a17:5Rom 4:17
b17:7Luk 1:55
c17:8Apo 7:5
d17:10Apo 7:8; Rom 4:11

Genesis 17

Lataua Musakiinu Vaikala sou Opo Vilesisi Ane Lexe Xooxoo Ungaasi'a ta Mulu Ukalusi

Xe no tauu ie ane Avalamu tauu iexu mulai muxali loxo mavulovexa muxatele tami'a mo muxatele tami'a (99), la IAUE muxali mupala'a noxou la muvikalanu aloxo 'o,

“Eni Lataua ane xaviinu misevile.
Nini nalomuxo mo namulinu masaxa noxilo
mo na'oxonu 'ili'ilixo ane lailaixesi no ieli utotomu.
Nenge nengei tasakiinu vaikala sou opo vilesisi.
La eni axalixa'a ta 'iline mo ta xasixasine
mo ta 'ilu'ilusuneni ixali tavu'alo aso vile.”
Xe Avalamu muavuti la mutangatulu mulu'elai iou mulai no lia, la sou Lataua muvikalanu aloxo 'o,

“Nenge nengei tasakiinu vaikala sou opo vilesisi 'o,
la sou avikalaneni lexe ulai aso vile,
la nini mutu'uovuxa'a ta mitema tavu'alo.
a Maasi la ualasine lexe Avalamu la ua, amoxoine lexe Avalaamu,
xo eni aalusine sou nini naxali mutu'u ovuxa'a
ta mitema no xalexalee tuatuala ukalusi.
Eni axalixa'a ta xasixasine mo ta 'ilu'ilusuneni tapiena misevile, mo sou se'i noxi'a ixali loxo ta tatananu tuala. b Eni apala'alixu vaikala sou opo vilesisi ne aloxo 'o. Ta 'ilu'ilusuneni ne ixali tavu'alo misevile la ixalixa'a ta mitema iouiou sou xalexalee tuatuala ukalusi. Vaikala sou opo vilesisi eni esakiinu noxine ne, uxolu mo umauli no nixi noxinge nengei, mo no nixi noxi'a ta xasixasine ilo'a ta 'ilu'ilusuneni ane ipaa ili'i mo kaluxu uasi. Eni Lataua noxine mo noxi'a ta 'ilu'ilusuneni kalumo. c Lia ane nini nene'e nexolu no anu 'o nga'a ngingi ngongi'a uasi, xo ngingi ngene'e ngexolu no anu 'o loxo ta aasilasi, ia eni aitingenge ngongi'a ta 'ilu'ilusuneni lialia ne Kanani ne ukalusi. Ta xasixasine ilo'a ta 'ilu'ilisuneni liaxa'a manina ane, mo eni axali Lataua noxinge ngongi'a manina.”

Xe Lataua muavuti la muvikalanu Avalaamu aloxo 'o la, “Vaikala sou opo vilesisi ane nenge nengei tasakiinu ne, nini mo ta 'ili'iline ilo'a ta xasixasine mo ta 'ilu'ilusuneni ane ipaa aso vile ili'i imulinusi. 10  d Vaikala sou opo vilesisi nengei tasakiinu aloxo 'o. Ta mulu noxinge ukalusi ne xooxoo ungasi'a ukalusi. Vaikala sou opo vilesisi ane nenge nengei tesakiinu 'o ne nga'oxonu xe ngamulinu. 11 Usoko ane vaimomo 'o mo ulai ili'i ngatetelisou 'ilixo sou xooxoo ungasi'a ta mulu, xo anu sosovo sou vaikala sou opo vilesisi ane nengei tesakiinu. Xooxoo ungaasi'a ta keakea ta mulu ane ta neni'a mivo'one'i mo voxosi'a uao ta'uvesi mo muxatele tatalu. Ta mitema ane ngeno'a sou mine'e mixolu noxinge sou ngapalupalusi'a ne ta 'ili'ili'a ilo'a ane'i ane ngelotone'i no xalexalee tuala se'i va'axu ne ta 'ili'ili'a kalumo. 13 Ta mulusinge ne, xooxoo ungasi'a ukalusi. Mo sou sosovo ane ne upala'alixu vaikala sou opo vilesisi nenge tesakiinu. Vaikala sou opo vilesisi ane nenge tesakiinu ne uxoo aloxo ne mo umomomo sou ukalu uasi. 14 Ia lexe vile no nixi noxinge ne xooxoo ungasou uasi, la anu ane ne anu noxilo uasi, xo anu umulinu mo utetelisou vaikala sou opo vilesisi ane eni esakiinu uasi.”

15 Xe ili'i la, la Lataua muvikalanu Avalaamu aloxo 'o, “Maasi la nini namoxoe semameni lexe Salai la ua, vaimomo 'o mo ulai avile ili'i ne namoxoe lexe Sala. 16 Eni aalusie la sou ane ivo'onumeni keakea mulu vile xe ane ixali ta mitema no xalexalee tuatuala neni'a. Ta xasixasie ilo'a ta 'ilu'ilusune ne ulai ili'i la se'i noxi'a ixali ta tatananu tuala no xalexalee tuatuala aso vile.”

17 Xe Avalaamu mulomu noxou Lataua aloxo ne mukalu, la muxola'u tava'u tamei sou mutulu no tava'u vo'uvo'uxu ka sou mutangatulu mulu'elai no lia sou motoxonu ia mukeke xo tanu muvikala lexe, itema vile tauu iexu uxali loxo itemaxu ta'uve (100), ia upalaa loxovaa 'o? Xe Sala ne, ane tauu iexe muxali loxo mavulovexa muxatele tami'a (90), ia ane ipalaa loxovaa? 18 Xe Avalaamu muavuti la muvikalanu Lataua aloxo 'o, “Eni emasaxa lexe Isimaeli ne uxolu no anu saxisaxila'u noxine.” 19 Xe Lataua muavuti la mukolinu vaikalau aloxo 'o, “Uasi. Semameni Sala ne, ivo'onumeni keakea mulu la sou nini namoxo'u ualasou lexe Aisaki. Eni apala'alixu vaikala sou opo vilesisi eni esakiinu noxine 'o uxolu noxou xe noxi'a ta 'olu ilo'a ta xasoxasou mo ta 'ilu'ilusunu, mo kaluxu uasi manina. 20 Eni elomusou xavutala noxine sou eiae Isimaeli ne. La eni aalusou mo sou anu upalaane'i ta 'olu tavu'alo la sou ane'i ixalixa'a ta xasoxasou ilo'a ta 'ilu'ilusunu tavu'alo aso vile. Anu uxali ta mitema ta tatila sou isaxila'a ta mitema noxi'a vilevilesi, mavulovexa vile mo tamei mami'a. Anu upalaane'i la sou ixalixa'a ta mitema tavu'alo ane evile umomomo sou utaloxolixa'a uasi. 21 Ia, lexe Sala ivo'onu Aisaki no anu tauu ie alavua, la nexi noxousi tasakiinu vaikala sou opo vilesisi ne.”

22 Lataua muvikala aloxo ne noxou Avalaamu mukalu, la mulai. 23 Xe no voxo ane ne, Avalaamu mulomuxu vaivaikala noxou Lataua la muno'u 'olu Isimaeli sou xooxoo mungaasou ilo'a ta mitemau mo ta mitemau sou upalupalusi'a ta mulu ane anu mulotone'i ilo'a ta mitemau ta 'ili'ili'a ta mulu kalumo. 24 Xe no voxo ane Avalaamu tauu iexu mulai muxali loxo mavulovexa muxatele tami'a mo muxatele tami'a (99), la sou xooxoo mungaasi'a ilou 'olu Isimaeli. 25 No voxo ane ne la Isimaeli tauu iexu muxali loxo mavulovexa vile mo tatalu. 26 Mo ta mitemau no taasou kalumo. Ane'i ane mixoxoo noxou tatei mo ane'i ane mulotone'i ne, xooxoo mungaasi'a kalumo no voxo vilesisi ane.

Copyright information for `ATA