a19:5-8Kis 19:22-24
b19:112Ta 6:18
c19:162Pi 2:7
d19:24-25Mat 10:15, 11:23-24; Luk 10:12, 17:29; 2Pi 2:6; Iud 7
e19:26Luk 17:32

Genesis 19

Sodomu Ilee Xomola

No voxo ane ta angelo tamei e ilo'a IAUE milai mixali noxou Avalaamu mine'e mixali ne Sodomu, la anu 'olo'olovoxo. Loto mulai mo a uxoxoo no aitengaxu vimelusou tuala tila ne Sodomu, mole anu mumaisi'a mine mitelo, la anu mutulu sou mulai noxi'a ilou sou muxali noxi'a ilou la muxola'u tava'u sou mutulu no tava'u vo'uxu sou mutangatulu mulu'elai no talaxa'a ilou sou mutoxone'i, la muvikalane'i ilou aloxo 'o, “Ae, ta menexilo, eni sou asu'ulingengi ngongou. Ngongou ngane'e mo nenge'a talai no tani noxilo mo ngongou nga'uinu tavainge mo nenge'a taai, xe ne'iela no kakau la sou ngongou ngasolonu laingenge ngongou ulai no xalee ane lexe ngongou ngalai no anu.”

Ia, ane'i ilou miavuti la mikolinu vaikalau aloxo 'o, “Uasi, nexi talai taai no tilovolovo.”

Ia uasi, Loto pekia'u mole, ane'i ilou mamalaxa'asi la ilou mimulinu sou ilo'a milai no tani noxou. Xe muavuti la mupalusi'a ta mitema sou xaixai noxou sou mixutuxu veleti se'i vitanisi, ia iisi sou uasi. Xe mukalu la, mi'oxoxa'a la'ilali mine lailaixe loxo 'o. Milalaxi la'ilali ne mukalu la mi'avali'a sou mine'e mi'ou.

'Olovoxo, ia ta aasilaxu Loto ne ilo'a iaai uao. Ta mulusie Sodomu mine'e mixaliliu tani e ane'i mixoxoo no anu ne. Ta mulusie Sodomu ne mine'e mukalusi, ta maumaulu mo ta tatila mo ta auaululu ne mine'e mukalusi. a Mine'e mitulutulu no ale, io sou mi'ava mu'unalai sou mitali'isou Loto aloxo 'o, “Ta mitema tamei e mine'e mi'una no tani noxine no 'olo'olovoxo sou ngongi'a ngaai maasi no 'olovoxo 'o 'ava? Nano'a iuatu noxixe!” Ane'i mine'e mitalitali'isi'a loxo ne, xo imasaxa lexe i'oxo 'ilixo masua sou ilai noxi'a.

Xe Loto muavuti la mukisiinu aitenga sou muatulai. Muatulai mukalu la mutatusi'a pekia'u. Io sou muvikalane'i ta mulusie Sodomu ne aloxo 'o, “Ta menexilo, eni alingainge aloxo 'o, nga'oxo 'ilixo ane ne mamu! Ngalomu, eni ta 'alixe ta sema ta vuanga tamei a ixoxoo no nano no tani. Evile ulai noxi'a uao. Eni alai ano'a iuatu mo ngingi ngakalusou masaxa noxinge noxi'a ilou. Ia mamu nga'oxo masua noxi'a ta mitema tamei 'o, xo eni ta aasilaxeni ane, eni atatusi'asi mo ixoxoo a no nano ne.”

Ia, uasi. Ane'i la'iaxa'a la mikaikaitolonu Loto, “Vavalau sou tani, naxexesixe. Nini nene'e 'o loxo aasila vile, ia nini navivikala loxo itema tila lai 'o. Naxexesixe, loxo 'o io nexi ta'oxonu masuaneni tila, ia ane'i ne ta'oxo masuane'i xolosi.” Xe miavuti, la misounu Loto mulai ili'i no tumali'a, io sou ane'i misuku mulai no aitenga sou lexe imamulonu tatusou aitenga. La ua.

10 Ta mitema tamei no nano ne mipasipaa la mikisiinu aitenga sou milapunu palea mu'una no nano, io sou ilou mitatu. 11  b Xe ilou miavuti la ilou mi'oxonu ta mitema latala ne ie'i seleveenu mukalasi mole umomomo sou imaisou aitenga la ua.

12 Xe ilou miavuti la mivikalanu Loto aloxo 'o, “Lexe nini ta minemineni se'i loxo ta 'ili'iline ta mulu mo ta sema, ta leualeuaneni mo ta tulatulaneni se'i kalumo a ixoo no nano no tuala ano 'o, la nalailixa'a ilai no ale. 13 Xo nexi asou takalusou tuala ano 'o. IAUE mulomusou vaivaikala sou 'ili'ilixo masumasua noxi'a mukalu ne, la sou ane anu mupalusixe tene'e sou lexe takalusou tualasi'a 'o.”

14 Xe Loto muavuti la mulutu mulai noxi'a ta mitema tamei e lexe i'uluxa'a ta 'olu ta sema tamei la muvikalane'i aloxo 'o, “Ngapalea mo ngaxexesou tuala ano 'o mo nga'ume ulai va'axu, xo IAUE anu asou ukalusou tuala ano 'o!” Ia ane'i milomu aloxo nesi ka mixolu xo ane'i miexe lexe anu umomolo vila'i.

15 Xe no maxasesela, la ta angelo mitulusou Loto sou mipalusou mo upalea u'umesou tuala ne Sodomu. Mivikalanu aloxo 'o, “Nano'e semameni mo ta 'iline ta sema tamei ne, mo ngapalea mo ngalaa ane alalae 'osi mo sou mamu ngaulua!” 16  c Loto mulomu aloxo ne la mu'ume, ia ulutu mo ilee semau ilo'a ta 'olu i'ume palea uasi. Ia, IAUE tanuxu la sou ta angelo mikasi vaxa no avo'a ilee semau mo ta 'olu sou mitila'a milaalixa'a milai no ale no tuala ne. 17 Xe angelo vile muavuti la muvikalane'i aloxo, “Tangengixu maulingenge mo ngaiave avilesi. Ia iengi uxiuxiu mo ngatulu sou ngama'ila no vanunu vile uasi. Ngaiave utelai no laxalaxa'ilusi mo sou mamu ngaulua.”

18 Xe Loto muavuti la mukatunu aloxo 'o, “Ae, mamu na'oxonexi tamulinu aloxo nelemolu ne. 19 Xo nini tanenixo mo a nelaalixo 'o mo sou eni aulua uasi, ia nalomu, laxalaxa'ilu e nelemolu lexe nexi tatelai no anu 'ole ne, no paxa misevile. Nexi tapalea loxovaa la talai taxali ne. Loxo 'o io nexi taulua ane no lia 'osi, io talai taxali ne ua. 20 Namaisou tuala kitu'a se 'ole. Anu 'alaisi lexe nexi talai mo lexe taxali ane, la nexi taulua uasi.”

21 Anu mukolinu vaikalau Loto aloxo 'o, “Ioxe, anu laixesi, eni amulinu masaxa noxine. Eni akalusou tuala se ne uasi. 22 Ia napalea! Naiave! Eni umomomo sou a'oxo mii vile palea uasi mo lexe nini nalai mo lexe naxali ane.” Tava'u xo Loto mulemele tuala se ne lexe kitu'a, la sou ane'i milemele lexe Soalu.

23 Xe aso muxali mutelo la Loto mulai muxali ne Soalu. 24  d Xe alaxu vilesisi 'o la, IAUE mu'italo navu mulu'e loxo la'iua sou mu'elaxu tuala tamei, eiae Sodomu ilee Xomola. 25 Navu mu'elaxu tuala tamei mo vanunu ne mukalu. Ta mitema mo mimii latala loxo kamakamakala ne mu'ela mukalu avilesi. 26  e Ia Loto semau ne, ivaxasi mo imuli mulue ilaisi ua. Iei muxiu sou lexe imaisou tuala tamei nesi, la mixali loxo lavo'o au, mole mitulu ane.

27 No kakau la Avalaamu mulutu mulai no tanixa'a ilou IAUE e ilou mitutulu no anu, 28 sou iou mulu'elai ne Sodomu ilee Xomola. Iou mulu'elai, la vanunu ne navu iauxuxu mutomu mo a uiaiauxu utetelo. 29 No voxo ane Lataua mu'elaxu tuala tamei no vanunu e Loto muxoo ne la, xavutalau a muxoo noxou Avalaamu, la sou ane anu tanuxu Loto sou mu'oxonu vote'isou sou mupamaulinu.

Loto Ilo'a ta 'Olu ta Sema Tamei

30 Xe ili'i la, Loto umasaxa lexe anu uxolu ne Soalu uasi, xo anu u'ume. La sou ilo'a ta 'olu ta vuanga tamei ne mi'ume mitelai no laxalaxa'ilu sou milai mixolu mitalume no taxa vile no tava'u maea.

31 No voxo vile, la 'olu laposalaxu mivikalane vimoe aloxo 'o, “Maminge nengei soxu a sou aululu, ia ta mulu sou i'ulunenge sou nenge'a taxalixa'a ta 'ilinge uasi, xo ta mulu se'i ixoo no xalexalee tuatuala 'o uasi. 32 Ia maasi la nenge nengei ta'oxo vote'i vile aloxo 'o. Nengei taienu la sou nenge'a taai la sou anu upalaane'i ta 'olu noxinge nengei mo sou ta xasoxasou ilo'a ta 'ilu'ilusunu ne ipaa ili'i.” 33 Ilou mivikala aloxo ne, xe no 'olovoxo la ilou milosou uaini sou muiexu. La sou 'olu laposalaxu milai noxou sou anu mulai noxie, ia mamie ne muie mu'oki mole ulavu ua. 34 Xe loxo ne'iela no kakau, la 'olu laposalaxu ne mivikalane vimoe aloxo 'o, “Mei no 'olovoxo ne elai noxou mo noxou teai, ia maasi no 'olovoxo, la nenge nengei taienu la mo sou nini nalai ngongou ngaai, la sou nenge nengei tapalaa ta 'ilinge. Maminge nengei molu uxalixa'a noxinge nengei.” 35 Xe no 'olovoxo la ane'i ilou miienu mami'a la. Anu muie mu'oki mole ulavu ua. 'Olu mipasipaa la mine'e sou ilou miai sou anu mulai noxie.

36 Vote'i ane ane'i ilou mino'u opo noxou mami'a a'alosou aloxo ne. 37 'Olu laposalaxu ne mivo'o, la 'ilie mulu. La mimoxo'u ualasou lexe Moabu. Anu Moabu ne, mutu'u ovuxa'a ta mitema ta Moabu ane mipaa ili'i mo mimauli vaimomo 'o. 38 Xe vimoe ne mivo'o, la 'ilie mulu kalumo, la mimoxo'u ualasou lexe Veni-ami. Anu mutu'u ovuxa'a ta mitema ne Amoni ane mipaa ili'i mo mimauli vaimomo 'o.

Copyright information for `ATA