a11:3Apo 10:28; Xal 2:12
b11:5-15Apo 10:9-48
c11:14Apo 16:31
d11:15Apo 2:4
e11:16Apo 1:5
f11:18Apo 13:48, 14:27
g11:19Apo 8:1-4
h11:22Apo 4:36
i11:25Apo 9:30
j11:28Apo 21:10
k11:30Apo 12:25

Acts 11

Pita Mua'aloi'a Ane'i ne Ielusalemu sou Mii Ma'ia Ane Anu Mu'oxo'oxonu

No voxo ane ne, la ta aposeli xe ta vimovimo'a ane ane'i mixolu ne Iutaia milomu lexe ta mitema ane'i ane ta Iutaia uasi kalumo ane'i a milomusou vaikala noxou Lataua. No mine Pita muxali ne Ielusalemu la ane'i ta mitema ane xooxoo ungasi'a mo mimulaxu tane'i noxou Lataua la'iaxa'a la anaxasou. a La sou ane'i mivikala Pita aloxo 'o, “Loxovaa la sou nini nelai no taasi'a ta mitema ane xooxoo ungasi'a uasi mo nongi'a nge'ani no taasi'a ne.” La sou Pita muavuti sou mua'aloi'a sou mimii mukalusi ane muxali aloxo 'o, b  “No mine uao eni exolu ne Iopa io, ekilaka, la emaisou mii vile loxo aipiepiena, la emaisou mii vile iou loxo lavalava tatila molu no opo loxotolo mulu'e. Mii vile mutetelisou no 'a telexu tami'a io mulu'enu noxilo. Ioxe eni emasaxa lexe alavusou mimii ne la sou eni emalei laixe no anu la etongone'i ta mimii iouiou ane'i ane imuamua'i no tava'a tami'a mo ta vova mo talaxavale iouiou sou lialia xe ta ngiala sou ivava no va'a. La elomusou itema vile muvikalaleli lexe, ‘Pita, natulu mo navauxene ta mimii ne se'i mo na'i'a.’ Ia eni evikala aloxo 'o, ‘Tila, umomomo sou eni a'oxo loxo ne uasi, xo eni a'ou mii vile ane nuni'u no ienu mo tavuna sou eni a'ou mii no ieni uao.’ La vaikala mune'e noxilo alaxu tameisou la, ‘Mimii ane Lataua mu'oxonu muxali malemalenga ne, mamu sou nini nalemolu lexe nuni'u.’ 10 Mii ane ne muxali aloxo ne alaxu tatalu mukalu, la lavalava e ilo'a ta mimii no nano no anu ne mulivu mutelai no opo loxotolo. 11 No mine lavalava mutelai no opo loxotolo mukalu, la alaxu vilesisi la ta mitema tatalu ne itema vile e muxolu ne Kaisalia mupalusi'a ne, ane'i mixali no tani ane nexi texoxolu no anu. 12 Xe Uleenu Tavuna muvikalaleli lexe, ‘Ngongi'a ngalai io naxavutala piena uasi,’ la sou ta vivilo muxatele vile ne nexi noxi'a temuamua'i telai te'una no taasou itema ne. 13 Te'una mukalu, la sou itema ne mua'alo mexi lexe anu mumaisou angelo vile mutulu no iou no nano no tani noxou. La sou angelo ne muvikalanu lexe, ‘Napalusi'a ta mitema se'i ilai ne Iopa, mo ikamulinu Saimoni e ualasou vile lexe Pita. Mo ivikalanu lexe une'e noxine, 14  c sou uvikalaneni no anu vaikala mo sou Lataua upamaulingengi ngongi'a ta tema taasine ukalusi.’ 15  d Ioxe itema e mu'avalilo ne muvivikala mukalu, xe eni esokosou evivikala sio, la Uleenu Tavuna mulu'e noxi'a iouvilesisi loxo no mine mulu'e noxinge tei. 16  e La sou eni exavutalanu vaikalau Tila e muvikala lexe, ‘Ioanesi u'ulosi'a ta mitema no anu lexa, io ngingi ne Lataua u'ulosinge no anu Uleenu Tavuna.’ 17 La sou ngingi ngelavusou vaimomo 'o Anu Lataua mulosi'a mii iou vilesisi aloxo mulosinge ne si. No mine nenge temulaxu tanenge noxou Tila Iesu Kalisito. Aloxo ne la sou eni itema ma'ia sou ataluxu masaxa noxou Lataua ulai noxi'a.” 18  f Ioxe ta mitema milomusou vaikala noxou Pita, la xavutala sou la'iaxa'a ne mukalu mo anaxa'a mutomu, ia mi'osasi sou mi'iti Tila ualasou sou mivikala aloxo 'o, “Mii vile uasi, Lataua mumasaxa lexe ta mitema ane'i ane ta Iutaia uasi ne ixiu opone'i mo ino'u mauli.”

Ta Mitema ne Antioki Misoko sou Milavusou Iesu Kalisito

19  g Ioxe, no mine ta mitema mivau Sutepano musoli xe ili'i, la ane'i mi'oxo lexe ive'ave'a ta mitema ane ane'i milavusou Iesu mo mimuxaxu tane'i noxou. La sou ane'i mi'ume'ume la mipaxele sou milailai ne Ponisia, xe Kipulosi mo Antioki sou mia'aloxu a'alo laixe sou Iesu noxi'a ta Iutaia ane'isisi. Io ia'aloxu noxi'a ta mitema ane'i ane ta Iutaia uasi mamu. 20 Ia se'i noxi'a ne ane'i sou tuala ne Kipulosi mo tuala ne Kilene milai mipita ne Antioki sou mia'aloxu a'alo laixe sou Tila Iesu noxi'a ta mitema ane'i ane ta Iutaia uasi kalumo. 21 La sou Lataua xaviinu muxolu noxi'a aloxo ne, xe ta piena mixiu opone'i la sou mimuxaxu tane'i noxou Tila. 22  h Xe ta mitema sou lalotu ane'i ane mixolu ne Ielusalemu milomusou a'alo ane ne, la sou mipalusou Valunavasi sou mulai ne Antioki. 23 No mine muxali la mumaisou lexe Lataua mualusi'a ta mitema laixe manina la anu mu'osa. La sou anu muavutinoxu xavutalai'a sou imuxaxu tane'i noxou Tila utotomu. 24 Xe anu Valunavasi ne itema laixe manina. Mo Uleenu Tavuna muxoo noxou la anu itema sou muxamuxaxu tanu, xe ta mitema ta piena mixiu maulixa'a sou mine'e noxou Tila mukalusi. 25  i Ioxe, Valunavasi muavuti la mulai ne Tasisi sou mukamulinu Saulo. 26 Anu muxalisou Saulo mukalu, la sou mutilonu sou ilou mivaxa ne Antioki. Mo ilo'a ta mitema mixolu tauu ie vile, sou milosie'ixa'a ta mitema ta piena no anu vaikalau Lataua. La sou no voxo ane ne ta molomolo noxou Iesu mo ta mitema ane ilavusou Lataua uasi ane'i mino'u uala lexe ta mitemau Kalisito. 27 No voxo ane ne kalumo, la ta mitema sou palomatana se'i me'a ne Ielusalemu milu'e ne Antioki. 28  j Ioxe vile noxi'a ualasou lexe Axavosi ne mutulu xe no anu xavi Uleenu Tavuna, la anu muvikala palomatana, lexe tausoli vile toxoxa'a uxali no tuatuala ukalusi no lia 'o, la ili'i no anu Kulaudio uxolu loxo tatananu tuala, la anu muxali. 29 No mine ta molomolo noxou Iesu Kalisito milomusou Axavosi muvikala palomatana aloxo ne, la sou ane'i mipitanu xavutala sou isu'uline'i ta vimovimo'a ne Iutaia no anu lamoli xe mimii sevile umomomo no anu maulixa'a. 30  k Ane'i mi'oxonu aloxo ne mukalu, la sou mipalusi'a Valunavasi ilou Saulo milaixu noxi'a ta tatila sou lalotu.

Copyright information for `ATA