a26:3-4Tav 22:16-18
b26:7Tav 12:13, 20:2
c26:26Tav 21:22

Genesis 26

Aisaki Ilou Avimeleki

Tauu vile sou soli muxali ne Kanani la loxo ane muxali no tauu ane Avalaamu muxoxoolu 'o, la sou Aisaki mulai noxou Avimeleki, anu tatananu tuala noxi'a ta Pilistia no tuala tila ne Xelalu. IAUE mupala'a noxou no voxo ane ne la muvikalanu aloxo 'o, “Nalu'elai ne Aixiputo uasi, naxolu no xalee lia ane eni melo avikalaneni sou naxolu no anu. a Naxolu no lia xalee ane ne la eni kalumo axolu noxine mo aalusine. Lia xalexalee ano 'o eni alosinge ngongi'a ta 'iline mo ta xasixasine ilo'a ta 'ilu'ilusuneni ukalusi, aloxo 'o eni elemolu lamana noxou mamine Avalaamu. Eni axalixa'a ta 'ili'iline mo ta xaisxasine ilo'a ta 'ilu'ilusuneni ixali tavu'alo loxo ta oto teitexi no loxotolo. Mo sou a'italonu lia xalexalee no anu lia lololinu ano 'o noxi'a. Xe ulai ili'i, la eni aalusi'a ta mitema no xalexalee tuatuala ukalusi no anu vote'i vilesisi. Vote'i ane ne, nini ta xasixasine ilo'a ta 'ilusulusuneni, xo Avalaamu anu mulomuxo mo mumulinu masaxa noxilo mo vaivaikala noxilo laixe mukalusi. Tava'u aloxo ne, la sou ane eni a'oxonu 'ilixo laixesi ulai noxine.” Aisaki mulomusou vaivaikala lamana noxou IAUE mukalu, la sou anu muxolu ane ne Xelalu.

b Xe no voxo ane ta mitema sou tuala tila ne Xelalu mitali'isou sie semau Liveka ne, la anu muvikalane'i lexe, Liveka ne, anu semau uasi, vimou ane. Muxavutala lexe utalumeie'i ilou aloxo ne xo loxo io anu upala'alixe lexe anu semau ane, la ane'i ivau. Xo ane Liveka ne iei lailaixe misevile.

Aisaki muxoxoolu no xalee tuala ane ne maxuveeni misevile, xe no voxo vile la Avimeleki tatananu tuala noxi'a ta Pilistia mutulu no aitenga sou atume no taasou la iou mulaiiou Aisaki mine usa'asa'avunoxe Liveka. Avimeleki mumaisou Aisaki aloxo ne mukalu, la mu'avalou mulai noxou la muvikalanu aloxo 'o, “Aisaki, vaimomo 'o eni elavu, sema e ngongou ngaxoxoolu ne, nini semameni ane, ia loxovaa la nini nevikala lexe nini vivine sema ane?” Xe Aisaki muavuti la mukolinu tali'i noxou Avimeleki aloxo 'o, “Eni xavutalaxeni mu'ume xo loxo 'o io maasi xe eni apala'alixe lexe ane semaxe ane, la ta mitema ine'e ivelo asoli io sou ine'e ino'e la ilai i'uluxe.”

10 Xe Avimeleki muavuti, la muvikalanu aloxo 'o la, “Nini nesusu toxoxa'a. Lexe itema vile noxixe 'o ilee semameni miai, la anu susu ane vaikalasou utelo noxixe. Ia ano 'o ne uasi, anu susu ane muxali no nano 'o ne, vaikalasou utelo ane noxinesi.” 11 Xe ili'i la sou anu Avimeleki ne molu muavuti sou muvikala pekia'u sou mupeletotosi'a ta mitema noxou mukalusi. Muvikalane'i aloxo 'o, “Lexe itema vile u'oxo susu vile noxou itema ano 'o ilee semau, la tava'u itema ane ne mo usoli.”

12 Aisaki muxoxoo ne xe ili'i la sou muxaxai sou mutounu la'ilali se'i mulu'e no lia no xai ane anu muxaisou ne. No tauu ie ane ne, la'ilali no xai ane ne, temanu piena misevile, xo IAUE mualusou anu Aisaki. 13 Aisaki muxali loxo itema tila vile maninasou lavuluti tavu'alo mo lavulutiu mu'oki'oki tani manina. 14 Anu itema vile toxoxa'a manina. Ta sipsipou ilo'a ta kau mo ta mitemau sou ixaxaixu ne tavu'alo misevile, la sou ta Pilistia opone'i masuau. 15 Xe miavuti la lexa taxataxasou e ta mitema sou xaixai noxou momu Avalaamu mi'asou mine anu Avalaamu uxoxoolu ne, misovosovolou mukalusi no anu lialia.

16 Xe Avimeleki muavuti la muvikalanu Aisaki aloxo 'o, “Eni emasaxa lexe nini naxoo no lia 'o la uasi. Naxexesou tualasixe 'o mo nalai naxoo va'axu, xo nexi tamomomo noxine la uasi. Nini xavineni misevile.” 17 Aisaki mulomu aloxo ne mukalu, la mulutu sou mulai. Mulai xoo la mu'ilii tualasou alavua no vanunu ne Xelalu ne sou mutulusou taasou ane. 18 Tatei la Avalaamu muxoxoolu ane, mo mu'asou lexa iou sou miie no anu, ia ili'i no anu soli noxou la ta Pilistia misovolou lexa taxataxasou ne mukalusi. Ia Aisaki mulutu xe mulai muxolu ane, la anu mu'asou lexa taxataxasou ne la. Mu'asou mukalu la mumoxo'u ualaualasi'a aloxo momu mumoxo'u no anu tei.

19 Alaxu vile la ta mitema sou xaixai noxou Aisaki mi'asou lexa iou vile no vanunu e ane'i milai mixolu no anu ne. 20 Xe ta mitema sou isaxisaxila'a ta kau ne Xelalu ne miavuti la ilo'a ta mitema sou isaxisaxila'a ta kau noxou Aisaki mi'otosou lexa iou ane ne. Ta mitema sou isaxisaxila'a ta kau ne Xelalu miavuti la mivikala lexe, “Lexa iou ane ne, nexi na'anexi.” Xe ili'i la sou Aisaki mumoxo'u lexa iou ane ne lexe, “'Otosou”. 21 Ioxe, ta mitema sou xaixai noxou Aisaki miavuti la mi'asou xa'a lexa iou vile la. Xe ili'i la 'oto'oto muxali no anu la. La sou Aisaki mumoxo'u lexa iou ane ne lexe, “Ulua”. 22 Xe Aisaki muavuti la musukusou xalee lia ane ta mitema sou xaixai noxou mi'asou lexa iou no anu ne, ia musuku mulai no xalee vile sou mu'asou lexa iou vile alavua la. Xe mumalei la ta mitema i'otosou uasi, la mumoxo'u lexa iou ane ne lexe, “Xoluxolu laixesi”, xo anu muvikala aloxo 'o, “Vaimomo 'o IAUE mulosinge tuala laixe sou taxolu laixesi no anu, mo ulai ili'i la nenge mimii tavu'alo ne anu molu ulosinge no anu xoluxolu noxinge no anu lia xalee ano 'o.”

23 Xe ili'i la anu Aisaki mutelai ne Beru-seva. 24 Xe no 'olovoxo la IAUE mupala'a noxou la muvikalanu aloxo 'o, “Eni Lataua noxou mamine Avalaamu. Na'ume mamu, xo eni axoo noxine, mo aalusine mo sou ta 'ili'iline mo ta xasixasine ilo'a ta 'ilu'ilusuneni ixali tavu'alo xo eni emasaxau itema sou xaixai noxilo Avalaamu misevile.” 25 Aisaki muavuti la muvalovalo no anu lavo'o sou mutauuxu navu sou mu'elaxa'a ta sipsip sou mulinga no anu IAUE ualasou noxou IAUE. Xe muavuti la mu'ilii tuala sou mutulusou taasou no xalee lia ane ne. Xe ta mitema sou xaixai noxou miavuti la mi'asou lexa iou vile kalumo a no xalee lia ane ne.

26  c No voxo vile la Avimeleki molu no tuala ne Xelalu sou mulai mumaisou Aisaki, la eiae Ausate e anu itema vile sou ulolosou Avimeleki xavuxavutala mo Pikolu anu itema vile toxoxa'a sou uuli noxi'a ta mitema sou 'oto'oto noxou Avimeleki ne ilou mimulinu sou milai noxou Aisaki. 27 Ilo'a mimuamua'i xe milai mixali noxou Aisaki la mutali'isi'a aloxo 'o, “Tatei la ngelavixo la ngekusailo la exexeesou liangenge, ia loxovaa la ngingi ane a ngane'e ngaxali noxilo 'o la?” 28 Xe ane'i tatalu ne miavuti la mikolinu tali'iiou aloxo 'o, “Vaimomo 'o nexi telavu lexe IAUE anu a uxoo noxine. La sou nexi temasaxa lexe nenge nenge'a tasakii xavutala vile no nixi noxinge nenge'a. 29 Xavutala ane nenge nenge'a tasakiinu 'o aloxo 'o, Mamu nini na'oxo masua une'e noxixe xo nexi ta'oxo masua noxinge uasi. Nexi te'oxo laixesi mulai noxingesi. Mo no voxo ane nini ne'umesou lianexe, la nexi iexi muvaxainesi mole nelai opoone lelemesousi, ia la'iaxene uasi. La sou nexi temaisou lexe IAUE musu'ulineni laixe misevile.”

30 Xe Aisaki muavuti la mu'oxoxa'a la'ilali toxoxa'a sou mi'ou xe miie. 31 Ilo'a miai xe mi'emo la ilo'a mixalixu masaxa vile toxoxa'a lexe usoko ane vaimomo mo ulai utalo ili'i ne ane'i ilo'a xoluxoluxa'a vilesisi. Misakii xavutala ane ne mukalu, la Aisaki musaxane'i sou milai, ia opone'i muai se'isisi.

32 No anu voxo ane nesi la ta mitema sou xaixai noxou anu Aisaki ne mine'e mixali noxou la mivikalanu aloxo 'o, “Nexi te'asou lexa iou vile la lexa muxali mutelo no anu.” 33 Xe Aisaki muavuti la mumoxo'u lexa iou ane ne lexe, “Seva (tavu'alo)”. La sou musoko no voxo ane ne mole mune'e vaimomo 'o ne, ane'i mimoxo'u tuala ane ne lexe Beru-seva.

34 Ioxe, Esau tauu iexu mulai muxali loxo itemaxu tamei (40), la mu'uluxe eiae Iudi, Beri 'olu sema. Beri anu itemasie Keti. Xe muavuti la mu'uluxe Basemati, eiae Eloni 'olu. Eloni kalumo anu itemasie Keti. 35 Aisaki ilee Liveka ixoxolu xe ie'i uvavaxai'a ta sema tamei ne la, tane'i navuxui'a misevile.

Copyright information for `ATA