a6:6Mat 10:22; Eva 10:26-27; 1Ioa 5:16
b6:8Tav 3:17-18; Mat 13:7, 22
c6:10Eva 10:32-34
d6:13-14Tav 22:16-17
e6:18Iti 23:19
f6:19-20Liv 16:2-3

Hebrews 6

Taxiu no Anu Xaixai sou Soli

Aloxo ne la sou anu laixe lexe nenge tasuku talai mo tano'u lavulavu noxi'a ta tatila, ia taxolu taninenge vilesisi mo talivulivuxu lavulavu se teno'u tei no anu vaikala noxou Kalisito uasi. Xo nenge talivulivuxu lavulavu se teno'u tei ne, la anu aloxo nenge talalaanu savana sou tani utotomu ia tani utulu uao. Aloxo ne la sou mamu sou tasolonu vaivaikala no anu 'ilixo sou taxiunu tumalinge no anu 'ilixo masumausa e mauli no anu uasi xe no anu 'ilixo sou tamuxaxu tanenge noxou Lataua. Mo mamu sou talivu talai taa'aloxu 'ilixo sou 'ulo'ulo iouiou e nenge te'ulo no anu mo no anu 'ilixo sou tamuxaxu avonge no kisi'a ta mitema, mo taa'aloxa'a ta mitema misoisoli itulu mo tu'umaxu ane kaluxu uasi e ili'i la tano'u lakolisou susu noxinge no mine tatulu no anu vaivaikala no iou Lataua. La sou anu laixe lexe taxoxolu no anu a'alo aloxo ne uasi tasuku mo tano'u a'alo e noxi'a ta tatila. Ia lexe Lataua upelemasaxanenge lexe nenge ta'oxonu aloxo ne, la nenge ta'oxonu.

Lexe ta mitema mose'i ne Lataua mulamanalixa'a mo mutovone'i xe mixamulinu mii ma'ia lailaixe e Lataua mulosi'a molu teitexi no opo loxotolo ne, mo Uleenu Tavuna muxolu noxi'a. Mo milomusou a'alo laixe no anu vaikala noxou Lataua la lailaixe xe mixamulinu xavi noxou Lataua e sou uxali no anu voxo vile ili'i. a Ia lexe ane'i ilapau la ane'i imomomo sou ilivu ine'e sou ixiunu opone'i uasi. Xo ane'i mi'oxonu aloxo ne la anu loxo mivau Lataua 'Olu mo mililixu no ovu valautu alaxu vile la xe mipamaelanu no ie'i ta mitema tavu'alo.

Voxo tavu'alo la'iua usili ulu'e no lialia, la lialia uiexu. Mo lexe ta mitema itotou la'ilali no anu lialia ne xe lialia ne uxalixu 'ani'ani tavu'alo sou usu'uline'i ta mitema ne, la Lataua ualusou lialia ne. b Ia lexe lialia ane lamota 'ana'anaxu ilou ia'eia'e masumasuasi uleme no anu, la lialia ne, anu masua. Anu aloxo ne la tatananu xai ne uvikalasou lexe anu lialia masua mo ulai ili'i sou kaluxusou la u'ela no navu.

Ta vivixe maninasou noxou Iesu, nexi tavivikala aloxo 'o ulai noxinge, ia nexi temuxaxu tanexi lexe mamulo ne uxali noxinge uasi. Xo no nano no tanexi la nexi temaisou xoluxolungenge ne laixe umomomo sou Lataua upamaulingengi. 10  c Xo Lataua ne Anu ulavusou utilovosinge laixe ia ususunoxu uasi. La sou umomomo sou tanu vulusiou xaixai noxinge e nge'oxonu sou ngemaxa'u tanutanuxu noxinge mulai noxou ne uasi. Tanutanuxu noxinge mulai noxou ne, mupala'a muatu no anu su'uli noxinge mulai noxi'a ta mitemaou. Mo 'ilixo sou alauna ne 'a ngasosolonu ulalai sio. 11 La sou nexi temasaxa lexe ngingi vilevilesi ne xavingengi mo nga'oxonu xaixai iouvilesisi aloxo ne no anu maulingenge ulai avile uxali no anu voxo sou ngano'u mii ma'ia e ngexolu mo ngelolopalanu. 12 Nexi temasaxa lexe ngatotosa mamu. Ia ngatovo sou ngatovotovola'inu 'ilixo noxi'a ane'i mimuxaxu tane'i maninasou mo mitaloxolixa'a xe mixolu se'isisi la mino'u mii ma'ia e Lataua musakiinu vaikalasou tei lexe ino'u.

Mii Ma'ia E Lataua Musakiinu Vaikalasou Tei ne Uxali Maninasou

13  d Tatei no mine Lataua ilou Avalaamu misakiinu vaikala, la itema vile ualasou tila ua'ulixu Lataua uasi. La sou Lataua umomomo sou u'oxonu pakia'usou vaikalau la uvikala lexe manina teitexi no ualasou. Aloxo ne la sou Lataua muvikala lexe manina teitexi no ualasilo la. 14 La sou muvikala aloxo 'o, “Manina teitexi, eni aalusine mo a'oxone'i ta 'ili'iline ilo'a ta xaixasine ixali tapiena manina.” 15 La Avalaamu utotosa uasi muxolu se'isisi maxuveeni xe ili'i la sou anu muno'u mii e Lataua musakiinu vaikalasou tei lexe ulosou ne. 16 Lexe ta mitema ivikala lexe manina teitexi no ualasou itema vile, la anu laaxu lexe itema ne anu ualasou tatila mua'ulixu noxi'a. Xe loxo ta mitema ixililiou itema vile la anu vote'i sou u'oxonu pekia'usou vaikala noxou aloxo. Anu uvikala lexe manina teitexi no ualasou itema vile tatila manina mua'ulixu la utomunoxu anaxa'a ane'i ane itovo sou lexe italoxolixu ne. 17 Xo tei la Lataua musakiinu vaikala lexe Anu mumasaxa lexe u'oxonu laixe noxi'a ane'i ane ino'u mimii laixe e Lataua musakiinu vaikalasou ili'i. La sou anu mu'oxonu pekia'usou vaikala noxou ne xe anu umomomo sou uxiunu xavutalau uasi la sou muvikala lexe manina teitexi. 18  e Aloxo ne la sou vaimomo 'o vaikala ta tamei anu a muxolu. Lataua musakiinu vaikala xe muvikala lexe manina teitexi. No anu mii ta tamei ne umomomo sou uxiu uasi. Xo no mine Lataua usakiinu vaikala sou mii vile la ulavusou ukalavoi uasi, xe uvikala lexe manina teitexi la ukalavoi uasi. Aloxo ne la sou mu'oxonu pekia'inge nenge ta mitema ane te'ume telai texolu 'alai noxou Lataua taxavutalanu mii ma'ia ane Anu musakiinu vaikalasou lexe tano'u, la sou u'oxonenge tatulu pekia'inge mo taxolu se'isisi xe taloopalanu mii ma'ia sou tano'u. 19  f Aloxo ne la sou mii e nenge teloopalanu ne anu muxolu loxo axa e pumuxu manina no anu ulenenge. Xo loopala ane ne mu'unalai no nano manina no anu taasou lalotu tatila noxou Lataua, la mu'unalai no nano manina no anu kaveutu e tavuna manina no tumalou lavalava tatila e mulili no nano ne. 20 Iesu muulaxunenge mulai no nano no kaveutu ne sou musu'ulinenge xo Anu muxali kisi'a ta aili'i uno'u tanixu Melikisateki, ka uxolu utotomu mo kaluxu uasi.

Copyright information for `ATA