a22:3Apo 5:34
b22:4Apo 8:3
c22:18Apo 9:29-30
d22:19Apo 8:3, 26:9-11
e22:20Apo 8:1
f22:21Apo 9:15
g22:25Apo 16:37
h22:29Apo 16:38

Acts 22

La anu musokou muvikala aloxo 'o, “Ta vivilo mo ta mamilo, ngalomusilo mo eni apala'alixo noxinge vaimomo 'o lexe eni a'oxo susu vile uasi.” Xe no mine ane'i mimuxaxu sangali'a sou lexe ilomu sou vaikala noxou 'o la milomusou muvikalane'i no anu vaikala Evalaio. La sou ane'i mixolu tasiau manina. Io sou anu muvikalane'i aloxo 'o, a  “Eni amitema sie Iutaia manina e nenilo mivo'oleli ne Tasisi no xalee lia tila ne Kilikia. Ia eni exali tila no nano no anu tuala tila Ielusalemu. La sou eni exali loxo itema vile e exolu no la'axu Xamalieli sou mulosielixu lavulavu toxotoxoxu no anu lapuloto noxinge nenge'a ta xaixasinge. Mo eni exaxai pekia'ilo manina sou lexe amomomo sou amulinu Lataua aloxo ngingi mukalusi nga'oxonu vaimomo 'o. b Eni elavusou ave'ave'a ta mitema e imulinu vote'i laixe isoisoli. Mo eni alapune'i ta mulu ilo'a ta sema sou alai a'unane'i no taasou navunavu. Aloxo 'o kisi'a ta aili'i ilo'a la'oluxa'a ta tatila noxi'a ta Iutaia umomomo sou ivikalangengixu ne, anu manina. Mo ane'i mikaukavunu vaikala vile si'a ta vimovimo'a e mixolu ne Temasukasi la eni elaixu sou lexe asakisakine'i ane'i ane mimuxaxu tane'i noxou Iesu ne sou alaixa'a no taasou navunavu ne Ielusalemu sou ilosi'a navunavu.

La sou eni emuamua'i xe exali 'alai ne Temasukasi no mine aso mukulupa muisalili 'o, la alaxu vilesisi 'o la lamana vile toxoxa'a mu'iei molu teitexi no loxotolo mulu'e muieisilo. Xe eni elapau la elu'e no lia. La sou elomusou itema vile muvikalaleli lexe, ‘Saulo, Saulo, loxovaa la sou nini ne'oxonu masumasualeli 'o?’ Xe eni eavuti la etalisou aloxo 'o, ‘Tila, nini 'ena'ei?’ La sou Anu mukolileli aloxo 'o, ‘Eni Iesu itema sie Naseleti ane nini ne'oxo masumasualeli.’ No mine Anu muvivikalaleli loxo ne, la ta mitema ane noxi'a temuamua'i ne mimaisou lamanasi ia ilomusou itema e uvikalaleli ne uasi. 10 Xe eni eavuti la etali sou aloxo 'o, ‘Tila, eni a'oxo ma'ia?’ La sou anu Tila muvikalaleli lexe, ‘Natulu, mo nalai na'unalai ne Temasukasi. Xo itema vile anu a uxoxolu lai ne anu uvikalaneni no anu mii ma'ia ane Lataua musosovosine sou nini na'oxonu.’ 11 Xe ta mitema e ane'i ane nexi noxi'a temuamua'i ne miavuti la mitilailo no avolo sou noxi'a te'unalai ne Temasukasi, xo lamana tatila muiesou ieli la isivoxo mo amalei uasi.

12 Xe itema vile ualasou lexe Ananiasi e itema vile umulinu lapuloto noxinge laixe, mo ta mitema ta Iutaia ta piena mixolu lai ne ilavusou itoxonu laixe, 13 anu mune'e mutulu 'alai noxilo la muvikalaleli aloxo 'o, ‘Vivilo Saulo, ieni ukaa.’ Xe alaxu vilesisi 'o la eni ieli mukaa la mo emaisou.

14 La anu muvikalaleli aloxo 'o, ‘Lataua noxi'a ta xaixasinge musosovosine sou lexe nalavusou masaxa noxou, mo namaisou Itema ane itema sou 'ilixo mulapu, mo nalomusou vaikalau e ulaa no anaxu uisalili. 15 Xo nini naxali loxo anu itemau sou naa'aloi'a ta mitema mukalusi no anu mii ma'ia ane nini nemaisou xe nelomusou. 16 La sou vaimomo 'o nini naxoxomaio ma'ia 'o? Natulu mo nalinga no ualasou la sou na'ulo mo uxexeenu 'ili'ilixo masumasua noxine.’

17 Ioxe no mine eni elivu ne Ielusalemu, la elai eu'na no taasou lalotu tatila noxou Lataua sou ekilaka. Ekilaka la emaisou mii vile loxo aipiepiena. 18  c Mii e emaisou ne Tila muvivikalaleli aloxo 'o, ‘Napalea naxexesou tuala tila ne Ielusalemu alaxu vilesisi mo nalai. Xo ane'i imasaxa lexe ilomusou a'alosilo e nini naa'aloxu uasi.’

19  d Ioxe eni eavuti la evikalanu aloxo 'o, ‘Tila, ane'i milavusilo lexe tatei la eni elai no taasou lalotu noxi'a ta Iutaia mukalusi sou esakisakine'i mo eve'ave'a ta mitemameni ane'i ane mimuxaxu tane'i noxine. 20  e Mo no mine ane'i mivau itema sou ua'aloxu ualasine e ualasou lexe Sutepano, la eni etulu 'alai ne sou esaxila'u tokolomoi'a veveeni ne xe emaisou no ieli no mine ane'i mivau musoli mo sialuxu munixi loxo ne, la eni opoleli vilesisi no anu mii ane ane'i mi'oxonu.’ 21  f Xe, Tila muvikalaleli aloxo 'o, ‘Nalai, xo Eni apalusine sou nalai no paxa noxi'a ta mitema ane'i ane ta Iutaia uasi.’”

Paulo Muvikalane'i Lexe Eni Amitema sie Romu Manina

22 No mine ta mitema ta piena e mine'e mipita ne milomusou muvikala aloxo ne, la sou ane'i miavuti sou mi'ava toxotoxoxu mo mikaikaitolonu io mivikala lexe, “Ngavau usoli. Itema ane loxo ne umomomo sou uxolu no lia 'o uasi.” 23 Xe ane'i miavuti la miungaunga mo milulusou tokolomo sou vasime'a sou mipeinu mulai teitexi xe mi'atonu lialia sou mipei mulai teitexi. 24 La sou kisi'a ta mitema sou 'oto'oto muvikala pekia'u noxi'a lexe ta mitema sou 'oto'oto ilaixu Paulo no nano no taasi'a. Io muvikalane'i lexe ipuapuasou mo itali'isou pekia'u lexe tava'u loxovaa la sou ta mitema tavu'alo ne mi'ava toxotoxoxa'a mulai noxou loxo ne. 25  g Xe no mine ane'i misakisakiinu mukalu sou lexe ipuapuasou la Paulo muvikalanu tila noxi'a ta mitema sou 'oto'oto a ututulu. La sou anu muavuti la muvikala aloxo, “Loxovaa, umomomo sou nini napuapua sou itema sie Romu? A lexe nini natulusilo no anu vaivaikala tei io, ka napuapuasilo loxo ne, la anu laixe.”

26 Xe tila noxi'a ta mitema sou 'oto'oto mulomusou aloxo ne, la anu mulai noxou kisi'a ta mitema sou 'oto'oto sou muvikalanu aloxo 'o, “Nini na'oxo a loxovaa? E itema 'o ne anu itema sie Romu.” 27 La sou kisi'a ta mitema sou 'oto'oto mulai noxou Paulo sou mutali'isou aloxo 'o “Navikalaleli nini itema sie Romu manina?” La Paulo mu'oxe “Ani.” 28 Xe la kisi'a ta mitema sou 'oto'oto ne mukolinu aloxo 'o, “Eni elotonu xoluxolu noxilo no anu lamoli tatila.” Xe Paulo muavuti la muvikalanu lexe, “Ia eni no mine nenilo mivo'oleli la eni amitema sie Romu manina.” 29  h La sou alaxu vilesisi 'o la, ta mitema sou 'oto'oto ilo'a kisi'a ta mitema sou 'oto'oto ne itali'i sou la uasi. Anu mumama'u xo anu itema sie Romu manina ia anu musakiinu no anu seni.

Ta Tatila sou Ivelunu Vaivaikala Milomusou Vaikala Noxou Paulo

30 Voxo vile ili'i, la kisi'a ta mitema sou 'oto'oto mumasaxa lexe ta Iutaia ipala'anixu susu ma'ia ane Paulo mu'oxonu manina. La sou anu mululusou no anu seni, io muvikala pekia'u noxi'a ta tatilasi'a ta aili'i ilo'a ta tatila sou ivelunu vaivaikala mukalusi sou mipita la sou anu mupalusou Paulo mune'e sou mutulusou no ie'i.

Copyright information for `ATA