a2:1-5Kol 1:21, 2:13
b2:2Kol 3:7; Tit 3:3
c2:3Kol 3:6
d2:4-5Rom 6:11-13
e2:6Kol 2:12
f2:8-91Ko 1:29-31; 2Ti 1:9
g2:10Tit 2:14
h2:12Rom 9:4; Kol 1:21
i2:13Kol 1:20
j2:141Ko 12:13
k2:15Kol 2:14
l2:16Sek 9:10; Kol 1:20, 22
m2:17Ais 57:19
n2:19Ep 3:6
o2:201Ko 3:11
p2:211Ko 3:16
q2:221Pi 2:5

Ephesians 2

Nenge Tesoisoli Ia Kalisito Mutulusinge

a Ngingi tei la nge'oxo'oxonu 'ili'ilixo masumasua mo susu la muvau ulengengi musoisoli. b No mine ngingi ngemulimulinu xoluxolu mo muamua'i masumasua sou lialia 'o, mo ngemulinu 'ilixo noxou kisi'a ta uleenu ta masumasua e musaxila'u la va'a vitanisi teitexi no loxotolo. Anu uleenu ne ane uxolu uxaxai no nano no anu maulixa'a ta mitema ane mose'i ilolomu uasi vaimomo 'o. c Nenge nenge'a tei la texolu no taine'i mo xavutalamenge muavuti la temulimulinu masaxa masua sou vasimenge sou umomomo sou masaxa no anu vasimenge. Nenge te'oxonu aloxo ne, la nenge kalumo texo no nano no anu la'ia noxou Lataua ane Anu mulalaxiinu sou ulosi'a ta mitema ukalusi ane mose'i imulimulinu 'ili'ilixo ane ne. d Manina susu noxinge te'oxo'oxonu la muvau uleenenge musoisoli, ia xo no anu alauna mo tanu tanuxu lailaixe noxou Lataua mu'ana'ana no anu alauna misevile la sou mutulusinge temauli noxou Kalisito. Ani no anu alauna tatila noxou Latauasi la sou Anu mupamaulingengi. e Mo Anu mutulusinge nenge'a Kalisito la mupalupexasinge no pa'umolu teitexi no opo loxotolo mo nenge'a Iesu Kalisito texolu tepita. Anu mu'oxonu aloxo ne noxinge mo u'oxonu kalumo noxi'a ane'i ane ili'i. Anu mu'oxonu aloxo ne sou umaxa'u alauna tatila noxou singe noxou Kalisito Iesu. Alauna tatila noxou ne umomomo sou tatilovo sou uasisi manina. f La sou no anu alauna noxou la, Anu mupamaulingengi xo ngingi ngemuxaxu tangengi noxou. Mii ane 'o, nga'itinu ualasinge lexe ngingi nge'oxonu muxali no anu xaixai noxinge, mo lakolisou xaixai noxinge uasi. Anu Lataua molusi mulosinge vitanisi. 10  g Lataua anu mukoinenge, la sou Anu mupuinenge. Sou nenge tamuamua'i no anu vote'i sou 'ilixo laixe ane Anu mulalaxiinu tei lexe nenge tamulinu.

Noxou Kalisito La Nenge Taxali Vilesisi

11 Aloxo ne la sou ngingi ane ngaxali no anu mata noxi'a ta Iutaia uasi ngaxavutala ulivu. Ta Iutaia ilemenge lexe ngingi xooxoo ungasinge uasi, ia ane'isisi xooxoo mungasi'a. 'Ilixo ane ne i'oxo noxi'a ta mulusi vasime'a mo ixaxaisou no 'a avo'a. 12  h Mo ngaxavutala ulivu, tei no mine ngingi ngamuxaxu tangengi noxou Kalisito uao, la ngingi ngexolu va'axu noxou. Mo ngaxavutalanu laixe, tei la ngingi ngexolu loxo ta asila mo ngexali no anu mata noxi'a ta Isilaeli uasi. Lataua musakiinu vaikala mo mulosi'a ta Isilaeli lapuloto, la ngingi ngexolu va'axu noxi'a. Mo no mine ngingi ngexoxolu no lia 'o la ngaloopala sou ngano'u mii vile laixe ili'i uasi mo ngalavusou Lataua uasi. 13  i Mo tei la ngingi ngexolu no paxa manina. Ia vaimomo 'o, no anu sialuxu Kalisito la muno'inge ngelivu mune'e 'alai noxou mo ngexolu ngepita noxou Kalisito Iesu.

14  j Xo noxou Kalisitosi la mulosinge opo se'isisi mo mu'oxonu xoluxolungenge muxali laixe. Tei la ta Iutaia mimolosilangengi mo mikalipalangengi. Ia noxou Kalisito la mumamulonu vimelu e muxolu no taingengi la ngingi ngexali vilesisi. 15  k Mo anu soli noxou la Anu mumamulonu lapuloto noxou Mosesi mo vaivaikala maumautunu ilou lapuloto sou. Anu mu'oxonu aloxo ne sou mupitane'i ta mitema la'oluxa'a ta tamei ne, mixali alavua mo vilesisi. No anu 'ilixo ane ne la sou Anu muxalilixu opo se'isisi no tainenge. 16  l Mo no anu soli noxou no ovu valautu la Anu mupitane'i ta mitema la'oluxa'a ta tamei ne mixali vilesisi mune'e noxou Lataua. No anu ovu valautu ne la Anu mukalusou 'ilixo sou imolomolosilangengi ne. 17  m Mo Anu mune'e la mua'aloxu a'alo laixe sou opo se'isisi. Anu mua'aloxu noxi'a ane'i ane mixolu 'alai xe noxi'a ane'i ane mixolu no paxa kalumo. 18 La sou no anu mii ma'ia ane Kalisito mu'oxonu ne mukisiinu vote'isinge ta Iutaia xe ane'i ane ta Iutaia uasi. Mo no anu Uleenu vilesisi muxolu noxinge la sou nenge tamomomo sou talai noxou Maminge.

19  n Ngingi nge'oxonu aloxo ne la sou ngingi ngexolu loxo ta asila la ua, ngingi ngexali loxo ane'i mo ngexali ta mitema noxou Lataua xe ngexali Lataua ta 'olu. 20  o Mo ngingi ngexali loxo tani Lataua mutulusou. Nexi ta mitema ane Iesu mupalusixe, mo ta mitema sou palomatana, nexi aloxo lavo'o sou tani tava'u. Ia Kalisito Iesu Anu loxo lavo'o mutila manina sou tani tava'u ne. 21  p Noxousi, xe nenge nenge'a tapita la tani lololinu ne utulu. Anu utulu la uxali taasou lalotu tatila noxou Tila sou talotu ulai noxou Lataua no anu. 22  q Mo noxousi la Anu mutulusinge kalumo la ngexali taasou Uleenu Lataua sou uxoxolu no anu.

Copyright information for `ATA