b20:17Apo 18:21
c20:18Apo 18:19–19:10
d20:23Apo 9:16, 21:11
e20:24Apo 21:13; 2Ti 4:7
f20:281Ti 4:16; 1Pi 5:2-4
g20:29Mat 7:15; Ioa 10:12
h20:311Te 2:11
i20:33-341Ko 9:11-12
j20:34Apo 18:3; 1Te 2:9

Acts 20

Paulo Mumuamua'i ne Makedonia Xe ne Xiliki

Ioxe no mine anaxa'a piena sou 'oto'oto toxoxu ne mutalo, la Paulo mu'avali'a ta molomolo noxou Iesu mine'e, mo anu mupeletotosi'a sou mu'oxo pekia'a, mukalu la mu'italone'i sou muione'i io mulutu sou mulai no xalee lia tila ne Makedonia. Anu mulalai no xalee lia ane ne, la muvikala no anu vaikala sou peletoto ta piena lai noxi'a ta mitema, xo la mulai muxali ne Xiliki. La anu muxolu lai ne so'io tatalu. Xo ta Iutaia misakii vaikala sou lexe ivau no mine anu 'alai sou utelo no lasipi sou ulai ne Silia. La sou anu mumuxaxu xavutala sou lexe ulivu upolo ne Makedonia. Ane'i ane tavaitamiou Paulo sou ilo'a mimuamua'i milai ane Supateli anu itema sie Belea e Pulosi 'olu, xe Alisitaluko ilou Sekundosi sie Tesalonika, xe Xaiosi sie Delube, xe Tukiko ilou Tolopimosi sie xalee lia tila ne Asia xe Timoti kalumo. Ta mitema ane ne mi'uli milai mixomaiexi ne Toloasi. Ia nexi texolu ne Pilipai mutalo no mine voxo tatila sou Ixutuxu Veletixa'a Vitanisi mukalu, la sou nexi tetelo no anu lasipi. Tetelo no lasipi sou telutu telai. Xe voxo ta'uve sou, la nexi telai texali noxi'a ane'i ane mixomaie'i ne Toloasi. La nexi texolu voxo muxatele tamei.

Paulo Mutulusou Iutikasi no Anu Soli ne Toloasi

No anu voxo muxatele vilesou
20:7Voxo muxatele vile ne anu voxo noxi'a ta Iutaia sou ise'ise'inu veleti.
no anu 'olovoxo, la nexi tene'e tepita sou tase'ise'inu veleti. Paulo mua'alo mulai noxi'a ta mitema. La anu muvikala mulalaisi 'o xo mole 'olovoxo lixilixinu xo anu ulutu no voxo ane vile.
Tani lalaxu teitexi ne nexi tepita no anu ne lalamo sou ta piena. Itema maulu vile ne muxolu no anu aitenga sou sivo ualasou lexe Iutikasi. Anu iou muvuvu manina ia Paulo muvikala mulalaisi 'o. Xe no mine anu mupasipaa ai mukalu, la anu mulapau molu no anu tani lalaxu tatalusou la mulai mutuvu no lia. Xe ane'i milu'e miitinu, la anu musoli ne. 10 Xe Paulo mulu'e la musu'anu muai vaxa teitexi noxou itema maulu ne, la musavunoxu io muvikala lexe, “Nga'ume mamu. Xo anu a umauli.” 11 La sou anu mulivu mulai teitexi la, sou muse'i veleti mo muo'u. Xe ili'i no mine Paulo muvivikala xo mole lamana, la anu mulutu sou mulaa. 12 Ia ta mitema mino'u itema maulu ne mumauli ne sou ilo'a milai no taasi'a, la tane'i laixe manina.

Paulo Muvikala Laixe sou Muione'i ta Tatila Noxi'a ta Mitema Noxou Lataua ne Epeso

13 Ioxe nexi teuli telai tetelo no lasipi, sou teiave telai texali ne Asosi. La nexi texomaiou Paulo sou utelo no anu lasipi. Anu muvikalanexi sou nexi ta'oxonu aloxo ne xo anu umuamua'i no tava'u ulai uxali lai ne. 14 No mine anu muxalisixe ne Asosi, la nexi tetelonu no anu lasipi sou noxi'a telai texali ne Miteleni. 15 La nexi telutu lai ne xe voxo ane vile, la texali 'alai ne Kiosi, xe voxo ane vile la, la tevalautu tevaxa ne Samosi, xe no anu voxo ane ili'i la texali ne Miletosi. 16 Paulo musakiinu xavutala lexe ane'i iiave ine'e la ipolopepeenu Epeso ne si, xo tava'u lexe anu mumasaxa sou upaipalunu voxo maxuveeni no xalee lia tila ne Asia mamu. Xo anu upalepalea lexe umomomo la uxali ne Ielusalemu no anu voxo sou Pentikosi.

17  b Nexi texali ne Miletosi, la Paulo mukalaanu anaxui'a ta tatila noxi'a ta mitema noxou Lataua ne Epeso sou lexe ine'e noxou. 18  c No mine ane'i mine'e mixali, la anu muvikalane'i aloxo 'o, “Ngingi ngelavu sou maulixo anu a loxovaa no voxo lololi ane eni exolu noxinge 'o musoko no anu voxo ane eni ene'e e'una no anu xalee lia tila ne Asia. 19 Ta Iutaia misakii vaikala sou mi'oxo masualeli ne anu axo tu'umaxu mo tovotovo ta piena, ia eni etaloxolixo avilesi sou e'oxonu xaixai noxou Tila ilou ieli lexaxu piena. 20 Ngingi ngelavu lexe eni evikala pekia'u la a'ume uasi sou a'aloxu mii ma'ia laixe ane sou usu'ulingengi. Ia eni elosinge lavulavu ne no ie'ngi ta mitema ta piena mo tasinge vilevilesi, 21 la eni evikala pekia'u ulai noxi'a ta Iutaia ilo'a ta Xiliki. Lexe ane'i ne ixiu mo ilai noxou Lataua, mo imuxaxu tane'i noxou Tila noxinge Iesu.

22 Mo ane 'o ne masaxa pekia'u noxou Uleenu Tavunasi la sou eni alai ne Ielusalemu, ia alavusou mii ma'ia ane uxali noxilo lai ne uasi. 23  d Eni elavusou lexe no anu tuatuala tatila ane eni alai no anu ne Uleenu Tavuna uvikalaleli lamana lexe taasou navunavu mo tu'utu'umaxu ta piena anu a ulooxo. 24  e Ia eni amaisou mauli noxilo ne anu loxo mii vitanisi noxilo. Eni amasaxa akalusou iaveiave saisale mo amomomo sou xaixai ane Tila Iesu mulosilo ne ukalu manina. Xaixai ane ne sou a'aloxu lamana a'alo laixe sou alauna noxou Lataua. 25 Ia vaimomo 'o eni elavu lexe umomomo sou vile noxinge ngingi ane eni elai ea'aloxu saxisaxila'u noxou Lataua noxinge ne umaisilo la uasi. 26 Aloxo ne, la sou eni avikala lamana ulai noxinge, vaimomo 'o aloxo 'o. Lexe vile noxinge usoli la eni susu noxilo uasi. 27 Xo eni evikala pekia'u mo a'ume uasi sou a'aloxu masaxa lololinu noxou Lataua mulai noxinge ne. 28  f La sou ngingi menge ngasaxilainge nongi'a ta mitema noxou Lataua mukalusi loxo ta sipsip la'olu'oluxa'a ne ane Uleenu Tavuna musosovosinge sou ngasaxila'a. Ngaxali loxo ngingi ta mitema sou saxila'u noxi'a ta mitema la'oluxa'a noxou Lataua ane Anu muno'u uulusi'a no anu sialuxu. 29  g Eni elavu lexe alutu alai io ili'i, la ta a'aa ta vova ta la'ia i'una noxinge, la umomomo sou imalanixi'a ta sipsip la'oluxa'a ne uasi. 30 Mo loxo no nano nonixi noxinge ne la, ne ta mitema mose'i iavuti la a'alo kalakalavoi sou ilapune'i ta mitema ane'i ane mimuxaxu tane'i noxou Iesu sou imuline'i. 31  h La sou ngaxolu la ngasaxilainge laixe. Ngaxavutala lexe no anu tauu ie tatalu la no 'olovoxo mo no aso ne eni epela'inge utotomu mo ieli lexaxu unixisinge.

32 Mo vaimomo 'o, eni a'italongengi ngalai no avolu Lataua mo ngalai no anu vaikala sou alauna noxou ane. Vaikala anu umomomo sou utulusinge pekia'u xe ulosinge mimii laixe noxou noxi'a ane'i mukalusi ane anu ta na'u manina. 33  i Eni aisuxu itema vile silivau ilou xoulu mo tokolomou uasi. 34  j Ngingi menge ngelavusou lexe eni melo exaxai no avolo tamei 'o sou musu'ulinexi noxi'a ta menexilo. 35 No anu mimii mukalusi ane eni e'oxonu, la eni elosiengi lexe no anu xaixai pekia'u io aloxo 'o, la nenge tasu'uline'i ane'i ane mamalaxa'asi. Taxavutalanu vaivaikala noxou Tila Iesu muvikala aloxo 'o, ‘Anu laixe lexe nenge ta'osa sou taitinu mii ia ta'osa sou tano'usi uasi.’”

36 No mine anu muvikala aloxo ne mukalu, la ilo'a mukalusi mixolau tava'a mulu'e no lia sou mikilaka. 37 La ane'i mukalusi ne mitama tila noxou Paulo mo miaulaxu xe mi'osasou. 38 Mii e muxalixu tama toxoxu noxi'a ane vaikalau e mu'oxe ane'i imomomo sou imaisou iou la uasi. Mukalu la sou ane'i misaxanu mulai no 'a lasipi.

Copyright information for `ATA