a13:2Ioa 9:2
b13:7Luk 3:9
c13:82Pi 3:9, 15
d13:14Mul 20:9-10; Lap 5:13-14
e13:15Luk 14:5
f13:25Mat 25:10-12
g13:27Lex 6:8
h13:28Mat 8:11-12
i13:29Lex 107:3
j13:30Mat 19:30
k13:35Lex 118:26

Luke 13

Itema Uxiu Opoonu Uasi, La Anu Uulua

Ioxe, no mine Iesu muvika-lane'i mukalu, la sou ta mitema mose'i mia'alou si'a ta mitema ne Xalilaia e Pilato mupalusi'a sou muve'ave'a la sialuxa'a ilou musiali mukei ilou sialuxa'a ta sipsip e ane'i i'oxe i'elaxa'a ulai noxou Lataua. a La Iesu muvikalane'i aloxo 'o, “Ngingi ngexavutala lexe 'ili'ilixo masumasua noxi'a ta mitema ane ne, muuaulixu 'ili'ilixo masumasua noxi'a ta mitema ane mose'i sie Xalilaia ne, la sou anu muve'ave'a ne? Eni avikalangengi lexe uasi manina. Ia lexe ngingi ngaxiu opongengi uasi, la ngingi latala ukalusi kalumo ne ngaulua aloxo ne. Xe ta mitema mavulovexa mo mulu'e no lia ta'uve mo muxatele tatalu e tani veveeni ne Siloamu mulapau la muatasi'a mo misoisoli ne, la ngingi ngexavutala lexe 'ili'ilixo masumasua noxi'a ne muuaulixu 'ili'ilixo masumasua noxi'a ta mitema ane ixoxolu ne Ielusalemu ne? Eni avikalangengi lexe uasisi manina. Ia lexe ngingi ngaxiu opongengi uasi, la ngingi kalumo ngaulua aloxo nesi.”

Mukalu, la sou Anu muvikalane'i no anu vaikala tovola'i vile aloxo 'o, “Itema vile mutounu lovo vile no anu xai sou ovu uaini noxou, ia ili'i la anu mune'e sou mumaisou lexe munene'a. Ia uxalisou temanu uasi. b La sou anu muvikalanu itema ane usaxila'u xai sou ovu uaini noxou ne aloxo 'o, ‘No 'a tauu ie tatalu mukalu, la eni ene'e ekakamuli ovu ano 'o temanu. Ia axalisou vile uasi. La sou naxeta'u mo uxexee! Xo loxovaa, la sou anu upaipalunu lialia lovoxu vitanisi 'o.’

c La sou itema sou usaxila'u xai ne, mukolinu aloxo 'o, ‘Tila, namalanixu uxolu no anu tauu ie vile 'o la, mo amamulonu lialia no tava'u xe asuanu mosomoso no tava'u sou uleme laixe. Ia lexe unene'a no tauu ie ane uuli o, la anu laixe musuku. Ia lexe unene'a uasi, la sou naxeta'u mo uxexee.’”

Iesu Mupamauline Sema Vile Ane Xine Tavulenu Mukilikalu

10 No anu voxo Tavuna vile, la Iesu ulolosi'a ta mitema lavulavu no anu vaikala noxou Lataua no nano no taasou lalotu noxi'a ta Iutaia. 11 La sema vile ane mixoxolu ne, ulee masua vile muxolu noxie, la sou mu'oxonu xine tavulenu mukilikalu maxuveeni umomomo loxo tauu ie mavulovexa mo mulu'e no lia ta'uve mo muxatele tatalu. Milanga aloxo nesi, ia umomomo sou imexi itelo uasi. 12 Xe Iesu mumaisie, la mu'avalie mine'e noxou sou muvikalane aloxo 'o, “Eiseo, eni exexeenu pipiena noxine mukalu ne.” 13 Mukalu, la Anu mu'italonu avolu noxie, xe alaxu vilesisi 'o, la ane mimexi mutelo mo mi'itinu Lataua ualasou.

14  d Ia itema sou usaxila'u taasou lalotu noxi'a ta Iutaia mumaisou Iesu mupamauline no anu voxo Tavuna, la la'iaxu misevile. La sou muvikalane'i ta mitema aloxo 'o, “Nenge voxo sou xaixai noxinge muxatele vilesi. La ngingi ngane'e noxou Iesu sou upamaulingengi no anu voxovoxo ane ne, io no anu voxo Tavuna uasi.”

15  e Ioxe, Tila mulomu aloxo ne, la muvikalanu itema ne aloxo 'o, “Ngingi ta mitema sou kalakalavoi! Xo ngingi vilevilesi ngalavusou ngalulusi'a ta mimiimengi loxo ta bulumakaumengi ilo'a ta donkimengi no taasi'a sou ngalaixa'a sou iie no voxo Tavuna ne. 16 Ia sema ane 'o ne, ane Avalaamu 'ilusunu vile, ia Satani musakisakiine mumomomo loxo tauu ie mavulovexa mo mulu'e no lia ta'uve mo muxatele tatalu. La sou umomomo sou eni axexeenu tu'umaxu noxie 'o no anu voxo Tavuna 'o uasi?”

17 Anu muvikala aloxo ne, la ta ulua noxou ne mimaela masua. Ia ta mitema ne mi'osa manina no anu xaixai lailaixe mukalusi ane Anu u'oxo'oxonu ne.

Vaikala Tovola'i sou Masitati Ngiaxu Ilou Iisi

(Mat 13:31-33; Mak 4:30-32)

18 Iesu muavuti la mutali'isi'a aloxo 'o, “Saxisaxila'u noxou Lataua ne, anu aloxo mii ma'ia? Eni atovola'inu a loxovaa? 19 Anu aloxo masitati ngiaxu kitu'a e itema vile mutounu no xaixu. Ia ili'i xe muleme muxali tatila loxo ovu vile, la ta ngiangiala i'oxonu iomusi'a no anu avoavolu.”

20 Anu mutali'i la aloxo 'o, “Mii ma'ia ane sou, eni atovola'inu saxisaxila'u noxou Lataua no anu? 21 Anu aloxo iisi sevile kitu'a e sema vile mino'u sou mipitanu mixiunu ilou veleti ane tatila, la musoxolixu veleti ane ne.”

Pekia'inge sou Nga'una no Anu Aitenga Kitu'a

(Mat 7:13-14, 21-23)

22 Ioxe, Iesu mumuamua'i sou ulai ne Ielusalemu, la mu'una no tuatuala sou mulosi'a ta mitema lavulavu no anu vaikala noxou Lataua. 23 La mitema vile mutali'isou Iesu aloxo 'o, “Tila, ta mitema ta 'eisi mane ino'u mauli ane kaluxu uasi, ne?”

La Iesu muvikalane'i ta mitema aloxo 'o, “Ngapita xavingengi sou nga'una no anu aitenga ane kitu'a ne. Xo avikalangengi lexe ta mitema tavu'alo itovonu sou i'unalai, ia imomomo uasi.
25  f Xo loxo moosou tani uavuti xe utatusou aitengaxu tani, la ngingi ngane'e ka ngatulu no ale sou ngapolopolo, io ngalinga aloxo 'o, ‘Tila, nakisi aitengasixe.’

Ia, anu ukolinu vaikalamengi aloxo 'o, ‘Eni alavusinge lexe ngingi menge ne'ei uasi.’

26 La ngingi ngavikalanu aloxo 'o, ‘Nenge nenge'a tepita sou te'ani mo teie ano. Mo nini netulu no vote'isixe sou nelosiexixu lavulavu no anu vaikala noxou Lataua.’

27  g Ia anu ukolinengi la aloxo 'o, ‘Eni alavusinge lexe ngingi menge ne'ei uasi. Ngingi ta mitema sou 'ili'ilixo masumasua, ngaxexee mo ngalai va'axu.’

28  h Io, ngingi ngamaisi'a Avalaamu ilou Aisaki mo Iakovo ilo'a ta mitema sou palomatana ixoxolu no tuala noxou Lataua, la ngingi ngatama mo anangenge ukalakiki. Xo ngingi ngaxolu no ale. 29  i Ia ta mitema ilutu me'a no tuatuala no xalee lia tami'a ine'e ixolu no luusi'a sou la'ilali no tuala noxou Lataua. 30  j Manina musuku lexe ta mitema ane ixavutala lexe ili'i, la ane'i ixali iuli, xe ane'i ane ixavutala lexe ixolu iuli, la ane'i ilai ili'i.”

Iesu Mutamasi'a ta Mitema ne Ielusalemu

31 No voxo ane ne, la ta Palisaio se'i mine'e noxou Iesu sou mivikalanu aloxo 'o, “Nalutu mo naxexesou tuala ano 'o, io nalai no tuala vile va'axu. Xo Elodesi umasaxa lexe uvene.”

32 La Anu muvikalane'i aloxo 'o, “Ngalai mo ngavikalanu mivulaulau ne lexe eni akusai'a ta ulee ta masumasua mo apamauline'i ta mitema vaimomo 'o mo ne'iela. Xe no anu voxo tatalusou, la eni akalusou xaixai noxilo. 33 Mii ma'ia ane uxali noxilo vaimomo 'o mo ne'iela mo ualisa ne, ia eni axaxaisi. Xo itema sou palomatana vile umomomo sou usoli no ale ne Ielusalemu uasi!

34 Iauo, ngingi ta Ielusalemu o, ta Ielusalemu o, ngingi ta mitema sou ngave'a ta mitema sou palomatana mo ngave'a ane'i ane Lataua mupalusi'a mine'e noxinge no anu kulu mo isoli. Alaxu tapiena musuku, la eni emasaxa sou apitane'i ta 'ilinge loxo koko'a neni'a ipitane'i ta 'ilie no laaxu vivisie. Ia ngingi ngamasaxa uasi. 35  k Ngamaisou. Ili'i, la Lataua umamulonu tualasinge mo anu usaxila'u la uasi. Eni avikalangengi lexe umomomo sou ngamaisilo la uasi, ulai utalo no voxo ane ngingi ngavikala lexe Lataua ualusou anu ane Tila mupalusou mune'e 'o.”

Copyright information for `ATA