a2:1Apo 15:2
b2:4Xal 1:7, 5:1, 13
c2:7Apo 22:21
d2:10Apo 11:29-30
e2:12-13Apo 11:3
f2:16Apo 15:10-11; Rom 3:20-28; Xal 3:11
g2:20Xal 1:4

Galatians 2

Ta Aposeli Mi'osa sou Ilo'a Paulo Ipita

a Ioxe tauu ie mavulovexa mo mulu'e lia tami'a mukalu la nexi noxou Valunavasi tetelai ne Ielusalemu la. Nexi noxou telai la teno'u Tito noxi'a tekei tetelai. Eni elai xo Lataua molu mupalusilo sou lexe alai. Xe no mine exolu ne la noxi'a ta kisokisou no 'a lalotusi tevivikala, mo ea'aloi'axu a'alo laixe ane eni ea'aloxu mulai noxi'a ta mitema ane ane'i ta Iutaia uasi. Eni e'oxonu aloxo ne la evikala noxi'asi ane'i ane mi'oxo lexe ane'i ta kisokisou. Xo loxo 'o io ipupuiou xaixai noxilo e e'oxonu tei xe ane e'oxonu vaimomo 'o la uxali mii vitanisi. Ia uasi, xo Tito e nexi noxi'a telai ne anu Xiliki, ia ipalusixe lexe tapasipaa sou noxou talai mo xooxoo ungasou uasi. b Mimii ane ne muxali xo se'i ne ikalavoi lexe ane'i ta vivinge kalumo la mipakisi mi'una mixolu no anu pita noxixe. Ane'i mine'e mixolu no tainexi imamalei pakali sou ilomusou a'alosou mauli ma'ia Kalisito Iesu mu'oxonu noxinge no mine mululusinge no anu sakisaki sou temulimulinu lapuloto, la texolu vasimenge manamana'u. Ia ane'i imasaxa lexe i'oxonexi taxali ta mitema sou xaixai vitanisi. Aloxo ne, la sou nexi talomuxa'a uasi, texolu maxuveeni sevile, xo nexi temasaxa lexe a'alo laixe maninasou ne uxolu no anu maulingenge utotomu.

Ta mitema mose'i mixolu loxo ta tatila sou lalotu. Ia no anu xavutala noxilosi la ane'i ane mino'u uala tila xe ane'i ane ino'u uala tila uasi ne, anu mii vitanisi no iou Lataua. Xo Lataua ulavusou uxavutala no anu uala noxi'a ta mitema uasi. No anu vaivaikala noxilo la ta kisokisou e mino'u uala tila ne, ilemolu mii vile la uasi. c Ane'i mimaisou lexe Lataua mulosilo xaixai sou a'aloxu a'alo laixe ulai noxi'a ta mitema ane'i ane ta Iutaia uasi. Xe iouvilesisi aloxo mulosou Pita xaixai sou ua'aloxu a'alo laixe ulai noxi'a ta Iutaia. Lataua mulosou Pita xavi sou uxaxai loxo aposeli noxi'a ta Iutaia, la sou anu iouvilesisi aloxo ne. Anu mulosilo xavi sou axaxai loxo aposeli noxi'a ta mitema ane'i ane ta Iutaia uasi. Ta mitema mimaisi'a Iakovo ilo'a Pita ilou Ioanesi mixali loxo ta tatila no anu lalotu, ia ane'i mimaisou lexe no anu alauna noxou Lataua la mulosilo xaixai ane 'o, la sou milapu avoxe noxou Valunavasi sou misexelanexe sou texali loxo ta vimovimo'a maninasou. La sou nexi noxi'a tesakiinu vaikala lexe maasi la nexi noxou taxaxai noxi'a ta mitema ane ane'i ta Iutaia uasi ia ane'i la ixaxai ulai noxi'a ta Iutaia ulovo. 10  d Xe mivikalanexi noxou no anu mii vilesisi lexe no anu xaixai noxixe la taxavutalane'i ane'i ane i'a mii uasi mixolu no nano no lalotu noxi'a mo tasu'uline'i. Mii ane ne muxolu no anu xavutala noxilo tei sou lexe eni a'oxonu.

Paulo Muxililiu Pita

11 Ia ili'i no mine Pita mune'e ne Antioki, la eni elavixu no iou, xo anu mu'oxonu 'ilixo laixe uasi. 12  e Susu noxou ne aloxo 'o, no mine Iakovo ilo'a ane'i mose'i ixali uao, la Pita ilo'a ta mitema ane ane'i ta Iutaia uasi ilavusou i'ani'ani. Ia no mine ane'i mine'e mixalixali, la Pita mu'ume la muxolu va'axu noxi'a ta mitema ane'i ane ta Iutaia uasi ne. Xo mu'ume noxi'a ane'i xulumuxa'a ane ilavusou imulinu 'ilixo sou xooxoo ungasi'a pekia'u 'ole. Mo ta Iutaia mose'i mimulinu mi'una no anu kalavoi noxou ne, la sou no anu kalavoi ne mu'oxonu Valunavasi la mususunoxu. 14 No mine eni emaisou lexe ane'i imulinu vaikala manina sou a'alo laixe uasi, la sou eavuti la elavixu Pita no ie'i ane'i latala ne aloxo 'o, “Nini ne Iutaia, ia nini xoluxoluxene loxo ane'i ta mitema ane'i ane ta Iutaia uasi. Ia tava'u a loxovaa la sou nini natovo sou lexe na'oxone'i imulinu xoluxolu noxi'a ta Iutaia ne?

15 Nenge texali no anu mata noxou Iutaia no mine mivo'onenge, ia nenge taxali no anu mata noxi'a ane'i ta mitema ane'i ane ta Iutaia uasi e ilavusou i'oxo'oxonu susu uasi. 16  f Mo nenge talavusou lexe Lataua umoxo'u itema vile lexe anu itema mulapu no anu vote'i sou umulinu lapuloto laixe uasi. Ia Anu umoxo'u lexe itema mulapu no anu vote'i sou umuxaxu tanu noxou Kalisito Iesu. Aloxo ne, la sou anu laixe lexe nenge tamuxaxu tanenge noxou Kalisito Iesu. No anu vote'i ane nesi la sou Lataua umoxo'inge lexe nenge ta mitema telapu, ia no anu vote'i sou tamulimulinu lapuloto laixe uasi. Xo no anu vote'i sou tamulimulinu 'ili'ilixo sou lapuloto laixe ne umomomo sou u'oxonu itema vile uxali itema mulapu no iou Lataua uasi. 17 No mine nenge temulinu vote'i sou tamuxaxu tanenge noxou Kalisito la sou nenge texali ta mitema telapu no iou Lataua. La sou anu muai lamana lexe nenge ta Iutaia ne nenge kalumo ta mitema sou susu iouvilesisi aloxo ane'i ane ta Iutaia uasi 'ole. La sou laxovaa Kalisito umasaxa lexe u'oxonu susu uxali utila? Uasisi manina! 18 Lexe eni atulusou ulivu mii ma'ia e eni emamulonu, la anu mumaxa'u lexe eni amitema sou amulinu lapuloto uasi. 19 Ia no anu 'ilixo sou amulinu lapuloto la mulailixo no anu vote'i sou soli. La sou no anu lapuloto la mu'oxoleli esoli, mo sou lexe no anu vote'i anenesi la eni amomomo sou noxou Lataua taxolu. 20  g Mo no mine mililinu Kalisito teitexi no ovu valautu, la eni kalumo. La sou mauli ane muxolu noxilo 'o ne, eni maulixo uasi, mauli noxou Kalisito ane uxolu noxilo 'o. Mauli ane muxolu noxilo vaimomo 'o ne, eni emauli no anu muxamuxaxu taleli noxilo noxou Lataua 'Olu e Anu tanuxo la sou muitalonu maulixusilo. 21 Eni amasaxa sou avila'isou alauna noxou Lataua vitanisi uasi. Xo lexe no anu vote'i sou tamulimulinu 'ili'ilixo sou lapuloto laixe u'oxonu itema uxali ulapu no iou Lataua, la soli noxou Iesu ne anu uxali mii vitanisi.”

Copyright information for `ATA