a16:1Apo 14:6; 2Ti 1:5
b16:2Pil 2:19-22
c16:4Apo 15:23-29
d16:6Apo 18:23
e16:17Mak 1:24
f16:20Mak 13:9
g16:222Ko 11:25; 1Te 2:2
h16:27Apo 12:18-19
i16:30Apo 2:37

Acts 16

Timoti Mumuline'i Paulo Ilou Sailasi

a Paulo mulai muxali ne Delube, ka mulai ne Lisita. La itema vile noxou Iesu ualasou lexe Timoti anu muxolu no tuala tila ane ne. Nenu ne ane sema Iutaia vile mo mimuxaxu tane noxou Iesu. Io momu ne anu itema sie Xiliki. b Ta mitema ane'i ane mimuxaxu tane'i noxou Iesu ne Lisita mo ne Ikonia mivikalasou lexe anu itema laixe. Mo Paulo mumasaxa sou uno'u ilou ilai. La sou Paulo muvikalasou xooxoo mungasou xo tava'u lexe ta Iutaia ane'i ane mixolu lai ne ane'i mukalusi milavusou lexe Timoti momu ne anu itema sie Xiliki. c No mine ane'i mimuamua'i milai no tuatuala ta tatila la mia'aloxu vaivaikala ane ane'i ta aposeli ilo'a ta tatila noxi'a ta mitema noxou Lataua misakii xavutalasou lai ne Ielusalemu sou lexe ta mitema imulinu. La sou ta mitema sou lalotu mixali pekia'a no anu 'ilixo sou imuxaxu tane'i, la sou sosovosi'a muleleme mutelai tatila no voxovoxo.

Paulo Mumaisou Itema Vile ne Makedonia no Anu Mii Loxo Aipiepiena

d Paulo ilo'a Sailasi ilou Timoti mimuamua'i mipolo no xalee lia tila ne Pilixia mo Xalatia, xo Uleenu Tavuna mutaluxa'a sou mia'alo no 'a vaikala no nixi no xalee lia tila ne Asia Xe no mine ane'i mixali ne Pilixa ne Misia, la mitovo sou lexe i'unalai no xalee lia tila ne Vetinia, ia Uleenu noxou Iesu muvikalane'i lexe ilou ilai mamu. La sou ane'i mipolo mivaxa ne Misia, la milu'e mixali ne Toloasi. No 'olovoxo, la Paulo mumaisou mii loxo aipiepiena ne, sou itema vile ne Makedonia mututulu la muvikalanu Paulo sou mulingau lexe. “Napolo nane'e lai ne Makedonia mo nasu'ulinexi.” 10 Paulo mumaisou mii e loxo aipiepiena mukalu xe ili'i, la nexi tepalea telalaxi sou telutu telai ne Makedonia. Xo nexi telavu manina lexe Lataua mu'avalixe sou talai taa'aloxu a'alo laixe sou Iesu Kalisito ulai noxi'a ta mitema no xalee ane ne.

Litia Mixiu Mine'e Noxou Iesu

11 La sou nexi tetelo no lasipi ne Toloasi, la teiave telapu mulai sou telai ne Samatoreki, xe no anu voxo vile la tesuku telai ne Neapolisi. 12 Xe telutu lai ne, la temuamua'i telai ne Pilipai. Tuala ane ne ta Romu mixolu no anu, mo anu tuala tila vile muuli no xalee lia tila ne Makedonia. La nexi texolu lai ne voxo mose'i. 13 No anu Voxo Tavuna, la nexi telaa no aitengaxu tuala tila sou telai no ale no lexa vile pa'umolu. Nexi telai ne xo texavutala lexe taxalisou tanixa'a ta mitema sou ikilaka no anu vile sou takilaka no anu, la nexi texalisi'a ta sema e mipita mixoxolu ne la sou tetalupexa telu'e no paume'a la tesoko sou tea'alo mulai noxi'a. 14 Vile noxi'a ta sema e mixolu ne ualasie lexe Litia ane sema sie tuala tila ne Taiatila ane milavusou misovanu tokolomo kakato. Mo ane milavusou milotu noxou Lataua. Mo Tila mukisiinu opoone sou ilomu laixe no anu a'alo ane Paulo mua'aloxu. 15 No mine ane ilo'a ane'i mukalusi e mixolu no tani noxie ne mi'ulo mukalu, la ane milingaixe, la mivikala aloxo 'o, “Lexe ngingi ngexavutala lexe eni emuxaxu taleli manina noxou Tila, la ngane'e mo ngaxolu no tani noxilo.” La sou ane milingaixe pekia'u mole nexi temulinu linga noxie ne.

Mitatuxa'a Paulo Ilou Sailasi no 'a Taasou Navunavu

16 Xe voxo vile, la nexi telai no anu tanixa'a ta mitema sou ikilaka no anu. La texalisie sema sou ipalupalusie vile vuanga ne uleenu masua muxolu noxie, la ulosie lavulavu sou ilavusou mii e uxali uao la ane ia'aloxu tei. Ane mi'oxo aloxo ne, la ta tatilasie xaixaie ne, ane'i mino'u lamoli tatila no anu. 17  e Ia no voxo ane ne, la ane mimulinexi noxi'a Paulo, la i'ava'ava aloxo 'o, “Ta mitema ane ne ane'i ta mitema noxou Lataua e muxolu teitexi manina ta mitema sou xaixai sou ia'alomengi no anu vote'i sou tano'u mauli.” 18 Ane mivivikala aloxo ne voxovoxo utotomu, xo mole Paulo ne mutotosa, la sou muxiu sou muvikalanu uleenu masua ne aloxo 'o, “No anu Ualasou Iesu Kalisito, la eni avikalaneni lexe, nalaa mo naxexesie sema vuanga ne.” Alaxu vilesisi la uleenu masua ne muxexesie sema vuanga ne.

19 Ioxe ta tatilasie sema vuanga ne mimaisou aloxo ne, la laiaxa'a xo vote'i sou lamoli'a e inono'u ane tasiauxu ne. La sou ane'i milasilasine'i Paulo ilou Sailasi sou mino'a ilou mine'ene'i no ie'i ta tatila no tanixu pitapita. 20  f Ane'i mino'a ilou milaixi'a noxi'a ta kisikisi'a sou ilomusou vaivaikala ne Romu, la mivikalane'i aloxo 'o, “Ta mitema ane 'o, ane'i ta mitema sie Iutaia. Ia ane'i mine'e 'o la, mi'oxo 'ilixo masumasua no nano no anu tuala tila noxinge. 21 Ane'i ilosie'i ta mitema sou tuala tila noxinge 'ili'ilixo noxi'a e nenge ta Romu umomomo sou ta'oxonu uasi xo anu umulinu lapuloto noxinge uasi.” 22  g Xe ta mitema mukalusi miavuti, la mipitaxa'a ilou sou mipuapuasi'a ilou. Xe ta kisikisi'a sou xalee tuala tila ne mivikala pekia'u ulai noxi'a ta mitema sou 'oto'oto, la mikakaa tokolomo ia ilou xe mipuapuasi'a ilou no anu puate. 23 Mive'a ilou alaxu ta piena aloxo ne mukalu, la sou mitatuxa'a ilou no nano no taasou navunavu. Io mivikalanu itema sou usaxila'u aitenga sou lexe utatuxa'a ilou pekia'u mo usaxila'u aitenga laixe. 24 Itema sou usaxila'u aitenga mulomusou vaikala pekia'u ane ne, la muitalone'i ilou milai no nano no anu kaveutu vile kitu'a no nano no anu taasou navunavu ne, io sou musakiinu tava'a ilou no anu ovu alelaxu.

25 Ia no 'a 'olovoxo ane ne, la Paulo ilou Sailasi mixolu sou ilingalinga xe ilelexesi sou iitinu Lataua Ualasou. La ta menexi'a e ilo'a mixolu no nano no anu taasou navunavu ne ixolu sou ilolomusi'a ilou. 26 Milomusi'a ilou aloxo ne, xe mikuluke loxo 'o la 'uni'uni toxoxa'a mu'umu'umunu taasou navunavu ne, la lia mupaupau mo savana mutaotao, la sou aitenga mukisikisi, xe seni e misakine'i ta mitema mukalusi avo'a ilou tava'a no anu ne mululu kalumo. 27  h Ioxe itema sou usaxila'u aitenga mukuluke, xe mumalei loxo 'o la aitengaxu taasou navunavu mukisikisi, xe anu muavuti la muxavutala lexe ta mitema mukalusi e mixolu no nano no taasou navunavu ne ane'i a miumeume mukalu. La sou anu muavuti muno'u laviso sou lexe molu uvau sou usoli. 28 Ia Paulo mu'avakaka mulai noxou lexe, “Navila'isi ne sou navene nasoli mamu xo nexi a taxoxolu 'o.” 29 Xe anu itemasou usaxila'u aitenga ne muavuti la mu'ava lexe ino'u telu une'e, xe muno'u telu mukalu, la sou anu muiave mu'una, la mu'olo'olo mo mu'ume manina, la sou mulapau mulu'e noxi'a Paulo ilou Sailasi talaxa'a. 30  i La sou anu muno'a ilou milaa mukalu, la mutalisi'a ilou lexe, “Ngingi ta tatila tamei 'o, eni a'oxonu ma'ia la sou ano'u mauli ane laixe?”

31 La sou ane'i ilou mukolinu aloxo 'o, “Nini namuxaxu taneni noxou Tila Iesu. La sou ngingi nongi'a ta tema taasine ngano'u mauli ane lailaixe ne.” 32 Xe ane'i ilou miavuti, la mia'aloi'a ilo'a ta tema taasou no anu vaikala noxou Tila. 33 No 'olovoxo ane ne si, la itema sou usaxila'u aitenga ne muno'a ilou sou mulai mu'uinu xalexalevine'i ilou no anu lamalasile. Xe mukalu, la Paulo ilou Sailasi mi'ulosi'a ilo'a ta tema taasou ne a no 'olovoxo nesi. 34 Mukalu, la anu mukasi noxi'a Paulo ilou Sailasi sou ilo'a milai no taasou sou mulosi'a 'ani mose'i sou mio'u. Mo ane'i ilo'a ta tema taasou mi'ana'ana no 'a 'osa'osa manina xo ane'i mukalusi mimuxamuxaxu tane'i noxou Lataua.

35 Xe no 'a kakau ane ne, la ta kisikisi'a sou ilomusou vaivaikala mipalusi'a ta mitema sou ino'a ta mitema ilaixa'a no taasou navunavu sou lexe ilai ivikalanu itema ane usaxila'u aitengsou lexe, “Napalusi'a ta mitema tamei ne ilai.” 36 La sou itema sou usaxila'u aitenga ne muvikalanu Paulo no anu vaivaikala aloxo 'o, “Ta kisikisi'a sou ilomusou vaivaikala mipalusi'a ta mitema sou ino'a ta mitema ilaixa'a no taasou navunavu mine'e mivikalaleli lexe eni alulusinge ngongou Sailasi mo ngalai, la sou ngongou ngalai ia opo se'isisi uxolu noxinge ngongou.” 37 Ia Paulo muavuti, la muvikalane'i ta mitema sou ino'a ta mitema ilaixa'a no taasou navunavu aloxo 'o, “Nexi noxou texamulinu navunavu sou mivexe noxou no ie'i ta mitema tavu'alo mo mitatunexe noxou no nano no taasou navunavu. Ia nexi noxou ne nexi ta mitema sie Romu. Ia ane'i italisixe noxou mo ilavusixe lexe nexi tesusu manina 'o uasi. La sou loxovaa la ane'i i'oxe ngingi ngane'e ngavikalanexi noxou sou talai vitanisi 'o. Uasisi manina. Ane'i me'a ine'e ipalusixe noxou talaa.”

38 Ioxe ta mitema sou ino'a ta mitema ilaixa'a no taasou navunavu ne mia'aloi'a ta kisikisi'a sou ilomusou vaivaikala lexe Paulo ilou Sailasi ne ane'i ta mitema sie Romu. Xe ane'i milomu aloxo ne, la ane'i mimama'u manina. 39 La sou ane'i mine'e noxi'a ilou sou mivikalane'i ilou aloxo 'o, “Ta vivixe nexi tatali'isinge ngongou sou ngalulusou susu noxixe. Xo nexi talavusinge ngongou lexe ngingi nenge nenge'a sie Romu uasi. La sou nexi te'oxongengi masua loxo 'o.” La ane'i milaalixa'a miuatula'i no taasou navunavu. Mo mivikalane'i lexe, “Ngaxexee no tuala tila 'o.” 40 La sou ane'i ilou milaa no taasou navunavu sou milai no tani noxie Litia. Noxie Litia no tani ne, la ane'i ilou mixalisi'a ta mitema ane'i ane mimuxaxu tane'i noxou Iesu ane'i a mixoxolu lai ne sou ane'i ilou mipeletotosi'a, mukalu la sou ane'i ilou milai.

Copyright information for `ATA