a16:2Mat 24:9; Luk 6:22; Ioa 9:22
b16:3Ioa 15:21
c16:7Ioa 14:16
d16:11Ioa 12:31
e16:121Ko 3:1-2
f16:16Ioa 14:19
g16:23Mat 7:7
h16:27Ioa 14:21, 23
i16:32Mat 26:31, 56
j16:33Ioa 14:27; Rom 5:1; 1Ioa 5:4

John 16

Eni evikalangengi aloxo ne, mo sou ngingi nga'umesilo mo ngalai va'ava'axu uasi. a Ili'i la ta mitema ikusainge mo ngongi'a ngalotu ngapita uasi. Aloxo ne la voxo vile a unene'e sou ane'i tavu'alo ivenge la ikalavoi lexe ane'i i'oxonu xaixai noxou Lataua ane. b Ane'i i'oxonu aloxo ne, xo ilavusixe noxou Mamilo uasi. Eni evikalangengixu mii ne, mo sou voxo ane ne uxali la ngingi ngaxavutalanu vaikala noxilo. Eni avikalangengi aloxo ne tei uasi, xo nenge nenge'a texolu.

Iesu Mulemolu Xaixai Noxou Uleenu Tavuna

Ia eni 'ala'alai sou alai. Alai noxou ane anu mupalusilo ene'e. Ia vile noxinge utali'isilo lexe eni alai ne'ei ne uasi. Xo eni evikalangengi aloxo ne, la ngingi tamangenge mulokolangenge manina. c Ia eni avikalangengi manina. Eni a'umesinge la anu laixe. Xo eni a'umesinge uasi, la itema sou usaxila'inge umomomo sou une'e uasi. Ia lexe eni alai, la eni apalusou une'e noxinge. Anu une'e la ta mitema itongonu laixe lexe susu a loxovaa mo 'ilixo ane mulapu a loxovaa mo Lataua utulusi'a no anu vaivaikala ne, a loxovaa. Susu ne laaxu aloxo 'o. Ane'i imulaxu tane'i noxilo uasi. 10 Mo 'ilixo ane mulapu ne laaxu aloxo 'o. Eni alai noxou Mamilo la ngingi umomomo sou ngamaisilo uasi. 11  d Lataua utulusi'a no anu vaivaikala ne, laaxu aloxo 'o. Iesu mutaloxolixu itema sou usaxila'u lia no lia 'o mukalu. 12  e Eni vaikala tavu'alo a uxolu sou lexe avikalangengixu. Ia eni avikalangengi uasi. Xo ngingi umomomo sou ngano'u uasi. 13 Ia lexe anu Uleenu Tavuna maninasou une'e, la sou Anu molu ulosiengixu mimii latala mo ngalavusou manina. Anu umomomo sou uvikala no anu masaxa noxou uasi, Anu ulemolu ma'ia ane anu mulomusousi. Mo uvikalangengixu mii ma'ia ane uxali ili'i. 14 Anu u'itinu ualasilo. Xo Anu uno'u vaivaikala noxilo la sou ulosiengixu. 15 Mimii latala noxou Mamilo ne, Anu mu'italo mune'e noxilo. Tava'u aloxo ne, la sou evikala lexe Uleenu Tavuna uno'u vaikala noxilo sou ulosiengixu. 16  f Eni 'ala'alai sou a'umesinge la umomomo sou ngamaisilo la uasi. Ia maxuveeni uasi, la ngamaisilo la.”

Tama Ili'i La Uxalixu 'Osa'ila

17 Ta molomolou se'i noxi'a ne, mitali'isi'a ngato'o aloxo 'o, “Anu muvikala lexe Anu 'ala'alai sou u'umesinge mo umomomo sou tamaisou la uasi, xe maxuveeni uasi la tamaisou la. Mo Anu muvikala lexe Anu ulai noxou Momu. Ia vaikalau ne, laaxu a loxovaa? 18 Mo Anu muvikala lexe maxuveeni uasi, ia vaikalau ne laaxu a loxovaa? Nenge talavusou ma'ia ane Anu ulelemolu ne uasi.” 19 Iesu mulavu lexe ane'i imasaxa itali'isou no anu vaikala ane ne, la Anu muvikalane'i aloxo 'o, “Ngingi ngatalitali'isinge ngato'o no anu vaikala ane evikalangengi lexe maxuveeni uasi la ngamaisilo la ua, xe maxuveeni uasi la ngamaisilo la, laaxu? 20 Eni avikalangengi manina musuku. No mine ngingi ngatatama mo ngamatengaleisilo, la ta mitema no lia 'o ane'i i'osa. Ia tama noxinge ne, ili'i la uxalilixu 'osa'ila. 21 Loxo voxo 'alai sou sema ivo'o la ane ixamulinu navunavu. Ia ivo'onu keakea ukalu, la ixavutalanu navunavu ne la ua. Ane ixolu sou i'osasou 'ilie muxali no lia 'o. 22 Vaimomo 'o, ngingi ngatama. Ia ili'i la eni amaisinge la. Aloxo ne, la 'osa'ila noxinge utila manina. Ia itema vile umomomo sou uxexeenu 'osa'ilo noxinge uasi. 23  g No anu voxo ane ne, ngingi umomomo sou ngalingau mii vile noxilo uasi. Eni avikalangengi manina musuku. Mamilo ulosinge mii ma'ia ane ngingi ngalingau no anu ualasilo. 24 Tei manina utalo vaimomo 'o la ngingi ngalavusou ngalingau mii vile no anu ualasilo uasi. Ngalinga la ngingi ngano'u. La 'osa'ila noxinge ne utila manina.

Iesu Xaviinu Muualixu Xavi Ane sou Lia 'o

25 Eni avivikalangengi la avivikala latilovosi. Ia voxo a unene'e sou avikalangengi latilovo la uasi. Avikalangengi lamanasou Mamilo. 26 No voxo ane ne, ngingi ngalinga ulai noxou Mamilo no anu ualasilo. Ia eni avikala lexe eni akilakasinge ulai noxou uasi. 27  h Xo Mamilo mumasaxainge aloxo ngingi ngemasaxailo mo ngamulaxu tangengi noxilo lexe eni melo noxou Lataua. 28 Mamilo mupalusilo elu'e no lia 'o. Ia eni a'umesinge no lia 'o mo alivu alai noxou Mamilo.” 29 Ta molomolou miavuti la mivikalanu aloxo 'o, “Manina. Nini nevikala lamana. Ia navikala latilovo la uasi xo nini nelavusou tali mai'a muxolu no 'a ta mitema xavutalai'a. 30 Vaimomo 'o nexi telavusou lexe nelavusou mimii latala mukalu mo nevikalanexixu. Ia evile umomomo sou utali'isinexu uasi. Aloxo ne la sou nexi telavusou lexe nini mene noxou Lataua mo nene'e.” 31 Iesu muvikalane'i aloxo 'o, “Ae, Vaimomo 'o, ngingi ngamulaxu tangengi noxilo? 32  i Ngalomu! Voxo a unene'e, ia anu a muxali sou nga'ume'ume ngalivu ngalai no tuatualasinge. Ngingi nga'umesilo, mo enisisi axolu. Ia enisisi uasi xo Mamilo a muxolu noxilo. 33  j Eni evikalangengixu mimii ne mo sou opo se'isisi noxilo uxolu noxinge. No lia 'o, la ngingi ngaxalisou tu'utu'umaxu. Ia ngatulu pekia'inge xo eni etaloxolixu xavi sou lia 'o.”

Copyright information for `ATA