a24:5Apo 17:6
b24:6Apo 21:28-30
d24:15Ioa 5:28-29
e24:18Apo 21:17-28
f24:21Apo 23:6
g24:22Apo 23:26

Acts 24

Paulo Mutulu no Anu Vaivaikala no Iou Peliki

Ioxe voxo ta'uve mupolo mukalu, la kisi'a ta aili'i Ananiasi ilo'a ta tatila noxi'a ta Iutaia mose'i mo itema sou uvelunu vaikala e ualasou lexe Tetulusi ne milu'e ne Kaisalia sou mitelonu vaivaikalai'a noxou Paulo no iou tila sou usaxila'u xalee lia tila ne Iutaia. Xe no mine tila sou usaxila'u xalee lia tila ne Iutaia mu'avalou Paulo mu'una, la Telutulusi musokosou muxalixu susu noxou Paulo no iou Peliki aloxo 'o, “Nexi texolu se'isisi laixe maxuveeni no anu saxila'u noxine, Tila Peliki. Mo xavutala laixe noxine anu mupaipounu mimii sou uxali laixe no anu xalee tuala tila no nano 'o. Nexi talemo laixe noxine, tila Peliki no anu mimii ane ne la nexi ta'osasine manina musuku no xalee xalee tuala mukalusi. Ia sou loxo nexi ta'oxoneni natotosa no anu vaivaikala maxuveeni mamu. La sou eni alinga lexe nini na'oxonu laixe loxo sou nalomusou vaikala noxixe.

a Nexi texalisou itema ane 'o lexe anu itema vile sou u'oxonu susu sou uaavutinoxu 'oto'oto no taine'i ta Iutaia no xalexalee tuatuala mukalusi. Mo anu ne muuli noxi'a la'oluxa'a vile lalotu kalavoi e ileme'a lexe ta Nasalini. b Mo mutovo sou lexe u'oxo masuanu vimelu sou tani tila noxou Lataua kalumo. La sou nexi tetetelisou.
24:7Ia kisi'a ta mitema sou 'oto'oto ualasou lexe Lusio mune'e no 'a xavi sou mulaxinu muxexeenu no avoxe.
Io muvikala pekia'u noxi'a sou ta mitema itelo vaikala noxou sou lexe ine'e itulu no ieni sou vaivaikala. Ia lexe nini mene natalitali'isou laixe, loxovaa nini nalavusou vaivaikala ane nexi tatelonu noxou 'o ne manina sou?”

Xe ta Iutaia miavuti la misolonu vaikala e mitelo noxou Paulo ne la mivikala lexe vaivaikala ane Telutulusi mulemo ne anu manina. 10 Xe no mine tila sou usaxila'u xalee lia tila mutovola'i mulai noxou Paulo sou lexe uvikala, la anu mukolinu aloxo 'o, “Eni elavu lexe nini nexaxai sou nexililie'i sou tu'utu'umaxu noxi'a ta mitema tauu ie tapiena no anu tuala xalenu ano. La sou vaimomo 'o eni a'osasi sou a'oxonu vaikala ulai noxine sou latolosilo. 11 Lexe nini natali'i la nini umomomo sou nalavu lexe eni alai telo ne Ielusalemu sou alotu ulai noxou Lataua voxo mavulovexa mo mulu'e no lia tameisi io usuku uasi. 12 Ia ta mitemaxeni e mitelo vaikala noxilo ixalisilo lexe nexi noxou itema vile ta'otosou ananexe no anu taasou lalotu tatila noxou Lataua mo aavutilixu xavutalai'a ta mitema la'oluxa'a no nano no anu taasou lalotu noxi'a ta Iutaia, mo no nano no tuala tila ne uasi. 13 Mo ane'i imomomo sou ilemo lexe susu ane ane'i itelonu vaikala une'e noxilo ne manina 'o uasi. 14 Ia anu aloxo 'o, eni avikalaneni lexe eni elotu noxou Lataua noxi'a ta xaixasinge no mine emulinu vote'i noxou Tila ane ilemo lexe la'oluxa'a vile lalotu kalavoi. Eni emuxaxu taleli no anu mimii mukalusi ane muisalili no anu lapuloto noxou Mosesi mo mii ane ta mitema sou palomatana mikaukavunu. 15  d Xe loopala noxilo ne anu iouvilesisi noxi'a ta mitema ta Iutaia ane 'o. Nexi taloopala mulai noxou Lataua lexe ili'i la ta mitema ane ta lailaixe mo ta masumasua e misoisoli ne itulu imauli la. 16 La sou eni peki'ailo utotomu sou asaxila'u opoleli uxolu uisalili no iou Lataua mo no ie'i ta mitema kalumo.

17 Ioxe eni exolu no tuala va'ava'axu tauu ie ta piena mukalu, la eni ene'e ne Ielusalemu sou elailixu su'uli se'i ulaisou usu'uline'i ta mitema ane xa'a la'ilali ilou i'a tokolomo uasi. Xe e'oxonu iaiama se'i mulai noxou Lataua. 18  e No mine eni e'oxonu iaiama sou axali malemalenga no nano no taasou lalotu tatila noxou Lataua, la ane'i mixalisilo mine eni e'oxonu loxo ne. La no voxo ane ne nexi noxi'a ta mitema tapiena uasi mo eni a'una no anu 'ava vile uasi. 19 Ia ta Iutaia mose'i me'a no xalee lia tila ne Asia a mixolu. Ia laixe lexe ixali no ieni mo ia'aloxu susu mose'i noxilo lexe ane'i milavusou. 20 Ia lexe uasi la ane'i ane mixolu 'o ivikala lamana no anu susu ma'ia ane ane'i mixalisou noxilo no ie'i ta tatila sou ivelunu vaivaikala. 21  f Ia mii vilesisi ane eni e'avamolu no mine eni etulu no ie'i no 'a aloxo 'o, ‘Ta mitema ane misoisoli ne itulu imauli la. Tava'u a loxo ne, la sou nini natulusilo no anu vaivaikala no iengi vaimomo.’”

22  g Ia Peliki ne anu mulavu laixe no anu vote'i noxou Tila ane ne la sou musukunu voxo sou vaivaikala, la muvikala lexe, “No mine kisi'a ta mitema sou 'oto'oto ualasou lexe Lusio une'e la sou eni alomusou mo alapunoxu vaivaikala noxinge.” 23 Anu muvikala pekia'u noxou tila noxi'a ta mitema sou 'oto'oto sou u'italonu Paulo no anu taasou navunavu ia ulosou navunavu pekia'u malaxo uasi ia no anu tani taiinu mose'i, la uapixa'a ta menexu sou ine'e noxou mo isu'ulinu no anu mimii se'i sou isaxila'u uasi.

24 Voxo mose'i mupolo mukalu, la Peliki ilee semau Dalusila ane sie Iutaia ne mine'e mixali, la anu mu'avalou Paulo mune'e sou milomusou mine anu mua'alo no anu 'ilixosou itema umuxaxu tanu noxou Kalisito Iesu. 25 Xe no mine Paulo mua'alo muvula no anu 'ili'ilixo lailaixe mo saxila'u muamua'inenge mo voxo sou Lataua ututulusinge no anu vaivaikala ili'i, la Peliki ne mu'ume la muvikala aloxo 'o, “A'alo mutalo aloxo ne o sou vaimomo 'o. Io nini nalai. Io no mine eni axalisou voxo taiinu vile, la eni a'avaline nane'e la.” 26 No ano voxo ngiou ane ne, la anu muloloopala lexe Paulo uxolixolinu mo ulosou lamoli sou lexe ululusou, la sou anu mu'avalou utotomu sou ilou mivivikala.

27 Tauu lele'e tamei mukalu, la itema e ualasou lexe Polukiusi Fesuto muno'u Peliki tanixu. Ia Peliki mumasaxa lexe u'oxo ta Iutaia opone'i laixe noxou la anu iou muvaxau Paulo muxolu no nano no anu tani sou navunavu ne.

Copyright information for `ATA