a15:1Xal 5:2
b15:2Xal 2:1
c15:4Apo 14:27
d15:7Apo 10:1-43
e15:8Apo 10:44, 11:15
f15:10Mat 11:30; Xal 3:10
g15:11Xal 2:16; Ep 2:5-8
h15:13Xal 2:9
i15:16-18Amo 9:11-12
j15:20Mul 34:15-17; Liv 17:10-16
k15:28Mat 23:4
m15:37Apo 12:12, 25
n15:38Apo 13:13; Kol 4:10

Acts 15

Mipita sou Vaivaikala ne Ielusalemu

a Ioxe ta mitema mose'i me'a ne Iutaia milu'e ne Antioki, la milosiexa'a ta mitema ane'i ane mimuxaxu tane'i noxou Iesu no anu lavulavu aloxo 'o, “Lexe xooxoo ungasinge umulinu 'ilixo ane Mosesi mulosixe lavulavu sou uasi, la umomomo sou ngingi ngamauli uasi.” b Mii ane ne muavutinoxu Paulo ilou Valunavasi opone'i, la ilo'a mi'otosou anaxa'a sou. La sou ane'i misosovosi'a Paulo ilou Valunavasi ilo'a mose'i la ane mimuxaxu tane'i noxou Iesu sou lexe ilai telo ne Ielusalemu sou imaisi'a ta mitema sou xaixai ilo'a ta tatila noxi'a ta mitema noxou Lataua mo imomosou vaikala ane ne. La sou ta mitema ilotu noxou Iesu mipalusi'a sou milai. Xe ane'i mimuamua'i mipolo ne Ponisia xe ne Samalia, la mia'aloxa'a ta mitema ane'i ane ta Iutaia uasi ne mixiu milai noxou Lataua. A'alo ane ne muxalixu 'osa'ila tatila noxi'a ta mitema mukalusi ane'i ane mimuxaxu tane'i noxou Iesu. c No mine mixali ne Ielusalemu, la ta mitema e ilotu noxou Iesu ilo'a ta aposeli mo ta tatila noxi'a ta mitema noxou Lataua misexelaxa'a, xe ane'i mia'aloxu mimii mukalusi e Lataua mulosi'a xavi sou mi'oxonu. Ia ta Palisaio mose'i ane mimuxaxu tane'i noxou Iesu miavuti la mivikala lexe, “Ta mitema ane'i ane ta Iutaia uasi ne anu laixe lexe xooxoo ungasi'asi mo ane'i imulinu lapuloto noxou Mosesisi.

Ioxe, ta aposeli ilo'a ta tatila noxi'a ta mitema ilotu noxou Iesu mipita sou mimaisou mii ane ne. d No mine vaikala ta piena muxali no anu, la Pita muavuti sou muvikala mulai noxi'a aloxo 'o, “Ta vivilo, ngingi ngelavusou lexe tatei, la Lataua musosovosilo no taingengi sou lexe a'aloxu a'alo laixe sou Iesu Kalisito noxi'a ta mitema ane'i ane ta Iutaia uasi mo sou ane'i ilomusou la imuxaxu tane'i. e Lataua e mulavusou ta mitema mukalusi opone'i ne musosovosi'a ta mitema ane'i ane ta Iutaia uasi la sou mulosi'a Uleenu Tavuna aloxo mulosinge ne si. Anu mu'oxonu 'ilixo iouvilemo noxinge ta Iutaia xe iouvilemo noxi'a ane'i ta Iutaia uasi. Ane'i mimuxaxu tane'i noxou Tila, la sou opone'i muxali malemalenga no iou Lataua. 10  f La sou loxovaa ane ngingi nga'oxe ngatovonu Lataua vaimomo 'o? Tava'u loxovaa la sou ngamuxaxu mii ane tu'umaxu no laxasi'a ta molomolo noxou Iesu sou imulinu lapuloto noxou Mosesi e umomomo sou ta xaixaisinge mo nenge kalumo tamomomo sou tatavulenu uasi 'o? 11  g Aloxo ne uasi, nenge temuxaxu tanenge, la nenge temauli xo Tila Iesu mulosinge alauna noxou aloxo ane'i nesi.”

12 Pita muvikala aloxo ne, la ta mitema mukalusi e ane'i mipita ne mixolu tani mukii. Sou milomu mulai noxi'a Valunavasi ilou Paulo mia'aloi'a sou sosovo iouiou xe mii ane talavusou uasi e Lataua mulosi'a xavi sou mu'oxonu no taine'i ta mitema ane'i ane ta Iutaia uasi. 13  h No mine ane'i mia'alo mukalu, la Iakovo muavuti mutulu la muvikalane'i aloxo 'o, “Ta vivilo, ngalomu noxilo. 14 Saimoni mua'alomengi lamana no anu soko mii ne Lataua mumaxa'u masaxa noxou sou muno'a ta mitema ane'i ane ta Iutaia uasi mo mu'oxone'i mixali ta mitema noxousi. 15 Mo vaivaikala noxi'a ta mitema sou palomatana ne muisalili ilou ane nenge tea'aloxu aloxo ane'i mikaukavunu nesi,

16  i  ‘Ili'i, la eni alivu ane'e xo tani alelaxu noxou Deviti ne mulapau mo mumamulo,
ia Eni atulusou la mo apaipounu.
17 Mo sou ta mitema pausi'a umomomo sou ikamuli Tila,
mo ta mitema ane'i ukalusi ane ta Iutaia uasi ne Eni a'avali'a
mo ixali ta mitema noxilo.
Tila e u'oxonu mimii ukalusi ne muvikala aloxo 'o.
18 Anu mupala'anixu tatei mo.’
19 Eni xavutalaxeni aloxo ne, ta mitema ane'i ane ta Iutaia uasi ia ixiu ine'e noxou ne talosi'a tu'umaxu sou itavule mamu. 20  j Ia laixe lexe nenge takaukavu ulai noxi'a sou tavikalane'i lexe, mamu sou ngingi nga'ou la'ilali ane nuni'u xo ane'i miiamanu noxi'a ta lataua kalakalavoi, mo ngapolopepeenu 'ilixo sou vote'i loxo i'oxo susu noxi'a ta sema, mo nga'ou mii sou poosi ane miaili'osou mo musoli ne mamu, mo sialuxu a uxolu no anusi 'o. 21 Xo tatei mo ne ta mitema mia'aloxu lapuloto noxou Mosesi no anu tuatuala tatatila mukalusi, mo no voxo Tavuna utotomu ne, la miitisou no nano no tani sou lalotu noxi'a ta Iutaia.”

Uoli Voloxu Ulai Noxi'a ta Mitema Ane'i Ane ta Iutaia Uasi Ia Mimuxaxu Tane'i Noxou Iesu

22 Ioxe, ta aposeli ilo'a ta mitema noxou Lataua ilo'a ta tatilasi'a mukalusi misakii xavutala la misosovosi'a ta mitema se'i noxi'a ne, ka mipalusi'a ilo'a Paulo ilou Valunavasi milai ne Antioki. Ane'i misosovosi'a Iudasi e milemo lexe Valusavasi xe Sailasi.Ane'i ilou e miuli noxi'a ta mitema ane'i ane mimuxaxu tane'i noxou Iesu ne. 23 Uoli voloxu ane ane'i misovanu noxi'a ilou ne mikaukavunu aloxo 'o, “Nexi ta vivinge ta mitema sou xaixai ilo'a ta tatilasi'a ta mitema ane Iesu mupalusi'a tasovanu uoli voloxu ane 'o ulai noxinge ta mitema ane'i ane ta Iutaia uasi ia ane'i imuxaxu tane'i noxou Iesu ane'i ane ixolu no tuala tila ne Antioki mo no xalee lia tila ne Silia xe ne Kilikia mukalusi. Sexela ilou 'osa'osa ulai noxinge. 24 Nexi telomu lexe ta mitema mose'i me'a noxixe 'o milai noxinge mo ane'i a mi'oxo vulaulaunu xavutalamengi no anu vaivaikala noxi'a. Ia nexi tapalusi'a uasi. 25 La sou nexi mukalusi tesakiinu xavutala mo tasosovosi'a ta mitema mose'i sou tepalusi'a ilo'a ta menexinge manina e Valunavasi ilou Paulo ilai noxinge. 26 Ta mitema ane ne ane'i mi'italonu maulixa'a sou ualasou Tila noxinge Iesu Kalisito. 27 Aloxo ne, la sou nexi tepalusi'a Iudasi ilou Sailasi. Sou ivikala imulinu vaikala e tekaukavunu ne no 'a anaxa'a la. 28  k Xo anu laixe noxou Uleenu Tavuna xe noxinge kalumo lexe sou nexi tamuxaxu tu'umaxu ta piena noxinge mamu. Ia ngingi ngamulinu 'ili'ilixo aloxo 'o si. 29 Mamu sou ngingi nga'ou la'ilali ane ane'i miiamanu mulai noxi'a ta lataua kalakalavoi, mo nga'ou mii ane sialuxu uasi, mo mii sou poosi ane miaili'osou mo musoli ne xiasinu mamu, xe ngapolopepeenu 'ilixo sou vote'i loxo i'oxo susu noxi'a ta sema. Laixe sou lexe ngingi ngapolopepeenu mimii ane ne la laixe noxinge. Vaikala noxixe anu anesi.”

30 La sou, ane'i mipalusi'a ta mitema milutu milu'e ne Antioki, la mipitane'i ta mitema noxou Lataua sou milosi'a uoli voloxu ane ne. 31 Xe ta mitema miitisou la mi'osasou vaivaikala sou peletoto ane muxolu no nano no anu ne. 32 Iudasi ilou Sailasi ne ane'i ta mitema sou palomatana kalumo, la sou ane'i ilou mivikala piena sou mipeletotosi'a mo mi'oxo pekia'a ane'i ane imuxaxu tane'i noxou Iesu. 33 Ane'i ilou mixolu lai ne Antioki ne maxuveeni sevile, ka sou ane'i imuxaxu tane'i noxou Iesu ne mialusi'a no anu opo se'isisi, io mipalusi'a milivu milai noxi'a ane'i ane mipalusi'a ne. 34 
15:34Ia Sailasi muxavutala lexe uxolu lai ne.
35 Ia Paulo ilou Valunavasi mixolu lai ne Antioki, la ane'i ilo'a ta mitema ta piena mose'i mixaxai sou milosi'a ta mitema lavulavu mo mia'aloxu vaikala noxou Tila.

Paulo Ilou Valunavasi Opone'i Vilesisi Uasi

36 Mo voxo se'i ili'i, la Paulo muvikala noxou Valunavasi lexe, “Nenge talivu talai mo tamaisi'a ta vivinge no anu tuala ta tatila ukalusi ane nenge tea'aloxu vaikala noxou Tila noxi'a, mo tamaisi'a lexe xoluxoluxa'a a loxovaa.” 37  m La Valunavasi mumasaxa lexe uno'u Ioanesi e ualasou vile lexe Maluko sou ilo'a ilou ilai. 38  n Ia Paulo umasaxa aloxo ne uasi, xo tava'u lexe anu mu'umesi'a ne Pamfulia, mole ilo'a isolonu xaixai ilai ua.

Paulo Mumuamua'i sou Xaixai Tameisou

39 La sou, ane'i ilou mi'otosou anaxa'a ta piena sou mii ane ne. Mole ane'i ilou mikalipala, la Valunavasi muno'u Maluko la ilou mitelo no lasipi sou milai ne Kipulosi. 40 Ia Paulo musosovosou Sailasi, xe ilou milutu la ane'i ane ta mitema noxou Iesu mi'italone'i milai no anu alauna noxou Tila sou ilou milai. 41 Ane'i ilou milai la mimuamua'i mipolo no anu xalee lia tila ne Silia xe ne Kilikia sou mi'oxo pekia'a ta mitema noxou Lataua.

Copyright information for `ATA