a5:61Ko 7:19; Xal 6:15
b5:91Ko 5:6
c5:102Ko 11:15; Xal 1:7
d5:131Pi 2:16
e5:14Liv 19:18; Rom 13:9
f5:17Rom 7:15-23
g5:19-211Ko 6:9-10
h5:24Rom 6:6; Kol 3:5
i5:26Pil 2:3

Galatians 5

Noxou Kalisitosi La sou Anu Mululusinge

Kalisito mululusinge no anu sakisaki sou lapuloto mo nenge vasimenge manamana'u. La sou laixe lexe ngatulu pakia'inge, mo iengi uvaxai'a ta mitema i'oxongengi ngaxali ta mitema sou xaixai vitanisi la mamu. Ae, ngalomu, eni Paulo avikalangengi aloxo 'o, lexe ngingi ngamalalingenge sou xooxoo ungasinge, la xaixai noxou Kalisito ne uxali mii vitanisi noxinge. Ngingi ta mitema ukalusi e ngamalalingenge ulai sou xooxoo ungasinge eni avikalangengi lamana la aloxo 'o, lexe ngingi nga'oxonu aloxo ne la anu laixe lexe ngamulinu lapuloto ukalusi. Ngingi ta'ei e nga'oxo lexe ngamulinu lapuloto laixe mo sou ngaxali ngalapu no iou Lataua, la ngingi ngexolu va'axu noxou Kalisito. Mo ngexolu no nano no anu alauna noxou Lataua la uasi. Ia no anu xaviinu Uleenu Tavuna la nenge temuxaxu tanenge noxou Lataua mo taxolu taloopalasi noxou sou umoxo'inge lexe nenge ta mitema mulapu. a Xo lexe itema uxolu noxou Kalisito, la xooxoo ungasou xe ane xooxoo ungasou uasi ne anu mii vitanisi. Ia 'ilixo sou itema umuxaxu tanu la uavutinoxu opoonu sou umasaxai'a ane'i mose'i, la anu 'ilixo ane ne anu mii maninasou.

Ngingi ngeiave no anu saisale ne la ngeiave laixesi. Ia 'ena'ei utalutaluxu vote'isinge la sou mu'oxongengi ngamulinu vaikala manina ua, ne? Xavutala ane loxo ne, anu molu noxou, Anu ane mu'avalinge ne uasi. b Ngamaisou isi kitu'asi, ia u'oxonu veleti la usoxo toxoxa'a. 10  c Eni emuxaxu taleli manina noxou Tila lexe Anu usu'ulingengi la ngamulinu xavutala vile uasi, 'ei ane mu'oxo aloxo ne, uno'u 'ulusou susu noxou ne. 11 Ta vivilo, lexe eni a a'alo no anu 'ilixo sou xooxoo ungasinge ulalaisio ia tava'u loxovaa la sou ane'i i'oxo'oxonu masualeli sio 'o? Ia lexe eni avikala lexe xooxoo ungasi'a ta mulu, la vaikala sou ovu valautu ne umomomo sou u'oxoo masuanu xavutalamengi uasi. 12 Ta mitema e ixovulaulaulixu xavutalamengi ne, xavine'i lexe xooxoo ungasinge ukalusi. Ia lexe ane'i imasaxa aloxo ne, la anu laixe lexe ane'i ixotosou vasivasime'a uxexee avile.

13  d Ioxe ta vivilo, Lataua mu'avalinge sou ngaxolu vasimenge manamana'u. Ia no mine ngexolu vasimenge manamana'u aloxo ne, la mamu sou ngaxavutala lexe, nexi texolu laixenenge, mo nexi tamomomo sou tamulinu masaxa noxinge sou vasimenge. Ngingi nga'oxonu aloxo ne uasi, ia laixe lexe ngamasaxainge ngatongato'o xe ngaxali ta mitema sou xaixai noxinge ngatongato'o. 14  e Vaikala sou lapuloto mukalusi ne mupita muxolu no nano no anu lapuloto vilesisi ane lexe, Nini namasaxai'a ta menexine aloxo nini nemasaxaine. 15 Ia lexe ngingi ngalavilavi xe nga'oto'oto ngatongato'o, la ngalaxa'i xo maasi la ngingi ngaulua ukei.

Mauli no Anu Uleenu Tavuna Xe Mauli sou Masaxa sou Vasimenge

16 Ioxe, la sou eni avikalangengi aloxo 'o, laixe lexe Uleenu Tavuna uulaxungengi no anu muamua'ingenge. Lexe ngingi nga'oxonu aloxo ne, la ngingi ngamomomo sou ngamulinu masaxa sou vasimenge uasi. 17  f Xo nenge telavusou aloxo 'o, masaxa sou vasimenge ne utovo sou utaloxolixu Uleenu Tavuna xe Uleenu Tavuna ne utovo sou utaloxolixu masaxa sou vasimenge. Ane'i ilou i'oto noxi'a ngatongato'o, la mii ma'ia e ngingi ngamasaxa lexe nga'oxonu ne, ngamomomo sou nga'oxonu uasi. 18 Ia lexe Uleenu Tavuna uulaxungengi, la ngingi ngamomomo sou ngaxolu no laaxu lapuloto uasi.

19  g Ngingi ngelavusou masaxa sou vasimenge 'ili'ilixo sou ne aloxo 'o, 'ili'ilixo sou vote'i mo 'ilixo e nuni'u manina, xe opo uavuti sou 'ilixo masumasua. 20 Mo 'ilixo sou lalotu noxi'a ta lataua kalakalavoi mo 'ilixo sou i'oxonu ta'uluxu masua, mo 'ilixo sou molomolosilane'i mo 'oto'oto xe lavilavi, mo opo masumasua, mo iisuiisu, mo 'ilixo sou tatoonenge mo sangalako mo 'ilixo sou la'ia xe 'ilixo sou kalikalipala. 21 Xe opone'i masuai'a ta menexi'a e mi'ami'a tavu'alo mo iiexu lexa pekia'u ulolutu la i'itine'i xe ipulipuli anaxa'a. Eni evikalangengixu tei, ia vaimomo 'o avikalangengixu la. Ta mitema ane ilavusou i'oxo'oxonu 'ili'ilixo aloxo ne, umomomo sou i'unalai no anu saxisaxila'u noxou Lataua uasi.

22 Ia xaixai no anu Uleenu Tavuna uxalixu nene'axu aloxo 'o, 'ilixo sou tamasaxai'a ta menexinge manina, 'ilixo sou 'osa'ila, 'ilixo sou opo se'isisi, 'ilixo sou la'ianenge palepalea uasi, 'ilixo sou ta'oxonu 'ilixo laixesi noxi'a mose'i mo 'ilixo sou tamuamua'i ulapusi xe 'ilixo sou ta'oxonu xaixai la ta'oxonu maninasousi. 23 Mo 'ilixo sou xolu se'isisi xe 'ilixo sou tataloxolinenge. Vaikala no anu lapuloto vile uapinenge sou tamulinu 'ili'ilixo ane ne uasi. 24  h Ane'i ane noxou Kalisito Iesu mipilixinu vasime'a ilou masaxa masua sou vasime'a ne, la mililinu no ovu valautu mo musoli ne. 25 Aloxo ne, la sou lexe nenge teno'u mauli laixe no anu Uleenu Tavuna, la anu laixe lexe Anu molu uulaxunenge no anu muamua'i noxinge. 26  i La sou anu laixe sou ta'iti'itinenge mo taavuavutinoxu oponenge ngatongato'o xe taiisuiisu nenge ngatongato'o mamu.

Copyright information for `ATA