a3:1-2Iti 12:7; Eva 4:14, 7:26
b3:5Iti 12:7; Lap 18:15-19
c3:7-11Lex 95:7-11
d3:8Mul 17:7; Iti 20:2-5
e3:11Iti 14:21-23
f3:15Eva 3:7-8
g3:16Iti 14:1-35
h3:171Ko 10:10

Hebrews 3

Iesu Muno'u Uala Tila Mua'ulixu Mosesi

a Ioxe ta vivilo, noxou Iesu Lataua muxolu teitexi no opo loxotolo mu'avalinge mo mukalipalangengi lexe ngingi ta noxou muisalili ngaxolu. Mo ngaxavutala Iesu. Anu aposeli noxou Lataua mo kisi'a ta aili'i e nenge temuxaxu tanenge noxou xe taa'aloxu ualasou lamana. Anu mumulinu vaikala noxou Lataua mo muxaxaisou xaixai ane Lataua musosovosou sou uxaxaisou ne laixe. Xaixai noxou ne anu iouvilesisi aloxo Mosesi mu'oxonu, sou muxaxaisi'a ta mitema laixe loxo ane'i Lataua taasou. Ia Lataua mulosou Iesu uala tila manina mua'ulixu Mosesi. Aloxo nenge telavusou itema vile utulusou tani vile lailaixe manina la. Nenge tavikalasou tani ne malaxo uasi, ia talosou uala tila manina noxou moosou e mutulusou ne. Aloxo tanitani ne itema vilevilesi mutulusou, ia Lataua anu molu muxalixu mimii latala mukalusi. b Mosesi ne anu itema sou xaixai noxou Lataua mo mumulinu vaikala noxou Lataua la mu'oxonu xaixai laixesi sou musaxila'u tani noxou. Mo anu muvikala lamana no anu mii ma'ia ane sou Lataua ulemolu ili'i. Ia Kalisito ne Anu Lataua 'Olu la sou anu xaixai noxou ne sou musaxila'a ta mitema mukalusi loxo ane'i tani noxou Lataua. La mumulinu vaikala noxou Lataua la, mu'oxonu maninasou xaixai noxou ne. La sou nenge ane tanenge utulu pekia'u mo ta'osa'osa sou tano'u mii ma'ia nenge texolu teloloopalanu sou tano'u, la nenge kalumo ne texolu loxo Lataua taasou.

Ta Mitema Ilomuxu Lataua Uasi ne Ilaxa'i Laixe

c La sou anu aloxo Uleenu Tavuna mulemolu, Anu muvikala aloxo 'o,

“Vaimomo 'o lexe ngalomusou Lataua xolinu
la mamu sou ngatatusou opongengi pekia'u
d loxo ta 'ili'ilisungengi mi'oxonu tatei.
Xo no voxo loxo mixolu no xalee lia 'esi'esi
la mixiunu tumali'a noxilo xe mitovoleli.
La mimaisou mimii ta tatila e'oxonu muxali noxi'a
mumomomo no anu tauu ie itemaxu ta tamei (40).
10 Xo ta mitema no anu taunu ane ne mi'oxonu la'iaxo la eni evikala lexe,
‘Ta mitema ane 'o ne, opone'i muxolu va'axu noxilo manina,
mo ilavusou imulinu vote'i noxilo e lexe imulinu ne la uasisi.’
11  e La mi'oxoleli la'iaxo la eni evikalane'i aloxo 'o,
‘Manina teitexi, ane'i imomomo sou i'unalai no nano no tualasou ma'ila
noxilo uasisi manina.’”
12 Ta vivilo noxou Iesu, ngalaxa'ingengi laixe, loxo 'o io vivinge vile no taingengi ne opo masumasua muxolu no anu xavutalau la umomomosou umuxaxu tanu uasi la uxiunu tumalou noxou Lataua e Anu umauli. 13 La sou anu laixe sou ngapatetelingengi ngatongato'o no voxovoxo utotomu. Xo nenge tamaisou voxo vilevilesi uxaxai la nenge tavikala lexe anu voxo ane vaimomo 'o si, ia talavusou telexu uasi. Aloxo ne la sou anu laixe sou ngasu'ulingengi ngatongato'o mo ngaavutinoxu xavutalamengi, loxo 'o io 'ilixo sou susu u'oxo loloxa'a se'i noxinge la itatusou tane'i pekia'u. 14 No mine nenge temuxaxu tanenge noxou Lataua pekia'u, la loopala noxinge ne pekia'u manina. Lexe nenge tatulu peka'inge aloxo ne ulai utalo no telexu, la nenge nenge'a Kalisito taxolu tapita. 15  f Aloxo Lavuku Tavuna teinu, muvikala aloxo 'o,

“Vaimomo 'o, lexe ngalomusou xolinu,
la mamu sou ngatatusou opongengi pekia'u loxo ta 'ilu'ilusungengi mi'oxonu tatei.
Xo ta 'iluilusungengi mi'oxonu tatei aloxo ne
la mixiunu tumali'a noxilo xe mitovoleli.”
16  g Ane'i ta 'ei ane miavutinoxu Lataua opoonu la la'iaxui'a no mine milomusou vaikala noxou la mixiunu tumali'aou ne? Ane'i ta mitema mukalusi ane Mosesi muulaxune'i milaa ne Aixiputo. 17  h Mo anu la'iaxui'a ta 'ei mumomomo no anu tauu ie itemaxu ta tamei? Anu la'iaxui'a ane'i ta mitema e misusu xe misoisoli la vasime'a muta'ota'olu no xalee lia 'esi'esi ne. 18 Xe noxi'a ta 'ei e Lataua muvikalane'i pekia'u lexe umomomo sou i'unalai no nano no tualasou ma'ila noxou uasi ne? Anu muleleme'a ta mitema e imulinu vaikala noxou uasi. 19 La sou nenge tamaisou lexe ane'i imomomo sou i'unalai no tuala sou ma'ila uasi, xo tava'u vilesisi aloxo 'o imulaxu tane'i uasi.

Copyright information for `ATA