a42:2Apo 7:12
b42:9Tav 37:5-10
c42:22Tav 37:21-22

Genesis 42

Iosepu ta Vimovimou Ilai ne Aixiputo

Ioxe, Iakovo ilo'a ta 'olu ixoxolu no tualasi'a ne Kanani xe anu mami'a mulavu lexe la'ilali tavu'alo a uai ne Aixiputo, la anu muavuti la muvikalane'i ta 'olu aloxo 'o, “Ngananavaa e ngata'ota'olu vitani 'o, ngaavuti mo nga'oxo mii vile uasi? a Ngalomu! Eni elomu lexe ta mitema a ilalai ne Aixiputo sou ilolotoxa'a la'ilali. Ngalai ane mo ngalotonenge, ua tasoisoli sou soli maasi.”

Xe ane'i milomu vaxa noxou mami'a aloxo ne, la sou ane'i Iosepu ta vimovimou mavulovexa vile milutu sou milai ne Aixiputo sou ilotoxa'a la'ilali, ia mami'a upalusou vimo'a soxu e kitu'a, Iosepu vimou maninasou sou ilo'a ilai uasi. Vimou soxu ne ualasou lexe Beniamini. Mami'a umasaxa lexe umuline'i uasi xo loxo 'o io, male mii vile u'oxo masuanu no vote'i. Ta mitema se'i ne Kanani ne milutu sou milai milotoxa'a la'ilali, la ane'i Isilaeli ta 'olu mavulovexa ne milutu sou mimuline'i, xo soli tila ne mulai mutaasou xalee lia ne Kanani mukalu.

Iosepu ne, anu muxali itema sou usaxila'u tuala tila ne Aixiputo, mo ta mitema no xalee xalee tuatuala ne'ei ne'ei ne a ilalai noxou sou ilolotoxa'a la'ilali. Xe anu ta vimovimou mine'e mixali noxou, la mixola'u tava'a sou mitulu no tava'a vo'uvo'uxu ka sou mitangatulu mulu'elai no talaxu sou mitoxonu. Anu Iosepu ne, mumaisi'a ta vimovimou ne ka mutongone'i, ia anu muavuti la muvivikalane'i loxo anu ulavusi'a uasi. Muavuti la mutali'i xatixati vaxa noxi'a aloxo 'o, “Ngingi menge ne'ei e ngene'e 'o?” Xe ane'i miavuti la mivikalanu lexe, “Nexi mexe no xalee lia ne Kanani ane tene'e 'o, xo temasaxa lexe talotonexe la'ilali.”

Anu mulavusi'a xo mutongone'i, ia ane'i ne itongonu uasi. b Mumaisi'a mine ane'i mine'e sou mixola'u tava'a sou mitulutulu no tava'a vo'uxu sou mitangatulu mulu'elai no talaxu, la anu muxavutalanu aipiepiena noxou e muai la mumaisou, ia anu muavuti la muvikalane'i lexe, “Ngingi ta mitema ano 'o, ngingi ngene'e 'o sou ngatulunexe sou ngalavu lexe tualasixe xalee anevaa ane pekia'u uasi.”

10 Xe ane'i miavuti la mikolinu vaikalau aloxo 'o, “Tila, uasi! Nexi tene'e 'o loxo nexi ta mitema vitanisi sou lexe talotonexe la'ilali. 11 Nexi latala 'o ne, itema vilesisi ta 'olu, ia nexi tene'e sou tatulungenge uasi, xo nexi ta mitema ano ne, nexi ta mitema sou vaikala manina. Takalavoi uasi.”

12 Ia anu Iosepu muavuti la muvikala kiipali vaxa noxi'a, “Uasisi manina! Ngingi ngene'e 'o sou ngatulunexe sou ngalavu lexe tualasixe xalee anevaa pekia'u uasi.”

13 Xe ane'i miavuti la, la mivikalanu la aloxo 'o, “Tila. Nexi 'o ne nexi itema vilesisi ta 'olu. Nexi itiitisixe muxali loxo mavulovexa mo mulelia tamei. Mo nexi sou xalee lia ne Kanani. Vivixe vile ne musoli, xe soxu e kaluxusixe a ilou mamixe mixolu.”

14 “Uasisi! Ngingi ngene'e sou ngatulunexesi!” Anu Iosepu muavuti la muvikalane'i aloxo ne la. 15 “Ia eni amasaxa lexe alavusinge manina no anu vote'i vile aloxo 'o. Eni atulu no xavi noxou tatananu tuala lai ne Aixiputo, la sou eni avikala manina aloxo 'o, umomomo sou ngingi ngalivu ulai no tualasinge uasi manina. Mole vivinge soxu e kaluxusinge ne lexe une'e 'o mo eni amaisou no ieli maninasou. 16 La sou emasaxa lexe vile noxinge ne ulivu mo ulai uno'u une'e, ia ngingi tavu'alo ne ngane'e ngaxoo no anu taasou navunavu 'o mo nexi takamuli mo talavu manina lexe ngingi ngevikala maninasou. Xe uasi, la eni atulu no xavi noxou tatananu tuala ne Aixiputo, la sou eni avikala manina lexe, ngingi ngene'e 'o sou ngatulunexe manina.” 17 Muvivikalane'i aloxo ne xe mukalu, la muno'a sou mulai mitatuxa'a sou mixolu no nano no taasou navunavu voxo tatalu.

18 Xe no voxo tatalusou, la anu Iosepu mulai sou muvikalane'i aloxo 'o, “Ngalomu, eni 'o ne, eni alavusou ataxaanu Lataua misevile. La sou eni emasaxa lexe apamaulingengi no anu vote'i vile aloxo 'o. 19 Lexe ngingi ta mitema sou ngavikala manina, la eni emasaxa lexe vile noxingesi ane maasi la ulivu mo ulai uxolu no nano no taasou navunavu e ngingi ngongi'a ngelai ngexoo no anu, ia ngingi muxatele tami'asi ne, ngano'u la'ilali e ngelotonu ne mo ngalivu ulai noxi'a maminge ilou 'olu mo ta mingemingengi e ixolu sou soli no tuala. 20 Ngalailixu la'ilali 'o no tuala ukalu, la sou ngatilo vivinge soxu e kaluxusinge ne une'e noxilo. Xo lexe eni amaisou no ieli maninasou, la sou eni alavu manina lexe ngingi ngevikala manina. La sou umomomo sou ngingi ngaulua uasi.” Ane'i milomu noxou aloxo ne xe mukalu la sou mimasaxa lexe imulinu aloxo anu mulemolu noxi'a ne.

21 Xe ane'i miavuti la mivikalane'i ngato'o lexe, “Ngamaisou, nenge te'oxo masuanu vivinge la sou ane vaimomo 'o nenge texalisou tu'umaxu ano 'o lakoli 'ilixo ne. Nenge nenge'a temaisou tu'umaxu toxoxa'a ane muxali noxou ne mo, anu soxu mutama mune'e noxinge sou tasu'ulinu ne, ia nenge texiunu tumalingeusi. La sou ane nenge nenge'a talu tu'umaxu ano ane mune'e musu'asinge 'o.”

22  c Xe Luven muavuti la mukoline'i ta vimovimou aloxo 'o, “Eni evikalangengi laixe lexe mamu nga'oxo masuanu maulamenge soxu, ia ngingi ngalomuxo uasi, la sou ane nenge taxalisou tu'umaxu ano 'o lakolisou soli noxou ne.” 23 Ia Iosepu ta vimovimou ne ilavu lexe Iosepu mulavu no anu vaivaikala noxi'a e i'oxo'oxonu uasi, xo anu uvivikalane'i no anu vaikala noxi'a ta Aixiputo ia, itema vile a sou uxiuxiunu ulai noxi'a no anu vaikalai'a. 24 Muvivikalane'i aloxo ne xe tamaxu mulokolaxu, la mulai mutalume no nano mo mutama o. Xe mutama mukalu, la sou anu muuatulai noxi'a sou muvivikalane'i la. Xe ili'i la sou mupalusi'a ta mitema sou xaixai noxou sou mitila'u Simeoni mulai loxo noxi'a sou misakisakiinu no ie'i ta vimovimou ne.

25 Xe muavuti la muvikalane'i ta mitema sou xaixai noxou sou mitataa la'ilali mu'unalai no tivativaxa'a ta vimovimou ne, xe muvikalane'i sou itataa lamoli'a ulivu no tivativaxa'a vilevilesi kalumo. Mo mino'uxa'a la'ilali ane muxutu kalumo sou i'ou tuxane'i no vote'i. La ane'i mi'oxonu aloxo anu mulemolu noxi'a ne. Xe ta mitema sou xaixai noxou mi'oxonu aloxo anu mulemolu ne mukalu, 26 la sou ane'i Iosepu ta vimovimou ne mitelotelo tivativa sou la'ilalixa'a e milotonu ne mutelo noxi'a ta donkii'a vilevilesi sou milutu milai.

27 Milutu milai xoo xe, 'olovoxo la mita'olu sou miai. Xe vile noxi'a muavuti la mululusou tivaxu sou lexe ulaanu la'ilali se'i sou ua'anu donki noxou sila, mumaisou lamoliu e mulotonu la'ilali no anu ane uai no latanu la'ilali no tiva anaxu 'o. 28 Xe aliku 'o muavuti la muvikalane'i ta vimovimou, “Ae, taemoso! Lamoli noxilo e elotonu la'ilali 'o no anu ane mulivu mune'e noxilo 'o. Ngamalei, ane uai no la'ilali 'o latanu no nano no tiva 'o.” Xe ta motu mimalei loxo 'o, la manina. Ka inavaa. 'E'ene'i ne mutelo mulokolaxa'a manina. Tane'i kalaua sou u'umesi. Xe miavuti la mitalitali'isi'a ngatongato'o, “Lataua mu'oxonu 'ilixo ma'ia ane loxo 'o noxinge 'o?”

29 Milutu sou mimuamua'i ilalai xoo xe, milai mixali noxou mami'a Iakovo ne Kanani, la mia'aloxu mimii e muxali noxi'a ne Aixiputo ne aloxo 'o, 30 “Telutu e nepalusixe sou telai, xe texali ne Aixiputo, la itema tila ane usaxila'u tuala ne Aixiputo ne, muvikala pekia'u noxixe mo mukalavoisixe lexe nexi telai ne sou tatuluxa'a. 31 Xe nexi teavuti la tevikalanu lamana lexe, ‘Nexi ta mitema sou tatulungenge uasi, nexi 'o, nexi ta mitema sou vaikala manina. 32 Mo nexi 'o, nexi itema vilesisi ta 'olu. Nexi itiitisixe mulai muxali loxo mavulovexa mo mulelia tamei. Ioxe, ili'i, la vile musoli, xe soxu anu kaluxusixe a ilou mamixe mixolu no tualasixe.’ 33 Xe itema tila ane usaxila'u tuala ane ne muavuti la muvikalanexi aloxo 'o la, ‘Ngalomu, eni emasaxa lexe alavu manina lexe ngingi vaikalamengi 'o manina, la vile noxinge ne une'e mo noxou taxolu, ia ngingi ane muxatele tami'a ne ngatavule la'ilalixa'a maminge ilou 'olu, mo ta mingemingengi no tuala mo ngalai. 34 Xe ngalivu une'e la, ngatilo vivinge soxu ane kaluxusinge sou ngane'e noxilo. Lexe eni amaisou soxu ne, la sou eni alavu manina lexe ngingi ngane'e sou ngatulunexe uasi mo lexe ngingi ngamitema sou kalavoi uasi. La sou eni alivunoxu vivinge ane uxoo noxilo 'o sou ulivu ulai noxinge. La sou ngingi ngane'e ngaxoo lai 'o sou ngavaivaoli sou ngano'u lamoli.’”

35 Mixali mia'alou mami'a aloxo ne xe mukalu la sou ane'i vilevilesi ne milulusou tivativaxa'a sou milaasou la'ilali e milai miloto ne, xe ie'i muvaxa loxo 'o la, lamoli'a soxisoxisou kalumo ane muai no nano no tivativaxa'a 'o, la mimama'u misevile. Mami'a kalumo ne mumama'u misevile. 36 Xe muavuti la muvikalane'i ta 'olu ne lexe, “Nga'oxole mole eni ta 'alixeni tasitasiauxa'a noxilo ukalu io? Iosepu tasiauxu tei mo musu'a ne. Ka Simeoni ane kalumo tasiauxu ne. Ia ngingi a ngevikala lexe ngano'u Beniamini kalumo sou ngalailixu la. Ia talu la axoo laixe.”

37 Xe 'olu Luven muavuti la muvikalanu momu aloxo 'o, “Ano'u mo alailixu, xe namalei lexe eni alivu uxali noxine ia, anu uasi, la sou eni melo ano'a ta 'alixeni ta mulu tamei ine'e noxine sou nave'a isoli. Na'italonu Beniamini no avolo mo eni melo asaxila'u sou alailixu ka alivunoxu une'e noxine.” 38 Ia momu ne, pekia'u misevile. Muavuti la muvikalane'i ta 'olu, “'Alixeni 'o umomomo sou umulingengi uasi manina, xo vimou ane musoli ne, ia anusisi soxusi ane noxou taxolu 'o. Ngalailixu uasi xo loxo 'o io, mii vile uvau no vote'i. Ngamalei, eni soxu ane a aululu manina mukalu, lexe mii vile masua uxali noxou la eni talelixu misevile mole eni asoli mo alu'elai no tualasi'a ta mitema sou soli.”

Copyright information for `ATA