a17:7Luk 23:2; Ioa 19:12
c17:17Apo 18:19
f17:24-251Ta 8:27; Apo 7:48
g17:25Lex 50:12
h17:27Lex 145:18; Iel 23:23
i17:29Ais 40:18‑20, 44:10-17; Apo 19:26
j17:31Lex 96:13

Acts 17

Paulo Ilou Sailasi Mixolu ne Tesalonika

Ioxe, Paulo ilo'a ta menexu milutu ne Pilipai, la sou milai mixali ne Ampipolisi xe Apolonia, la sou mixali ne Tesalonika. La taasou lalotu noxi'a ta Iutaia vile a muxolu no tuala tila ane ne. Xe Paulo muavuti la mu'oxo 'ilixo loxo anu u'oxo'oxonu sou mulai mu'una no nano no taasou lalotu noxi'a ta Iutaia mo no anu Voxo Tavuna tatalu lololi ne anu mu'oxo ane sou ilo'a mivavei no anu vaikala e muxolu no nano no anu Lavuku Tavuna noxou Lataua. Sou mulamananixa'a sou lexe ilamana lexe Kalisito ne une'e sou utavule tu'utu'umaxu mo usoli ka umauli la. La sou anu muvikalane'i aloxo 'o, “Iesu anu ane eni a'aloxu noxinge Anu ane Kalisito.” Aloxo ne, la sou ta mitema ta Iutaia se'i noxi'a mimuxamuxaxu tane'i ne mimuline'i Paulo ilou Sailasi. Mo ta Xiliki ta piena ane'i ane milotu noxou Lataua xe ta sema ane ualasi'a tatila ta piena kalumo mimuxaxu tane'i la mimuline'i ilou.

Ia ta Iutaia mimaisi'a aloxo ne, la ane'i opone'i masuai'a, la sou mi'avali'a ta mitema ta masua ane'i ane ilavusou ixixaoxao vitanisi, sou mipita la miavutinoxu xavutalai'a ta mitema mukalusi no nano no tuala tila sou mi'ava'ava mole laixa'a, la sou milai mimamulonu tani noxou Iasoni sou lexe ikamuline'i Paulo ilou Sailasi la ilaixa'a sou itulusi'a no ie'i ta mitema. Ia no mine ane'i mikakamuline'i xe ixalisi'a uasi, la ane'i mino'a Iasoni ilo'a ane'i ane mimuxaxu tane'i noxou Iesu se'i sou milasilasine'i milailixa'a noxi'a ta tatila sou tuala tila ane ne. Io ane'i miungaunga mulai noxi'a aloxo 'o, “Ta mitema ane'i ane ilavusou i'oxo 'ilixo masumasua no tuatuala mukalusi ane'i a mixali noxinge 'o sou i'oxo masuanu tuala tila na'a nenge. a Ane'i mine'e la Iasoni mumulaxa'a no tani noxou. Ane'i ta mitema mukalusi ane'i ane ilavusou imulinu lapuloto noxou Kaisari
17:7Naitisou Ualauala laalaaxu.
uasi. Xo ane'i mi'oxo lexe mutuxu tuala noxi'a vile anu ualasou lexe Iesu.”
Xe ta mitema ane mine'e mipita ilo'a ta kisokisou sou tuala tila ne milomusou vaikala ane ne, la mikuluke mo mimama'u. La sou ta kisokisou sou tuala tila ne mivikalane'i Iasoni ilo'a ane ta mitema ane mimulaxu tane'i noxou Iesu se'i mino'u lamoli sou milaane'i no anu.

Paulo Ilou Sailasi Mia'aloxu A'alo Laixe ne Belea

10 Ioxe alaxu vilesisi 'o la no 'olovoxo ne, ta mitema ane'i ane mimuxaxu tane'i noxou Iesu ne mipalusi'a Paulo ilou Sailasi sou milai ne Belea. Ilou mixali ne Belea, la ilou milai mi'unalai a vile no taasou lalotu noxi'a ta Iutaia. 11 Ta Iutaia se'i ane mixolu ne Belea ne 'ilixoi'a loxo ane'i ane mixolu ne Tesalonika ne uasi. Ane'i ta mitema ta lailaixe manina. La sou no mine ane'i milomusou vaikala lailaixe noxou Paulo, la ane'i mimasaxau manina xe utotomu ne ane'i milavusou sou iitiitisou vaikala no 'a Lavuku Tavuna la sou ane'i mimasaxa lexe ilavusou vaikala e Paulo mua'alo no anu ne lexe manina. 12 La sou ta Iutaia ta piena xe ta Xiliki ta sema ane'i ane ualasi'a tatila tapiena mo ta mulu ta Xiliki tapiena ne mimuxamuxaxu tane'i. 13 Ia no mine ta Iutaia ane'i ane mixolu ne Tesalonika milomu lexe Paulo mua'aloxu vaikala noxou Lataua ne Belea la, sou ane'i milaulatala sou mine'e miavutinoxu xavutalai'a ta mitema ane'i ane ne sou opone'i masua. 14 Xe alaxu vilesisi 'o la, ta mitema ane'i ane mimuxaxu tane'i noxou Iesu ne mipalusou Paulo mupolo mulai no luaki. Ia Sailasi ilou Timoti mixolu ne Belea. 15 Io ta mitema ane'i ane misaxanu Paulo ne milai mixalixu ne Atenasi, xe sou lexe ilivu, la Paulo muvikala pekia'u noxi'a lexe ilivu la ivikalane'i Sailasi ilou Timoti lexe ilou ipalea ine'e noxou.

Paulo Mua'aloxu A'alo Laixe ne Atenasi

16 No mine Paulo muxoxomai'a Sailasi ilou Timoti ne Atenasi, la anu mumaisou lataua kalakalavoi ta piena mu'ana'ana no nano no tuala tila ane ne, la anu opoonu mutamasi'a ta mitema ane'i ane ne. 17  c La sou anu ilo'a ta mitema ta Iutaia xe ta mitema ane'i ane ta Iutaia uasisi io milotu noxou Lataua ne mipita mivivikala no nano no taasou lalotu noxi'a ta Iutaia. Mo anu no anu tanixu pitapita no voxovoxo sou ilo'a mivivikalane'i ta mitema ane'i ane mixixaoxao vitanisi. 18 Xe ta mitema sou lavulavu se'i no 'a la'oluxa'a ane'i ileme'a lexe ta Epikulosi
17:18Epikulosi xe Suloiki ne laoluxa'a vile e misosovosou lavulavu iouvilemo e no nano ne Atenasi.
xe se'i no 'a la'oluxa'a ane'i ileme'a lexe ta Suloiki, ilo'a Paulo anaxa'a muteloi'a ngato'o, la sou se'i mivikala aloxo 'o, “Itema ane muvikala xovulaulau ne umasaxa lexe uvikala a loxovaa ne?” Xe se'i mi'oxo lexe, “Male itema ne u'oxe ua'alomenge sou latauai'a tuala vile va'axu.” Ane'i mivikala iouiou noxou Paulo aloxo ne xo anu mua'aloi'a noxou Iesu xe soli mo tulu noxi'a ta mitema.
19 La sou ane'i mikasi noxou Paulo sou milaixu noxi'a ta mitema sou isaxila'u lapuloto ilemolu lexe Aleopaxosu.
17:19Aleopaxosu ne anu lele'e vile ne uxoxolu teitexi no laxa'ilu ualasou lexe Alesi ne lataua sou 'oto'oto noxi'a ta Xiliki.
Sou mivikalanu lexe, “Nexi temasaxa lexe talavusou lavulavu alavua ane nini nalolosi'a ta mitema 'o.
20 Xo nexi telomusou mimii ane nini nea'aloxu ne, la mutama iou vilemo no 'a sangalixe. La sou nexi temasaxa lexe talavusou kalumo.” 21 Xe ta Atenai ilo'a ta mitema sou tuala va'ava'axu e mipita ne Atenai ne milolomusou voxovoxo la ane'i mukalusi ne mimasaxa lexe ilai va'ava'axu uasi mixolu anesi sou milolomusou vaikala sou alauna la ane'i kalumo mivivikalane'i ngatongato'o no anu.

22 Ioxe Paulo muavuti mutulu no ie'i ta mitema mipita noxi'a e ilemolu lexe Aleopaxosu, ne la muvikala aloxo 'o, “Ngingi ta mitema sie Atenasi 'o ne, eni emaisinge ngingi ngalotu no anu lataua ta piena manina. 23 Xo no mine eni exolu 'o, la eni emuamua'i no nano no tuala 'o, mo emaisou mimii mukalusi ane ngingi ngalotu no anu. La eni exalisou valovalo vile mikaukavu no anu lexe, ‘Lataua ane 'o ne talavusou uasi.’ La sou Lataua ane nesi ane eni a'alomengi no Anu xo ngingi ngelotu noxousi ia ngalavusou uasi. 24  f Lataua ane ne Anu Tila sou opo loxotolo mo lialia kalumo, mo Anu mukoinu xalexalee tuatuala mo mimii mukalusi. Mo itema vile utulusou taasou lalotu sou Lataua uxoxolu no nano no anu uasi. 25  g La sou itema vile umomomo sou u'oxo mii vile no avolu, ka itema vile ulosou uasi xo Anu umomomo sou ulingau mivile noxou evile uasi. Anu molusi ane mulosinge ta mitema mukalusi mauli no anu tauuxu mo mimii mukalusi. 26 Itema vilesisi Lataua mukoinu nesi anu muxalixa'a ta mitema mukalusi no xalexalee tuatuala. Sou musosovosi'a mixolu no xalexalee lialia mukalusi. Anu molu musosovosou voxo ane ane'i ixolu sou imauli no anu mo mulosieixu pilipilixa sou lialiaxa'a. 27  h Lataua mu'oxo aloxo ne sou lexe ane'i ikamulinu la ixalisou male, ia Anu uxolu va'axu noxinge vilevilesi uasi. 28 Xo Anu Latauasi, la sou mulosinge mauli ilou xavi sou texoxolu mo temuamua'i. Aloxo ne la sou ta mitema se'i noxinge ne milavusou la sou mivikala lexe, ‘Nenge ne Lataua ta 'olu kalumo.’ 29  i Ioxe nenge ne nenge Lataua ta 'olu, la sou mamu sou nenge taxavutala lexe Lataua ne Anu loxo mii ane ta mitema i'oxonu no anu xoulu ilou siliva mo lavo'o uasi. Xo Lataua ne itema vile upuinu no avolu sou ulotu noxou uasi. 30 La sou Lataua ne mulavusi'a ta mitema ane ilavusou uasi tei ne, la anu umomomo sou uvikala ta piena noxi'a uasi. Ia vaimomo 'o ne ta mitema mukalusi no xalexalee tuatuala la Anu muvikalane'i pekia'u lexe ixiu opone'i. 31  j Xo Anu musosovosou voxo vile mukalu sou utulusi'a ta mitema ukalusi no xalexalee lialia no anu vaikala. Xo tava'u lexe Anu mu'oxo 'ilixo lailaixe sou mupalusou Itema vile e Anu musosovosou lexe ulu'e sou usolisinge no lia 'o mo Anu molu mutulu sou no anu lulu sou soli. Aloxo ne, la sou ta mitema ukalusi imuxaxu tane'i noxou no anu xaixai ane Anu mu'oxonu.”

32 Ioxe no mine ane'i milomusou Paulo mua'aloxu soli ilou tulu xe, la se'i noxi'a ne miavuti sou mimolovila'i noxou xe se'i mivikalanu lexe, “Nexi temasaxa lexe talomusou mii e nini nelemolu ne la.” 33 Aloxo ne, la sou anu Paulo muavuti mulutu sou mu'ume mulai, la ane'i mixoxolu ne. 34 Ia se'i noxi'a ne mimuxamuxaxu tane'i mo mimulinu. Vile noxi'a ne Dionisiusi ne anu vile noxi'a Aleopaxosu, xe sema vile ualasie lexe Damalisi, mo ta mitema se'i la.

Copyright information for `ATA