a9:1Apo 8:3
b9:15Apo 26:2, 6, 27:24; Rom 1:5
c9:162Ko 11:23-28
d9:21Apo 8:3
e9:22Apo 18:28
f9:252Ko 11:32-33
g9:26Xal 1:17-19
h9:271Ko 9:1

Acts 9

Saulo Muxiu Opoonu

a No voxo ane 'o, la Saulo ne la'iaxu mu'oki mo masaxa lexe uve'a ta molomolo noxou Tila sou isoli. La sou anu mulai muxali noxou kisi'a ta aili'i noxou Lataua, sou mutali'isou lexe ukaukavunu uoli voloxu mo ulosou sou ulaixu noxi'a ta kisokisou no 'a taasou lalotu noxi'a ta Iutaia ne Temasukasi. Sou lexe anu uxalisi'a ta mulu mo ta sema mose'i ane'i mimulinu vote'i noxou Iesu ane'i ane ixolu lai ne, la anu utetelisi'a mo usakisakine'i sou une'ene'i ne Ielusalemu. Ioxe mu'oxonu aloxo ne xe mune'e 'alai ne Temasukasi, xe alaxu vilesisi 'o la lamana molu teitexi no opo loxotolo mukaa xaviinu mulu'e muieisou. La sou anu mulapau mulai no lia, io mulomusou itema vile muvikalanu lexe, “Saulo, Saulo, Loxovaa la sou nini na'oxonu masualeli 'o?” La sou Saulo muavuti, la mutali lexe, “Nini 'ena'ei, nini Tila?” La sou Anu mukolinu, “Eni Iesu e nini na'oxo masumasualeli. Ia natulu mo nalai na'una no 'a tuala tila ne, la sou ivikala nenixu mii ma'ia ane sou nini na'oxonu.” Ta mitema ane ilo'a Saulo mimuamua'i ne mitulu tasiausi, ane'i milomusou itema vile muvivikala ia imaisou uasi. Xe Saulo muavuti no lia sou mutulu xe iou mukaa la mumaisou mivile uasi. La sou ane'i mitila'u no avolu sou mi'unalaixu ne Temasukasi. Anu muxolu voxo tatalu ne iou isivoxosi mo u'ani xe uie uasi.

10 Itema vile anu muxolu ne Temasukasi ualasou lexe Ananiasi anu molomolo vile noxou Iesu. Tila mu'ava mune'e noxou no anu mii loxo aipiepienasi aloxo 'o, “Ananiasi.” La anu mukoli 'ava lexe, “Tila, eni ano 'o.” 11 La sou Tila muvikalanu aloxo 'o, “Nalutu mo nalai no tani noxou Iudasi no 'a vote'i ane ualasou lexe ‘vote'i muisalili.’ La natali'isou itema vile ualasou lexe Saulo sie Tasisi, anu a uxoxolu sou ulinga ulai noxou Lataua. 12 Xe no anu mii e loxo aipiepiena ne la anu mumaisou itema vile ualasou lexe Ananiasi une'e la umulaxu avolu no kisou lexe sou iou lamana la.” 13 Xe Ananiasi muavuti la mukolinu aloxo 'o, “Tila eni elomusou a'alo ta piena sou itema ane ne, mo 'ili'ilixo masumasua ane anu mu'oxo noxi'a ta mitema noxine ne Ielusalemu. 14 Mo anu muno'u xavi noxi'a ta kisikisi'a ta aili'i la sou anu mune'e ne sou lexe utetelisi'a mo usakisakine'i ane'i ukalusi, xo ane'i ne ilotu mo ilinga no 'a ualasine.” 15  b Ia Tila muvikalanu la aloxo 'o, “Nalai, xo eni esosovosou itema ane ne sou uxali itema sou xaixai noxilo sou ua'aloxu ualasilo ulai noxi'a ta mitema ane'i ane ta Iutaia uasi, mo ta tatananu tuala, mo ta Isilaeli ta 'ilu'ilusune'i kalumo. 16  c La Eni alosou tu'utu'umaxu ta piena sou anu utavulenu no mine anu ua'aloxu ualasilo.” 17 Ioxe la sou Ananiasi mulutu mulai sou mu'una no tani ane ne, la mumulaxu avolu no kisou xe muxexee la muvikala lexe, “Vivilo Saulo, Tila Iesu e mupalaa noxine no vote'i no mine nini nene'e 'o, mupalusilo ene'e noxine sou lexe nini namalei lamana mo na'ana'ana no anu Uleenu Tavuna.” 18 Xe alaxu vilesisi 'o, la mii loxo sinana xaxasinu e muxolu no iou ne mulapau sou muxexesou iou la anu mumalei la. La sou anu muavuti mu'ulosou, 19 mo mu'ani la'ilali, la sou anu xaviinu mulivu muxali la.

Saulo Musoko Xaixai ne Temasukasi Xe ne Ielusalemu

La sou Saulo ilo'a ta molomolo noxou Iesu mixolu voxo mose'i la ne Temasukasi.
20 Mukalu, la sou anu muavuti sou musoko mua'alo no taasou lalotu noxi'a ta Iutaia lexe Iesu Anu Lataua 'Olu. 21  d Xe ta mitema mukalusi ane milomusou a'alo noxou ne la ane'i mikuluke la mitali'i lexe, “Loxovaa, itema ne mu'oxo masua noxi'a ta mitema ane milotu mo milinga no 'a ualasou Iesu ne Ielusalemu, anu ane? Mo tava'u aloxo ne la sou anu mune'e lai 'o, sou usakisakine'i mo ulaixa'a noxi'a ta tatilasi'a ta aili'i?” 22  e Ia Saulo xaviinu muxali tatila sou mua'alo lamana laixe noxi'a ta Iutaia ane'i ane mixolu ne Temasukasi ne lexe Iesu ne Anu Kalisito. Ane'i milomu a'alo aloxo ne la ane'i tane'i lilisi ia mixolu. 23 Ili'i xe voxo ta piena mukalu, la sou ta Iutaia misakii vaikala sou lexe ivau usoli. 24 Ia Saulo mulavusou xavutalai'a ne. Ane'i milutu la sou no aso mo no 'olovoxo no anu tuala tila aiaitengaxu sou lexe ivau usoli. 25  f Ia ta molomolo noxou mino'u no 'olovoxo ka mitaanu no 'a lakela tatila io mikalaanu muuatu no taxa sou mi'italonu mulu'elai no ale no anu vimelu sou tuala tila ne. 26  g Anu mulai xe muxali ne Ielusalemu la anu mutovo sou lexe upita noxi'a ta molomolo noxou Iesu, ia ane'i mukalusi ne mi'umolu, xo mimulaxu tane'i lexe anu ta molomolo vile noxou Iesu manina ane ne uasi. 27  h Ia Valunavasi muno'u sou mulaixu noxi'a ta mitema sou xaixai. Anu mua'aloi'a sou Saulo mumaisou Tila mo Tila muvikala noxou no vote'i, mo mua'aloi'a kalumo sou mua'alo pekia'u no anu ualasou Iesu ia u'ume uasi ne Temasukasi. 28 La sou Saulo muxolu noxi'a ne mo muxixao papaxe no nano ne Ielusalemu sou muvikala pekia'u no anu ualasou Tila. 29 Anu muvivikala la ilo'a ta Iutaia ane milavusou ivikala no anu vaikala Xiliki, mi'oto sou anaxa'a. La ane'i mitovo sou lexe ivau usoli. 30 No mine ta vimovimou milavusou xavutalai'a ne, la ane'i misaxanu milu'elaixu ne Kaisalia mole mipalusou mulai ne Tasisi. 31 Aloxo ne la sou, ta mitema sou lalotu no nano mukalusi ne Iutaia, mo Xalilaia xe Samalia milavusou la sou ta mitema mixolu se'isisi laixe. Xo Uleenu Tavuna musu'uline'i mo mu'oxo pekia'a la sou ane'i mixali ta piena mo no 'a maulixa'a ne la ane'i mimama'u mo mixolu no laaxu Tilasi.

Ainiasi Ilee Dokasi

32 Ioxe, no mine Pita muavuti xe mumuamua'i mulai no xalexalee tani mukalusi no lia tila ane ne, la anu mununa mumaisi'a ta mitema noxou Lataua e mixolu ne Luda. 33 Anu mulai ne la muxalisou itema vile ualasou lexe Ainiasi ne vasimolu misoisoli io muai no luu tauu ie muxatele tatalu. 34 Ia Pita muvikala mulai noxou aloxo 'o, “Ainiasi, Iesu Kalisito upamaulineni mo nini naxali laixe. Naavuti natulu mo napaipounu luusine.” Xe alaxu vilesisi anu muavuti mutulu. 35 La ta mitema mukalusi ane mixolu ne Luda mo Saroni ne mimaisou aloxo ne, la ane'i mixiu opone'i sou milai noxou Tila.

36 Sema molomolo vile noxou Iesu ualasie lexe Tavita ualasie no anu vaikala Xiliki lexe Dokasi mixolu no tuala ne Iopa. Ane ne ilavusou i'oxo 'ili'ilixo laixe mo ilavusou isu'uline'i ta mitema ane i'a mimii uasi. 37 No voxo ane ne la ane mipipiena mo misoli. La vasimele ne mi'ulosou ka mimulaxe no 'a tani lalaxu ane teitexi. 38 Tuala ne Luda ne muxolu 'alai se ne Iopa nesi. La sou no mine ta molomolo noxou Iesu milomusou Pita lexe anu a muxolu ne Luda, la ane'i mipalusi'a ta mulu ta tamei milai noxou sou milingau lexe, “Nini napalea nane'e noxixe io navoxovoxo mamu.” 39 Ioxe Pita muavuti, la ilo'a ilou milai, xe milai mixali la ane'i milai mino'u mitelaixu no 'a tani lalaxu ane teitexi. Ta sema ta vaalu mukalusi mitulu mixaliline'i, ia mitatama xe mimaxamaxa'u tokolomo veveeni mo tokolomo se'i la, ane Dokasi mi'oxonu no mine ilo'a mixoxolusi 'o. 40 Ia Pita mupalusi'a milailai no ale mukalusi, io sou anu mulu'e muxo no 'a tava'u vulenu sou mulinga noxou Lataua. Xe mukalu la muxiu mulai no anu vasimele sema e misoli ne, io muvikala lexe, “Tavita naavuti natulu.” La ane iei mukaa la, xe mimaisou Pita, la ane miavuti mitalupexa. 41 Anu mutetelisie no avolu io musu'uline sou mutulusie, ka Pita mu'avali'a ta mitema noxou Lataua ilo'a ta sema ta vaalu mine'e sou anu mumaxae noxi'a lexe ane mimauli la. 42 Ta mitema ta piena ne Iopa mukalusi ne milomusou a'alo sou mii ane Pita mu'oxonu ne, la ta mitema ta piena mimulaxu tane'i noxou Tila. 43 La Pita muxolu voxo ta piena ne Iopa noxou itema vile ualasou lexe Saimoni. Saimoni ne anu itema sou u'oxonu mii iouiou no anu ta mimii sosoie'i.

Copyright information for `ATA