a12:10Apo 5:19
c12:18Apo 5:22-24
d12:23Tan 5:20
e12:24Ais 55:11
f12:25Apo 11:29-30, 15:37

Acts 12

Elodesi Muvau Iakovo Musoli Io Mutatuxu Pita no Anu Taasou Navunavu

No voxo ane ne la, tatananu tuala Elodesi musokou 'oto'oto ane ne sou muve'avea' ta temanu lalotu noxou Iesu. La sou anu muvikalane'i sou mivau Iakavo e Ioanesi vimou ne no anu laviso la musoli. Xe Elodesi mulavusou lexe ta Iutaia mimasaxau mii ane anu mu'oxonu ne la sou anu mutatuxu Pita kalumo. Mu'oxnu mii ane ne muxali no anu Voxo e Ixutuxu Veletixa'a Vitanisi. La sou anu mutetelisou Pita sou mutatuxu no anu taasou navunavu. Anu mu'italonu Pita no avo'a ta mitema sou 'oto'oto la'oluxa'a tami'a sou misaxila'u. Mino'a ta mitema tamitami'a no nano noxi'a ta mitema sou 'oto'oto la'oluxa'a tami'a ne sou mixali loxo mavulovexa mo mulu'e no lia ta'uve mo muxatele vile sou isaxila'u. Elodesi mu'oxonu aloxo ne xo umasaxa lexe utulusou Pita no anu vaivaikala no ie'i ta mitema tavu'alo ili'i no anu voxo e isosovosou sou Lataua Mupolopepeene'i ta Isilaeli no anu. La sou Pita muxolu no nano no taasou navunavu. Ia ta tema lalotu ikilakasou pekia'u ulai noxou Lataua sou usu'ulinu.

Angelo Mulaanu Pita no Anu Taasou Navunavu

Ioxe Elodesi musosovosou voxo vile sou lexe utulusou Pita no anu vaivaikala. Ia tei no anu voxo ane ne xe no 'olovoxo, la Pita muai no taine'i ta mitema sou 'oto'oto tamei xe misakisakiinu no anu seni tamei kalumo. Xe ta mitema sou isaxila'u aitengaxu taasou navunavu ne kalumo ane'i a mitutulu sou isaxila'u aitenga. Xe alaxu vilesisi 'o la, angelo vile noxou Tila muxali mutulu la lamanaxu mukaa no nano no taasou navunavu ne. La angelo mukopesou Pita no vainu sou mutulusou la muvikala aloxo 'o, “Napalea natulu.” Muvikalanu aloxo ne, la seni e misakiinu Pita no anu ne mululu no avolu la mulapau muai no lia. La angelo muvikalanu lexe, “Nano'u tokolomomeni ane veveeni mo nasakiinu utupokonexe mo namuxaxu siove sou tava'ine mo namulileli.” La Pita mu'oxonu aloxo ne. La sou muavuti mumulinu angelo sou mulai no ale. Ia anu ulavusou lexe anu umulinu angelo manina sou ane uasi. Anu muxavutala lexe anu mumaisou mii loxo aipiepiena ane. 10  a Ia uasi anu mumulinu angelo manina. La sou ilou mipolopepeenu aitenga vile mo tameisou xe tatalusou la anu aitenga pekia'u sou ulai no tuala tila. Aitenga ane ne pekia'u ia molu mukisi vitanisi. La sou ane'i ilou miuatu no ale la mimuamua'i mimulinu vote'i milai, la alaxu vilesisi angelo mu'umesou Pita sou mulai.

11 La sou Pita xavutalau muxali lamana. Sou muvikala lexe, “Ae, eni e'oxo lexe eni emaisou mii loxo aipiepiena ano 'o si, la uasi. Eni emaisou mii manina. Tila mupalusou angelo noxou vile ane mune'e musu'ulileli no anu navunavu ane ta Iutaia i'oxe i'oxo umulinu masaxa noxou Elodesi sou i'oxonu noxilo.” 12 Anu mulavusou lexe Lataua musu'ulinu, la sou anu mulai no tani noxie Malia e Ioanesi e ualasou vile lexe Maluko nenu. Ta mitema ta piena ane'i a mipipita sou ikilaka ulai noxou Lataua. 13 Anu muxali no tani ne la mutulu no ale io mupolopolo no aitenga, la sou sema sou xaixai vile e ualasie lexe Loda. Ane mine'e sou lexe ikisiinu aitenga, la ua. 14 Ane mitongonu Pita xolinu, la ane mi'osa misevile la ikisiinu aitenga la ua, miiave milivu sou mi'ava kakaa mulai noxi'a ta menexie lexe, “Pita anu a ututulu no ale no aitenga 'o.” 15 Xe ta menexie miavuti la mivikalane aloxo 'o, “Nini nexovulaulau ne.” La ane pekia'e sou mivikala pekia'u lexe, “Manina, anu a ututulu no aitenga 'o,” La sou ane'i mi'oxe, “Male nini nemaisou angelo
12:15Loopala noxi'a ta Iutaia lexe ta mitema vilevilesi ne uleene'i a uxolu la sou uxali noxi'a no mine imauli. Imauli uasi isoli ne la ilavusi'asi lexe angelo noxi'a ane.
noxou ane.”

16 No mine ane'i ixixilie'i ngato'o loxo ne, la Pita anu a upolopolo no aitengasi 'o. La sou ane'i mimaisou la mine'e mikisi aitenga, la sou mimaisou lexe anu Pita maninasou, la ane'i mikuluke manina. 17 Xe anu muavuti, la muavimaxuxune'i no avolu sou lexe ivikala mamu. Io anu mua'aloi'a no anu mii ma'ia ane Tila mu'oxonu noxou sou mulaanixu no anu tani sou navunavu, sou muatu no ale. La sou anu muvikalane'i lexe, “Nga'aloi'a Iakovo ilo'a ta vivinge no anu mii 'o.” Io anu mulutu sou mulai no tuala vile va'axu.

18  c Ia no kakau manina 'o, la ta mitema sou 'oto'oto ne mixovulaulau manina, la sou ane'i miavuti sou mitalitali'isi'a ngato'o lexe, “Pita mulai ne'ei?” 19 Xe Elodesi mulomu aloxo ne, la mupalusi'a ta mitema sou mikamulinu Pita, xe anu uxolu uasi, la sou anu utulusi'a ta mitema sou isaxila'u aitenga no anu vaikala sou lexe ive'a isoisoli xo ane'i isaxila'u Pita laixe uasi. Xe ili'i, la anu Elodesi muvula ne Iutaia sou mulai telo ne Kaisalia sou muxolu lai ne.

Elodesi Musoli

20 No mine Elodesi la'iaxui'a ta mitema si'e Taia xe Saidoni, la ane'i mipita la'oluxa'a vilesisi sou milai mimaisou. Tei la Valasutosi muno'u vaikala lamana noxi'a sou usu'uline'i la mutali'isou Elodesi lexe opoonu uai se'isisi noxi'asi xo ane'i milavusou lexe ane'i ino'u la'ilali no anu tuala tila ane anu musaxila'u nesi. 21 Ioxe, no voxo ane ne, la Elodesi mutokolomoxu tokolomo sou mutuxu tuala noxou mo muxolu no anu puloulou noxou anu mutuxu tuala ne. La musosovosou voxo vile sou lexe uvivikala noxi'a no anu. La sou anu mupitane'i sou muvikalane'i. 22 No mine anu muvivikala noxi'a, la ta mitema mi'ava'ava lexe, “Lataua vile a uvivikala o, itema uasi.” 23  d Xe alaxu vilesisi 'o la angelo noxou Tila muvau avile a alalainesi xo anu mu'iti ualasou io Lataua uasi. La sou ta polikoka mingangasou la musoli avile. 24  e Aloxo ne la sou vaikala noxou Lataua muxali pekia'u mo muleme mulai no tuatuala mukalusi. 25  f La sou Valunavasi ilou Saulo mikalusou xaixai ne Ielusalemu mukalu la sou mukasi noxou Ioanesi e ualasou lexe Maluko sou ilo'a me'a ne Ielusalemu sou milai ne Antioki.

Copyright information for `ATA