a4:4Apo 2:41
b4:10Apo 3:6, 13-16
c4:11Lex 118:22
d4:12Mat 1:21
e4:18Apo 5:28
f4:19Apo 5:29
g4:24Mul 20:11; Nee 9:6; Lex 146:6
h4:25-26Lex 2:1-2
i4:27Mat 27:1-2; Luk 23:7-11; Apo 3:13
j4:28Apo 2:23
k4:29Ep 6:19
l4:32Apo 2:44
m4:34Apo 2:45

Acts 4

Pita Ilou Ioanesi Mitulu no Anu Vaivaikala Noxi'a ta Iutaia

Ane'i Pita ilou Ioanesi uao ivivikala noxi'a ta mitema sio, la ta aili'i ilo'a ta Sadokaio mo tila noxi'a ta mitema sou isaxila'u taasou lalotu tatila noxou Lataua mixali ne'e. Xe ane'i la'iaxa'a manina xo ane'i ilou ilosie'ixa'a ta mitema mo ia'aloxu tulu noxou Iesu mo ivikala lexe ane'i ane isoisoli ne ane'i kalumo itulu. La ane'i mitetelisi'a ilou, sou mimulaxa'a no taasou navunavu xo 'olovoxo mukalu. Ane'i mixolu no nano ne 'olovoxo vile lololi. a Ia ane'i tapiena ane milomusou vaivaikala noxi'a ilou ne mimulaxu tane'i noxou Iesu. La sou itiitisi'a ta mulu musuku mutelo loxo 5,000.

'Olovoxo mukalu xe kakau, la ane'i ane ta Iutaia isaxila'a ta mitema ilo'a ta tatila sou tuala mo ta mitema sou lapuloto mipita ne Ielusalemu. La kisi'a ta aili'i e ualasou lexe Anasi ilo'a ta tema taasou ualasi'a lexe Kaiapasi mo Ioanesi mo Alekisanda ilo'a mose'i noxi'a mipita kalumo. La mitulusi'a Pita ilou Ioanesi no talaxa'a sou mitali'isi'a ilou aloxo 'o, “No anu xavi anevaa ane ngingi ngongou ngepamaulinu itema 'o no anu? Mo 'ena'ei mupelemasaxangengi sou nge'oxo loxo ne?”

Xe Uleenu Tavuna mu'ana'ana noxou Pita, la mukoline'i aloxo 'o, “Ngingi sou ngasaxila'a ta mitema mo ngingi ta tatila sou tuala! Lexe ngingi nge'avalixe sou ngatali'isixe noxou vaimomo 'o sou 'ilixo laixe ane nexi noxou temaxa'u mulai noxou itema e tava'u musoisoli mo ngingi ngetali'isixe lexe anu mumauli a loxovaa, 10  b la ngingi mo ta mitema sie Isilaeli ukalusi ne ngalavusou mii ano 'o. Nexi tavikalangengi lexe itema ane ututulu no iengi 'o ne, anu mumauli no anu xavi noxou Iesu Kalisito sie Naseletisi ane ngingi ngevau musoli no anu ovu valautu ia Lataua mutulusou no anu soli. 11  c Lavuku Tavuna teinu muvikalasou Iesu anu aloxo 'o, ‘Anu lavo'o e ngingi ta mitema sou ngatulusou tani ngexexeenu musua, ia anu muxali lavo'o vile laixe manina sou utetelisou tani.’ 12  d Nenge tamomomo sou taxalisou mauli noxou itema vile la uasi. Xo Lataua ulosinge uala vile la no lia 'o sou nenge tano'u mauli no anu uasi.”

13 Ane'i mimaisi'a ilou lexe ane'i i'ume'a uasi xe ane'i milavusi'a ilou lexe ane'i ta mitema vitanisi mo i'a lavulavu uasi, la ane'i mikuluke manina ia mitongone'i lexe ane'i mixolu noxou Iesu tei. 14 Ia tava'u lexe ane'i mimaisou itema ane ilou mipamaulinu ne a ututulu no pa'ume'a ilou, la ane'i i'a vaikala vile sou ilemolu la uasi. 15 La sou ane'i ta mitema ne mivikalane'i ilou lexe ixexee mo ilai va'axu. Ane'i mixexene'i milai mukalu, io ane'i mixolu sou mivivikalane'i mo mitalitali'isi'a ngatongato'o aloxo 'o, 16 “Nenge ta'oxonu mii ma'ia noxi'a ta mitema tamei 'o? Xo ta mitema latala e ixoxolu ne Ielusalemu 'o ne, milavusou sosovo tatila ane ane'i ilou mi'oxonu mo umomomo sou nenge tasingisou uasi. 17 Ia nenge tavikalane'i ilou pekia'u lexe mamu sou ilou ia'aloxu Iesu ualasou ne la. Aloxo ne, la sou nenge tataluxu vote'isou a'alo ne mo mamu sou usuku ulai noxi'a ta mitema mose'i la.”

18  e Mivivikala mukalu, la sou mi'avali'a ilou milivu mi'una la, sou mivikalane'i ilou pekia'u lexe mamu sou ane'i ivivikala mo ilosie'ixa'a ta mitema no anu xavi no 'a ualasou Iesu. 19  f Ia Pita ilou Ioanesi mikoline'i aloxo 'o, “Ngingi menge ngaxavutala laixe lexe anu laixe no iou Lataua sou nexi talomuxu vaikalamengi? Uasi, nexi talomuxu vaikalau Lataua? 20 Xo nexi umomomo sou tatomunu ananexe no anu mii ma'ia ane nexi temaisou mo telomusou ne uasi.”

21 Mukalu, la ane'i mivikala pekia'u mose'i la noxi'a ilou, io sou mimalanixi'a ilou milai. Ane'i imomomo sou ixalisou vote'i vile la sou ilosi'a ilou navunavu no anu uasi, xo ta mitema latala mukalusi ne mi'iti'itinu Lataua ualasou sou mii ane ane'i ilou mi'oxonu ne. 22 Itema ane ane'i ilou mimaxa'u sosovo sou mipamaulinu ne, tauu 'iexu muuaulixu tauu ie itemaxu tamei.

Ane'i Milinga Noxou Lataua

23 Ane'i mimalanixi'a Pita ilou Ioanesi mukalu, la sou ane'i ilou milivu milai noxi'a ta menexi'a sou mia'aloxu vaivaikala latala e ta tatilasi'a ta aili'i ilo'a ta tatila sou tuala milemolu. 24  g Xe ane'i milomusou mukalu, la ane'i mipita sou milinga mulai noxou Lataua aloxo 'o, “Tila, nini nekoinu mimii tavu'alo mukalusi ane muxolu teitexi no loxotolo mo no lialia 'o xe no luaki kalumo. 25  h Xe nini nevikala noxou itema sou xaixai noxine Deviti, 'ilusunexi tatei no anu Uleenu Tavuna, la anu muvikala lexe,

‘Tava'u loxovaa, la sou ta mitema ane'i ane ta Iutaia uasi ne la'iaxa'a musuku
mo ane'i misakiinu vaikala sou lexe i'oto noxou Tila
ia vaikala noxi'a ne vitanisi 'o?
26 Mo ta tatananu tuatuala ilo'a ta tatila sou isaxila'a ta mitema milalaxii
mo mipita sou lexe i'oto noxi'a Tila ilou Kalisito noxou.’
27  i Vaivaikala ane ne, manina musuku. Xo Elodesi ilou Pontio Pilato ilo'a ta mitema ane'i ane ta Iutaia uasi mo ta Isilaeli no tuala tila ane 'o mipita sou mi'oto noxou itema malemalenga e Lataua na'u sou xaixai noxine vitanisi, ualasou lexe Iesu e nini nesosovosou. 28  j La ane'i mi'oxo mii ane ne aloxo nini nesakiinu xavutalameni tatei mo nemasaxa lexe na'oxonu no 'a xavineni mo uxali. 29  k Aloxo ne, la sou Tila nini naxavutala no anu 'ili'ilixo noxi'a ane ane'i i'oxonu sou nexi ta'ume no anu mo na'oxo pekia'inge nexi ta mitema sou xaixai noxine, mo sou nexi taa'aloxu vaikalameni ia ta'ume uasi. 30 Mo nini nalosixe xavi sou nexi tapamauline'i ta mitema no anu pipienaxa'a mo nexi ta'oxonu sosovo iouiou ilou mii ane ta mitema imaisou la tane'i liliiou no 'a ualasou Iesu, Anu itema malemalenga sou xaixai noxine.”

31 Ane'i milinga aloxo ne mukalu, la tani ane ane'i mixolu mipita no anu ne, mukunikuni. Tani mukunikuni, la ane'i mi'ana'ana no anu Uleenu Tavuna, la sou ane'i mia'aloxu vaikala noxou Lataua, ia i'ume uasi.

Ta Mitema Noxou Lataua Misu'uline'i Ngatongato'o

32  l La sou ta mitema tavu'alo ne, mimulaxu tane'i noxou Iesu, mo opone'i ilou xavutalai'a ne muxali vilesisi. La vile noxi'a uvikala lexe mimii noxou ne anu anusisi na'u uasi. Ia ane'i ivelunu mimii'a ne noxi'a ngatongato'o. 33 Xe ta aposeli ne, ane'i misolonu sou mia'alo xavine'i no anu soli mo tulu noxou Tila Iesu, la Lataua mualusi'a ane'i mukalusi mu'oki manina. 34  m Itema vile loxo xou la'ilali mo lavuluti uasi uxolu no taiine'i ne uasi. Xo ane'i ane xa'a lia mo si'a tanitani mi'italonu sou ta mitema ilotonu une'e noxi'a, la ane'i mitavulenu lamoli 35 mo milaixu mimulaxu no talaxa'a ta aposeli sou mivelunu noxi'a ta mitema ane'i ane loxo xa'a la'ilali mo i'a lavuluti uasi.

36 Io itema vile no anu mata noxi'a ta Levi ne ualasou lexe Iosepu sie Kipulosi. Ia ta aposeli ne, mimoxo'u ualasou vile la lexe Valunavasi laaxu lexe itema vile sou xolixoli. 37 Anu xaixu vile a muxolu, la anu mu'italonu noxi'a ta mitema sou milotonu. Xe muno'u lamolisou, la mune'enu mumulaxu no talaxa'a ta aposeli.

Copyright information for `ATA