a21:4Apo 20:23
b21:8Apo 6:5, 8:40
c21:10Apo 11:28
d21:11Apo 20:23, 21:33
e21:13Apo 20:24
f21:19Apo 15:12
g21:20Apo 15:1, 5
h21:23-24Iti 6:1-20; Apo 18:18
i21:25Apo 15:29
j21:261Ko 9:20
k21:29Apo 20:4
l21:36Luk 23:18
m21:38Apo 5:36-37

Acts 21

Paulo Mutelo no Lasipi sou Mulivu ne Ielusalemu

Ioxe no mine nexi telutu, la teioone'i ta tatila noxi'a ta mitema noxou Lataua, la nexi telai tetelo no lasipi. Nexi tetelo no lasipi mukalu, la teiave teisalili telai ne Kosi xe ili'i no voxo vile la, la texali ne Lodosi, xe mexe ne Lodosi ne, la texali ne Patala. La texalisou lasipi vile e lexe sou ulalai ne Ponisia. La sou nexi tetelo no anu sou telai. Telai la tepolopepee la'olu ne Kipulosi muxolu no avoxe ae, la nexi telai te'isalili sou texali no xalee lia tila ne Silia, la telai tetulu no tuala tila ne Taia. La ane'i milu'enu mimii ane muai no anu lasipi. a La nexi texalisi'a ta molomolo noxou Iesu. La nexi texolu lai ne voxo muxatele tamei. Xe Uleenu Tavuna muvikalane'i, la ane'i mivikalanu Paulo lexe ulai ne Ielusalemu mamu. Ia noxi'a texolu voxo muxatele tamei aloxo ne mukalu, la sou nexi telutusou telai. La ane'i ilo'a ta semasemai'a mo ta 'ili'ili'a mukalusi ne milutu sou misaxanexi mexe loxo no tuala tila sou telai no luaki paumolu. La sou telai texolau tavaixe mulu'e no lia sou tekilaka. Mukalu, la sou nexi noxi'a teioonexi ngatongato'o. Sou ane'i milivu no tuala xe nexi tetelo no lasipi sou telai.

Tetelo no lasipi ne Taia sou telai texali no tuala tila ne Telemisi mukalu, la sou lexe temuamua'i la texalisi'a la te'osasi'a ta mitema ane'i ane mimuxaxu tane'i noxou Iesu, la noxi'a texolu voxo vile. b Xe ili'i la nexi telutu sou texali no tuala tila ne Kaisalia. Ia te'una texolu no tani noxou Pilipi, itema sou ua'aloxu a'alo laixe. Pilipi ne anu itema vile anu vile noxi'a ane'i ta mitema muxatele tamei e ta mitema misosovosi'a ne Ielusalemu sou i'oxo xaixai sou isu'uline'i ta mitema noxou Iesu. Ta 'olu ta vuanga tami'a ne itaula'i uasi ia ane'i ipalamatanane'i ta mitema no anu vaivaikala noxou Lataua. 10  c Nexi texolu lai ne voxo ta piena, la sou itema sou palomatana vile ualasou lexe Axavosi ne molu ne Iutaia mulu'e muxali ne Kaisalia. 11  d Xe mune'e muxali noxixe mukalu, la muno'u utupokoxu Paulo, ka musakiinu avolu ilou tava'u no anu. Io muvikala aloxo 'o, “Uleenu Tavuna muvikalaleli lexe, ‘Mo sou utupoko 'o, ulai uxali ne Ielusalemu, la ta Iutaia isakiinu aloxo 'o ka i'italonu ulai noxi'a ta mitema ane'i ane ta Iutaia uasi.’”

12 Xe nexi telomusou aloxo ne, la nexi noxi'a ta mitema ane'i ane lai ne tavikala pekia'u lexe Paulo ne ulai ne Ielusalemu uasi. 13  e Ia Paulo muavuti la mukolinexi aloxo 'o, “Tava'u loxovaa la sou ngingi ngatatamasilo e nga'oxo xavutalaxeni mamalaxu 'o? Ngalomu, eni elalaxii sou alai mo isakisakileli ne Ielusalemu mo ivelo asoli kalumo no anu ualasou Tila Iesu.” 14 Nexi tetovo temulesou aloxo ne, xe anu ulomunexe uasi, la sou nexi texolu tasiausi ne ia tevikala lexe, “Mivile uasi, mii ma'ia ne Tila umasaxa lexe u'oxonu, la u'oxonusi.”

Paulo Muxali ne Ielusalemu

15 Ioxe ili'i no voxo se'i, la sou nexi telalaxinu mimemimexi sou telutu telai ne Ielusalemu. 16 No mine nexi telutu ne Kaisalia ne la ta molomolo noxou Iesu sie Kaisalia ne mimulinexi sou misaxanexi telai no tani noxou Nesoni anu itema sie Kipulosi ne anu muxali molomolo noxou Iesu tatei mo. La nexi taxolu no tani noxou ne.

17 No mine nexi texali ne Ielusalemu, la ta mitema ane'i ane mimuxaxu tane'i noxou Iesu ne mino'ixe la mi'osasixe tatila manina. 18 Ili'i no voxo vile la, la Paulo mukasi noxixe sou noxi'a telai temaisi'a Iakovo ilo'a ta tatila noxi'a ta mitema noxou Lataua no mine mine'e mipita. 19  f La Paulo mu'osasi'a no anu xaixai noxou la mua'aloi'a sou mimii e Lataua mu'oxonu muxali no tatexa noxi'a ta mitema ane'i ane ta Iutaia uasi.

20  g Xe ane'i milomu la, miiti ualasou Lataua mo mivikala Paulo lexe, “Vivixe, nini nelavu lexe ta Iutaia ta piena manina ane'i mimuxaxu tane'i noxou Iesu mo ane'i pekia'a sou imulinu lapuloto noxou Mosesi. 21 Ia ane'i milomu lexe ta Iutaia mukalusi e ixolu no nano no taine'i ta mitema ane'i ane ta Iutaia uasisi lexe nini nelosie'i lexe mamu sou imulinu lapuloto noxou Mosesi. La nini nevikalane'i lexe xooxoo ungasi'a ta 'ili'a mamu mo imulinu 'ili'ilixo ane noxi'a ta xasixasi'a ne la mamu. 22 Ia nenge ta'oxo a loxovaa? Xo ane'i ilomusine lexe nini a nexali 'o. 23  h La sou nini namulinu xavutalamexi vile e nexi tavikalaneni. Nexi noxi'a ta mitemamexi tami'a e misakiinu vaikala ulai noxou Lataua a taxolu 'o. 24 Nini nano'a ta mitema ne mo ngongi'a ngalai nga'oxonu 'ili'ilixo sou ngaxali malemalenga no iou Lataua. Mo nini nalotonu mimii mose'i sou ane'i iamanu ulai noxou Lataua. La sou isalanu kisi'a laxusou ne. Na'oxo aloxo ne mo sou ta mitema ukalusi ilavusou lexe vaikala ane mitelo noxine ne anu manina uasi. Ia ane'i ilavu lexe nini nelavusou namulinu lapuloto mulapu. 25  i Tei la nenge tekaukavunu vaikala vile aloxo 'o sou tesovanu mulai noxi'a ta mitema ane'i ane ta Iutaia uasi e mimuxaxu tane'i noxou Iesu. La sou te'una tanenge noxi'a aloxo 'o, ngingi nga'ou la'ilali ane ane'i miiamanu mulai noxi'a ta lataua kalakalavoi mamu, mo nga'ou mii ane sialuxu uasi, mo mii sou poosi ane miaili'osou mo musoli ne xiasinu mamu, mo ngapoloxalonu 'ilixo sou vote'i.”

26  j Aloxo ne la sou Paulo mukasi noxi'a ta mitema e ilo'a misakiinu vaikala mulai noxou Lataua. Xe voxo vile ili'i la ilo'a mimulinu 'ilixo sou ixali malemalenga. La anu mu'unalai no nano no anu taasou lalotu tatila noxou Lataua sou muvikalane'i ta aili'i lamana lexe voxo sou ane'i ixali malemalenga. Mo ane'i vilevilesi iama ulai noxou Lataua.

Ta Iutaia Mitetelisou Paulo no Nano no Taasou Lalotu Tatila Noxou Lataua

27 Ia no mine voxo muxatele tamei asou ukalu no mine ane'i ixali malemalenga no iou Lataua, la ta Iutaia me'a no xalee lia tila ne Asia mimaisou Paulo no mine muxolu no nano no taasou lalotu tatila noxou Lataua. La sou ane'i miavutinoxu xavutalai'a ta mitema ta piena mukalusi sou laiaxa'au Paulo la sou mitetelisou. 28 La mi'ava kaka lexe, “Ta Isilaeli, ngasu'ulinexi. Xo itema ane 'o itema sou ulosie'i ta mitema mukalusi no tuatuala sou ixililine'i noxinge ta mitema ne Isilaeli mo ixililiiou no anu lapuloto noxou Mosesi xe taasou lalotu tatila noxou Lataua menge kalumo. Mo u'oxo 'ilixo anenesi uasi. Anu muno'a ta mitema ane'i ane ta Iutaia uasi, sou mi'una mi'oxo masuanu tani tavuna noxou Lataua.” 29  k Ane'i mivikala aloxo ne, xo tei la ane'i mimaisou Tolopimosi sie Epeso ilo'a Pauloena mi'una mixolu no tuala tila ne la sou ane'i mixavutala lexe Paulo mulaixu Tolopimosi ne no nano no taasou lalotu tatila noxou Lataua.

30 Ia ane'i milomusou vaikala ane ne, la ta mitema mukalusi ne Ielusalemu ne xavutalai'a mu'oxo iouiou, la sou miiave mine'e mipita sou mitetelisou Paulo sou milapunu mulai no ale muxexee no anu taasou lalotu tatila noxou Lataua. Xe miavuti la mutatusou aiaitenga alaxu vilesisi. 31 Ioxe no mine ane'i mi'oxe ivau Paulo sou usoli aloxo ne, la sou 'ava'avaxa'a ilou a'alo mulai muxalisou kisi'a ta mitema sou 'oto'oto sie Romu. Anu mulomu lexe ta mitema mukalusi sie Ielusalemu la'iaxa'a mo ane'i miavutinoxu 'oto'oto. 32 Xe alaxu vilesisi 'o la anu mukasi noxi'a ta mitema sou 'oto'oto ilo'a ta tatila noxi'a ta mitema sou 'oto'oto, ne sou ilo'a miave milai noxi'a ta mitema e mipita sou mi'oxe ivau Paulo usoli ne. Xe ane'i mimaisou kisi'a ta mitema sou 'oto'oto ilo'a ta mitema sou 'oto'oto noxou mine'e si la ane'i ivau Paulo la ua.

33 La sou kisi'a ta mitema sou 'oto'oto ne mutetelisou Paulo ia muvikala pekia'u noxou vile noxi'a ne sou lexe usakiinu no anu seni tamei. Mukalu la sou anu mutali'isi'a lexe anu itema 'ei xe anu mu'oxo ma'ia. 34 Xe ta mitema ta piena e mipita ne miavuti la ane'i vilevilesi mi'ava'ava iouiou xo mole kisi'a ta mitema sou 'oto'oto ne umomomo sou ulomusou vaikala manina vile no anu mii ane ne uasi, xo 'ava tavu'alo. La sou anu muvikala pekia'u noxi'a ta mitema sou 'oto'oto lexe ino'u Paulo mo ilaixu no taasi'a. 35 No mine ane'i milaixu la mitulusou no anu valovalo sou aitengasi'a. Xe mimalei loxo 'o la ta mitema mukalusi ne la'iaxa'au mu'oki'oki sou i'oxe ine'e ivau Paulo usoli, la sou ane'i mivo'onu milutunoxu la. 36  l Xo ane'i ta mitema mukalusi e mipita ne italo uasi, ane'i i'ava pekia'usi lexe, “Ngavau usoli.”

Paulo Mupala'alixu Tanu Mulai Noxi'a ta Iutaia

37 Ioxe ta mitema sou 'oto'oto i'oxe ilaixu Paulo no nano no taasi'a la ilaixu uao, ia anu mutali'isou kisi'a ta mitema sou 'oto'oto lexe, “Loxovaa, eni umomomo sou avikala sevile noxine?” La anu mukolinu lexe, “Ia nini nelavusou vaikala noxi'a ta Xiliki ne? 38  m Eni emaisine la exavutala itema vile sie Aixiputo e tatei la muavutinoxu 'oto'oto noxi'a ta tatila sou tuala tila, la mulapune'i ta mitema itemaxu mavulovexa mavulovexa tamei (4,000) e milavusou 'ilixosou 'oto'oto iouiou, la ilo'a milai mixolu no xalee lia vitanisi, taatei ne ane nini 'o?” 39 Xe Paulo muavuti la mukolinu aloxo 'o, “Eni itema sie Iutaia nenilo mivo'oleli ne Tasisi e no xalee lia tila ne Kilikia mo eni itema sou tuala tila ane ne. Tuala ane ne anu uala no anu mutila. La sou laixe sou namalalixo mo avikala sevile noxi'a ta mitema 'o.” 40 Ioxe no mine kisi'a ta mitema sou 'oto'oto mupelemasaxanu Paulo mukalu, la sou Paulo mutulu no valovalo sou aitenga, la mutovola'i no avolu mulai noxi'a ta mitema mo muvikalane'i sou lexe ixolu tasiau. La sou ane'i mixolu tasiau, la anu muvikalane'i no anu vaikala Evalaio.

Copyright information for `ATA