a3:1Ioa 7:50, 19:39
b3:3Mat 18:3; 1Pi 1:23
c3:5Ese 36:25-27
d3:6Ioa 1:13
e3:14Iti 21:9; Ioa 8:28, 12:32
f3:15Ioa 20:31
g3:16Ioa 3:36, 10:28; Rom 5:8, 8:32; 1Ioa 4:9-10
h3:17Luk 19:10
i3:18Ioa 5:24
j3:19Ioa 1:5, 9, 8:12
k3:22Ioa 4:1-2
l3:28Mat 11:10; Ioa 1:20
m3:31Ioa 8:23
n3:32Ioa 3:11
o3:35Mat 11:27; Ioa 5:20
p3:36Ioa 3:16-18; 1Ioa 5:12

John 3

Iesu Mulosou Nikodimo Lavulavu

a Ioxe, no voxo vile la itema vile ualasou lexe Nikodimo, anu Palisaio vile mo anu itema tila vile noxi'a ta Iutaia mune'e noxou Iesu no 'olovoxo. La muvikalanu aloxo 'o, “Rabi, nexi telavusou lexe Lataua mupalusine nene'e loxo itema sou ulosi'a ta mitema lavulavu. Lexe Lataua uxolu noxine uasi, la umomomo sou nini na'oxonu sosovo ane ne uasi.” b Iesu mukolinu vaikalau aloxo 'o, “Eni avikalaneni manina musuku. Lexe itema vile uxali alavua uasi, la umomomo sou umaisou saxisaxila'u noxou Lataua uasi.” Nikodimo muavuti la mutali'isou aloxo 'o, “Loxovaa, umomomo sou itema vile aululu ulivu u'unalai noxie nenu opoone, la ivo'onu la?” c Iesu mukoli aloxo 'o, “Eni avikalaneni manina musuku. Lexe itema vile uxali alavua no anu lexa mo Uleenu Tavuna uasi, la anu umomomo sou u'unalai no 'a saxisaxila'u noxou Lataua uasi. d Mauli ane muxali no anu masaxa noxi'a ta mitemasi ne, la anu mauli ane ne ukalu vitanisi. Ia mauli ane muxali no anu Uleenu Tavuna, anu mauli ane ne kaluxu uasi. Eni evikalaneni lexe nini naxali alavua la, io mamu nini nakuluke no anu vaikala ane 'o. Nini namaisou atume uili ulai no anu masaxa na'u mo nalomusou luluxusi, ia nalavusou lexe molu ava xe ulai ava uasi. Ta mitema ane maulixa'a ane uxali no anu Uleenu Tavuna ne, anu aloxo nesi.” Nikodimo mutali'isou aloxo 'o, “Mole, anu uxali a loxovaa?” 10 Iesu mukolinu aloxo 'o, “Nini namitema sou nalosi'a ta Isilaeli lavulavu ane, ia nalavusou mii ane ne uasi? 11 Avikalaneni manina musuku. Nexi talemolu ma'ia nexi telavusou mo temaisou. Ia ngingi ta mitema nga'osasou mo ngano'u uasi. 12 Eni evikalangengixu mii sou no lia 'o, ia ngingi ngamulaxu tangengi no anu uasi. Io lexe eni avikalangengixu mii sou teitexi no opo loxotolo, la sou ngingi ngamulaxu tangengi no anu a loxovaa? 13 Itema vile ulai teitexi no opo loxotolo uao, ia itema vile molu teitexi no opo loxotolo mulu'e, Anu anusisi Anu Itema 'Olu. 14  e Loxo Mosesi mu'itinu sinana veveeni no xalee lia vitanisi, ane'i iitinu Itema 'Olu kalumo, 15  f sou lexe 'ena'ei ane umulaxu tanu noxou la uno'u mauli ane kaluxu uasi.”

16  g Lataua tanunenge nenge ta mitema no xalee lia mukalusi, la sou mulosinge 'Olu vilesisi mo sou lexe anu ane umulaxu tanu noxou 'Olu ne, la usoli uasi, uno'u mauli kaluxu uasi. 17  h Anu Lataua mupalusou 'Olu mulu'e sou utulusi'a ta mitema no lia 'o no anu vaivaikala uasi, mulu'e sou upamauline'i. 18  i 'Ei ane umulaxu tanu noxou, la anu utulu no anu vaivaikala uasi. 'Ei ane umulaxu tanu no anu Lataua 'Olu vilesisi ualasou uasi, la anu mutulu no anu vaivaikala mukalu ne. 19  j Tava'u itulu no anu vaivaikala ne, aloxo. Lamana mulu'e no lia mukalu, ia ta mitema mimasaxau lamana ne uasi, imasaxau isivoxo. Xo 'ili'ilixo noxi'a ne, masumasua misevile. 20 Ane'i ane i'oxo'oxonu 'ili'ilixo masumasua ne, imasaxau lamana ne mo ilai no lamana ne uasi. Xo ane'i imasaxa lexe 'ili'ilixo masumasua noxi'a ne upala'a no ie'i ta mitema uasi, utalumesi. 21 Ia anu ane u'oxonu 'ili'ilixo ane laixe ne, anu unene'e no lamana, la sou ta mitema ilavusou manina lexe anu mu'oxonu 'ili'ilixo ane manina no anu xavi noxou Lataua.

Ioanesi Anu Itema sou U'ulosi'a ta Mitema Muvikala Lamana Noxou Iesu Lexe Anu 'Ei

22  k Iesu ilou Nikodimo mivivikala mukalu xe ili'i, la Iesu ilo'a ta molomolou milutu ne Ielusalemu sou milai no xalee vile no xalee lia tila ne Iutaia. La mixolu voxo se'i sou Iesu mu'ulosi'a ta mitema. 23 Mo Ioanesi kalumo u'ulosi'a ta mitema no tuala ne Ainon 'alai ne Salimu. Xo no xalee lia ane ne, lexa tavu'alo. Ta mitema tavu'alo inene'e noxou Ioanesi sou u'ulosi'a. 24 No voxo ane ne, Ioanesi, itatuxu no anu taasou navunavu uao. 25 No voxo ane ne, la ta molomolou Ioanesi ilo'a Iutaia vile mi'otosou anaxa'a sou vote'i sou itema vile u'ulo sou uxali malemalenga no iou Lataua a loxovaa. 26 La sou ane'i milutu milai noxou Ioanesi la mivikalanu aloxo 'o, “Rabi, itema e ngingi ngongou ngexolu no xalee vile ne Ioridani xe nini nepala'alixu noxixe ne, Anu a u'ulo'ulosi'a ta mitema mo ta mitema latala a ilalai noxou sio.” 27 Anu mukoline'i aloxo 'o, “Lexe Lataua no opo loxotolo ulosou itema vile mii vile uasi, la anu umomomo sou uno'u uasi. 28  l Ngingi ngelomusilo eni evikalangengixu aloxo 'o, ‘Eni Kalisito uasi. Lataua mupalusilo sou euli noxousi.’ 29 Itema vile utaula'i alavua la sema ne anu semausi. Ia menexu e mune'e no anu la'ilali sou taula'i alavua ne, uxolu mo ulomusou xolinu la 'osa'ila noxou u'oki manina. La sou eni kalumo a'osa manina xo mii ne muxali manina. 30 Xo Anu ualasou utelai, ia eni ualasilo ulu'elai.”

31  m Anu ane molu teitexi, Anu tila no anu mimii mukalusi. Ia Anu ane molu no lia 'o, Anu sou lia 'osi mo uvikala loxo itema vile sou lia 'osi. Anu ane molu no opo loxotolo, Anu tila no anu mimii mukalusi. 32  n Itema ane ne mupala'alixu mimii ane mumaisou mo mulomusou. Io itema vile u'osasou sou uno'u vaikala ane Anu mulemolu ne uasi. 33 'Ei ane u'osa sou uno'u vaikalau ne, anu musosovosou lexe Lataua anu manina. 34 Anu ane Lataua mupalusou mulu'e ne, Anu uvikala vaivaikala noxou Lataua. Xo Lataua mulosou Uleenu Tavuna mukalusi. 35  o Momu mumasaxau 'Olu misevile, la sou mu'italonu mimii latala mukalusi no avolu. 36  p 'Ei ane umulaxu tanu noxou Lataua 'Olu ne, la uno'u mauli ane kaluxu uasi. Ia lexe 'ei ane ulomuxu vaikala noxou Lataua 'Olu uasi, la umomomo sou umauli uasi xo la'ia noxou Lataua a uxolu noxou.

Copyright information for `ATA