a31:13Tav 28:18-22

Genesis 31

Iakovo Mu'ume Mulai

Ilo'a mixoxoo ne xe alaxu vile, la Iakovo mulomu lexe iau, Lavani ta 'olu ta mulu misu'anu vaikala vile. Mivikala aloxo 'o, “Iakovo to ne mune'e la, iu mimii uasi ia, mune'e muxolu noxinge nenge'a maminge mole ane mutaxusou maminge miumiu mukalu 'o. Mole ane anu muxali itema sou lavuluti vile manina.” Mami'a kalumo ne, iau Iakovo umamaisou, la iou la'ila'iaxu mo uvivikalanu lailaixe loxo tei uasi, muxiu mo loxo iou ututumasi. Xe IAUE muavuti la muvikalanu Iakovo aloxo 'o, “Naxoxoo 'o uasi, nalutu mo nalivu ulai no lialiaxa'a mamine ilo'a ta minemineni xo eni kalumo alai axoo ane sou axoo noxine sou asaxila'ine.” Xe Iakovo muavuti la mukalanu anaxui'a Lakeli ilee Lea sou milai noxou e uxoxoolu sou usaxisaxila'a ta sipsip ilo'a ta mee no anu. Ilou milutu xe milai mixali noxou, la muvikalane'i ilou, “Emaisou maminge ngongou, la maulixu muxiu. Tei, la nenge'a ta'osa'osasinge ngato'o mo uvivikalanenge nenge'a ne lailaixe loxo 'o, ia vaimomo 'o ne uasi manina, emaisou iou ne, la iou masuailosi. Ia Lataua noxou mamilo Aisaki ane uxoxoo noxilo 'o. Ngingi ngongou ngelavu lexe, eni exaxai misevile xou maminge ngongou, ia anu mukalavoileli alaxu mavulovexa la ulotoleli uasi. Mu'oxo 'ilixo ane ne noxilo ia umomomo sou u'oxo 'ilixo vile masua une'e noxilo uasi xo Lataua a uxolu noxilo. Muvikalaleli lexe ta sipsip ilo'a ta mee ane tolotolone'i ne eni ta na'axeni. Ioxe, ane'i isulu xe tolotolone'i ukalusi, la anu uxiunu la lexe eni ta na'axeni ane misa'esa'eutu. La sou ane Lataua muno'a maminge ngongou ta sipsipou ilo'a ta meeu la ane mune'e muitixeni 'o. 10 No tauu ane ta mee ta mulu ane'i sou ivaialone'i ta mee ta sema, la eni eaipiepiena lexe emaisi'a ta mee ta mulu ane tolotolone'i mo ane'i ane misa'esa'eutusi ane mivaialone'i ta mee ta sema ne. 11 Xe angelo noxou Lataua muavuti la mu'avalilo, ‘Iakovo,’ la eni ekolinu ‘O! Ma'ia?’ 12 La anu musolonu vaikala la, ‘Natulu mo namalei ta mee ta mulu ane tolotolone'i mo ane ngolangola'a mo ane'i ane misa'esa'eutusi ane ivavaialone'i ane'i ane ta sema. Eni emaisou 'ili'ilixo e Lavani mu'oxo'oxo noxine ne mukalu, la sou ane eni e'oxo vote'i ano 'o sou usu'ulineni. 13  a Eni e avivikalaneni 'o, eni Lataua e epala'a noxine ne Veteli, anu lia xalee ane nini nelaa lavo'o e netixalaxu ka nenixiu ovu vile lexaxu no latanu sou nepala'alixu taneni mune'e noxilo. Ia, alalae 'osi ne, nataxusou mimemimeni mo nalivu ulai no liaxene.’” 14 Lakeli ilee Lea milolomu noxou mului'a ilou aloxo ne mukalu, la ilou mikolinu, “Nexi umomomo sou tano'umexi mimii se'i noxou mamixe miumiu 'o uasi. 15 Xo anu mu'oxonexi loxo nexi ta 'olu uasi, nexi ta sema sou tuala va'axu mo a. Muno'u 'ulusixe ne ia musu'a mukalu ne. 16 Mimii tavu'alo e Lataua muxexe noxou mamixe avolu ne, une'e nexi noxi'a ta 'ili'ilixe mii mexi ukalusi. La sou nexi umomomo sou tamulesine uasi. Namuli aloxo Lataua muvikalaneni ne.”

17 Xe ili'i la sou anu mutelone'i ta semasemau ilo'a ta 'ili'ili'a noxi'a ta kameli. 18 Anu mutelone'i mukalu la muolene'i ta sipsip ilo'a ta mee sou muulaxune'i sou milai. Lavulavuluti'a e muno'u ne Mesopotamia ne, mutavulenu kalumo sou mulailixu ne Kanani noxou Aisaki. 19 Lavani ne ulavu uasi, xo mulai no paxa mo a uxoxotosou ta sipsip laxusi'a. Lakeli miavuti la milai mipakaline'i ta miiu e mupuine'i sou isaxila'u taasou sou mino'a milailixa'a. 20 Itemasie Alamu kena Lavani ne, 'ei muvikala lamana no anu lailutu ane ne. Iakovo xavutalau lexe, ane'i ipasikisi mo ilai. 21 Mitaxusou mi'ami'a tavu'alo ne mukalu, la mipasikisi mole milai. Mimuamua'i xoo xe, milai la mixisa'isou lexa toxoxa'a Iupileitisi. Mixisa'isou mukalu la sou mimuamua'i milai loxo no laxalaxa'ilu ne Xileati.

Lavani Mumulinu Iakovo

22 Iakovo ena milai mo voxo tatalu mupolo, ia ili'i la sou ta mitema se'i milai mivikalanu Lavani lexe Iakovo ane mupasiki mo mu'ume mulai ne. 23 Xe Lavani mulomu aloxo ne, la mutaxusi'a ta minuminu se'i sou ilo'a mimuline'i. Mimuline'i milalai xoo xe, voxoxa'a muxatele vile mukalu xe muxatele tamei sou, la sou mixalisi'a no laxalaxa'ilusie Xileati. 24 Mixali xe 'olovoxo la ilo'a miai. Lavani muai la muaipiepiena lexe Lataua muxali noxou la muvikalanu aloxo 'o, “Nelelemulinu Iakovo mo a nene'e nexalisou 'o, ia mamu nini navikala vile loxo 'o noxou uasi!”

25 Iakovo ena miuli la milai mixolu ane no laxalaxa'ilu ne Xileati sou mitulusi'a tani, la sou ane Lavani ilo'a ta minuminu mine'e mixalisi'a ne. Lavani kalumo muavuti la mutulusou tani vile ane no laxalaxa'ilu ne, no pa'umolu Iakovo. 26 Xe ili'i, la sou Lavani mulai noxou Iakovo la muvikalanu aloxo 'o, “Loxovaa ane nini ne'oxo loloxo la nelavene'i ta 'alixe tamei 'o ilo'a ta xasixasilo loxo ta motu ilulutu sou ilai ialivula no tuala vile 'o? 27 Loxovaa ane nini ne'oxo loloxo mo nepasikisi ia navikalaleli lamana ua 'o? Lexe nini navikala lamana tei noxilo la nenge nenge'a taxolu tapita mo ta'ani sevile ka tavalivali kulumiso mo talala'ati sou talelexe mo talelei, ka sou nexi tasaxangengi la sou ta'italongengi ngalai. 28 Ano 'o ne ua, nini netalumeie'i ta xasixasilo ilo'a ta neeni'asi mole ne'umene'i 'o ia, eni asaxane'i laixe mo atimu no xalexalene'i mo aioone'i ka sou i'umesilo ilai uasi. Nexovulaulau misevile. 29 Eni umomomo sou akalusine ane alalae 'o ia, umomomo la uasi xo no 'olovoxo la Lataua noxou mamine mumulesilo la muvikalaleli lexe, ‘Nene'e nexalisou Iakovo ne ia mamu nini navikala vile loxo 'o noxou uasi!’ 30 Eni elavu lexe nini taneni mutulu pekia'u lexe na'umesilo mo nalivu ulai no tualasine, ia loxovaa la nalutusi mo nalaisi ua ia, nelutu la nepakaline'i ta mimii e epuine'i sou isaxila'u taasilo?” 31 Xe Iakovo muavuti la muvikalanu iau Lavani aloxo 'o, “Ua, lexe avikalaneni lamana ia, emama'u xo loxo io maasi xe eni avikalaneni lamana, la nini na'apixa'a ta 'iline 'o pekia'u la na'umene'i ilivu ilai noxine. 32 Ia avikalaneni aloxo 'o, nakamuline'i ta mimii noxine alalae 'o, xe naxalisi'a no tivaxu vile noxixe 'o la anu ane ne usoli ane alalae 'osi. Nexi noxi'a ta molomolo noxilo ilo'a ta neeni'a mo ta mitema sou xaixai noxilo mo, ane'i ane ngongi'a ngene'e 'o ane, nexi noxi'a tatutulu 'o ia nini mene na'una no taataasixe ne mo nalulusou tivativanexe ne mo namalei lexe naxalisi'a. Lexe naxalisi'a la nalaasi'a mo nano'a, ia nexi latala 'o tatulu mo tautiieni.” Iakovo uvivikala Lavani loxo ne ia, ulavu uasi. Mii ne, semau Lakeli mipakali noxou mamie taasou mo a itatalumeiou ne. 33 Lavani muavuti la mulai mu'unalai noxou Iakovo taasou tei sou mukamuli. Mukamuli xe uasi, la musuku mulai noxie Lea no tani. Mu'unalai mukamuli xe uxalisou mii vile uasi, la mulaa muatu. Xe muavuti la musuku mulai no tani noxi'a Silipa ilee Vila, la uasi. Xe musuku la mulai noxie 'olu Lakeli no tani. 34 Ane moosou e mipakaline'i ta miiu mamie ane. Ane miavuti la mitaane'i mu'una no anu tixalasou ixolu no anu kameli la ixolusou mo milai mixolusou. Mamie mune'e xe mu'una no taasie, la ane mipasipaa mivikalanu lamana aloxo 'o, “Tila, na'una mo nakamuli, ia nalavixo uasi, xo eni ekulukemelo mo umomomo sou eni atulu sou asukusine uasi.” Mamie mu'una la ukakamuli no nano no tivativaxe xoo mole ua, la mulaa. 36 Iakovo ne la'iaxu misevile. Xe muavuti la muasaxau iau Lavani ne sou mutali'i xatixati vaxa noxou. “Ae! Susu ma'ia ane eni e'oxonu la sou ane nini nelelemulileli, nene'e avone muxaixai mimemimexi mukalu 'o? 37 Ioxe, lexe nexalisou mii vile, la namuxaxu ulu'e no talanexe nexi latala e tatutulu 'o, mo sou ta mitema noxilo 'o ilo'a ane'i ane noxine imaisou kalumo, la sou ane'i imomosou vaikalasou no nixi noxinge nengei. 38 Xo nalomu, eni elai exolu noxine tauu ie mavulovexa tamei, la ta sipsipmeni ilo'a ta meemeni ne isusulu utotomu lailaixesi ia ixotoxoto uasi. Mo avau sipsipmeni mulu vile mo a'ou uasi. 39 Mo no 'olovoxo ane, ta mii se'i ine'e ipakaline'i ta sipsipmeni sou ive'a i'i'a, mo ane ive'a mo i'i'a pausi'a uai ne, eni ano'u mo ane'e amaxa'u noxine uasi. Eni melo axiu vaxa la, akoli mii e tasiauxu ne la. Xe naavuti la, navikala pekia'u une'e noxilo misevile sou melo akolinu mii ane ta mitema ipakali no aso xe no 'olovoxo kalumo. 40 Voxo piena musuku aso ulakaisilo xo mole kisilo ne lexe uvala. Xe no 'olovoxo la sivo ukasilo mole aolopipi loxo 'o. Mo aai laixe uasi manina. 41 Nengei texolu tepita tauu ie mavulovexa tamei, la e'ausou ane sou exaxaixene nesi. Exaxaixeni tauu ie mavulovexa vile mo mulelia tami'a xo eni e'uluxa'a ta 'iline ta sema tamei 'o. Xe ili'i la exolu sou exaxaixene tauu ie muxatele vile sou lexe ano'axeni ta sipsip se'i noxine sou lailoto sou xaixai latala ne la ua. Nini nekalakalavoilelisi alaxu mavulovexa vile. 42 Ia, lexe Lataua noxou mamilo, mo Lataua noxou Avalaamu uxoo noxilo uasi, la male eni alivu vitanisi, ia mii vile sou ano'u no avolo uasi. Ia tava'u xo Lataua mumaisou mo mulavusou xaixai tapiena e eni e'oxoxene, mo tu'utu'umaxu ane muxoo noxilo 'o, la sou ane anu muxali noxine no 'olovoxo sou muvikala pekia'u noxine ne.”

43 Xe Lavani muavuti la mukolinu vaikala noxou Iakovo aloxo 'o, “Lea ilee Lakeli ne, eni ta 'ali'alixe ta sema ane. Mo ta 'ili'ili'a ilou ne, eni ta xasixasilo ane, mo ta sipsip ilo'a ta mee kalumo ne, eni ta miixe ane. Mo namalei, mimii tavu'alo 'o ne, molu ane noxilosi, ia a'oxo mii vile noxi'a Lea ilee Lakeli mo ta 'ili'ili'a uasi.” 44 Xe anu Lavani molu muavuti la muvikalanu Iakovo la, “Eni emasaxa lexe ane alalae 'osi 'o, nane'e mo nengei tasakiinu vaikala sou opo vilesisi pumuxu sou usakinenge nenge'a no anu. Xe ili'i la sou nenge'a tasu'a la'oluxu lavo'o no lia 'o sou loxo sosovomenge. Ili'i xe nenge tane'e tamaisou, la nenge taxavutalanu vaikala e nenge taxalixu alalae 'o.” 45 Xe Iakovo muavuti no lia 'o, la mulai mutavulenu lavo'o to vile veveeni ka mune'e mulaa loxo atola pumuxu mulu'elai no lia, 46 ka muvikalane'i ta 'olu ilo'a ta mitema noxou sou milai mitavule lavo'o se'i la, sou mine'e mita'olunu vaxa muxaliliou ane anu mulaa tei. Xe mukalu, la sou ane'i ilo'a mi'ani ane no lavo'o la'oluxu pa'umolu ne. 47 Xe mi'ani mukalu, la Lavani mulemolu lavo'o la'oluxu ane ne lexe, “Iaxaru Sa'aduta” no anu vaikala noxou, xe Iakovo kalumo mulemolu lexe Xaleti no anu vaikala noxou. 48 Xe Lavani muavuti la muvikalanu Iakovo aloxo 'o, “Lavo'o la'oluxu ano 'o, anu uxolu loxo sosovo sou nenge nengei taxavutalanu vaikala ane nenge nengei tasakiinu ili'i.” La sou ane ane'i mimoxo'u lavo'o la'oluxu ne lexe Xaleti. 49 Xe Lavani muavuti la muvikala aloxo 'o la, “IAUE molusi umaisinge nengei mine nenge nengei takalipala'a.” La sou lavo'o la'oluxu ane ne, milemolu kalumo lexe Misipa. 50 Xe Lavani muavuti la muvikalanu Iakovo la, “Ia, lexe nini nasaxila'a mo na'oxo laixe noxi'a ta 'alixeni ta sema tamei 'o uasi, mo male nalai na'uluxa'a ta sema se'i va'axu, ia eni alavu uasi ne, ia anu laixe nini naxavutalanu lexe Lataua a umamaisinge nengei. 51 Lavo'o ane eni elaanu mo ane eni esu'a la'oluxu no tava'u ane, eni elaanu no nixi noxinge nengei ne, ane uxolu 'o. 52 Uxolu sou nenge tamaisou aso vile, la taxavutalanu vaikala ane nenge nengei tasakiinu. Eni amomomo sou aalasou pilixa ano 'o sou avenge mo ngingi umomomo sou ngaalasou sou ngavelo uasi. 53 Lataua noxou Avalaamu mo Naolu molusi umaisinge, la sou ulavu no anu 'ili'ilixo noxinge nengei.” Xe no ualasou Lataua anu Lataua noxou Iakovo momu Aisaki, anu Iakovo muavuti la mupala'alixu tanu lexe anu utetelisou mo umulinu vaikala ane ne. 54 Xe muavuti la muve'a ta sipsip se'i sou mu'elaxa'a mulai noxou Lataua teitexi no laxa'ilu ne. Xe ili'i la sou mu'avali'a ta mitema noxou mine'e ilo'a mi'ani. Mi'ani mukalu, la miai 'olovoxo vile la, teitexi no laxa'ilu ne. 55 Xe no kakau manina, la sou Lavani mulai noxi'a ta 'olu tamei ne ilo'a ta 'ili'ili'a sou mutimutimunu xalexalene'i ka mualusi'a io sou mu'italone'i ia anu mulivu mulai no tualasou.

Copyright information for `ATA