a1:2Ioa 1:3
b1:3Ioa 14:9; Kol 1:20; Eva 8:1
c1:4Pil 2:9
d1:52Sa 7:14; 1A'a 17:13; Lex 2:7; Apo 13:33
e1:6Lap 32:43; Rom 8:29
f1:7Lex 104:4
g1:8-9Lex 45:6-7
h1:10-12Lex 102:25-27
i1:13Lex 110:1
j1:14Lex 34:7, 91:11

Hebrews 1

Lataua Muvikalanu No 'a Anaxu 'Olu

Tatei la Lataua muvikalane'i ta xaixasinge alaxu tavu'alo no anu vote'i iouiou no anaxa'a ta mitema sou palomatana. a Ia vaimomo no anu voxo kalukaluxusou 'o, la Lataua muvikalanenge no anaxu 'Olu. Anu musosovosou 'Olu ne sou usaxila'u mimii latala ukalusi sou uxali ta na'u, mo no avolu 'Olu nesi la Lataua mukoinu mimii latala no lialia 'o mukalusi. b Mo anu 'Olu ne mupala'alixu lamanaxu Lataua la iaaxu muieisinge mukalusi. Mo anu iouvilesisi loxo Lataua muisalili, mo no anu xavi no anu vaikala noxou la mutetelisou mimii latala mukalusi muxolu pekia'u. Xe ili'i no mine Anu mukalusou xaixai noxou sou mukalusou susu xe mu'oxone'i ta mitema mixali malemalenga mukalu, la mulai mutalupexa no paumolu Tatananu tuala ane tatila manina teitexi no opo loxotolo, la muxolu no avolu tema. c Anu mulai muxolu ne la, Lataua mulosou uala ne tatila manina muuliuli manina noxi'a ta angelo, la sou Anu muxali tatila noxi'a ta angelo.

d Xo Lataua umoxo'u angelo vile lexe,

“Nini, eni 'alixeni mo vaimomo 'o eni axali Maminesi.”
Mo muvikala kalumo lexe,

“Eni axali loxo Anu Momu. Xe Anu uxali loxo 'alixeni.”
Ne, Lataua muvikalanu angelo vile aloxo ne? Uasi.

e Mo no mine Lataua mupalusou 'Olu laposalaxu mulu'e no lialia 'o la Anu muvikala aloxo 'o,

“Ta angelo noxou Lataua ukalusi ine'e ilotu noxou.”
f Xe noxi'a ta angelo la Lataua muvikalasi'a aloxo 'o,

“Anu Lataua u'oxone'i ta angelo noxou ixali loxo atumesi
xe u'oxone'i ta mitema sou xaixai noxou ixali loxo navu lamixu.”
g Xe Anu muvikalasou 'Olu aloxo 'o,

“Lataua, nini nexolu no anu puloulousine sou Tatananu tuala utotomu mo kaluxu uasi.
Mo nini nasaxila'a ta mitema noxine la naulaxune'i no anu 'ilixo mulapusi.
Nini namasaxau 'ili'ilixo ane mulapusi ia namasaxau 'ili'ilixo ane masumasua uasi.
Aloxo ne la sou Lataua noxine munixi'u ueli sou 'osa'ila mu'ana'ana noxine
sou musosovosine lexe nini neuliuli noxi'a ta menexine.”
10  h Mo Lataua muvikalasou 'Olu la aloxo 'o,

“Tila, tatei manina no mine nekoinu mimii latala no lialia 'o,
la nemuxaxu tavatava'u laixe sou mu'oxonu pekia'u.
Mo nekoinu loxotolo ilou mimii iouiou teitexi ne anu nene'axu xaixai noxinesi.
11 Mimii ukalusi ne ulai la umamulosi
ia nini la naxolu aloxo nesi.
Mo lialia ilou loxotolo ne umanaunu loxo tokolomo mamuxanu.
12 Mo ulai la napipinu loxo itema upipinu mo'e,
xe nakolinu alavua aloxo itema uxexeenu tokolomo teinu
ia ukalanu tokolomo alavua.
Ia nini ne naxolu aloxo nesi,
mo tauu iexene ne kaluxusou uasisi manina.”
13  i Tei la Lataua muvikalanu 'Olu lexe,

“'Alixeni nane'e mo natalupexa no pa'umelo no avolo tema ulai umomomo
no mine eni amulaxa'a ta uluameni no laaxene sou namalomaloxo'a no tava'ine.”
Ia Anu muvikalanu angelo noxou vile aloxo ne a talu? Uasi.

14  j Ta angelo ukalusi ne ane'i ta uleenusi sou i'oxonu xaixai noxou Latauasi, sou upalusi'a ilai isu'uline'i ane'i ane ulai la ino'u mauli.

Copyright information for `ATA