a25:10Tav 23:3-16
b25:23Rom 9:12
d25:33Eva 12:16

Genesis 25

Avalaamu Musoli

Sala misoli la Avalaamu mu'uluxe sema vile la, ualasie lexe Ketula. La sou ilou mipalaane'i ta 'ili'a la ualaualasi'a ano 'o, Simulani, Iokusani, Medani, Midiani, Isivaki xe Sua. Iokusani mupalaane'i ta 'olu ane Seva ilou Tetan. Tetan ta 'olu ane mixalixa'a ta mitema sou tuala ne Asulu mo ta mitema ne Letusi mo ne Leumi. Xe Midiani ta 'olu ta mulu ane Epa ilou Epe mo Kanoko mo Avita mo Eluda. Ane'i ane ne Ketula ta 'ili'ilie ilo'a ta xasixasie.

Avalaamu mu'italonu lavuluti noxou mukalusi mulai noxou 'olu Aisaki. Xe no mine anu uao uxoxoolu o, la lavulavuluti se'i ne muiti'a ta 'olu ane noxi'a ta semasemau ane ili'i. Mulosi'a mukalu la mupalusi'a sou milai mixolu va'axu noxou Aisaki no lia xalee ane aso uxaxali utelo no anu.

Avalaamu muxolu mumaulixu tauu ie loxo itemaxu ta'uve mo mavulovexa muxatele tamei mo ta'uve (175), mole anu aululu soxu manina. Muxoxolusi xe mulapuu tauuxu kaluxu alaxu vilesisi loxo 'osi la musivita soxu. Anu aululu manina vile xo mumaulixu tauu ie piena misevile. Xe no voxo ane anu musoli no anu ne, la uleenu mulu'elai no tualasi'a ta mitema sou soli. Ta 'olu tamei eiae Aisaki ilou Isimaeli mitavule sou milai mi'asixu ne Makapela. Makapela ne muxoo no xalee mulai loxo aso uxaxali utelo no anu ne Mamule. Tei la lia xalee ane ne, Epulon liaxu. Epulon ne itemasie tuala ne Keti, momu ualasou lexe Sokaru. 10  a Avalaamu molu mulotonu lia ane ne noxi'a ta mitema ne Keti. Milai mi'asixu anu Avalaamu no pa'umele semau Sala ane. 11 Avalaamu musoli io Lataua muavuti la mualusou 'olu Aisaki. Aisaki mulai muxolu 'alai no lexa iou vile ilemolu lexe, “Lexa Noxou Lataua Ane Mauli Muxolu Noxou Mo Umamaisilo”.

Isimaeli ta 'Olu

12 Ioxe nanasou Isimaeli ano 'o. Isimaeli ne, Avalaamu mupalaanu noxie Axali semasie Aixiputo e Sala mino'e sou mixoo noxie sou ipalupalusie ne. 13 Mupalaane'i la ta 'olu ualaualasi'a ano 'o. Musokou noxou ane laposalaxu la mulai muxali noxou soxu ane kaluxusi'a. Laposalaxu ane Nevaiote ka Kedaru, Atibelu, Mipusamu, 14 Misima, Tuma, Masa, 15 Kadati, Tema, Ieturu, Napisi xe Kedema. 16 Ane'i, ta mitema e mavulovexa mo mulelia tamei ne, Isimaeli ta 'olu ta mulu ane. Ualaualasi'a ne, mimoxo'u tuatualasi'a ilou tanitanixu maulixa'a no anu. Ane'i Isimaeli ta 'olu mixalixa'a ta mitema sou mata noxi'a vilevilesi. 17 Xe Isimaeli tauu iexu mulai muxali loxo itemaxu ta'uve mo mavulovexa tatalu mo muxatele tamei (137) la sou anu musoli. Xe no voxo ane anu musoli no anu ne, la uleenu mulu'elai no tualasi'a ta mitema sou soli. 18 Ta xasoxasou ilo'a ta 'ilusulusunu ne milai mixolu no lia xalee no nixi ne Avila xe ne Suru no vote'i mulai ne Asulu 'alai ne Aixiputo. Ane'i milai mixolu va'axu noxi'a Avalaamu ta xasoxasou ilo'a ta 'ilusulusunu ane noxou 'olu Aisaki.

Iakovo Ilou Esau

19 Avalaamu 'olu e ualasou lexe Aisaki, nanasou aloxo 'o. 20 Aisaki tauu iexu mulai loxo itemaxu tamei (40) la sou anu mu'uluxe Liveka eiae Betueli 'olu. Betueli anu sou tuala ne Alamu no xalee ne Mesopotamia. Vimoe mulu ualasou lexe Lavani. 21 Aisaki mu'uluxe semau Liveka ne, ia ipalaa uasi, la sou mulinga mulai noxou IAUE la sou ane opoone. 22 Opone ne la ta 'ilie tamei a mixolu no nano, la ilou i'oto'oto. La sou ane miavuti la mitali'i aloxo 'o, “Loxovaa ane mii ano 'o muxali noxilo loxo 'o?” Xe miavuti imasaxa lexe ilavu no anu tava'u 'oto'oto noxi'a ta keakea tamei ne. La sou mele mitali'i no anu linga noxie mulai noxou IAUE. 23  b La sou IAUE mukolinu tali'i noxie aloxo 'o,

“Ta mutu'u ovuxa'a ta mitemta tamei ane ixoxoo no nano no oponeni ne,
ulai ili'i, la sou nini navo'one'i, ia ulai ili'i la ixolu ipita uasi, ikalipala'a.
Vile xaviinu xe vile ne xaviinu uasi.
Ane kitu'a e uxali la ulu'e ili'i ne, ulai la anu usaxila'u anu ane nini navo'onu tei.”
24 Xe no voxo ane sou Liveka mivo'o, la mivo'one'i ta 'ilie ta vunaxa'a ta sema ta mulu tamei. 25 Ane mulu'e tei ne, vasimolu lauolauoinu xe laxulaxusou. La sou mimoxo'u ualasou lexe Esau. 26 Xe ane mulu'e ili'i ne mulu'e la avolu muteteli noxou ane muuli ne tava'u ulu'u. La sou mimoxo'u ualasou lexe Iakovo. No tauu ie ane, ane Liveka mivo'one'i ta 'ilie tamei ne la Aisaki anu tauu iexu mulai muxali loxo mavulovexa muxatele vile (60).

27 Ta 'olu ta tamei ne mileme mipalea loxo 'o. Esau ne muxali itema vile sou paipaa manina. Mulavu laixe misevile sou uvau mii. Ia Iakovo ne anu itema vile sou uxoxoo se'isisi sou u'ole'ole no tualasi. 28 Aisaki umasaxau Esau misevile xo anu u'osasou taataa e unono'u anu u'o'ou utotomu. Xe Liveka ne ane imasaxau Iakovo misevile.

29 No voxo vile la Iakovo uxuxutuxu la'ilali se'i ne se'isisi. Xe Esau mulai mupaipaa xe muxali, la musolixu. 30 Xe muavuti la muvikalanu vimou Iakovo aloxo 'o, “Eni esolixo misevile, naitixo la'ilali lauoinu e naxuxutuxu ne se'i.” La sou ane ane'i mimoxo'u Esau ualasou vile lexe Edomu.
25:30Edomu laaxu lexe lauoinu.
31 Ioxe, anu Iakovo muavuti la mukolinu vaikalau Esau aloxo 'o, “Lexe nini nalosilo ualasine lexe nini laposalaxu ne, la sou eni aitixene la'ilali 'o.” 32 Xe Esau muavuti la muvikala aloxo 'o, “Anu mii vile uasi. Eni a 'alalai sou asoli. Uala ane ne, anu mii vitanisi, umomomo sou uxalixu mii vile noxilo uasi.” 33  d Xe Iakovo muavuti la muvikalanu vimou ne lexe, “Ia lexe nini navikala maninasou lexe nini nemasaxa manina lexe na'italo uala ane ne une'e noxilo.” Esau muavuti la muvikala maninasou, la sou mulosou uala ne lexe anu Iakovo anu laposalaxu. 34 Xe Iakovo muavuti la sou muitixu vimou Esau ne, veleti ilou la'ilali se'i ane anu muxuxutuxu ne. Mu'ani mo muie mukalu, la sou mulutu sou mulai. No anu xavutala ane Esau mumulinu sou muxexeenu ualasou lexe anu laposalaxu mulai noxou vimou ne, anu lamana lexe anu uala ane ne, anu mii vitanisi noxou anu Esau.

Copyright information for `ATA