a4:1Ep 6:9
b4:2Ep 6:18; Pil 4:6
c4:3Rom 15:30; Ep 6:19
d4:5Ep 5:15-16
e4:6Ep 4:29; 1Pi 3:15
f4:7Ep 6:21
g4:8Ep 6:22
h4:9Plm 10-12
i4:10Apo 12:12, 13:13, 15:37-39; 2Ti 4:11
j4:12-14Kol 1:7; Plm 23-24
k4:17Plm 2
l4:181Ko 16:21

Colossians 4

a Aloxo ne la sou ngingi ta tatilasi'a ta mitema ane ixaxai vitanisi noxinge ne, laixe lexe nga'oxonu 'ilixo laixesi mo mulapu ulai noxi'a. Xo ngingi ngelavusou lexe ngingi Tilasinge vile a uxoxolu teitexi no opo loxotolo.

'Ilixo sou Lakilaka Xe 'Ilixo sou Muamua'i Laixe

b Ngapilixinu maulingenge lololinu no anu 'ilixo sou lakilaka. Xe no mine ngakilaka la ngalaxa'ingengi laixe mo ngalemolu laixe ulai noxou Lataua. c Mo ngakilakasixe kalumo, mo sou Lataua ukisiinu aitengasou a'alo laixe noxou e nexi taa'aloxu. A'alo laixe noxou Kalisito ne tei la mutalume ia vaimomo 'o anu muxali lamana mukalu. Ia ta mitema imasaxa lexe ilomusou a'alo laixe ne uasi, la sou mi'italoleli no nano no taasou navunavu. Mo ngakilaka lexe no mine eni aa'aloxu a'alo laixe ne la ulamana xe umulinu masaxa noxou Lataua. d Mo no mine ngingi ngongi'a ane'i ane imulaxu tane'i noxou Iesu uasi, la utotomu ne ngatovonu sou ngalalaxiinu mo nga'oxonu 'ilixo laixesi ulai noxi'a. e Utotomu no anu vaivaikalamengi la nga'oxonu vaikala laixesi umomomo sou tu'axu no anu lolomu noxi'a ta mitema. Xe no mine itali'isinge no anu tali'i mose'i la anu laixe lexe ngakolinu no anu xavutala laixesi.

Vaikala sou Sexela Noxou Paulo Kaluxusou

f Tukikosi anu vivinge e tamasaxau manina mo nexi noxou taxaxai laixe utotomu noxou Tila, anu molu ua'alomengixu xaixai e eni a'oxo'oxonu 'o. g Eni epalusou mulai noxinge xo tava'u aloxo 'o. Anu ulai mo sou ua'alomengixu xoluxolunexe lai 'o a loxovaa xe u'oxonu pekia'inge no anu xoluxolungenge. h Eni epalusou Onisimasi a ilou ikei ilai noxinge. Xo Onisimasi ne anu vivinge maninasou e nenge tangengixu mo anu u'oxo laixe noxingesi. Ane'i ilou la sou ia'alomengixu mimii latala e muxali lai 'o.

10  i Alisitaluko, anu menexilo nexi noxou texolu no nano no taasou navunavu mo musovanu aso laixe noxou mulai noxinge mo Maluko e anu Valunavasi iau musovanu aso laixe noxou kalumo mulai noxinge. Lexe anu ulai noxinge la anu laixe sou ngasexelaxu mo ngano'u, aloxo evikalangengixu mukalu ne. 11 Mo Iesu, ualasou vile ilemolu lexe Iasitusi, musovanu aso laixe noxou kalumo ulai noxinge. Ane'i tatalu ne ane'i ta Iutaia e imulaxu tane'i noxou Iesu nexi noxi'a e taxaxai tapita, mo misu'ulileli laixe manina sou nexi noxi'a taa'aloxu saxisaxila'u noxou Lataua. 12  j Mo temanu tualasinge Epapalasi musovanu aso laixe noxou ulai noxinge kalumo. Anu itema vile sou xaixai noxou Kalisito Iesu. Utotomu ne anu ukilakasinge pekia'u lexe ngingi ngatulu pekia'inge mo ngamulinu masaxa noxou Lataua xe nga'oxonu loxo ngingi totoxongengi no anu mo ngamulaxu tangengi no anu mimii ukalusi. 13 Eni amasaxa lexe avikalangengixu aloxo 'o. Anu uxaxai xaviinu manina sou usu'ulingengi ngongi'a ta temanu lalotu ne Laodekia xe tuala tila ne Ielapolisi. 14 Mo Luka anu dokuta e nexi temasaxau musuku ilou Temasi misovanu aso laixe noxi'a ulai noxinge kalumo. 15 Mo eni emasaxa lexe ngingi ngasovanu aso laixe noxilo ulai noxi'a ta vivinge no tuala tila ne Laodekia mo ulai noxie Nimpasi ilo'a ta temanu lalotu ixoxolu no taasie. 16 No mine ngingi ngaitisou uoli voloxu noxilo 'o ukalu la laixe lexe ngalosi'a ta temanu lalotu ne Laodekia sou iitisou kalumo, xe ngingi la ngano'u uoli voloxu ane noxi'a ta Laodekia la ngaitisou. 17  k Mo ngavikalanu Akipasi lexe, “Naxaxaisou xaixai noxou Tila e mulosine laixe mo nakalusou.” 18  l Vaivaikala ane 'o eni Paulo melo ekaukavunu no avolo sou asova aso laixe ulai noxinge. Ngaxavutalaleli xo eni a axoxolu no taasou navunavu 'o. Eni akilaka lexe alauna noxou Lataua uxolu noxinge.Utotomu mo kaluxu uasi. Manina.

Copyright information for `ATA