a1:1Apo 18:19-21, 19:1
b1:3Ep 2:6
c1:4Ioa 15:16
d1:5Ioa 1:12
e1:7Ep 2:7; Kol 1:14
f1:9Rom 16:25
g1:10Kol 1:16, 20
h1:11Rom 8:28-29
i1:142Ko 1:22
j1:17Kol 1:9
k1:19Kol 1:11
l1:20Lex 110:1; 2Ko 13:4; Kol 2:12
m1:21Kol 1:16, 2:10
n1:22Lex 8:6
o1:23Rom 12:5; Ep 4:10, 15; Kol 1:18

Ephesians 1

a Eni Paulo aposeli noxou Kalisito Iesu no anu masaxa noxou Lataua mupalusilo sou akaukavunu vaivaikala ane 'o ulai noxinge ngingi ta mitema noxou Lataua, mo ngingi ane ngemuxaxu tangengi noxou Kalisito Iesu ne Epeso. Eni akilaka lexe alauna mo opo se'isisi noxou Lataua Maminge mo Tila Iesu Kalisito uxolu noxinge.

Alualu Noxou Kalisito Mune'e Noxinge

b Ta'itinu Lataua ualasou anu Tila noxinge Iesu Kalisito Momu. Noxou Kalisito la sou Anu mualusinge no anu mii lailaixe teitexi no opo loxotolo sou usu'uli uleenenge. c Xo no mine Anu ukoinu mimii uao la, Anu musosovosinge. Mo no iou Lataua la nenge malemalenga mo ta noxou la, ta mitema ixalisou susu vile noxinge uasi. d No anu tanutanuxu noxou Lataua la Anu xavutalau lexe, noxou Iesu Kalisito la Anu umoxo'inge lexe nenge taxali loxo anu ta 'olu. Anu tanu mo masaxa tatila noxou aloxo ne. La sou nenge ta'itinu Lataua ualasou no anu alauna lailaixe ane Anu mulosinge vitanisi muxolu noxou Iesu anu ane Anu tanuxu musuku. e Alauna tatila mu'ana'ana noxou Lataua la muno'u 'ulusinge no anu sialuxu Iesu. La sou Anu mululusou susu noxinge no anu alauna noxou. No anu alauna noxou la Anu mu'ana'analinenge no anu xavutala laixe mo lavulavu lailaixe. f Mo Anu mumolo tanuou mii mai'a ane lexe Anu u'oxonu no anu xaixai naxou Kalisito. Ia xavutalau ne tei la mutalume, ia vaimomo 'o Anu mulosiengexu xavutala noxou ne. Anu u'oxonu manina sou ne. 10  g Xavutala ne aloxo 'o, xavutalau ne. Mo voxo ulai ukalu la Anu mupitanu mimii latala teitexi no opo loxotolo mo no lia 'o mukalusi ne muxolu loxo kisi'a Kalisito.

11  h Mo noxou Kalisito la sou Anu xavutala mo masaxa noxou anu ane mu'oxonu mimii latala mukalusi ne musosovosixe lexe nexi ta na'u maninasou. 12 Anu musosovosixe ta Iutaiasi tei, xo nexi teloopala noxou Kalisito. La sou nexi ta'itinu Lataua no anu alauna lailaixe noxou ne. 13 Mo ngingi kalumo ngelomusou vaikala manina noxou Kalisito. La sou ngexali ngexolu noxou la anu a'alo lailaixe sou Lataua mupamaulingengi. Mo ngemuxaxu tangengi noxou Kalisito la sou mumomomo sou vaikala noxou Lataua e musakii tei lexe umulaxu sosovo vile noxinge. Sosovo noxou ne ane Uleenu Tavuna noxou. 14  i Nenge teno'u Uleenu Tavuna la sou nenge tamomomo sou tano'u mimii lailaixe teitexi no opo loxotolo ane Lataua mulalaxiinu sou ulosi'a tamitema noxou. La sou nenge ta'itinu ualasou no anu alauna noxou singe.

Lakilaka Noxou Paulo

15 Aloxo ne la sou no mine eni elomusinge lexe ngingi ngemuxaxu tangengi noxou Tila Iesu mo ngingi tangengixa'a ta mitema noxou Lataua. 16 La sou eni axavutalangengi no anu lakilaka noxilo mo alemolu laixe noxou Lataua utotomu. 17  j Mo utotomu ne eni akilaka ulai noxou Lataua e Tila noxinge Iesu Kalisito. Anu Maminge xavi musuku lexe ulosinge Uleenu sou ulosinge xavutala lailaixe, mo ngalavusou Lataua laixe, xe upalapala'alixu laaxu vaivaikala noxou ane mutalume. 18 Mo eni akilaka kalumo lexe ukisiinu xavutalamengi mo sou xavutalamengi ulamana no anu mii ma'ia ane anu mu'avalinge la ngingi ngeloopala no anu, mo ngalavusou laixe lexe lavuluti lailaixe ne Lataua ulosi'a ta mitema noxou. 19  k Mo eni akilaka lexe nenge ta mitema ane tamuxaxu tanenge noxou ne, talavusou xavi noxou Lataua a uxolu noxinge. Xavi noxou Lataua e uxaxai noxinge ne anu uxaxai la xavi musuku umomomo sou tatilovo sou uasi. 20  l Xe no mine musoli la no anu xavi noxou Latauasi la mutulusou. No anu xavi ano 'o la Lataua mulaixu sou muxolu no avolu tema teitexi no opo loxotolo. 21  m La Anu muxolu kisi'a ta uleenu ane mixolu teitexi no opo loxotolo, mo muxolu kisi'a ta mitema e iulaxune'i ta mitema no lia 'o mo ta tatila no lia ukalusi 'o xe ta uleenu ane xavine'i musuku kalumo. Anu muno'u uala tila manina. Uala tila ne sou vaimomo 'osi uasi, sou 'ili'i kalumo. 22  n Mo Lataua mumuxaxu mimii latala muxolu no laaxu mo musosovo sou lexe Anu uxolu kisou mimii latala ukalusi, mo uxolu kisou noxi'a ta mitema ilotu noxou Iesu. 23  o Lalotu ne anu Kalisito vasimolu. Anu muxolu mo mu'ana'ana no anu mimii latala mukalusi mo mu'ana'ana no anu lalotu noxou.

Copyright information for `ATA