a48:3-4Tav 28:13-14
b48:7Tav 35:16-19
c48:20Eva 11:21

Genesis 48

Manase Ilou Epalaimu

Ilo'a mixoxoo xe ili'i, la vaikala lamana mune'e muxali noxou Iosepu lexe momu a pipiena mu'oxonu. La sou anu muno'a ta 'olu tamei, eiae Masase ilou Epalaimu sou ilo'a milai mikilisou. Xe anu Iakovo mulomu lexe 'olu Iosepu a mune'e la anu mupulili sou molu muavuti sou mutulu mutalupexa no luusou ne.

a Xe muavuti la muvikalanu 'olu Iosepu, “Lataua ane xaviinu misevile mupala'a noxilo ne Lusu no xalee lia ne Kanani, la mualusilo ane. Muvikalaleli aloxo 'o, ‘Eni axalixa'a ta 'iline tavu'alo misevile mo sou itiitisinge utelai, la sou ngingi ngaxali ta mitema tavu'alo manina ili'i. Mo eni a'italonu lia ano 'o lexe ta 'iline ilo'a ta xasixasine mo ta 'ilu'ilusuneni liaxa'a ulai avile ili'i mo kaluxu uasi.’”

Xe musolonu vaikalau la muvikalanu 'olu aloxo 'o la, “Ta 'iline ta tamei e nepalane'i ne Aixiputo 'o ka sou eni ene'e ne, eni ta 'alixeni. Emasaxa lexe Manase ilou Epalaimu ne, eni ta na'axeni ta 'alixeni, aloxo 'o Luven ilou Simeoni. Ia ulai ili'i xe male nini napalaane'i ta 'iline se'i la, la nini ta na'a nini ane. Xe ulai ili'i xe ikalaa pilipilixasou lialiaxa'a sou i'ita'italonu noxi'a vilevilesi, la ane'i ta 'iline ane nini napalaane'i no tumali'a Manase ilou Epalaimu ne ane'i imoxo'u liaxa'a no anu ualasi'a tamei. b Eni e'oxo xavutala ano 'o xo taleli utamasie nenine Lakeli misevile. Ane misoli no xalee lia ne Kanani no voxo ane nexi tevulasou tuala ne Mesopotamia sou tasuku ulai ne Epurata. Misoli, la e'asixe no vote'i pa'umolu ulai ne Epurata. (Vaimomo 'o ne ilemolu tuala ne Epurata ne lexe Vetiliemu.)”

Xe Isilaeli mumaisi'a Iosepu ta 'olu tamei e ilo'a mine'e ne la mutali'isou aloxo 'o, “Ta molomolo ta 'ei moso ne?” La anu muvikalanu momu lexe, “Eni ta 'alixene e Lataua mulosilo lai ne Aixiputo 'o ane.” La sou momu muvikala lexe, “Nano'a ine'e noxilo mo aalusi'a ilou.”

10 Isilaeli ne iou isiisivoxo mo umalei laixe la uasi, xo anu itema tila manina. La sou 'olu Iosepu muno'a ta 'olu tamei ne milai 'alai manina noxou momu sou momu mu'aulaxa'a ilou ka mutimunu xalene'i ilou.

11 Xe Isilaeli muavuti la muvikalanu 'olu Iosepu, “Eloxomale lexe umomomo sou amaisou ieni la ua, ia vaimomo 'o Lataua molu mumasaxa la sou emaisou ieni xe emaisi'a ta 'iline kalumo.”

12 Xe momu muvikala aloxo ne xe mukalu, la sou anu mutila'a ta 'olu sou muxexene'i noxou momu tava'u, ia anu mutangatulu mulu'elai no talaxu momu. 13 Xe muavuti la muno'a ta 'olu tamei ne ka mutulusi'a no pa'umolu. Epalaimu no avolu tema sou musaxi mulai loxo noxou Isilaeli avolu ae, xe Manase ne mutulusou no pa'umolu no avolu ae sou musaxi mulai loxo noxou Isilaeli avolu tema. Io sou musukune'i ilou milai sou mitulu 'alai manina noxou momu talaxu. 14 Ia Isilaeli muxiunu la muno'u avolu tema, ka mutelo sou mumuxaxu noxou ane kitu'a Epalaimu kisou, xe muno'u avolu ae, la mutelo mumuxaxu noxou ane laposalaxu, Manase kisou.

15 Io sou mualusou Iosepu la muvikala aloxo 'o,

“Nini Lataua e xasilo Avalaamu ilou mamilo Aisaki mimuamua'i noxine
maninanu mo nini Lataua sou saxisaxila'u noxilo tatei
mo mune'e mutalo vaimomo 'o.
16 Mo nini Lataua e nene'e nexali noxilo loxo angelo sou
nesaxila'ilo mo nepamaulileli no anu tu'utu'umaxu ane lexe ukalusou maulixo.
Amasaxa lexe nini naalusi'a ta molomolo tamei 'o.
Ipalaane'i ta 'ili'a tavu'alo mo sou ta 'ili'ili'a ilo'a ta xasixasi'a ixali tavu'alo manina
sou i'ana'ana no xalexalee tuatuala ukalusi ili'i.
La sou eni ualasilo mo xasilo Avalaamu ilou mamilo Aisaki ualasi'a kalumo
ne uxexee no anaxa'a ta mitema uasi.”
17 Xe Iosepu iou muvaxa la mumaisou momu mine mumuxaxu avolu tema no latanu Epalaimu kisou, la opoonu u'osa uasi manina. Xe muavuti la mukasi vaxa noxou momu avolu sou muxexeenu noxou Epalaimu kisou sou mumuxaxu noxou Manase kisou, 18 ia muvikalanu lexe, “Ane nemuxaxu avone no kisou ne uasi, anu ane laposalaxu ano 'o. Namuxaxu avone tema no kisou.”

19 Ia momu umasaxa uasi, la muvikalanu lexe, “'Alixeni, eni elavusou. Manase ne ulai la ta 'olu ilo'a ta xasoxasou mo ta 'ilu'ilusunu ne ixali tavu'alo misevile sou tuala vile. Ia kitu'a 'o anu ulai la utila musuku noxou. Ta 'olu ilo'a ta xasoxasou mo ta 'ilu'ilusunu ne ixali ta mitema sou xavi, mo ixali tavu'alo loxo ta mitema sou xalexalee tuatuala piena.” 20  c La sou no voxo ane ne, Isilaeli mualusi'a la muvikala aloxo 'o,

“Ulai ili'i, la ta Isilaeli imoxo'u ualasinge ngongou no voxo ane
lexe ane'i ilingau Lataua sou ualusi'a se'i. Ivikala aloxo 'o,
‘Lataua molu ualusinge loxo mualusi'a Epalaimu ilou Manase.’”
Anu aloxo ne la sou ane anu Isilaeli muxiune'i ilou sou mumuxaxu Epalaimu muuli noxou Manase.

21 Xe muavuti la muvikala vaxa noxou 'olu Iosepu, “Eni asou asoli, ia Lataua uxolu noxinge. Mo anu molu uno'inge sou ulivulingenge ulai no liaxu xasine ilou 'ilusuneni. 22 Lia e no tuala ne Sikemu ne, anu lia xalee ane ne laixe misevile. Tatei la eni eno'u viso ilou pasiko sou noxi'a ta Amolu te'otosou la eni eno'u e'umenu noxi'a. La sou, tava'u xo ninisi ane nini tila noxi'a ta viivine, la ane eni a'italonu lia ane ne noxine.”

Copyright information for `ATA