a1:4Xal 2:20
b1:7Apo 15:1, 24
c1:81Ko 16:22
d1:101Te 2:4
e1:11Mat 16:17
f1:13Apo 8:3
g1:14Apo 22:3
h1:15Ais 49:1; Xal 2:7
i1:18Apo 9:26-27
j1:21Apo 9:30

Galatians 1

Eni aposeli Paulo. Ta mitema ipalusilo mo itema vile ulosilo xaixai ane 'o uasi. Ia Iesu Kalisito mulosilo xaixai ane 'o xe Momu Lataua e mutulusou no anu soli. Nexi noxi'a ta vivilo noxou Iesu e texoxolu 'o tekaukavunu uoli voloxo ane 'o ulai noxinge ta temanu lalotu ukalusi no xalee lia tila ne Xalatia. Nexi takilaka lexe alauna mo opo se'isisi noxou Maminge Lataua mo Tila Iesu Kalisito uxolu noxinge. a Anu Kalisito mumulinu masaxa noxou Lataua Maminge la muitalonu maulixu sou muxexeenu susu noxinge. Anu mu'oxonu aloxo ne, la sou musu'ulinenge sou muxexenenge no anu mauli masumasua sou lialia vaimomo 'o. Anu aloxo ne la sou laixe lexe nenge ta'itinu Lataua ualasou utotomu mo kaluxu uasi. Manina.

A'alo Laixe Vilesisi

Eni ekuluke manina no anu 'ilixo ngingi nge'oxonu ne. Xo no anu alauna noxou Kalisito la Lataua mu'avalinge sou ngexali ta mitema noxou, ia ngepalea alaxu vilesisi nge'ume la ngelai ngemulinu a'alo vilemo ane mupolo va'axu manina no anu a'alo laixe. b Ta mitema mose'i no taingengi itovonu sou ixovulaulaulingenge la ixiuxiunu a'alo laixe sou Kalisito ne. Ia a'alo laixe sou Kalisito ne anu vilesisi mo uxiuxiu uasi. Mo a'alo vile la uasisi manina. c A'alo laixe ne, nexi tea'alomengixu tei. Ia lexe nexi, uasi la angelo vile molu teitexi no opo loxotolo ulu'e ua'alomengi no anu a'alo iouvilemo loxo ane nexi tea'alomengixu tei ne, la itema ane loxo ne, anu uulua no navu kaluxu uasi.

Nexi tevikalangengixu tei mo vaimomo 'o eni avikalangengixu la. Ia lexe evile ua'alomengi no anu a'alo laixe iouvilemo no anu ane ngingi ngeno'u tei, la anu laixe lexe itema ne uulua no navu kaluxu uasi. 10  d Mo vaimomo 'o ngingi ngexavutala a loxovaa. No anu vaivaikala noxilo 'o? Eni a'oxonu sou ta mitema i'osasilo no anu, uasi ia eni a'oxonu sou Lataua u'osasilo. Lexe eni a'oxonusi sou ta mitema i'osasilo no anu la eni amitema sou xaixai noxou Kalisito uasi.

A'alo sou Paulo Mine Lataua Mu'avalou

11  e Ta vivilo, eni emasaxa lexe ngingi ngalavusou laixe lexe a'alo laixe e eni ea'aloxu noxinge tei ne, itema vile ukoinu vitanisi uasi. 12 Mo itema vile ulosilo mo itema vile ulosielixu uasi. Ia Iesu Kalisito molu mupala'alixu lamana noxilo.

13  f Ngingi ngelomusou a'alosou mimii eni e'oxo'oxonu tei no mine emulimulinu 'ili'ilixo sou lalotu noxi'a ta Iutaia, la e'oxoo masuane'i ta mitema noxou Lataua manina xe etovo sou lexe amamulonu lalotu ne ukalusi. 14  g Xo eni taleli utulu pekia'u manina sou amulimulinu 'ili'ilixo noxi'a ta 'ilu'ilusunexi. No anu 'ilixo ane ne la eni e'oxoleli euliuli noxi'a ta maulu ta Iutaia ane lasililinexe vilesisi. 15  h Ia no mine atie ivo'oleli uao, la Lataua musosovosilo xe no anu alauna noxou la mu'avalilo. Eni exolu mulai muxali no anu voxo anu molu musosovosou la sou, 16 Anu mupala'alixu 'Olu lamana noxilo. Anu mu'oxonu aloxo ne mo sou eni amomomo sou a'aloxu a'alo laixe sou 'Olu ulai noxi'a ta mitema ane'i ane ta Iutaia uasi. No mine Anu mupala'alixu ne, la atali'isou itema vile uasi. 17 Mo atelai ne Ielusalemu sou amaisi'a ane'i ane mixali ta aposeli tei noxilo uasi. Ia eni elutu alaxu vilesisi 'o la elai exolu no xalee lia vitanisi ne Alevia. Xe ili'i la sou elivu ene'e no tuala tila ne Temasukasi. 18  i Xe tauu lele'e tatalu mukalu, la sou eni etelai ne Ielusalemu sou eno'u lavulavu se'i noxou Pita. La nexi noxou texolu ne voxo mavulovexa mo mulu'e lia ta'uve (15). 19 No voxo mine eni elai exolu ne la amaisi'a ta aposeli mose'i uasi, ia emaisou Iakovo e Tila vimou kokope. 20 Vaivaikala noxilo e akaukavunu ulai noxinge 'o ne akalavoi uasi, evikala manina no iou Lataua. 21  j Xe ili'i la exixaoxao no xalee lia tila ne Silia xe ne Kilikia. 22 Ia ta mitema noxou Kalisito mixolu no 'a ta taasou lalotu no xalee lia tila ne Iutaia ne imaisou ieli tei uasi. 23 Ane'i milomusou a'alosilosi lexe, “Itema e tei la mu'oxo masuanenge, anu a vaimomo 'o muxiu mo ua'aloxo a'alo laixe no anu 'ilixo sou muxamuxaxu tanenge e tei la mu'oxoo masuanu.” 24 Ane'i milomusou a'alosilo aloxo ne, la mi'itinu Lataua ualasou.

Copyright information for `ATA