a14:3Luk 6:9
b14:5Mat 12:11; Luk 13:15
c14:8Xav 25:6-7
d14:11Mat 23:12; Luk 18:14
e14:14Ioa 5:29
f14:15Luk 13:29
g14:201Ko 7:33
h14:26Luk 9:23

Luke 14

Iesu Mupamaulinu Itema Vile no Taasou Palisaio Vile

No voxo Tavuna vile, la Iesu mulai mu'ani no tani noxou tila noxi'a ta Palisaio. La ta mitema ane mipita no tani ne, miutitisou laixe. Ia itema vile e muxolu no talaxu Iesu ne, pipiena vile mu'oxonu la avolu ilou tava'u ne musoxosoxo. a Iesu mumaisou itema ne, la Anu mutali'isi'a ta Palisaio ilo'a ta mitema ane milavu manina no anu lapuloto noxou Mosesi ne aloxo 'o, “Loxovaa, lapuloto noxou Mosesi muvikala laixe lexe tapamaulinu itema no anu voxo Tavuna, uasi?” Ia ane'i mixolu tani mukiisi. La sou Anu mutetelisou mitema ne sou mupamaulinu. Mukalu, la mupalusou mulai.

b Io mutali'isi'a aloxo 'o, “Lexe ngingi vile 'olu vile, uasi la bulumakau vile ulapau ulu'e no taxa sou lexa no voxo Tavuna, la umomomo sou ngingi ngapalea ngatokinu ngatelonu uasi?” La ane'i i'a vaikala vile sou ikolinu uasi.

Ioxe, Iesu mumaisi'a ta mitema ane mine'e mipita sou i'ani ne, mitomutomusou luuluu laixesi sou ane'i mixolu no anu, la Anu muvikalane'i no anu vaikala tovola'i aloxo 'o, c  “No voxo ane itema vile u'avalinge sou ngalai no anu la'ilali sou taula'i, la mamu sou ngatomutomusou luuluu laixe. Xo loxo 'o io anu mu'avalou itema vile tatila noxinge kalumo a uxali uao. Lexe anu uxali, la itema e mualinge ne une'e la uvikalangengi lexe, ‘Ngaxexesou luu ne mo mitema tila 'o uxolu no anu.’ La ngingi ne, ngamaela maninasi ka ngalai ngaxolu ili'i. 10 Ia lexe ialinge sou ngalai nga'ani, la ngalai ngaxolu no luu ili'i manina. Mo sou itema e mualinge ne une'e la uvikalangengi lexe, ‘Ta menexilo, ngasuku ngatelo no anu luu ane laixe uuli o.’ La ta mitema ane mine'e mipita sou i'ani ne, i'itinu ualasinge. 11  d Xo ta mitema ane ane'i me'a itelailixa'a, la Lataua ulu'elailixa'a, xe ane'i ane me'a ilu'elailixa'a, la Lataua utelailixa'a.”

12 Muvikalane'i ta mitema e mixali mipita sou la'ilali ne mukalu, la sou Anu muvikalanu mitema e mualiu ne aloxo 'o, “No mine nini na'oxonu la'ilali sou aso, xe sou 'olo'olovoxo, la mamu sou naali'a ta menexine mo ta vivine mo ta tulaneni ilo'a ta minemineni xe ta tema tualasine e i'a lavuluti piena. Xo nini naali'a maasi, la ane'i ialine kalumo sou ikolinu la'ilalixene ne. 13 Ia uasi. Nini na'oxo la'ilali, la naali'a ta mitema ane i'a lavulutii'a uasi mo ane'i ane vasime'a musoisoli mo ane'i ane tava'a mukilikalu xe ane'i ane ie'i seleveenu. 14  e Mo sou Lataua ualusine. Xo ane'i ta mitema ane loxo ne, imomomo sou ikoli la'ilalixene ne uasi. Ia Lataua ukolinu xaixai noxine ne no anu voxo ane ta mitemau itulu sou imauli.”

Vaikala Tovola'isou La'ilali Toxoxa'a

(Mat 22:1-10)

15  f Itema vile no taiine'i no anu luusou la'ilali ne, mulomusou Iesu muvikala aloxo ne, la anu muvikalanu Iesu aloxo 'o, “Lataua ualusi'a ta mitema ane'i ane ili'i la i'ani no anu la'ilali no tuala noxou.”

16 La Iesu muvikalanu aloxo 'o, “Itema vile mulalaxiinu la'ilali vile toxoxa'a ka muali'a ta mitema tavu'alo sou lexe ine'e i'ani no anu la'ilali ane ne. 17 Io, voxo sou 'ani'ani muxali, la anu mupalusou itema sou xaixai noxou vile sou lexe ulai uvikalane'i ane'i ane anu mu'avali'a ne lexe, ‘Ngane'e, xo la'ilali mulalaxii mukalu.’

18 Ia ta mitema latala ane ne, ane'i miavuti sou mivikala lexe ane'i imomomo sou ilai uasi xo ane'i 'au'au. Vile noxi'a muvikala tei aloxo 'o, ‘Eni amomomo sou alai uasi, xo eni elotonu xai vile alavuasi, mo eni alai mo amaisou.’

19 Xe tameisi'a muvikala aloxo 'o, ‘Eni amomomo sou alai uasi, xo eni elotone'i ta bulumakau mavulovexa mo eni amuamua'i alalaisou atovone'i lexe ixaxai alovoxaa?’

20  g Xe tatalusi'a kalumo muvikala aloxo 'o, ‘Eni amomomo sou alai uasi, xo eni a uao etaula'i alavua 'o.’

21 Aloxo ne, la sou itema sou xaixai noxou ne mulivunoxu vaikalai'a mulai noxou tilasou. La tilasou ne la'iaxu ka muvikalanu itema sou xaixai noxou ne aloxo 'o, ‘Napalea nalai no vote'i ta tatila xe vote'i kitukitu'a sou tuala ane ne, mo nataxusi'a ta mitema ane i'a lavulutii'a uasi mo ane'i ane vasime'a musoisoli xe ane'i ane ie'i seleveenu ilo'a ane'i ane tava'a mukilikalu mo nane'ene'i no taasilo.’

22 Ioxe, la sou itema sou xaixai noxou ne mu'oxonu aloxo ne mukalu, la muvikalanu tilasou aloxo 'o, ‘Tila, eni e'oxo loxo nini nevikalaleli, ia tani u'ana'ana uao.’

23 La tilasou muvikalanu la aloxo 'o, ‘Nalai no ale no vote'i ta tatila mo namulinu vote'i kitukitu'a sou xai xe naxalisi'a, la nane'ene'i no taasilo. Mo sou taasilo u'ana'ana. 24 Eni avikalangengi lexe ta mitema ane'i ane e'avali'a, ia ine'e uasi ne umomomo sou i'ou la'ilalixo 'o sevile uasi.’”

'Ilixo sou Tamulinu Iesu

(Mat 22:1-10)

25 Ta mitema tavu'alo mimulinu Iesu, la anu muxiu vaxa noxi'a sou muvikalane'i aloxo 'o, 26  h  “Lexe itema vile une'e noxilo, ia tanu vulusi'a momu ilee nenu mo semau ilo'a ta 'olu mo ta vimovimou xe tanu vulusiu maulixu kalumo uasi, la anu umomomo sou uxali molomolo noxilo uasi. 27 Mo loxo itema vile utavulenu tu'utu'umaxu mo usoli loxo eni asoli o uasi, la anu umomomo sou uxali loxo molomolo noxilo uasi.

28 Ia lexe vile noxinge ne umasaxa lexe utulusou tani vile veveeni, la uxolu mo uxavutala laixe tei lexe misomisou tani ane ne lamolisou ta'ei xe umaisou lexe anu lamoliu umomomo sou ukalusou xaixai sou utulusou tani ne. 29 Xo loxo 'o io, anu usokou tani ne, io ukalusou uasi xe ta mitema imaisou aloxo ne, la ane'i ikekeiou. 30 Io ivikala lexe, ‘Ngamaisou! Maulamenge soxu ne, musokou sou mutulusou tani ne, ia umomomo sou ukalusou uasi.’

31 Mo lexe tatananu tuala vile 'ala'alai sou u'oto noxou tatananu tuala ane vile 'olele, la anu uxolu mo uxavutala laixe tei o lexe anu umomomo sou ilo'a ta mitema sou 'oto'oto noxou ane itemaxu mavulovexa mavulovexa ta'uve (10,000) i'oto, la imomomo sou iuaulixa'a ane vile ilo'a ta mitema sou 'oto'oto noxou ane itemaxu mavulovexa mavulovexa mavulovexa (20,000) ne. 32 Ia lexe anu ulavu lexe umomomo sou uuaulixu tatananu tuala ane vile 'olele uasi xe anu uao no paxa sio, la anu usosovosou noxou itema vile sou ulai uvikalanu tatananu tuala ane vile lexe nenge nengei ta'oto mamu. 33 Anu aloxo nesi, lexe vile noxinge usu'anu miumiu ukalusi uasi, la anu umomomo sou uxolu molomolo noxilo uasi.

34 Au ne, anu laixe. Ia lexe tu'axu ne tasia'uxu, la nenge talivunoxu tu'axu ne a loxovaa? 35 Anu umomomo sou u'oxo lialia lovoxu uasi mo umomomo sou tapita ilou mosomoso sou u'oxonu lialia lovoxu sou la'ilali uleme no anu uasi. Ane'i isuanu vitanisi.

Itema ane sangalou a uxolu sou ulomu, la anu ulomusou vaikala noxilo 'o.”

Copyright information for `ATA