a4:1-2Ioa 3:22
b4:5Tav 33:19; Ies 24:32
c4:9Esi 4:1-5
d4:10Ioa 7:37-38; Pal 21:6
e4:12Ioa 8:53
f4:14Ioa 6:35
g4:20Lap 12:5-14; Lex 122:1-5
h4:222Ta 17:29-41; Ais 2:3; Rom 9:4-5
i4:24Rom 12:1; 2Ko 3:17; Pil 3:3
j4:26Mak 14:61-62
k4:34Ioa 6:38
l4:35Luk 10:2
m4:421Ioa 4:14
n4:44Mat 13:57
o4:45Ioa 2:23
p4:46-47Mat 8:5-6; Ioa 2:1-11
q4:48Ioa 2:18; 1Ko 1:22
r4:50Mat 8:13
s4:54Ioa 2:11

John 4

Iesu Muvikala Noxie Sema sie Samalia

a Iesu anu molu u'ulosi'a ta mitema uasi, ta molomolo noxou me'a mi'ulo'ulosi'a. Ia no mine ta Palisaio milomu lexe Iesu mu'ulosi'a ta mitema mo ane'i mixali loxo ta molomolou, la itiitisi'a muaulixu itiitisi'a ta molomolo noxou Ioanesi. Ioxe Tila mulavu aloxo ne, la sou Anu mu'umesou xalee lia tila ne Iutaia sou mulivu mulai to'o no xalee lia tila ne Xalilaia la. Ia muavuti sou lexe ulai la muxavutala lexe u'unalai no xalee lia tila ne Samalia tei o. b Mu'unalai la muxali no tuala ne Sikari 'alai no lia e Iakovo mu'italonu mulai noxou 'olu Iosepu. Iesu mumuamua'i xoo mole mutotosa la mulai muxali no anu lexa iou vile Iakovo mu'asou la muma'ila ne, la aso mukulupa. Iesu muavuti la mupalusi'a ta molomolou milai no tuala sou ilotoxa'a la'ilali. Io Iesu anusisi muxoxolu ne, la sema Samalia vile mine'e sou lexe itau lexa. Iesu mumaisie la muvikalane lexe, “Natau lexa sevile une'e mo aie.” c Ane miavuti la mivikalanu aloxo, “Nini namitema sie Iutaia xe eni sie Samalia. Ia tava'u loxovaa la nini nevikalaleli sou atauxene lexa o?” Ane mivikalanu aloxo ne, xo ta Iutaia ilo'a ta Samalia ilavusou ixolu ipita uasi. 10  d Iesu mukoline aloxo 'o, “Lexe nini nalavusou mii molu noxou Lataua ane Anu mulosine vitanisi mo nalavusou itema e mulingau lexa noxine sou lexe uiexu, la nini natali'i noxou mo sou Anu ulosine lexa sou mauli.” 11 La sema ne mivikalanu aloxo 'o, “Tila, nini mii vile sou natau lexa no anu uasi, mo lexa iou ne muxolu no lia manina. La sou nini natau lexa sou mauli a loxovaa? 12  e Nini natatila loxo mutu'uovunenge Iakovo uasi. Anu mu'italonu lexa iou 'o sou nexi taie no anu. Anu ilo'a ta 'olu mo ta mimii ta temene kalumo miie no anu.” 13 Iesu mukoline aloxo 'o, “Lexe 'ena'ei uie no anu lexa ane 'o, la usoliu lexa la. 14  f Ia lexe anu ane uie no anu lexa ane eni alosou, la anu umomomo sou usoliu lexa la uasi. Lexa e eni alosou ne, uxali loxo lexa luuxu no nano no tanu la ulosou mauli kaluxu uasi.” 15 Sema miavuti la mivikalanu aloxo 'o, “Tila, nalosilo lexa ane ne, la sou eni aiexu la asoliu la uasi, mo ane'e 'o sou atau lexa 'o la uasi.” 16 La Iesu muvikalane aloxo 'o, “Nalai na'avalou mulumeni mo une'e.” 17 Sema mikolinu lexe, “Eni muluxeni uasi.” La Iesu muvikalane la, “Nini nevikala lexe mulumeni uasi ne, manina. 18 Xo tei la ta mulumulumeni ta'uve, ia vaimomo ane ngingi ngongou ngaxoxolu ne, anu mulumeni manina uasi. La sou nini nevikala ne manina.” 19 Sema mikolinu Iesu aloxo 'o, “Tila, eni elavusou lexe nini itema sou palomatana vile. 20  g Ta totoxosixe ilolotu no laxa'ilu ano 'o, ia ngingi ta Iutaia ngavikala lexe nenge talotu lai 'o uasi, talotu ne Ielusalemusi.” 21 Iesu muvikalane sema lamana aloxo 'o, “Nini namulaxu taneni no 'a vaikala noxilo. Voxo a unene'e sou ngingi ngalotu noxou Maminge no laxa'ilu 'o mo ne Ielusalemu ne uasi. 22  h Ngingi ta Samalia ngalavusou ngalotu noxou 'ena'ei uasi. Ia nexi ta Iutaiasi telavusou lexe talotu noxou 'ena'ei manina. Xo itema sou upamaulinenge uxali noxixe nexi ta Iutaia. 23 Ia voxo e lexe ta mitema ilotu manina ulai noxou Maminge a unene'e a mune'e mukalu. Ia lexe ta mitema e ilotu manina noxou Maminge no anu uleene'i mo opone'i maninasou. Xo Maminge ukakamuline'i ta mitema aloxo ne. 24  i Xo Lataua anu uleenu la sou ane'i ane ilotu noxou, la ilotu no anu uleene'i mo opone'i maninasou.” 25 Sema mivikalanu Iesu aloxo 'o, “Eni elavusou lexe Mesaia e ilemo lexe Kalisito, Anu a unene'e. No voxo ane Anu une'e, la sou Anu ululusou mimii tavu'alo une'e noxixe.” 26  j Iesu muvikalane lamana aloxo 'o, “Itema ne, ane enisi o ane avivikalaneni.”

Ta Molomolou Iesu Milivu Mine'e La

27 Iesu ilee sema ne ivivikala aloxo ne, la ta molomolo noxou milotoxa'a la'ilali mo milivu mixali. Mine'e mixali la mimaisou Iesu uvivikalane sema ne, la mikuluke. Ia vile noxi'a utali'isou uasi lexe, “Nemasaxau ma'i noxie?” mo “Tava'u loxovaa la sou ngingi ngongie ngavivikala 'o?” 28 Xe sema miavuti la mi'italonu lexaxe vexasou muai ne, ia milivu milai no tuala. Mixali no tuala, la mivikalane'i ta mitema no tualasie aloxo 'o, 29 “Ngane'e mo ngamaisou itema vile e Anu mupala'alixu mimii tavu'alo no anu maulixo. Male Anu Kalisito ane.” 30 Ane'i milomusou vaikalaie la milutu sou milai mimaisou. 31 No mine ta mitema ine'e ixali uao, la ta molomolou mivikalanu aloxo, “Tila, nexi temasaxa lexe nini na'ani sevile o.” 32 Ia Anu muavuti la muvikalane'i aloxo, “Eni la'ilalixo a uai. Ia ngingi ngalavusou uasi.” 33 La ta molomolou mivikalane'i ngato'o lexe, “Evile mune'e muitixu la'ilali male.” 34  k Iesu muvikalane'i la aloxo 'o, “La'ilalixo ne, ane eni amulinu masaxa noxou Anu ane mupalusilo ene'e sou akalusou xaixai noxou. 35  l Ngingi ngavikala lexe, ‘Uao so'io tami'a a uxolu sou ngamolo la'ilali uxali,’ ia eni avikalangengi aloxo 'o, ngatulu mo ngamaisou xai laixe o. La'ilali a lingamo sou ngalai ngamolou. 36 Vaimomo 'o itema sou umolo la'ilali ne, muno'u lakolisou xaixai noxou mo vaimomo 'o umolo la'ilali sou mauli kaluxu uasi. La sou itema utotou xai xe itema sou umolo la'ilali ne, ilou i'osa mo ixolu ipita. 37 Anu vaikala ane ne manina lexe, ‘Itema vile sou utotou xe itema vile sou umomolou.’ 38 Eni apalusinge ngalai sou ngamolo la'ilali no xai e ngingi ngatou uasi. Ta mitema mose'i sasaie'i no anu, ia ngingi ngalai sou ngamolousi.”

Ta Mitema sie Samalia Tavu'alo Ane'i Mimulaxu Tane'i Noxou Iesu

39 Sema mipala'alixu noxi'a ta Samalia lexe anu Iesu mululusou mimii tavu'alo no anu maulixe. Ane'i tavu'alo milomusou aloxo ne, la mimulaxu tane'i noxou. 40 La sou ane'i mine'e noxou la mivikalanu mimasaxa lexe ilo'a ixolu. La ilo'a mixolu voxo tamei. 41 No anu vaikalausi, la ta mitema tavu'alo la mimuxaxu tane'i noxou. 42  m Ane'i mivikalane sema ne aloxo 'o, “Nexi temulaxu tanexi noxou xo nini nene'e nea'alomexi o uasi. Nexi mexe telomusou mo telavu manina lexe itema ano 'o Anu itema sou upamaulinenge no lia 'o.”

Iesu Mupamaulinu Itema sou Xaixai Noxou Tatananu Tuala 'Olu

(Mat 8:5-13; Luk 7:1-10)

43 Ilo'a mixolu voxo tamei mukalu, la Iesu mulutu sou mulai to'o no xalee lia tila ne Xalilaia. 44  n Xo Iesu anu molu muvikala lexe, “Itema sou palomatana vile, ta tema tualasou itoxonu uasi.” 45  o Anu mulutu xe muxali ne Xalilaia, la ta mitema mi'osasou. Xo ane'i mimaisou sosovo ane Iesu mu'oxonu ne Ielusalemu no voxo e misosovosou voxo sou Lataua Iou Muvaxai'a.

46  p Io Iesu mulutu la mulai no tuala ne Kana la. Tei la Anu muxiunu lexa muxali uaini. Iesu muxali ne Kana, la itema vile sou xaixai noxou tatananu tuala ne Xalilaia muxolu ne Kapenaumu, mulomu lexe Iesu molu ne Iutaia mune'e muxali ne Xalilaia la mulai noxou Iesu. Xo anu 'olu pipiena mu'oxonu mo 'alai sou usoli. Anu mulai noxou Iesu la mulingau sou lexe ilou ilai mo upamaulinu. 48  q Iesu muvikalanu aloxo 'o, “Ngingi ngamaisou sosovo noxilo uasi, la ngamulaxu tangengi noxilo uasisi manina.” 49 Itema sou xaixai noxou tatananu tuala ne Xalilaia muavuti la muvikalanu aloxo 'o, “Tila, nane'e mo nengei talai ua, 'alixe usoli maasi.” 50  r Iesu muvikalanu aloxo 'o, “Nalivu mo nalai. Xo 'iline a mumauli mukalu.” Anu mumulaxu tanu no anu vaikala noxou Iesu la mulutu mulai. 51 Anu uxali no tualasou uao, la ta mitema e ixaxai noxou ne mixalisou la mivikalanu lexe 'olu mumauli. 52 Anu muavuti la mutali'isi'a lexe mumauli talu. La ane'i mikolinu aloxo 'o, “Vasimolu ialuxu a mukalu no aso iou vile mei no 'olo'olovoxo.” 53 Molomolo momu mulomusi'a la mulavu lexe 'olu mumauli no aso iou vile no 'olo'olovoxo no mine Iesu muvikalanu lexe, “'Iline mumauli.” La sou anu ilo'a ta mitema no taasou mimulaxu tane'i noxou Iesu. 54  s Sosovo tamei sou ne, muxali no mine Iesu mulutu ne Iutaia mune'e muxali ne Xalilaia.

Copyright information for `ATA