Genesis 29

Iakovo Muxali Noxou Iau Lavani

Iakovo muvikala aloxo ne sou mupala'alixu tanu mulai noxou Lataua mukalu, la sou anu muavuti sou musokou muamua'i noxou sou ulai. Mumuamua'i ne, la mulalai aloxo no xalee lia ane aso uxaxali utetelo no anu. Mumuamua'i mulalaisi xe musu'a iou loxo 'osi la mumaisi'a ta sipsip la'oluxa'a tatalu ane misu'a la'oluxa'a miai mixaliliiou iou lexa vile. Ta sipsip ne, mine'ene'i sou iiene'i ane, ia mine'ene'i la iiene'i palea uasi xo lavo'o toxoxa'a te ipipalopalo'u sou uxexesou taxa e lexa uxaxali utelo no anu ne uao. Ta mitema sou isaxisaxila'a kalumo a ixoxoomaie'i. No voxo ane sou ta mitema sou isaxisaxila'a ta sipsipi'a ine'e sou iiene'i, la ane'i ipipalo'u lavo'o to ne uxexesou lexa iou sou ta sipsipi'a iie. Xe ukalu la sou ane'i ipipalo'u ulivu no tanixu la. Iakovo mumuamua'i musuku mulai 'alai manina noxi'a sou mutali'isi'a aloxo 'o, “Ta vivilo, ngingi sou tuala ne'ei?” Ane'i mikolinu la mivikala lexe, “Nexi sou tuala ne Alani.” Xe anu muxiu vaxa la mutali'isi'a la, “Ia ngingi ngelavusou itema e ualasou lexe Lavani o? Eiae Naola 'olu.” “Ani, nexi telavusou.” Ane'i mikolinu aloxo ne. Xe muavuti la mutali'isi'a la aloxo 'o, “Ia loxovaa, anu laixenusi?” “Ani, anu laixenusi. Namalei, 'olu sema Lakeli ane inene'ene'i ta sipsip noxou 'ole.” Ane'i mikolinu aloxo ne la. Xe anu muavuti la muvikalane'i aloxo 'o, “Aso a uao teitexi 'o mo umomomo sou ngingi ngalivulixa'a ta sipsip ilai no nano no taasi'a palea uasi, ia nganavaa e ngaiene'i palea mo sou ukalu la ngalailixa'a sou i'ani ia'eia'e ua o?” Xe ane'i miavuti la mivikalanu lamana aloxo 'o, “Nexi talavusou ta'oxo loxo ne uasi. Nexi taxoomaie'i ta menexixe mo lexe ane'i ixalixa'a ta sipsipi'a no lexa iou 'o ukalusi, la sou nexi tapipalo'u lavo'o uxexesou lexa 'o taxanu, la sou ta sipsipmexi 'o ne, ilu'e sou iie alaxu vilesisi.”

Anu Iakovo ilo'a ane'i ane miuli mine'e no lexa iou ne, ivivikala ia Lakeli ane mipasipaa mo mine'e mixalixa'a mamie ta na'u ta sipsip no lexa iou ne. Xo ane ilavusou isaxisaxila'a ta sipsip noxou mamie. 10 Xe aliku 'o iou muvaxa loxo 'o la iau 'olu ane mine'ene'i ta sipsipou 'o, xe muavuti la molu mulai sou mupipalo'u lavo'o muxexesou lexa iou sou muiene'i. 11 Xe muavuti la mutimunu xalene tei 'o sou muvikala “aso laixe” mulai noxie mo mutaloxu tama xo anu mu'osasie. 12 Xe ili'i la sou muvikalane lamana, “Eni vivilo tavuna ane nini 'o, iaxe ane mamine Lavani ne, xo mamine vimou sema e ualasie lexe Liveka, ane eni atie.” Xe sema 'o miavuti no lia 'o la ane miiave milai noxou mamie sou mia'alou. 13 Lavani mulomu lexe iau ane mune'e muxali 'o xe, muavuti la muiave mulai mualaxu sou mu'osasou. Muavuti vaxa la mu'aulaxu ka mutimunu xale. Xe mukasi vaxa no avolu la muno'u mu'unalailixu no taasou. Xe ili'i, la sou anu muvikalanu iau lamana noxi'a momu ilee nenu mo vimou, xe mua'alouxu mimii ane muxali noxou no anu muamua'i noxou. 14 Xe Lavani mulomu noxou iau aloxo ne xe mukalu, la muvikala aloxo 'o, “Manina musuku, nini ne noxilo manina. Nenge nengei ienge lavo'o vilesisi.” La sou Iakovo muxoo noxou iau ne, so'io vile.

Iakovo Mu'uluxa'a Lea Ilee Lakeli

15 Xe no voxo vile, la Lavani muvikalanu Iakovo, “Nini naxoxoo noxilo 'o sou nasu'usu'ulilelixu mixomixo vitanisi loxo 'o uasi. Loxo 'o io nini xavutalameni uexe lexe, eni alotoneni uasi o xo, nini noxilosi. Uasi, eni emasaxa lexe alotonenixu xaixai e nini nasu'usu'ulilelixu 'o. Nemasaxa lexe alotoneni no anu ta'ei?” 16 No tauu ie ane Iakovo mulai muxoo noxou iau ne la iau ta 'olu ta sema tamei ne, ane'i ta vuanga. Ane laposalaxu ne, ualasie lexe Lea, xe ane no talie Lea ne ualasie lexe Lakeli. 17 Lea ne, iei laixe malaxo uasi, ia Lakeli nesi, iei laixe misevile. 18 Xe Iakovo muavuti la mukolinu tali'i noxou iau Lavani aloxo 'o, “Eni emasaxa lexe axoo noxine 'o tauu ie muxatele tamei mo axaxaixene, lexe nini nemasaxa lexe eni a'uluxe Lakeli.” 19 Iau Lavani muavuti la muvikalanu aloxo 'o, “Anu mii vile uasi, eni a'italone noxine sou na'uluxe, xo 'ena'ei ane uxoxoo noxilo 'o sou uxaxaixo la sou eni a'italone noxou sou u'uluxe?” 20 Anu muxolu xe muxaxaixu iau tauu ie muxatele tamei sou u'uluxe Lakeli ne. Tanu mu'oxoxe la tauu ie muxatele tamei ne loxo, voxo moso tatalusi no xavutalau.

21 Muxolu sou muxaxaixu iau ne, xe tauu ie muxatele tamei mulai mukalu, xe mulutu la mulai muxali noxou iau, la muvikala aloxo 'o, “Nano'e 'iline ine'e mo a'uluxe, xo tauu ie eni elemolu lexe eni axoo sou axaxaixene no anu ane mukalu ne.” 22 Xe Lavani muavuti la mu'oxonu la'ilali sou iau ilee 'olu Lakeli taula'ixa'a. Mukala anaxu mulai noxi'a ta mitema no nano no tuala ne, sou mine'e no anu la'ilali ane ne mukalusi. 23 Xe no 'olovoxo la Lavani uno'e Lakeli ilai noxou iau loxo mulemolu tei 'ole ua, mukasivaxa noxie vimoe tila Lea mole mulailixe noxou sou ilou miai no 'olovoxo ne. 24 Lavani muno'e sema vile noxi'a ta sema e ixoxoo noxou sou upalupalusi'a sou i'oxo'oxo mixumixu ne sou ie 'olu Lea. Sema ne ualasie lexe Silipa. 25 Miai xe mitulu no kakalu xe, Iakovo iou muvaxa loxo 'o, la ano 'o Lea mo ane ilou miai 'o. Xe aliku 'o muavuti la mulai muxali noxou iau la muvikalanu aloxo 'o, “Loxovaa ane nini ne'oxo 'ilixo ano 'o mune'e noxilo loxo 'o? Eni exaxaixene 'o sou lexe eni ano'e Lakeli, ia loxovaa la, nini ne'oxo loloxo loxo 'o?” 26 Xe iau muavuti la muvikalanu lamana aloxo 'o, “Lai noxixe 'o, nexi talavusou tavaitaula'ine'i ta 'ilixe ta sema ane mipaa no tali'a ta laposalaxu tei uasi. Ta laposalaxu ane nexi tavaitaula'ine'i tei. 27 Ia naxolu 'o mo voxo sou taula'i ano ulai usivita no anu voxo muxatele tameisou 'o ka sou eni ano'e Lakeli ilai noxine, lexe nini namasaxa lexe naxolu tauu ie muxatele tamei la sou naxaxaixo. Xo eni masaxa noxilo aloxo ne.”

28 Xe Iakovo muavuti la muvikalanu iau lexe, “Anu mii vile uasi.” Xe voxo sou taula'i ane mi'oxo tei 'ole mulai musivita, la sou Lavani muno'e 'olu Lakeli sou mulailixe noxou iau Iakovo sou mu'uluxe. 29 Ka muno'e Vila mulailixe noxie 'olu Lakeli ne sou ipalupalusie sou i'oxo'oxo mixemixe. 30 Iakovo muno'e Lakeli kalumo sou milai ilou miai. Anu mumasaxaie Lakeli misevile noxie Lea. Xe muavuti la mumulinu masaxa noxou iau sou muxolu tauu ie muxatele tamei la sou muxaxaixu.

Iakovo ta 'Olu

31 Iakovo ilo'a ta semasemau tamei ne ixoxoolu, la anu ulai ilee Lea ixoxoo malamalaxo uasi, ia Lakelisi ane ilou itautinane'i misevile. Xe IAUE mumalei la mumaisou aloxo ne, la tanuxe Lea la sou musu'uline la ane opoone. Ia Lakeli ne uasi. 32 Ilo'a mixoxoo xe ili'i la sou Lea mivo'o 'ilie vile mulu. Xe miavuti la mivikala aloxo 'o, “IAUE mulavusou tu'umaxu ane muxoo noxilo. Anu manina lexe muluxeni umasaxailo manina.” La sou mimoxo'u ualasou lexe Luven. 33 Xe ili'i la, la Lea opoone la mivo'onu 'ilie mulu vile la. Xe miavuti la mivikala aloxo 'o, “IAUE muitixeni keakea mulu 'o xo anu mulavusou lexe Iakovo ne umasaxailo malaxo uasi.” La sou mimoxo'u ualasou lexe Simeoni. 34 Xe ili'i la, ane opoone la. La mivo'onu 'ilie vile mulu la. Xe miavuti la mivikala aloxo 'o la, “Vaimomo 'o eni elavu lexe eni muluxeni maasi la anu masaxa noxou utila une'e noxilo mo unene'e noxilo sou noxi'a ilo'a ta 'olu taxoo tapita utotomu, xo eni ane evo'one'i ta 'olu tatalu ta mulu 'o.” La sou 'ilie ane ne, ane mimoxo'u ualasou lexe Levi. 35 Xe ili'i la, ane opoone la. La mivo'onu 'ilie vile mulu la. Xe miavuti la mivikala aloxo 'o, “Vaimomo 'o eni a'iti IAUE ualasou sou molomolo ano 'o la.” La sou ane mimoxo'u ualasou lexe Iuda. Io, ili'i la ane ivo'o la ua.

Copyright information for `ATA