 'o, “Lataua mulomusou lingalinga noxine mulai noxou mo xavutalasou mimii ane nini ne'oxonu sou neitinu lamoli mo mimii mulai sou musu'uline'i ta mitema ane i'a mimii uasi ne muxolu no 'a xavutala noxou Lataua mo Anu mumasaxau. Ioxe, napalusi'a ta mitema ilai ne Iopa, mo ikamulinu itema vile ualasou lexe Saimoni, ualasou vile la lexe Pita sou i'avalou une'e. Anu a uxoxolu noxou Saimoni ane vile itema sou u'oxonu mii iouiou no anu ta mimii sosoie'i, ne taasou mutulu no luaki pa'umolu.” Angelo ane muvivikala noxou ne mulai mukalu, la Kolunelio mu'avali'a ta mitema sou xaixai noxou tamei xe itema sou 'oto'oto vile noxou anu kalumo ne ulavusou umulinu 'ilixo noxou Lataua laixe. Xe anu ulavusou sou uxolu noxou Kolunelio utotomu. Kolunelio mua'aloi'axu mimii mukalusi, ane muxali noxou ne mukalu la sou mupalusi'a sou milutu milai ne Iopa.

Pita Mumaisou Mii loxo Aipiepiena

Ta mitema ane Kolunelio mupalusi'a milai ne la miai no vote'i. Xe kakau la ane'i miavuti mimuamua'i la, xe aso lixinu la ane'i mixali 'alai ne Iopa. No voxo ngiou ane ne la Pita mutelai no tani laxa'u sou ukilaka noxou Lataua. 10 La anu musolixu mo mumasaxa sou u'ani, ia ane'i a uao milalaxiinu la'ilalisio io anu mumaisou mii vile loxo aipiepiena. 11 Anu mumalei sou lexe opo loxotolo mukisi io mii vile iou loxo lavalava tatila mitetelisou no 'a telexu tami'a io milu'e no lia. 12 No nano no 'a lavalava ne ta mimii iouiou ane'i ane imuamua'i no 'a tava'a tami'a mo talaxavale iouiou sou lialia xe ta ngiala sou ivava no va'a ne mi'ana'ana no anu. 13 La Pita mulomusou itema vile muvikala lexe, “Pita, natulu mo nave'axene ta mimii ne se'i mo na'i'a.” 14  a Ia Pita muvikala aloxo 'o, “Tila, umomomo sou eni a'oxo loxo ne uasi, xo eni a'ou mii vile ane nuni'u no ieni mo tavuna sou eni a'ou mii no ieni ne uao.” 15  b Ia vaikala mune'e noxou alaxu tameisou la, “Mimii ne Lataua mu'oxonu muxali malemalenga ne mamu sou nini nalemolu lexe nuni'u.” 16 Mii ane ne muxali alaxu tatalu mukalu, xe alaxu vilesisi 'o la lavalava ne mulivu mutelai no opo loxotolo.

17 Ioxe, Pita anu a muxavutala piena no anu mii ane anu mumaisou ne lexe laaxu a loxovaa, la ta mitema ane Kolunelio mupalusi'a mine'e ne mitali'isi'a ta mitema sou tani noxou Saimoni mo ane'i a mine'e mitulu no 'a aitengaxu vimelu sou tani. 18 Xe ane'i mi'ava sou mitali'i lexe Saimoni e ualasou vile lexe Pita anu a uxoxolu ne. 19 Ia Pita anu a uao uxavutalasi o sou mii ane loxo aipiepiena e anu mumaisou ne la Uleenu Tavuna muvikala mune'e noxou lexe, “Saimoni nalomu, ta mitema tatalu ane'i a ikakamulineni. 20 Naavuti mo nalu'elai no lia mo nongi'a ngalai io naxavutala piena mamu, xo eni epalusi'a a mine'e ne.” 21 Pita mulu'e no lia la muvikalane'i ta mitema ne aloxo 'o, “Eni itema e ngingi ngekakamulileli ne eni ano 'o. Io tava'u loxovaa la sou ngingi ngene'e 'o?” 22 La ta mitema ne mikolinu tali'i noxou lexe, “Nexi mexe noxou Kolunelio e tila noxi'a ta mitema sou 'oto'oto tene'e 'o, anu itema laixe mo ulavusou umama'u mo uxolu no laaxu Lataua, xe ta mitema ta Iutaia ta piena mukalusi ne ilavusou itoxonu. Ia Angelo noxou Lataua muvikalanu lexe anu u'avaline nane'e no tani noxou mo sou lexe anu ulomu noxine no anu ma'ia ane nini nalemolu.” 23 La sou Pita mu'unane'i ta mitema ne no nano no tani sou musaxila'a no anu 'olovoxo ane ne.

Pita Mulai no Tani Noxou Kolunelio

Xe lamana no voxo ane vile la sou ilo'a milutu milai. Ta vimovimo'a mose'i noxou Iesu ne Iopa ne milutu sou ilo'a milai.

24 Xe no voxo vile ane ili'i, la ilo'a mixali ne Kaisalia. Ia Kolunelio ne anu muxolu sou muloopalane'isi la mu'avali'a ta minuminu ilo'a ta menexu maninasou mine'e mipita no tani noxou. 25 No voxo mine Pita muxali mu'una no tani, la Kolunelio mualaxu la muxola'u tava'u mulu'e noxou Pita tava'u sou mulotu. 26  c Ia Pita mutulusou la muvikala lexe, “Natulu, xo eni kalumo ne eni amitemasi.” 27 Pita muvikala noxou ia mu'una la muxalisi'a ta mitema ta piena mipita ia mixoxolu. 28 Xe anu muavuti la muvikalane'i ane'i ane mixolu, ne aloxo 'o, “Ngingi menge ngalavu lexe lapuloto muvikala pekia'u lexe mamu sou itema Iutaia vile uxolu upita mo uxixaosi'a ta mitema ane'i ane ta Iutaia uasi. Ia Lataua mumaxa'uieli lexe mamu sou eni alemolu itema vile lexe nuni'u mo malemalenga uasi mamu. 29 La sou no mine ngingi nge'avalilo lexe eni ane'e, la eni aloloxolo ngenge uasi. Ia eni atali'isinge lexe nge'avalilo ene'e sou ma'ia?” 30 La Kolunelio mukolinu tali'i noxou aloxo 'o, “Voxo tami'a Mukalu. Eni ekilaka mulai noxou Lataua. Eni exolu no tani noxilo no aso iou iouvilesisi aloxo 'o ne aso iou tatalu. Xe emalei loxo 'o la, itema vile tokolomou muiei musuku muxali mutulu no talaxo alaxu vilesisi la mii ane ne muxali no talaxo la anu voxo tami'a mulai mukalu. 31 Io muvikala aloxo 'o, ‘Kolunelio, Lataua mulomusou lingalinga noxine mulai noxou mukalu, mo Anu muxavutalanu 'ilixo noxine ane nini ne'oxonu sou neitinu lamoli mo mimii mulai sou musu'uline'i ta mitema ne ane i'a mii uasi. 32 La sou mupalusi'a ta mitema mose'i milai ne Iopa sou i'avalou itema ane ualasou lexe Saimoni e ualasou vile lexe Pita, ia anu muxolu no tani noxou Saimoni ane vilemo e uxoxolu no luaki pa'umolu. Saimoni ne anu itema sou u'oxonu mimii iouiou no anu ta mimii sosoie'i.’ 33 Aloxo ne, la sou eni epalea epalusi'a milai mi'avaline, mo nini ne'oxonu 'ilixo laixe sou nene'e mo ano 'o nexi mukalusi 'a tepita no iou Lataua sou talomu no anu vaivaikala ukalusi ane Tila mulosine sou navikalanexixu.” 34  d Ioxe Pita muavuti sou muvikala aloxo 'o, “Vaimomo 'o, eni elavusou lexe Lataua ulavusou u'oxonu 'ilixo laixe noxi'a ta Iutaiasi uasi, 35 ia umasaxai'a ta mitema no 'a xalexalee lia ukalusi ane'i ane ilavusou ixoo no laaxu mo i'oxonu 'ilixo ane muisalili. 36 Vaikala ane 'o ne Lataua mulosixe nexi ta mitema sie Isilaeli muvikala sou a'alo laixe sou opo se'isisi noxou Lataua e noxou Iesu Kalisito. Anu Tila noxinge mukalusi. 37  e Ngingi ngelavusou mii ma'ia ane muxali musoko ne Xalilaia mo mu'ana'ana no tuatuala mukalusi ne Iutaia ili'i no anu a'alo sou 'ulo'ulo ane Ioanesi mua'aloxu. 38  f Ngingi ngelavusou lexe anu Iesu Kalisito sie Naseleti ne Lataua mulosou Uleenu Tavuna mo mu'ana'ana no anu xavi tatila. Mo Anu mumuamua'i no tuatuala mo muxaxai laixe noxi'a ta mitema mo mupamauline'i ta mitema ane satani mu'oxo masuane'i xo Lataua anu muxolu noxou. 39 Nexi ne ta mitema sou taa'aloxu mimii mukalusi ane Anu mu'oxonu no xalexalee tuatuala no lia 'o noxixe ta Iutaia mo ta Ielusalemu. Ane'i mililixu no anu ovu valautu la mivau musoli. 40 Ia no voxo tatalusou la Lataua mutulusou la, mo mu'oxonu mupala'a mo ta mitema mimaisou. 41  g Ta mitema ne Iutaia ukalusi ne imaisou uasi, ia nexisi ane temaisou. Io loxo Lataua musosovosixe sou nexi taa'aloxu lamana. Nexi noxi'a te'ani mo teie ili'i no mine Anu mutulu la no 'a soli. 42  h Anu muvikala pekia'u noxixe sou lexe taa'aloxu ulai noxi'a ta mitema mo tavikala lamana lexe Anu ne Lataua musosovosou lexe Anu uxali itema sou ulavusou ulevinu 'ilixoi'a ta mitema ane imaumauli mo ane'i ane misoisoli. 43  i Ta mitema sou palomatana mukalusi ne ane'i mia'aloxu la mivikala lexe no anu Ualasou la ta mitema ukalusi e imulaxu tane'i noxou ne, Lataua ululusou susu noxi'a.”

44  j No mine Pita anu uvivikala loxonesi 'o, la Uleenu Tavuna mune'e noxi'a ane'i mukalusi ane milomusou a'alo ne. 45 Ane'i ta mitema ta Iutaia mimuxaxu tane'i noxou Lataua e ilo'a Pita mine'e ne mikuluke xe Lataua munixiu Uleenu Tavuna mulu'e noxi'a ta mitema ane'i ane ta Iutaia uasi kalumo. 46  k Xo ane'i milomusi'a mivivikala no anu vaikala iouiou mo mi'iti'itinu ualasou Tila. La sou Pita muvikala lexe, 47 “Umomomo sou itema vile utalosi'a sou i'ulo mamu? Ia ane'i mino'u Uleenu Tavuna iou vilesisi aloxo nenge teno'u ne.” 48  l La sou anu muvikala pekia'u noxi'a lexe ane'i i'ulo no anu ualasou Iesu Kalisito. Ane'i mi'ulo mukalu la mitali'isou Pita sou lexe ilo'a ixolu voxo mose'i.

Copyright information for `ATA