a3:1Pil 1:7, 13
b3:2Kol 1:25
c3:3Ep 1:9-10; Kol 1:26
d3:6Ep 2:13, 16-19
e3:7Kol 1:25
f3:81Ko 15:9-10
g3:12Ioa 14:6; Rom 5:2
h3:17Ioa 14:23; Kol 1:23, 2:7

Ephesians 3

Paulo Mua'aloxu A'alo Laixe sou Iesu Mulai Noxi'a Ane'i Ane ta Iutaia Uasi

a Tava'u xo eni Paulo itema sou xaixai noxou Kalisito Iesu esu'ulingengi ta mitema ane'i ane ta Iutaia uasi, la sou exolu no nano no taasou navunavu. b Eni elavu sou lexe ngingi ngelomu sou lexe no anu alauna noxou Latauamenge, la Anu musosovosilo sou a'oxonu xaixaisinge noxou. c Mo mii ma'ia ane mutalume tei ne mupala'a noxilo la sou eni ekaukavu sevile no anu tei ne. No mine ngingi ngaitisou la sou ngingi ngamomomosou, ngalavusou lexe eni elavu manina no anu mii ma'ia mutalume noxou Kalisito. Mii ma'ia ane mutalume noxi'a ta mitema ane tatei, vaimomo 'o Uleenu mupala'alixu noxixe ta mitema sou ane Iesu mupalusi'a mo ta mitema sou palomatana noxou. d Mii ma'ia ane mutalume ne aloxo 'o, no anu a'alo laixe sou Iesu Kalisito la mu'oxongengi ta mitema ane'i ane ta Iutaia uasi nenge'a taxali vilesisi. Mo ngingi ta mitema ane'i ane ta Iutaia uasi ngano'u mii ma'ia ane Lataua musakiinu vaikala sou tei noxou Iesu lexe ta Isilaeli ino'u ne. No anu xaixai noxou Kalisito Iesusi la ngingi ngano'u kalumo.

e Lataua mu'oxoleli exali amitema sou xaixai noxou. Mo no anu alauna noxou la Anu mulosilo xavi noxou la sou eni exali itema sou xaixai noxou. Sou a'aloxu a'alo laixe sou Iesu. f Mo ta mitema noxou Lataua ne miua'ulixo, ia eni ne uasisi manina mo amii vitanisi. Ia Anu mualaunasilo laixe la mulosilo xaixai sou aa'aloxu a'alo sou mimii laixe sou Kalisito e tatilovo sou uasi ulai noxi'a ta mitema ane'i ane ta Iutaia uasi. La sou vaimomo 'o eni a'oxonu ulamana noxinge aloxo 'o. Lataua mukoinu mimii latala mukalusi la mimii latala anu mutalume iou noxi'a ane'i tatei. Ia vaimomo 'o Anu mulosilo xaixai sou a a'aloxu mimii ma'ia ane mutalume ne. Anu u'oxonu uxali maninasou. 10 Tei la Anu mutalume iou ia vaimomo 'o la Anu mu'oxonu lalotu noxou muxali. Mo anu mumasaxa lexe no anu lalotu noxou la ane'i ane mixolu teitexi no loxotolo mo ta tatila noxi'a ta uleenu e misaxila'u loxotolo ilavusou mo imaisou xavutala lailaixe iouiou noxou ne uxali lamana noxi'a. 11 Tatei manina la Lataua muxavutala lexe u'oxonu mii ane kaluxu uasi ne uxali, ia vaimomo 'o no anu xaixai noxou Kalisito Iesu Tila noxinge, la sou Anu mu'oxonu mimii ne muxali manina. 12  g Xo nenge noxou Kalisito, mo nenge temuxaxu tanenge noxou Kalisito la sou nenge tamama'u sou talai noxou Lataua uasi.

13 La sou eni avikalangengi aloxo, ngaxavutala malaxo no anu tu'umaxu ane noxilo singe 'o uasi xo eni a'itingengi.

Lakilaka Noxou Paulo Si'a ta Epeso

14 Tava'u aloxo 'o, la sou eni axolau tava'ilo vo'uxu ulu'elai no talaxu la akilaka ulai noxou Maminge. 15 Ane'i ane mixolu teitexi no opo loxotolo xe ane'i ane ixoxolu no lia 'a. Mo Anu molu mumoxo'u ualaualasi'a, mo ane'i loxo ta mata noxou. 16 Eni akilaka ulai noxou Maminge lexe, no anu mimii tavu'alo lailaixe iouiou noxou, la Anu u'ana'analingenge no anu xavi Uleenu noxou mo uxolu no nano noxinge, la u'oxonu pekia'inge. 17  h La sou Kalisito umomomo sou uxolu noxinge xo ngingi ngemuxaxu tangengi. Mo eni akilaka lexe 'ilixo sou tangengi noxou Lataua tanengingenge ngatongato'o uxali utila no anu maulingenge. Mo usiatoto loxo ovu uli'u ulu'elai no lia. 18 Mo ngingi ngongi'a ta mitema noxou Lataua ngano'u xavi, mo ngalavu sou manina 'ilixo noxou Kalisito sou tanuxa'a ta mitema. Masaxa noxou ne mutila manina mo veveeni manina mo mulai teitexi manina xe mulu'elai no lia manina. 19 La sou ngingi ngelavusou 'ilixo noxou Kalisito sou tanungenge ne anu mutila manina mo muaulixu lavulavu. Ia ngingi ngelavusou, la sou mimii ane noxou Lataua ne anu u'ana'analingenge no anu.

20 Ia noxou la Anu umomomo sou u'oxonu mimii tavu'alo. Mimii ane ne mua'ulixu mimii ane nenge texavutalanu mo tekilaka. Ia no anu xavi noxou ane uxolu uxaxai noxinge ne, mua'ulixu mimii ane ne. 21 La sou no voxovoxo utotomu ta mitema ukalusi e ilotu noxou Iesu ta'itinu ualasou Lataua no ualasou Kalisito Iesu utotomu mo kaluxu uasi. Manina.

Copyright information for `ATA