a7:1-3Tav 14:17-20
b7:5Iti 18:21
c7:14Ais 11:1; Mat 2:6; Pal 5:5
d7:17Eva 5:6
e7:19Eva 10:22; Iak 4:8
f7:21Eva 5:6
g7:22Eva 8:6, 12:24
h7:25Rom 8:34
i7:27Eva 5:3

Hebrews 7

Aili'i Melikisateki ne Anu Ualasou Tatila Manina

a Ioxe, Melikisateki anu tatananu tuala ne Salemu mo anu aili'i noxou Lataua e Anu muxolu teitexi manina. No mine Avalaamu ulai ilo'a ta tatananu tuala mi'oto xe anu mua'ulixa'a no anu 'oto'oto ne mukalu la mulivu mune'e xe Melikisateki muxalisou Avalaamu la anu mualusou. Xe Avalaamu muavuti la muvelunu mimii e muno'u no anu 'oto'oto ne la'oluxu mavulovexa, la mulosou Melikisateki la'oluxu ane mavulovexasou pa'usou. Uala Melikisateki ne loxo taxiunu, la anu laaxu lexe anu tatananu tuala e u'oxonu 'ili'ilixo mulapusi. Mo anu tatananu tuala ne Salemu kalumo, la lexe taxiunu kalumo, la anu laaxu lexe, tatananu tuala sou opo se'isisi. Melikisateki ne no nano no anu vaikala noxou Lataua 'o ulamanalinenge uasi. La sou anu mulamana lexe momu mo nenu xe nanasou uasi. Mo voxo sou nenu mivo'onu xe voxo sou usoli uasi loxo Lataua 'Olu, xe muxolu loxo aili'i utotomu mo kaluxu uasi.

Loxo xavutalamenge umulinu la anu muno'u uala tila manina. Xo loxo mutu'u ovunenge Avalaamu ne anu itema tila kalumo ia mutongonu Melikisateki lexe anu mutila noxou, la sou muvelunu mimii e muno'u no anu 'oto'oto ne la mulosou mavulovexasou pa'usou. b Xo lapuloto noxou Mosesi muvikala lexe ta mitema ukalusi ixexeenu mavulovexasou pa'usou la ilosi'a ta aili'i e ane'i mixali noxou Levi. Manina ane'i mukalusi ne tamutu'u ovuxu Avalaamu mo ane'i ta vimovimo'a ne, ia ane'i ta Levisi imomomo sou itaxusou mavulovexasou pa'usou noxi'a ta vimovimo'a ne. Ia Malikisateki ne anu uxali no anu mata noxou Levisi uasi, ia anu muno'u mavulovexasou pa'usou no anu mimii e Avalaamu muno'u no anu 'oto'oto. La mualusou Avalaamu anu itema e Lataua musakiinu vaikala noxou. Aloxo ne la sou nenge telavusou lexe itema e ualusou vile ne anu tila noxou xe anu ane muno'u alualu ne anu kokope noxou anu ane mualusou. Noxi'a ta Isilaeli la ta Levi e inono'u mavulovexasou pa'usou ne ilavusou isoisoli, ia Melikisateki ne anu mua'ulixa'a mo nenge telavusou lexe anu usoli uasi. Mo asolonu vaikala noxilo, la nenge tavikala lexe Avalaamu mulosou Melikisateki mimii mavulovexasou pa'usou ne, la anu aloxo Levi utaxusou mavulovexasou pa'usou ne anu kalumo mulosou. 10 Xo no mine Avalaamu muxalisou Melikisateki no vote'i xe mulosou mavulovexasou pa'usou ne, la Levi upaa uao, ia anu a muxolu no nano no vasimolu mutu'u ovuxu Avalaamu ne.

Iesu Anu Aloxo Melikisateki

11 Ioxe, lexe Lapuloto muvikala lexe ane'i ane ixali no anu mata noxou Levisi ane ixali ta aili'i, mo noxi'asi la ta mitema ixali laixe. La sou aili'i vile la umomomosou uno'u tanixu loxo Melikisateki ilou Aloni uasi. 12 Ia xaixai alavua noxou la anu laixe lexe lapuloto kalumo uxiu uxali alavua. 13 Xo aili'i alavua e Lataua mulelemolu lexe anu uxolu aili'i utotomu mo kaluxu uasi ne, anu no anu mata vilemo itema vile no anu mata noxou uxaxai loxo aili'i no anu valovalo sou u'elaxu mimii tatei uasi. 14  c Ia nenge telavusou lamana lexe Tila noxinge ne anu muxali no anu mata noxou Iuda. Mo Mosesi u'oxonu vaikala vile si'a ane'i mata ane ne lexe ixali ta aili'i uasi.

15 Ioxe nenge tamaisou lexe vaikala sou aili'i alavua vilemo iouvilesisi loxo Melikisateki uxali, la anu muxali lamana. La mua'ulixa'a ta aili'i e ta Levi ne. 16 Xo ta Levi ne mixali ta aili'i loxo lapuloto muvikala, ia Anu ne uasi. Anu muxali aili'i ne no anu xavi no anu mauli ane uxolu utotomu mo kaluxu uasi. 17  d Xo vaikala vile muai no nano no anu Lavuku Tavuna teinu muvikala aloxo 'o,

“Nini naxolu loxo aili'i utotomu mo kaluxu uasi, aloxo Melikisateki.”
18 La sou vaikala ane loxo ne, mumaxa'u lexe Lataua muxexeenu lapuloto ane teinu ne, xo anu xaviinu sou usu'ulinenge la uasi, la muxali mii vitanisi. 19  e Xo 'ilixo sou tamulimulinu lapuloto noxou Mosesi ne u'oxonu mii vile lailaixe uasi ia mii mua'ulixu lapuloto ne ane no anu 'ilixo sou loopalasi, la sou vaimomo 'o nenge tamomomosou tane'e 'alai noxou Lataua.

20 Lataua musosovosou Iesu sou muxali aili'i la Anu muvikala lexe manina teitexi tei la mose'i e mixali ta aili'i tei ne Anu u'oxonu aloxo ne noxi'a uasi. 21  f Ia noxou Iesusi la vaikala vile muai no nano no anu Lavuku Tavuna noxou Lataua teinu muvikala sou aloxo 'o,

“Tatila muvikala lexe, manina teitexi tei lexe,
‘nini naxolu loxo aili'i utotomu,’ mo kaluxu uasi,
la umomomo sou uxiunu xavutalau uasi.”
22  g Xo Lataua muvikala aloxo ne, la sou anu laaxu lexe Iesu anu muxalixu muuatu lamana opo vilesisi e Lataua musakiinu vaikalasou mune'e noxi'a ta mitema.

23 Tatei la ta mitema tavu'alo mixaxai loxo ta aili'i, ia vaimomo 'o misoisoli la ixolu isolonu xaixai noxi'a la uasi. 24 Ia Iesu anu umauli utotomu mo kaluxu uasi. Xo aloxo ne, la Anu uxolu uxaxai aili'i kaluxu uasi. 25  h Aloxo ne la sou Anu umomomo sou upamauline'i manina ane'i ane ine'e 'alai noxou Lataua no anu ualasou. Xo Anu uxolu ukikilakasi'a utotomu.

26 Anu kisi'a ta aili'i e nenge temasaxau ane, xo Anu malemalenga manina, mo mulapu no iou Lataua, xe mii vile nuni'u uxolu noxou uasi. La sou Lataua mukalipalanu muxexee noxi'a ta mitema sou susu la mulai mutalupexasou va'axu teitexi no opo loxotolo. 27  i Anu ulavusou u'elaxu mimii no voxovoxo utotomu loxo ta kisikisi'a ta aili'i tatei uasi. Xo ta aili'i tatei ne i'elaxu mimii sou susu noxi'a xe ukalu, la sou i'elaxu sou susu noxi'a ta mitema. Ia Iesu ne Anu u'oxonu aloxo ne uasi, Anu mu'italonu maulixu teitexi no ovu valautu alaxu vilesisi ne la anu ane si. 28 Lapuloto usosovosou kisi'a ta aili'i ne, ane'i ta mitemasi ne mamalaxa'asi. Ia ili'i no anu lapuloto la Lataua musosovosou 'Olu, la sou mu'oxonu vaikala e manina teitexi ne sou. Mo Anu musosovosou 'Olu ne Anu muxali kisi'a ta aili'i lailaixe manina uxolu utotomu mo kaluxu uasi.

Copyright information for `ATA