a5:2Mat 6:19
b5:4Lap 24:14-15
c5:5Luk 16:25
d5:7Lap 11:14; Iel 5:24
e5:8Rom 13:11-12; 1Pi 4:7
f5:11Mul 34:6; Iop 1:21-22, 2:10; Lex 103:8
g5:12Mat 5:34-37
h5:14Mak 6:13
i5:15Mat 17:18‑20
j5:171Ta 17:1, 18:1
k5:181Ta 18:42-45
l5:19Xal 6:1
m5:20Xav 10:12; 1Pi 4:8

James 5

Peletoto Ulai Noxi'a ta Mitema sou Lavuluti

Ioxe, ta mitema sou lavuluti. Ngingi ngatama mo ngaelielisou tu'utu'umaxu ane 'ala'alaisou uxalisinge. a Tu'utu'umaxu ane ne, uxali noxinge manina. Lavulutimengi ne umamulo vitanisi mo tokolomomengi ne ta su'uve itotokolonu. Xe lamolimengi kalumo ne ukukakuka. No mine ngamaisou lamolimengi ukukakuka, la mii ane ne anu usosovosou lexe Lataua utulusinge no anu vaivaikala ka sou uleangengi ngalai no navu. La sou ngatama, xo ngingi ngesua la'oluxu lavulutimengi no anu voxo kaluxusou. b Ngamaisou! Ta mitema e miluvunu xai temanu noxinge ia ngingi ngamomosi'a uasi ne, ane'i ikakatu lexe ngingi ngamomosi'a. La katu noxi'a ne, Tila xaviinu musuku mulomusou. c Ngingi ngexolu no lia 'o la xoluxolungenge laixe manina mo ngekalusou masaxa noxinge no anu mimii iouiou sou musu'ulingengisi. Ngingi aloxo ta memee e i'ani'ani xoo mole ixali totongotongolixu la ive'ave'a. Mo ngingi ngetulusi'a ta mitema ta lailaixe no anu vaivaikala mo ngeve'ave'a misoisoli. Ia ane'i ilea anaxa'a une'e noxinge uasi.

Ngatuluxu Tu'utu'umaxu

d La sou ta vivilo ta mitema noxou Lataua, ngingi ngatulu pekia'inge ulai utalo no mine Tila ulivu une'e la. Ngaxavutalanu tatananu xai. Anu utotou la'ilali no xaixu, la anu uxomaiou voxo sou la'ilali uleme laixe ulai utalo no voxo sou la'iua usokou. e Ngingi kalumo ngaxomaiou mo ngamulaxu tangengi pekia'u. xo voxo sou Tila ulivu une'e ne 'alai. Mo ta vivilo ta mitema noxou Lataua, mamu sou ngalea anangenge noxinge ngatongato'o. Ia ngingi nga'oxo aloxo ne, la Lataua utulusinge no anu vaivaikala. Itema sou utulusinge no anu vaivaikala, anu a utulu 'alai no aitenga.

10 Ta mitema noxou Lataua, ngingi ngamulinu 'ilixo aloxo ta mitema sou palomatana mi'oxonu. Ane'i mituluxu tu'utu'umaxu no mine ane'i mia'aloxu Tila ualasou. 11  f Ngamaisou! Nenge telavu lexe Lataua ualusi'a ane'i ane mituluxu tu'utu'umaxu. Ngingi ngelomusou a'alosou Iopu lexe anu mutuluxu tu'utu'umaxu kalumo mo ngemaisou mii ma'ia ane Tila muxalixu noxou. No anu ane ne, la nenge telavusou lexe Tila anu itema sou tanutanunenge mo ualaunasinge manina.

12  g Ioxe, ta vivilo ta mitema noxou Lataua, mii tila no anu vaivaikala noxilo vile la aloxo 'o. Mamu sou ngavikala lexe manina teitexi mo manina no lia 'o xe manina ne'ei ne'ei la. Mo no mine ngavikala lexe “Ani,” la vaikalamengi uxali manina loxo ngingi ngelemolu xe ngavikala lexe “Uasi,” la vaikalamengi uxali manina loxo ngingi ngelemolu la. Ia lexe nga'oxo aloxo ne uasi, la Lataua utulusinge no anu vaivaikala.

Ngakilaka La Ngamulaxu Tangengi Noxou Lataua Manina

13 Lexe vile noxinge utavule tu'utu'umaxu, la laixe lexe anu ukilaka. Mo lexe vile noxinge u'osa, la laixe lexe anu ulexe mo u'itinu Lataua ualasou. 14  h Xe vile noxinge pipiena u'oxonu, la laixe lexe anu u'avali'a ta tatilasou lalotu ine'e ikilakasou mo i'ulosou no anu ueli. Ane'i i'oxonu aloxo ne no anu ualasou Tila. 15  i Xo itema vile umulaxu tanu noxou Lataua manina, ia ukilakasou itema e pipiena mu'oxonu, la itema ne umauli mo Tila utulusou. Lexe anu mu'oxonu 'ili'ilixo masua mose'i, la Lataua uxiu tumalouu. 16 La sou ngapala'alixu 'ili'ilixo masumasua noxinge ulai noxi'a ta menexinge ngatongato'o mo ngakilakasinge ngatongato'o. Nga'oxo aloxo ne, la Lataua upamaulingengi. Xo lakilaka noxou itema mulapu ne, uxaxai la xaviinu musuku.

17  j Aloxo Eliasi. Anu itema loxo nenge 'osi. Ia anu mukilaka xaviinu lexe la'iua umomomo sou usili uasi, la la'iua usili uasi no xalee ane ne no tauu ie tatalu mo so'io muxatele vile. 18  k Xe anu mukilaka la, la la'iua musili. La sou musilisou lialia, la la'ilali no xai muleme.

19  l Ta vivilo ta mitema noxou Lataua! Lexe vile no taiingengi mupolo va'axu no anu vaikala noxou Lataua, la laixe lexe vile noxinge ulivunoxu une'e. 20  m Ngaxavutala vaivaikala ane 'o. 'Ei ane usu'ulinu itema sou 'ili'ilixo masua xe ulivunoxu no anu xoluxolu masumasua, la Lataua upamaulinu no anu soli mo usu'asou 'ili'ilixo masumasua tavu'alo noxou.

Copyright information for `ATA