Genesis 44

Iosepu Siliva Kapuxu

Xe ilo'a mi'ani mukalu, la sou Iosepu muvikalanu itema e sou usaxila'u taasou ne aloxo 'o, “Nalai mo namoloxa'a ta mitema 'o la'ilali mo nataataa u'una no tivativaxa'a vilevilesi mo u'ana'ana manina. Nataataa e piena. Xe ukalu la, nataataa lamoli'a vilevilesi ne ulivu ulai no nano no tivativaxa'a vilevilesi. Namuxaxu teiteixi no tivativaxa'a anaanaxu. Ia vimo'a soxu e kaluxusi'a ne, nano'u kapuxo siliva 'o, ka nataanu ilou lamoli ulai no nano no tivaxu.” Xe anu itema ne muavuti la, alaxu vilesisi. Mu'oxonu mimii ne mukalusi aloxo tatilasou mupela'uxu ne.

Ilo'a miai xe mitulu no kakau manina, la ta mitema sou xaixai noxou Iosepu ne misaxane'i ilo'a ta donkii'a sou milai. Milutu mo mi'umesou tuala tila ne mo ilai no paxa uao ia, Iosepu muavuti la muvikalanu itema sou xaixai noxou e usaxisaxila'u taasou ne aloxo 'o, “Nalutu mo namuline'i ta aliku e milivu alalae 'o mo lexe naxalisi'a la natali'isi'a aloxo 'o, ‘Loxovaa ane nexi te'oxo laixe noxinge ia, ngingi ngekoli no anu masua 'o la ngepakalinu tila noxilo siliva kaluxu o?’ Kapu ane ne anu uie no anu xe sou ulavu no anu sou umaisou mii ane utalume kalumo. Susu ane ngingi nge'oxonu 'o anu mutila misevile!”

Xe anu itema sou usaxisaxila'u taasou Iosepu ne muavuti 'o la mumuline'i anu Iosepu ta vimovimou ne xoo la, mulai muxalisi'a. Xe muavuti la, muvikalane'i aloxo tila noxou mupela'u ne. Xe ane'i miavuti la mikolinu, “Ae, tila. Tali'imeni ne laaxu loxovaa? Nexi tanexi lili. Nexi telavu lexe nexi ta'oxo 'ilixo vile loxo ne uasi manina. Namaisou, nini nelavu lexe nexi mexe no lia xalee ane ne Kanani sou telivu tene'e 'o la nexi teno'u lamoli e texalisou no tivativanexe anaanaxu vilevilesi sou telivunoxu mune'e. Ia nexi tapakalinu xoulu ilou siliva no taasou tila noxine loxo ne mole loxovaa o?” Xe miavuti moso la misolonu vaikalai'a mulai noxou itema ne aloxo 'o la, “Ae, tila. Lexe nini naxalisou vile noxixe 'o muno'u kapu ne, la uulua avilesi. Ia nexi latala 'o, nexi taxolu noxine sou napalupalusixe sou ta'oxo'oxo mixemixene.”

10 Xe anu muavuti la muvikalane'i lexe, “Ua ma'i, eni emasaxa aloxo ne. Anu ane lexe eni axalisou kapu noxousi, ane eni ano'u sou ulai uxolu noxilo sou eni apalupalusou sou u'oxo'oxonu mixomixo, ia ngingi latala nesi ngalivulivu ulai no tualasinge.”

11 Xe ane'i milomu aloxo ne, la mita'olunu tivativaxa'a no lia alaxu vilevilesi. Ka me'a milulusou tivativaxa'a ne anaxu vilevilesi. 12 Xe milulusou mukalu, la sou anu itema ne molu mune'e sou mukamuli kapu ne no nano no tivativaxa'a. Uxilexilenu tivativa ne laixe loxo 'o. Musoko noxou vimo'a ane laposalaxu xoo la sou, mulai musivitanoxu noxou soxu e kaluxusi'a. La sou muxalisou siliva kapu tila noxou ane noxou Beniamini no tiva. 13 Ta vimovimou mimalei loxo 'o la manina. Xe miavuti la misinasinanu tokolomoi'a no vasime'a vilevilesi ne mukalu. Xo tane'ixu misevile. Xe miavuti no lia 'o la, mitelo mixamixa'a no latane'i ta donkii'a alaxu vilesisi, xe miavuti la milivu mulai ne Aixiputo.

14 Milivu xe milai mixali no tani noxou Iosepu ne, la anu Iosepu a uxoxoolu no taasou nesi o. Iuda ilo'a ta vimovimou mi'unalai no taasou la mitulutulu no tava'a vo'uvo'uxu sou mitangatulu mulu'elai no talaxu vimo'a sou mitoxonu ne. 15 Xe anu muavauti la mutali'isi'a, “Ngingi nge'oxonu 'ilixo ma'i ane loxo 'o? Ngalavu lexe itema vile loxo eni umomomo sou ulavu mii ane utalume uasi?”

16 Vimou Iuda muavuti la mukolinu aloxo 'o, “Tila, nexi talemolu mii ma'ia la ulai noxine? Mo nexi tavikala piepiena sou taxilili lexe nexi ta'oxonu mii ano 'o uasi, loxovaa e Lataua molusi mupala'alixu susu noxixe 'o io. Maasi la nexi latala ukalusi 'o ne, nini nano'ixe sou nexi taxolu noxine sou napalupalusixexu mixemixene sou nexi ta'oxo'oxonu. Ia anu ane muno'u kapuxenesi uasi. Nexi noxi'a ukalusi.”

17 Xe Iosepu muavuti la muvikala aloxo 'o, “Uasi manina! Umomomo sou eni a'oxonu loxo ne uasi! Anu ane muno'u kapusi ane anu uxolu noxilo sou apalupalusou sou u'oxo'oxo mixomixo. Ia, ngingi latala nesi mii vile noxinge uasi. Tangengi uai laixesi mo ngalivu ulai noxou maminge.”

18 Xe Iuda muavuti la musuku mulai 'alai noxou Iosepu ka muvikalanu aloxo 'o, “Tatila noxilo. Eni emaisine la nini aloxo tatananu tuala ne Aixiputo manina. Ia na'apixo mamu, ieni uvaxailosi mo avivikalaneni 'o. Ia la'iaxene'ilo mamu. 19 Nalomu, no voxo ane loxo nexi tene'e tei, la nini netali'isixe lexe, ‘Maminge a uxoxoolu mo vivinge vile la uasi?’ 20 La sou nexi tevikalaneni lexe, ‘Ua ma'i, mamixe soxu ne aululu. Anu a uxoxoolu. Ilou vivixe soxu ane kalusixe. Anu mamixe soxu ne, aululu ia, anu mupalaa vivixe soxu ne. Mo vimou vile kalumo, ia vimou ne musoli. Ane'i ilou neni'a vilesisi, ia anu vimou soxu nesi ane umauli uxolu ne. Momu tanuxu mo usaxila'u laixe misevile.’

21 Ia tatila, nini nevikalanexi lexe nexi talai tano'u mo tane'enu noxine mo namaisou. 22 Xe nexi teavuti la tevikalaneni lexe anu umomomo sou u'umesou momu uasi, xo maasi xe anu u'umesou la momu soxu ne anu ukalu. 23 Xe nini neavuti la nevikala toxoxa'a noxixe lexe nexi umomomo sou namaisixe lexe nexi tano'u vivixe ane kaluxusou une'e noxine. Xe uasi, la umomomo sou nexi tane'e taxali noxine uasi. 24 Nexi telomu noxine aloxo ne xe mukalu, la sou nexi telutu sou telivu mulai noxou mamixe la tea'aloxu vaivaikalameni e nevikalanexixu.

25 Xe anu muavuti la mupalusixe sou talivu une'e 'o la sou taloto la'ilali sevile la. 26 Xe nexi teavuti la tevikalanu lamana aloxo 'o, ‘Nexi umomomo sou talai uasi. Xo maasi xe nexi talai, la umomomo sou tila opoonu usexelaixe sou nexi talai noxou uasi manina. Ia lexe nexi tano'u vivixe ane kaluxusou 'o ulai, la sou anu opoonu usexelanexe sou nexi talai taxali noxou aloxo anu molu mulemolu noxixe ne.’

27 Anu mamixe soxu muavuti la mukolinu vaikalamexi ne aloxo 'o, ‘Ngingi ngelavu lexe semaxeni mivo'one'i ta 'alixeni ta mulu tamei. 28 Vile ane mu'umesilo tatei mo ne. Male ta mii se'i mivau ne, xo amaisou uasi xoo mole ane mune'e mutalo vaimomo 'o. 29 Ia maasi xe ngingi ngano'u soxu 'o sou ngalailixu xe mii vile uvau no vote'i, ka eni asolisi mo alu'elai no tualasi'a ta mitema sou soli. Xo eni soxu ane aaululu ukalu 'o. La tu'umaxu ane ne umomomo sou ukalusou maulixosi.’

30 Ia vaimomo 'o, tatila nalomu lexe eni alivu ulai noxou mamilo xe anu umaisou maulu 'o no tava'ilo uasi, la anu ukalu soxu. Xo 'olu nesi ane anu 'e'enu manina ane. Mamixe soxu ne anu aululu maninanu. Ia lexe nexi talivunoxu 'olu ne uasi, la nexi mexe taolexu soxusi la, anu usoli mo ulu'elai no tualasi'a ta mitema sou soli. 32 Anu mamilo ne mu'apixu 'olu ne pekia'u misevile. Ia eni melo eavuti la epala'alixu masaxa noxilo maninasou mulai noxou aloxo 'o, ‘Naxavutala piena uasi, une'e la sou eni melo asaxila'u. Ia ulai xe namalei lexe eni alivunoxu une'e noxine uasi, la tu'umaxu ano 'o ne, vaikalasou utelo ane noxilo 'osi mo ulai utalo lexe eni akalu.’

33 La sou nalomu, eni emasaxa aloxo 'o, eni ano'u tanixu maulu 'o mo axoo noxine 'o sou napalupalusilo sou a'oxo'oxonu mixemixene, ia na'italonu soxu mo ulai noxi'a ta vimovimou mo ilo'a ilivu. 34 Lexe maulu 'o nexi noxou talivu ulai noxou mamixe uasi, la enisisi alai axali noxou loxovaa o? Xo eni amasaxa lexe amaisou tu'umaxu ano 'o uvila'isou mamilo uasi.”

Copyright information for `ATA