a23:2Ioa 18:22-23
b23:3Mat 23:27
c23:5Mul 22:28
d23:6Apo 26:5
e23:8Mat 22:23
f23:11Apo 27:24, 28:16, 23
g23:15Apo 25:3
h23:27Apo 21:30-33, 22:25-27
i23:28Apo 22:30
j23:30Apo 23:16-23, 24:1-9

Acts 23

Xe Paulo mumatakisi'a ta tatila sou ivelunu vaivaikala ne la muvikalane'i lexe, “Ta vivilo, noxou Lataua iou la eni emomomo sou e'oxo xaixaiou no anu xavutala lailaixesi mo a mune'e mutalo vaimomo 'o, io axavutala lexe a'oxonu 'ilixo vile masua uasi.” a Anu muvikala aloxo ne, la kisi'a ta aili'i e ualasou lexe Ananiasi ne muvikala pekia'u noxi'a ta mitema e mitulu 'alai noxou ne lexe isavalou anaxu ne. b Ia Paulo muavuti la muvikalanu lexe, “Lataua usavaline xo nini loxo vimelu e mikaukavunu mukea no ale io no nano ne nuni'u. Nini nene'e nexolu sou netelo vaikala sou lapuloto noxilo, ia nini mene la nealasou lapuloto sou nepalusi'a misavalilo.” Xe ane'i e mitutulu 'alai noxou Paulo ne miavuti la mivikalanu lexe, “Ae, nini namama'u sou navikalanu kisi'a ta aili'i noxou Lataua no anu vaivaikala aloxo ne uasi.” c La sou Paulo muvikala lexe, “Ta vivilo, eni alavusou itema ne lexe anu kisi'a ta aili'i noxou Lataua uasi. La sou eni evikala loxo ne, ia eni emama'u xo vaikala noxou Lataua vile muvikala aloxo 'o, ‘Mamu sou ngingi ngavikala masua noxi'a ta tatilasinge.’”

d Ia Paulo mulavusi'a lexe ane'i se'i noxi'a ta tatila sou ivelunu vaikala ne ta Sadokaio xe se'i ne ta Palisaio mine'e. La sou anu muvikala tatila noxi'a ta tatila sou ivelunu vaikala aloxo 'o, “Ta vivilo, eni amitema sou Palisaio mo 'ili'a. La sou eni atulu no 'a vaivaikala vaimomo 'o, xo eni aloopalanu tulu noxi'a ta mitema ane'i ane misoisoli no anu lulu.” No mine anu muvikala aloxo ne, la ane'i mixavutala iouiou mo mi'oto sou anaxa'a, la sou ikalipala muxali nonixi noxi'a ta Palisaio ilo'a ta Sadokaio. e Xo ta Sadokaio mivikala lexe angelo uxolu uasi, mo uleenu uasi kalumo mo itema usoli ka utulu la uasi. Ia ta Palisaio si'a mimuxaxu tane'i no anu mimii mukalusi ne lexe anu manina.

Xe ane'i miavuti la mi'ava toxotoxoxu la sou ta mitema sou lavulavu no 'a lapuloto e ane'i ta Palisaio ne miavuti mitulu mitoloxaxa sou io mivikala lexe, “Nexi tamaisou itema ane 'o u'oxo susu vile uasi. Ia loxo 'o io uleenu vile, uasi la angelo vile noxou.” 10 La ane'i mi'otosou anaxa'a mole 'oto'oto muxali tatila manina. La sou kisi'a ta mitema sou 'oto'oto mumaisou la mumama'u manina, xo loxo 'o io Paulo uxoto mautu tamei no avo'a la sou muvikala pekia'u mo mupalusi'a ta mitema sou 'oto'oto milu'e sou milaxinu Paulo noxi'a sou milaixu no taasi'a.

11  f Ili'i no 'olovoxo ane ne, la Tila muxali mutulu 'alai noxou Paulo io muvikalanu aloxo 'o “Natulu pekia'ine mo na'ume mamu. Xo Eni emasaxa lexe nini naa'aloxu ualasilo lai ne Romu 'o loxo nea'aloxu ne Ielusalemu.”

Ta Iutaia Misakiinu Vaikala sou Lexe Ivau Paulo Usoli

12 Xe no kakau 'o, la ane'i ta Iutaia mipita laoluxa'a sou misakii vaikala lexe ipelemu la i'ani mo iie uasi utalo no mine ivau Paulo usoli. 13 Ta mitema e misakii vaikala ne ane'i ta mitema itemaxu tamei mo mose'i la. 14 Ane'i milai noxi'a ta tatilasi'a ta aili'i mo ta tatila noxi'a ta mitema noxi'a ta Iutaia mivikalane'i lexe, “Nexi tesakii vaikala pekia'u aloxo 'o, nexi umomomo sou ta'ani uasi utalo no mine tava'u Paulo usoli. 15  g La sou vaimomo 'o, ngingi ta tatila sou ngavelunu vaivaikala ne ngelinga mulai noxou kisi'a ta mitema sou 'oto'oto vile sou nga'oxo loloxu lexe isaxanu Paulo une'e noxinge sou ngatali'isou laixe sou ngaxalisou susu noxou. La sou nexi talooxu xe anu une'e la une'e uxali noxinge uao, la nexi tava'u usoli.”

16 Ia no mine ane'i mivivikala loxo ne, la Paulo vimou sema 'ilie anu a muxoxolu ne, la sou mulomusou vaikala ane ne, la anu mulai no tani noxi'a ta mitema sou 'oto'oto sou muvikalanu Paulo. 17 Xe Paulo mulomu aloxo ne, la mu'avalou tila vile noxi'a ta mitema sou 'oto'oto la muvikalanu lexe, “Nano'u maulu 'o mo nalaixu noxou kisinge, xo anu muno'u vaivaikala mose'i sou uvikalanu no anu.” 18 La sou anu muno'u sou mulaixu noxou kisi'a, la muvikalanu lexe, “Paulo e anu muxolu no taasou navunavu mu'avalilo la muvikalaleli lexe ane'enu maulu 'o noxine xo anu iou vaivaikala mose'i sou ulemolu noxine.”

19 Xe kisi'a ne muavuti, la mukasi noxou maulu ne avolu sou ilou milai mitulu va'axu la mutalisou lexe, “Mii ma'ia ane nini namasaxa lexe nane'e navikalalelixu 'o?” 20 La anu muvikalanu lexe, “Ta Iutaia misakii vaikala vile mukalu, sou mi'oxe ne'iela, la i'oxo loloxene lexe nasaxanu Paulo ulai noxi'a ta tatila sou ivelunu vaivaikala sou itali'isou laixe no anu tava'u susu noxou. 21 Ia nalomuxa'a mo napalusou Paulo ulai noxi'a mamu. Xo ta mitema itemaxu tamei noxi'a mo mose'i la ne ane'i a ixoxolu iloloo mo mipelemu sou i'ani xe iie uasi ulai uxali no mine ane'i ivau usoli. Mo ane'i a iloloo mo ixoxomaiou vaikala makolinu noxine.”

22 La sou kisi'a ta mitema sou 'oto'oto ne mupalusou maulu ne mulai la muvikalanu lexe, “Nini navikalanu itema vile no anu mii e nevikalalelixu 'o mamu.”

Mivulanu Paulo Mulai Noxou Peliki Tila Muxolu Musaxila'u Xalee Lia Tila ne Iutaia

23 Xe anu tila noxi'a ne muavuti la mu'avali'a ta tatila tamei noxi'a ta mitema sou 'oto'oto ne sou muvikala pekia'u noxi'a ilou lexe, “Ino'a ta mitema sou 'oto'oto itemaxu mavulovexa vile, xe ane'i ane mitelo noxi'a ta oosi mavulovexa muxatele tamei, mo ane'i ane itavule lalumiso itemaxu mavulovexa vile kalumo. Sou ngalutu maasi no a aso iou muxatele tami'a no 'olovoxo 'o sou ngalai ne Kaisalia. 24 Nini nalosou Paulo ta oosi mose'i kalumo mo sou uiiave no anu mo nasaxila'u laixesi sou nalai naxalixu noxou Peliki anu itema sou usaxila'u xalee lia tila ne Iutaia.” 25 Kisi'a ta mitema sou 'oto'oto mukaukavunu uoli voloxu vile kalumo sou ino'u ulai sou ilosou Peliki muvikala aloxo 'o, 26 “Eni Kulaudio Lusio, Eni esovanu aso laixe ulai noxine mo ekaukavu vaivaikala ano 'o ulai noxine, nini tila Peliki e nini nasaxila'u xalee lia tila ne Iutaia. 27  h Sou avikalaneni aloxo 'o. Itema ane 'o ne ta Iutaia mitetelisou mo mi'oxo lexe ivau usoli. Ia eni noxi'a ta mitema sou 'oto'oto noxilo teutululunu xo eni elavusou lexe anu itema sie Romu. 28  i La sou eni emasaxa lexe alavusou lexe tava'u ma'ia la sou ane'i milalixu sou utulu no 'a vaivaikala, la elaixu noxi'a ta tatila sou ivelunu vaivaikala. 29 La eni exalisou lexe ane'i mitali'itali'isou mo milaixu sou utulu no 'a vaivaikala ne sou lapuloto noxi'a ta Iutaia. Ia mii ane ne anu umomomo sou nenge tatelonu vaikala sou noxou itema mo tava'u usoli xe tatatuxu no taasou navunavu uasi. 30  j Ia no mine eni elomusou ane'i misakiinu vaikalasou lexe ivau usoli la sou eni epalusou mupalea mulai noxine. Eni kalumo evikala pekia'u noxi'a sou lexe ilai ia'alomeni no anu tava'u lexe ane'i ilaixu sou utulu no 'a vaivaikala vitanisi noxou.”

31 Ioxe ta mitema sou 'oto'oto miavuti la mimulinu vaikala pekia'u noxou tila noxi'a la sou mukasi noxou Paulo sou ilo'a milutu no 'olovoxo lixinu ne sou milai mixali no tuala tila ne Antipatilisi. 32 Xe no anu voxo vile ili'i la ta mitema sou 'oto'oto mitali'isi'a ane'i ane mitelo noxi'a ta oosi sou misaxanu Paulo milaixu ne Kaisalia. Io ane'i se'i milivu no taasi'a. 33 No mine ane'i ane mitelo noxi'a ta oosi ne mixali ne Kaisalia, la milosou Peliki anu itema sou usaxila'u xalee lia tila ne Iutaia ne uoli voloxu ne xe milailixu Paulo kalumo sou mi'italonu no avolu. 34 Xe anu muitisou vaivaikala no anu uoli voloxu ne mukalu, la sou mutali'isou Paulo lexe, “Nini itema sou xalee lia tila ane 'ei?” La anu mukolinu lexe, “Eni itema sou xalee lia tila ne Kilikia.” 35 Xe anu mulavusou aloxo ne, la muvikalanu lexe, “Eni alomusine no mine ane'i ane mitelo vaikala noxine ne ixali.” La sou anu muvikala pekia'u noxi'a sou lexe itatuxu Paulo no tani tatila noxou Elodesi.

Copyright information for `ATA