a2:2Xal 3:19
b2:3Eva 10:29, 12:25
c2:4Mak 16:20; 1Ko 12:4, 11
d2:6-8Lex 8:4-6
e2:9Pil 2:8-9
f2:11Mat 25:40
g2:12Lex 22:22
h2:13Ais 8:17-18
i2:141Ioa 3:8; Pal 12:10

Hebrews 2

Pamauli Noxou Lataua ne Anu Mii Tatila Manina

Ioxe aloxo nenge telomusou tei lexe Lataua 'Olu muuliuli, la sou anu laixe sou nenge tatetelisou vaikala laixe ne pekia'u. Mo talaxa'i laixe, loxo 'o io tasasalo la taxexesou. a Tatei la vaikala ane mulaa no anaxa'a ta angelo sou mivikalane'i ta xaixasinge ne mupala'a lexe anu manina, xo ta mitema mixola'u mo imulinu laixe uasi la mixalisou tu'umaxu umomomo no anu 'ilixoi'a. b Ane ne tatei ia vaimomo 'o vote'i sou pamauli lailaixe a mupala'a. La sou lexe nenge taxiunu tumalingeu xaixai tatila noxou Lataua ne, la sou nenge ta'ume mo tapolopepeenu la'ia noxou Lataua ne a loxovaa? Tei la Tatila molu mupala'alixu vote'i sou pamauli noxi'a ane'i tatei, xe ane'i ta 'ei ane milomusou, la mia'aloxu noxinge vaimomo 'o lexe vaikala ne anu manina. c Mo Lataua kalumo muvalaxu vaikalai'a lexe vaikala ne anu manina, la mu'oxonu sosovo iouiou mo xaixai pekipekia'u mose'i, xe mumila'anu lavulavu sou xaixai iouiou no anu Uleenu Tavuna mulai noxi'a ta mitema vilevilesi no anu masaxa noxousi.

Iesu Anusisi Anu Itema sou Pamauli

Aloxo ne, la sou no anu lialia alavua ane uxali ili'i e tevivikalasou 'o, la Lataua usosovosi'a ta angelo sou iulaxunu uasi. d Xo aloxo itema vile muvikala muai no nano no anu Lavuku Tavuna teinu muvikala aloxo 'o,

“Itema 'o anu ne mii ma'ia manina 'o,
la sou nini taneni u'oxoxu malaxo 'o?
Anu mii vitanisi,
ia tava'u loxovaa la sou nini nasaxila'u itema 'Olu laixe 'o?
Nini ne'oxonu muxolu,
no laaxa'a ta angelo no anu voxo ataxusesi.
Mo nemulaxu no anu tanixene lailaixe ne mo ne'itinu ualasou
xe nelosou uala tila.
Xe nemulaxu sou mimii latala ukalusi e nekoinu ne
uxolu no anu saxisaxila'u noxou xe uxolu no laaxu.”
No mine Lataua muitalonu mimii mukalusi mulai no anu saxisaxila'u noxou la mii vile uxolu vitanisi uasi. Ia vaimomo 'o nenge tamaisou itema usaxila'u mo ulaxunu mii vile uasi.
e Ia nenge tamaisou Iesu la Anu muno'u uala tatila manina, xo tei la Anu muxolu no laaxa'a ta angelo voxo ataxusi sou muno'u tanixa'a ta mitema sou musoli. La ane ne anu vote'i sou alauna noxou Lataua sou usu'uline'i ta mitema. Xo Iesu mutaloxolixu mo mutavulenu tu'utu'umaxu mumomomo no anu soli, aloxo ne la sou Lataua mu'itinu ualasou xe mulosou uala tila xe mimii latala muxolu no laaxu.

10 Lataua anusisi Anu tava'u mimii latala mukalusi mo Anu molu mukoinu mimii latala mukalusi. La sou Anu mumasaxa lexe ta 'olu tavu'alo ne i'unalai ixolu no nano no anu xoluxolu laixe noxou Lataua teitexi no loxotolo. Lataua muxalixu vote'i sou pamauli ne ane noxou Iesusi nesi, la sou mu'oxonu mutavulenu navunavu. No anu navunavu ne la Anu mu'oxonu Iesu muuliuli manina sou mutulu moosou pamauli noxi'a Lataua ta 'olu. La sou 'ilixo e Lataua mu'oxonu ne anu lailaixe manina. 11  f La sou anu Iesu mukalipalane'i ta mitema milapu la mixali Lataua ta 'olu xe ane'i ta mitema e Anu mukalipalane'i ne, ane'i mami'a vilesisi, la sou Anu umaela sou umoxo'a lexe Anu ta vimovimou uasi. 12  g La muvikalanu Lataua aloxo 'o,

“Eni amoxomoxo'u ulasine mo apala'alixu noxi'a ta vivilo.
Xe no mine nexi tapita sou talotu,
la eni alexenu lexe sou a'itinu ualasine.”
13  h Mo muvikala la aloxo 'o,

“Eni axolu aloopala noxou Latauasi sou u'oxonu mii ma'ia Anu mulemolu.”
Xe muvikala la aloxo 'o,

“Namalei, eni exolu no taine'i Lataua ta 'olu e Anu mulosilo.”
14  i Lataua ta 'olu e Iesu muleme'a ne, ane ane'i ta mitema imaumauli. La sou Iesu muxali itema aloxo ane'i ne sou ulai no anu soli. Anu mu'oxonu aloxo ne sou mutaloxolixu Satani anu itema e xaviinu sou u'oxone'i ta mitema isoisoli. 15 Mo 'ume sou soli musakisakiinu maulixa'a ta mitema no anu xoluxoluxa'a, la sou Iesu musoli sou mululusi'a no anu sakisaki no anu 'ume sou soli ne. 16 Manina misevile, Iesu mune'e mu'oxonu xaixai tatila ne sou usu'uline'i ta angelo uasi, ia Anu mu'oxonu xaixai ne sou musu'uline'i Avalaamu ta xaixasou. 17 Xo Anu anusisi sou usu'uline'i ta vimovimou la anu vote'i vilesisi ane Anu uxali uisalili aloxo ane'i nesi. Mo sou aloxo ne la Anu uxali kisi'a ta aili'i e mu'ana'ana no anu 'ilixo sou alauna manina mo umulinu vaivaikala noxou Lataua la u'oxonu xaixai noxou laixesi. Xaixai ne ane sou uxexeenu susu noxi'a ta mitema. 18 Xe no mine tovotovo uxalisi'a la Anu umomomo sou usu'uline'i xo Anu muxamulinu navunavu no anu tovotovo iouvilesisi aloxo ane'i ixamulinu ne.

Copyright information for `ATA