a8:3Apo 9:1, 13; 22:4, 26:9-11
b8:17Apo 19:6
c8:32-33Ais 53:7-8
d8:36Apo 10:47
e8:40Apo 21:8

Acts 8

A'alo sou ta Mitema Mi'oxonu Masuane'i ta Mitema sou Lalotu Noxou Iesu

Xe Saulo mumaisou la opoonu vilesisi no anu 'ilixo ane ane'i mi'oxonu sou mivau Sutepano musoli. Ta mitema mi'oxonu masuane'i mo mipaxelene'i ta mitema noxou Iesu. Mo no anu voxo ane ne la ta mitema ne Iutaia mive'ave'a ta aposeli ane mixolu ne Ielusalemu, la mi'ume'ume milai no xalee lia tila ne Iutaia mo ne Samalia, io ta aposeli ane'isisi a mixolu ne Ielusalemu. Ta mitema mose'i milavusou mimulinu 'ilixo noxou Lataua laixe mi'asixu Sutepano mo mitamasou tatila muoki manina. a Ia Saulo ne anu muavuti sou mu'oxo masuane'i ta mitema sou lalotu noxou Iesu, la anu mu'una no 'a tani vilevilesi ne sou mulapune'i ta mulu mo ta sema milaa la sou mulai mutatuxa'a no 'a taasou navunavu.

Pilipi Mulai ne Samalia

Io ta mulu mo ta sema noxou Iesu ane'i ane mi'ume mipaxele ne mia'aloxu vaikala noxou Lataua no tuatuala ane ane'i milai no anu ne. Xe Pilipi mulu'elai no tuala tila ne Samalia, la mua'aloxu Kalisito mulai noxi'a. Xe no mine ta mitema tavu'alo milomusou a'alo ane Pilipi mua'aloxu, xe mimaisou sosovo iouiou ane anu mu'oxonu muxali. La ane'i mimulaxu sangali'a sou milomu laixe no 'a vaikala ane anu mulemolu. Ane'i ane ta uleenu ta masumasua tavu'alo mixolu noxi'a ne miungaunga mo milaa sou mixexesi'a. Mo ta mitema tavu'alo ane'i ane vasime'a musoisoli xe ane'i ane tava'a mukilikalukalu ne mixali laixe la. La sou ta mitema no 'a tuala tila ane ne mi'osa'osa tatila manina.

Saimoni Itema sou Kasila

Ioxe, Itema vile ualasou lexe Saimoni muxolu no 'a tuala tila ne Samalia. No voxo se'i la anu itema sou kasila mo aalu iouiou, la ta mitema ne Samalia mikuluke mo mimama'u noxou xo anu mu'oxe anu itema tila vile. 10 Mole ta mitema ualasi'a ta tatila mo ane'i ane ta mitema vitavitanisi ne ane'i mimaisou la mivikalasou lexe, “Anu itema ane 'o xavi noxou Lataua e tatila ne a uxolu noxou.” 11 Ane'i mimulimulinu ne xo anu mumolololoxa'a ta mitema la ane'i mikuluke sou anu mu'oxo'oxonu aalu noxou ne maxuveeni no ie'i. 12 Ia no mine ane'i mimuxaxu tane'i no anu a'alo laixe sou saxisaxila'u noxou Lataua mo no anu ualasou Iesu Kalisito ane Pilipi mua'aloxu, la ta mulu mo ta sema ne kalumo ane'i mi'ulo. 13 Xe Saimoni ne mumulaxu tanu la mu'ulo kalumo. Xe Pilipi mulai no tuatuala ne'ei ne la anu mumulinu mulai kalumo. Anu mumaisou sosovo iouiou mo xavi tatila anu Pilipi mu'oxonu la anu mumama'u no anu.

14 No voxo ane ta aposeli mixolu ne Ielusalemu xe milomu lexe ta mitema ne Samalia mimasaxau mo mino'u vaikala noxou Lataua la ane'i mitali'isi'a Pita ilou Ioanesi sou milai noxi'a. 15 Ane'i milai xe mixali la ilou mikilakasi'a ta mitema noxou Lataua sou lexe Lataua ulosi'a Uleenu Tavuna. 16 Xo Uleenu Tavuna ulu'e mo uxolu noxou vile noxi'a uao, ane'i mi'ulo no anu ualasou Tila Iesusi. 17  b Ane'i Pita ilou Ioanesi milingasi'a mukalu, la ilou mi'italonu avo'a no kisikisi'a, la sou Uleenu Tavuna mulu'e sou muxolu noxi'a. 18 No mine Saimoni mumaisou lexe ta aposeli mimulaxu avo'a teitexi no kisi'a xe Uleenu Tavuna mu'una sou muxolu noxi'a la anu mulosi'a lamoli. 19 Io muvikala lexe, “Ngalosilo xavi ane ne kalumo mo sou eni amuxaxu avolo noxou itema 'ena'ei ne, la Uleenu Tavuna une'e uxolu noxou.” 20 Ia Pita mukolinu vaikala noxou aloxo 'o, “Umomomo sou lamolimeni mo nini kalumo ne ngongou tasiaungenge ukalusi, xo nini ne nexavutala lexe nini namomomo sou nalotonu xavi noxou Lataua ane ulosinge vitanisi ne no 'a lamoli. 21 Nini umomomosou napita noxixe no anu xaixai ano 'o, xo tava'u lexe taneni ne uisalili noxou Lataua iou uasi. 22 Naxiu oponeni mo naxiu tumalineu 'ilixo masumasua noxine ane ne'oxo'oxonu mo nalinga ulai noxou Lataua, la sou Anu uxiu tumalouu 'ili'ilixo masumasua no taneni. 23 Na'oxo aloxo ne xo eni emaisine lexe 'ilixo sou isuisu mu'ana'ana noxine mo taneni ne sixula xe nini namitema sou 'ilixo masua utotomu.” 24 Xe Saimoni muavuti la mukolinu Pita aloxo 'o, “Nalingasilo ulai noxou Lataua, mo sou mimii e nini nelemolu ne umomomo sou uxali noxilo mamu.”

25 No mine ane'i mivivikala lamana no anu mii ane Lataua mu'oxonu no anu maulixa'a mo mia'aloxu vaikala noxou Tila mukalu, la ane'i ilou milivu milai ne Ielusalemu. Milivu milai, la mia'aloxu a'alo laixe noxou Iesu Kalisito no 'a tuatuala ta piena ne Samalia.

Pilipi Ilou Itema sie Etiopia

26 Ioxe angelo vile noxou Tila muvikalanu Pilipi aloxo 'o, “Naavuti mo nalai no 'a sivo u'una la namulinu vote'i ane upolo no xalee lia vitanisi mulu'e ne Ielusalemu e mulai muxali ne Xasa.” 27 La sou anu muavuti sou mulutu mulai. Xe mumuamua'i no vote'i la muxalisou itema Etiopia vile. Itema ne anu tila noxi'a, xe itema sou usaxila'u tuala noxie tatananu tuala semau e ualasie lexe Kandasi sie Etiopia. Mo anu mulavusou usaxila'u lamoli mo mimii ukalusi noxie tatananu tuala semau. Anu mune'e ne Ielusalemu sou ulotu. 28 Xe mulivu mune'e, la muxolu no anu tava'u tamei e oosi ulapunu, ia uitiiti no anu lavuku noxou itema sou palomatana Aisaia. 29 Ia Uleenu Lataua muvikalanu Pilipi lexe, “Nalai naxolu 'alai no anu tava'u tamei e oosi ulapunu.” 30 La sou Pilipi muiave mulai no 'a tava'u tamei e oosi ulapunu ne la mulomusou itema ne mii ne uitiiti no 'a lavuku noxou Aisaia e itema sou palomatana. La sou Pilipi mutali'isou lexe, “Nini nelavusou mii ma'ia ane nini naitisou ne.” 31 La anu muvikala lexe, “Lexe itema vile ulamanalixu noxilo uasi, la sou eni alavusou a loxovaa?” La sou anu mu'avalou Pilipi mutelo sou muxolu muvaisa'inu, 32  c itema sie Etiopia ne io anu muitiiti no anu Lavuku Tavuna teinu mautunu ane ne muvikala aloxo 'o,

“Itema miulaxunu loxo sipsip sou milai mivau musoli.
Mo Anu loxo sipsip 'olu e ta mitema mixotosou laxusou,
ia Anu utulu tasiausi, mo uvikala uasi.
33 Ta mitema milu'elaixu mo mitulusou no anu vaivaikala
ia ivelunu 'ilixo noxou laixe uasi.
Evile umomomo sou ua'aloxa'a ta xaixasou uasi,
xo mixexeenu mo uxolu no lia 'o la uasi.”
34 Xe muitiiti mukalu, la mutali'isou Pilipi aloxo 'o, “Navikalaleli lexe itema sou palomatana 'o mu'oxonu a'alo ne sou 'o, sou itema vile mo?” 35 La sou Pilipi muavuti sou musoko mua'alo no anu Lavuku Tavuna e itema muitisou ne la mua'aloxu a'alo laixe noxou Iesu. 36  d Ane'i mimulinu vote'i milalai, la mixali no lexa vile. Xe itema sie Etiopia ne muavuti la muvikala mu'oxe, “Namalei lexa 'o mii ma'ia ane utaluxo la sou eni aulo uasi.” 37 Xe Pilipi muavuti la muvikalanu, “Lexe nini namuxaxu taneni ukalusi, la nini umomomo sou na'ulo.” La anu mukolinu vaikala aloxo 'o, “Eni amuxaxu taleli lexe Iesu Kalisito ne Anu Lataua 'Olu.” 38 La sou anu itema ne muvikalanu itema sou utavulenu tava'u tamei e oosi mulapunu sou utulusou la mutulu. Io Pilipi ilou itema ne mikei milu'e no lexa. No nano no lexa la Pilipi mu'ulosou. 39 No mine ane'i me'a no lexa miuatu no ale la Tila Uleenu mupalea muno'u Pilipi mulai va'axu. Mole itema sie Etiopia ne umomomo sou umaisou la uasi, ia anu mu'osa'osasi sou mulai no tuala. 40  e Pilipi tasiauxu ne la muxali ne Azoto. La sou mumuamua'i sou mua'aloxu a'alo laixe sou Iesu Kalisito no tuatuala ta tatila mukalusi ne xo mole muxali ne Kaisalia.

Copyright information for `ATA