a15:2Luk 5:30
b15:4Ese 34:11, 16; Luk 19:10
c15:18Lex 51:4
d15:24Ep 2:1, 5

Luke 15

Vaikala Tovola'isou Sipsip Vile Mu'oxovau

(Mat 18:12-14)

Ioxe, ili'i la ta mitema sou itaxusou lamoli ilo'a ta mitema sou 'ili'ilixo masumasua mine'e mipita mixaliliiou Iesu sou ilomu noxou. a Ia ta Palisaio ilo'a ta mitema sou lapuloto mimunumunuxu Iesu aloxo 'o, “Itema ane ne, ulavusou upita noxi'a ta mitema sou 'ili'ilixo masumasua mo ilo'a i'ani ipipita kalumo.”

Xe Iesu mulavusou xavutalai'a aloxo ne, la sou Anu muvikalane'i no anu vaikala tovola'i vile aloxo 'o, b  “Lexe ngingi vile ta sipsipiu itemaxu ta'uve, ia vile noxi'a tasia'uxu. La anu u'umesi'a ane'i ane itemaxu tami'a mo mavulovexa mo muxatele tami'a ne ixolu no tani taatexa ne sou i'ani'ani, io anu ulai ukakamulinu ane vile e tasia'uxu ne xoo mo uxalisou. Xe uxalisou ukalu, la u'osasou la utavulenu no laxasou, sou ulaixu no tuala. Uxali no tuala, la u'avali'a ta menexu ilo'a ta tema tualasou ine'e ipita, io uvikalane'i lexe, ‘Nenge nenge'a ta'osa. Xo eni exalisou sipsipxeni e tasia'uxu 'ole.’ Eni avikalangengi lexe anu aloxo nesi, lexe itema vile sou 'ili'ilixo masumasua uxiu opoonu, la 'osa'osasou toxoxa'a ane uxali teitexi no opo loxotolo, uuaulixu 'osa'ila ane'i ane itemaxu tami'a mo mavulovexa mo muxatele tami'a ane'i mixiu opone'i tei mo milapu no iou Lataua.

Vaikala Tovola'isou Lamoli Tasia'uxu

Mo lexe sema vile lamolie siliva mavulovexa, ia vile tasia'uxu. La ane i'elaxu telu ka isilapa tani mo ikamuli laixe mo ixalisou. Xe ixalisou ukalu, la ane i'avali'a ta menexie ilo'a ta tema tualasie ine'e ipita, io ivikalane'i lexe, ‘Nenge nenge'a ta'osa. Xo eni exalisou lamolixeni e tasiauxu 'ole.’ 10 Eni avikalangengi lexe anu aloxo nesi, lexe itema vile sou 'ili'ilixo masumasua uxiu opoonu, la 'osa'osasou toxoxa'a uxali no talaxa'a ta angelo noxou Lataua.”

Vaikala Tovola'isou Itema Mu'umesou Momu

11 Iesu muavuti sou musolonu vaikala noxou aloxo 'o, “Itema vile ilo'a ta 'olu ta mulu tamei ne mixoxolu. 12 La 'olu ane kitu'a muvikalanu momu aloxo 'o, ‘Mamilo, nini nalosilo mixemixeni e nini nemulaxu muai va'axu sou lexe nini nasoli la eni ano'u ne, nalosilo a vaimomo 'o.’ La sou momu muvelunu miumiu mulosi'a ta 'olu tamei ne.

13 Maxuveeni uasi, io 'olu ane kitu'a ne mutaxusou miumiu mukalusi sou mulutu mulai no tuala vile no paxa manina. La muvelunu miumiu mukalusi no anu 'ilixosou lexamana noxou. 14 Xe mukalusou miumiu avile aloxo ne, io tausoli toxoxa'a muxali no xalexalee tuala ne mukalusi, la anu muxamuli lexe anu xou 'ani vile la sou u'ou uasi. 15 La sou anu mulai sou lexe uxaxai noxou itema vile sou tuala ane ne. La itema ane ne, mupalusou mulai no xalee lia ane ta memeeu ixolu sou i'ani'ani no anu sou lexe u'a'ane'i. 16 Anu muxamulinu lexe musolixu manina mo umomomo sou u'ou la'ilalixa'a ta memee. Ia itema vile ulosou mii vile sou u'ou uasi.

17 Muxamuli tu'utu'umaxu aloxo ne, la sou xavutalau mulivu. La muvikala aloxo 'o, ‘Ta mitema ta piena sou xaixai noxou mamilo ne, i'ani'ani ia la'ilalixa'a pa'usou a uai sio. Ia eni ne, esolixo manina mo 'aso asoli. 18  c Eni aavutisi mo alutu alivu alai noxou mamilo mo avikalanu lexe, “Mamilo, eni e'oxonu 'ili'ilixo masumasua mulai noxou Lataua teitexi no opo loxotolo mo noxine kalumo. 19 Mo umomomo sou nini namoxo'ilo lexe eni 'iline la uasi. Eni axolu loxo itema vile sou xaixai noxinesi.” ’ 20 La sou anu muavuti sou mulivu mulai noxou momu.

Xe anu uao unene'e no paxa sio, io momu mumaisou la anu tanu mutamasou manina. La sou anu muiave mulai noxou 'olu ne, sou muaulaxu xe mutimunu xaleenu sou mu'osasou.
21 La 'olu muvikalanu aloxo 'o, ‘Mamilo, eni e'oxonu 'ili'ilixo masumasua mulai noxou Lataua teiteixi no opo loxotolo mo noxine kalumo. Mo umomomo sou nini namoxo'ilo lexe eni 'iline la uasi.’

22 Ia momu muvikalane'i ta mitema sou xaixai noxou aloxo 'o, ‘Ngapalea! Ngano'u tokolomo lailaixe noxilo ne ngane'enu mo ngatokolomonu no anu. Mo ngano'u 'ola'ola mo ngane'e nataanu no avolu. Xe ngano'u siove mo nataanu sou tava'u. 23 Xe ngano'u bulumakau 'ilie vile mulu ane lovoxu manina mo ngavau. Ngavau sou ta'oxo la'ilali tila mo ta'osa. 24  d Xo 'alixeni mulu 'o mu'umesilo loxo musoli, ia mulivu mune'e noxilo loxo anu mumauli la.’ La sou ane'i miavuti sou mi'osasou.

25 No voxo ngiou ane ne, la 'olu laposalaxu ne, anu muxolu no xai. Xe no mine mulivu mune'e muxali 'alai no tani, la mulomusi'a ta mitema ilelexe mo ilelei. 26 La sou anu mu'avalou itema sou xaixai noxou momu vile mune'e sou mutali'isou lexe mii ma'ia ane ane'i i'oxo'oxonu ne? 27 La anu itema sou xaixai noxou momu ne, mukolinu aloxo 'o, ‘Vivine anu a muxali mo mamine muvau bulumakau 'ilie vile mulu ane lovoxu manina. Xo anu mulivu mune'e muxali noxou laixesi mo uulua uasi.’

28 Vimou mulomusou aloxo ne, la la'iaxu mo umasaxa sou u'una no tani uasi. La sou momu muuatulai sou muxolixolinu sou lexe u'unalai no tani. 29 Ia anu muvikalanu momu aloxo 'o, ‘Nalomu, no tauutauu ie tavu'alo mukalu o ne, eni exaxai noxine loxo itema sou napalupalusousi mo alavusou aloloxoloxu vaikalameni uasi. Ia nini nalavusou sou nalosilo mee 'olu vilesi loxo 'o sou nexi noxi'a ta menexilo ta'ou mo ta'osa uasi. 30 Ia 'iline soxu ane ne, anu mulai muvelunu mimemimeni no anu 'ilixo sou lexamana noxou, ia mulivu mune'e la nini nevauxou bulumakau vile mulu ane lovoxu!’

31 La momu muvikalanu aloxo 'o, ‘'Alixeni, nini ne nexoxolu noxilosi mo mimii latala noxilo ne, nini na'aninisi. 32 Ia laixe lexe nenge nenge'a tapita sou ta'ani mo ta'osa, xo vivine soxu ne mu'umesinge loxo musoli, ia mulivu mune'e 'o loxo mumauli la.’”

Copyright information for `ATA