a3:6Mat 12:36-37, 15:11, 18-19
b3:8Rom 3:13
c3:18Mat 5:9; Eva 12:11

James 3

Tasaxila'u Ananenge

Ta vivilo ta mitema noxou Lataua! Ngingi ngelavusou aloxo ne, la sou mamu sou ngingi tavu'alo ngaxali ta mitema sou ngelosieixa'a ta mitema noxou Lataua lavulavu. Xo ngingi ngelavusou lexe nenge ta mitema ane loxo ne, la Lataua utulusinge no anu vaivaikala tapiena. Ia anu utulusi'a ta mitema vitavitanisi no anu vaivaikala tapiena uasi. Xo nenge latala ne, tasusu no anu 'ili'ilixo iouiou. Lexe itema vile ususu no anu vaivaikalau uasi, la anu itema lailaixe, mo umomomo sou usaxila'u no anu 'ili'ilixo iouiou.

Ioxe, eni atovola'i sou ulamanalingenge aloxo 'o. No mine nenge tamasaxa lexe oosi ulomunenge, la tasamali anaxu. La sou nenge tasaxila'u sou ulai a loxovaa no anu masaxa noxingesi. Xe vile la aloxo 'o. Lasipi ne, anu mii toxoxa'a ia lavolesou e uxolu ili'i no ta'u ne isusu'a nesi. Ia no mine atume utavulenu, la itema sou uulaxunu lasipi ne usaxila'u lavole ne sou lasipi ulai a loxovaa no anu masaxa noxousi. Anu aloxo samalisou oosi anaxu xe lavolesou lasipi, ananenge ne anu mii isusu'a no vasimenge kalumo. Ia nenge tavivikala no anu, la anu u'iti ualasinge lexe nenge tamomomo sou ta'oxonu mii toxoxa'a. Ngaxavutalanu navu latoxonu. Anu mii kitu'asi, ia u'ani la lokoma toxoxa'a ne u'elasi. a Ananenge ne, anu kalumo loxo navu mo anu loxo tuala vile e ta mitema sou i'oxo'oxonu 'ili'ilixo masumasua. Anu muxolu no vasimenge, ia anu u'oxonu masua vasimenge latala ukalusi. Xe anu u'elaxu muamua'i noxinge no anu maulinenge loxo navu. La sou anu u'ela no anu navu ane u'ani'ani mo kaluxu uasi.

Ta mitema imomomo sou isaxila'a ta mimii ta vova iouiou mo ta ngiala mo ta mimii ane ixalaxala no lia xe ta mimii iouiou no luaki. Tei mo mune'e muxali vaimomo 'o. b Ia evile umomomo sou usaxila'u anaxu uasi. Anaxu ne, uma'ila sou ulemolu vaikala masumasua uasi loxo lamotaxu uve'a ta mitema isoisoli.

No anu ananenge ne, la nenge ta'itinu Tila noxinge mo Maminge ualasou xe no anu ananenge ne, la nenge tameletalone'i ta mitema ane Lataua mukoine'i loxo anu. 10 No anu ananenge vilesisi, la nenge ta'itinu ualasou Lataua xe tameletalone'i ta mitema. Ia ta mitema noxou Lataua, mamu sou nga'oxo aloxo ne. 11 Loxovaa? Umomomo sou lexa laixe xe lexa sixula ilou ikei iuatu no lexa iouvilesisi? Uasisi manina. 12 Ta vivilo ta mitema noxou Lataua! Loxovaa? Umomomo sou ovu lovo unene'a la uxalixu ovu olivu temanu? Mo umomomo sou ovu uaini unene'a la uxalixu lovo temanu? Uasisi manina. Anu aloxo lexa sixula umomomo sou uxalixu lexa laixe uasi.

Lavulavu no Lia 'o Xe Lavulavu Molu Teitexi

13 Mo vile no taiingengi uvikala lexe anu mulavusou 'ilixo ma'ia ane laixe xe masua sou umulinu mo anu mulavusou lexe anu umuamua'i laixe no lia 'o a loxovaa. Anu uvikala aloxo ne, la laixe lexe anu u'oxonu 'ili'ilixo laixe sou umaxa'u lavulavu noxou mo utaloxolixu no anu maulixu. 14 Ia lexe ngingi ngaxavutala masua noxi'a ta menexinge mo ngaxavutalangengisi ngemasaxau manina mii ma'ia ane'i mino'u, la mamu sou ngingi nga'iti ualasingesi. Lexe ngingi nga'oxo aloxo ne, la ngingi ngexiu tumalingeu vaikala manina noxou Lataua. 15 Lavulavu ane loxo ne, anu molu noxou Lataua ulu'e uasi. Ia anu mii sou no lia 'osi mo anu noxou Uleenu Tavuna uasi, ia anu molu noxou uleenu masua. 16 Xo no mine ngingi ngaxavutala masua noxi'a ta menexinge mo ngaxavutalangengisi xe ngemasaxau manina mii ma'ia ane'i mino'u, la ngingi ngakalikalipala no anu xoluxolungenge mo nga'oxonu 'ili'ilixo masumasua.

17 Ia itema ane uno'u lavulavu molu noxou Lataua, la anu umulinu 'ili'ilixo ane Lataua mumasaxau tei. Mo anu opo se'isisi noxi'a ta menexu, mo umasaxa sou ulomusi'a mo ane'i ilemolu ma'ia la anu ulomuxa'a mo anu itema sou alauna manina mo anu u'oxonu 'ili'ilixo laixe sou usu'uline'i ta mitema mo anu uixexa'a ta mitema uasi xe anu ukalavoi lexe anu mulavusou uasi. 18  c La sou itema vile u'oxo opo se'isisi noxi'a ta menexu la anu loxo itema utounu la'ilali ngiaxu no xai mo usu'uline'i sou i'oxo opo se'isisi ngatongato'o, la tavu'alo noxi'a imulinu 'ili'ilixo sou isu'uline'i ngatongato'o aloxo Lataua mumasaxai'a sou lexe i'oxonu.

Copyright information for `ATA