a1:2Mal 3:1
b1:3Ais 40:3
c1:4Apo 13:24, 19:4
d1:62Ta 1:8; Mat 11:8
e1:7Apo 13:25
f1:11Lex 2:7; Ais 42:1; Mat 12:18; Mak 9:7
g1:13Lex 91:11-13
h1:14Mak 6:17
i1:15Mat 3:2
j1:22Mat 7:28-29
k1:24Mak 5:7
l1:26Mak 9:26
m1:28Mat 4:24
n1:34Mak 3:10-12
o1:35Mat 14:23; Mak 6:46
p1:39Mat 4:23, 9:35
q1:44Liv 14:1-32

Mark 1

Ioanesi Mua'aloxu Vaikala

(Mat 3:1-12; Luk 3:1-18; Ioa 1:19-28)

Tava'u a'alo laixe sou Iesu Kalisito, Lataua 'Olu ne, Anu muxali tatei aloxo 'o. a Aisaia, itema sou palomatana ne, anu mukaukavu aloxo 'o,

“Ngalomu, eni apalusou itema vile sou upala'alixu vaikala noxilo
mo uuli noxine sou upaipounu vote'isine.”
b “Itema vile u'ava'ava no xalee lia vitanisi aloxo 'o,

‘Ngalalaxiinu vote'isou IAUE, mo ngamomosou kalumo.’”
c La sou itema e ualasou lexe Ioanesi ne, anu muxali no xalee lia vitanisi. Anu muvikala pekia'u mulai noxi'a ta mitema lexe ixiu opone'i, mo sou anu u'ulosi'a. La sou Lataua uxiu tumalouu 'ili'ilixo masumasua noxi'a ne. Ta mitema sou xalee lia tila ne Iutaia mo tuala tila ne Ielusalemu ne, mine'e noxou mukalusi, sou mivikala lamana no anu 'ili'ilixone'i vilevilesi, la sou anu Ioanesi mu'ulosi'a no lexa ne Ioridani. d Ioanesi ne, musakii kameli laxusou sou mutaluxu vasimolu xe muutupokoxu no anu bulumakau sosou. 'Ani'anixu ane musia'e taula ilou unuxu lexaxu. e Anu muvikala aloxo 'o, “Eni euli 'o, ia Anu ane uili'i noxilo ne, Anu xaviinu muuli noxilo mo eni amomomo sou alulusou lamotasou siovexu tava'u uasi. Xo eni amitema vitanisi. Eni a'ulosinge no anu lexasi, ia Anu u'ulosinge no anu Uleenu Tavuna.”

Ioanesi Mu'ulosou Iesu Mukalu, La sou Tovotovo Muxali Noxou

(Mat 3:13–4:11; Luk 3:21-22)

No anu imamaa ane ne, la Iesu mu'umesou tualasou ne Naseleti no xalee lia tila ne Xalilaia sou mununa muxali no lexa ne Ioridani. La sou Ioanesi mu'ulosou. 10 Xe mu'ulo mukalu ia muxali mutelo no lexa loxo'u, la alaxu vilesisi, mumaisou opo loxotolo mukisi la Uleenu muvava mulu'e loxo ngiala kuau sou muxolu noxou. 11  f La mulomusou 'ava molu no opo loxotolo, muvikala aloxo 'o, “Eni 'alixeni ane nini, amasaxaine misevile mo opoleli mu'osasine misevile.”

12 Xe alaxu vilesisi 'o, la Uleenu Tavuna mulutulixu sou mulailixu no xalee lia vitanisi. 13  g Mulai muxolu ane voxo mavulovexa tami'a, la Satani mutovonu. Mulai ilo'a ta mimii iouiou ane ta vova mixolu ane, ia ta angelo mine'e sou misaxila'u.

Iesu Mu'avali'a ta Molomolou

(Mat 4:12-17; Luk 4:14-15)

14  h Xe ili'i no voxo ane ane'i mitetelisou Ioanesi sou milai mi'unalailixu mo mitatuxu no taasou navunavu, la Iesu mulivu muto'o ne Xalilaia sou mua'aloxu a'alo laixe noxou Lataua, 15  i la muvikala aloxo 'o, “Voxo ane ne a muxali 'o, mo saxisaxila'u noxou Lataua a mune'e 'alai mukalu. Ngaxiu opongengi mo ngamuxamuxaxu tangengi no anu a'alo laixe noxou Lataua.”

16 No voxo vile, la Iesu mumuamua'i no pa'umolu kupa ne Xalilaia, la mumaisou itema vile ualasou lexe Saimoni ilou vimou Andeleasi ikakae, xo ane'i ilou ta mitema sou ikaene'i ta sinana. 17 Xe muavuti la muvikalane'i ilou aloxo 'o, “Ngane'e mo ngamulileli, mo sou eni alosinge lavulavu sou ngalapune'i ta mitema.” 18 Xe alaxu vilesisi 'o, la ilou mi'umesou kaexa'a mukalusi muai ne, ia ilou milutu sou mimulinu.

19 Xe mulutu sou mumuamua'i musuku mulai sevile la, la mumaisi'a Iakovo ilou vimou Ioanesi ioloonu kaexa'a ilou. 20 La uvoovoxo la uasi. Muavuti sou mu'avali'a ilou la. Xe ilou miavuti la mi'umesou mami'a Sevetaio ilo'a ta mitema sou xaixai noxou no uaxa ne, ia ane'i ilou milutu sou mimulinu Iesu.

Iesu Mukusau Uleenu Vile Masua Muxolu Noxou Itema Vile

(Luk 4:31-37)

21 Ane'i milutu sou milai no tuala ne Kapenaumu. Mixali mixolu, la anu voxo Tavuna muxalisi'a. La sou Iesu mu'unalai no taasou lalotu noxi'a ta Iutaia sou musoko mulosi'a ta mitema lavulavu. 22  j Xe ta mitema milomusou vaivaikala noxou, la mikuluke misevile. Xo Anu mulosi'a lavulavu ne loxo itema vile tatila vaikalau, ia loxo vaikala noxi'a ta mitema sou lapuloto uasi. 23 Alaxu vilesisi 'o, la itema vile no nixi no taiine'i ne, uleenu vile masua muxoo noxou, la muavuti sou mu'ava aloxo 'o, 24  k “Iesu, nini itema sie Nasaleti. Nene'e 'o sou na'oxonu ma'ia noxixe? Nene'e 'o sou lexe nakalusixe? Eni elavu lexe nini itema e Lataua musosovosine lexe nini Anu na'u 'ole ane.”

25 Xe Iesu mulomu aloxo ne, la muavuti sou mukaitolonu aloxo 'o, “Naxolu tasiau! Mo naxexesou itema ne!” 26  l Xe uleenu masua ne, muavuti la mu'umu'umunu itema ne xe muungaunga, la sou muxexesou.

27 Xe ta mitema mimalei aloxo ne, la mikuluke la mitalitali'isi'a ngatongato'o aloxo 'o, “Nenge mii ma'ia ane muxali loxo 'o? Nenge telavu lexe lavulavu noxou ne, mii alavua mo Anu xaviinu misevile. Xo Anu mupalusi'a ta uleenu masua 'o la milomuxusi.” 28  m Alaxu vilesisi 'o, la a'alo sou Iesu ne milai mia'aloxu no xalee lia tila ne Xalilaia mukalusi.

Iesu Mupamauline'i ta Mitema Tavu'alo

(Mat 8:14-17; Luk 4:38-41)

29 Xe milaa miuatu no taasou lalotu noxi'a ta Iutaia ne, la milai avilesi no tani noxou Saimoni ilou Andeleasi. Iakovo ilou Ioanesi kalumo ne mimulinu sou ilo'a milai. 30 Milai mixali, la Saimoni leuanu ne a iai no luu, xo pipiena mu'oxone la vasimele ialuxu. Alaxu vilesisi, la mivikalanu Iesu lexe ane mipipiena. 31 Xe Anu muavuti la mulai noxie sou mukasi vaxa no avole, io sou mutulusie. Xe pipiena ne muxexesie, la sou ane mitulu sou mixutuxuxa'a la'ilali.

32 Xe no 'olo'olovoxo no mine aso ulu'elai, la ta mitema mino'a ane'i ane vovolea iouiou mu'oxone'i mo ane'i ane ta uleenu masumasua mixoo noxi'a sou mine'ene'i noxou. 33 Ta mitema no tuala ane ne, mine'e mukalusi mole no ale no aitengaxu tani ne ane'isi. 34  n La sou Anu mupamauline'i ane'i tavu'alo e vovolea iouiou mu'oxone'i ne, xe mukusai'a ta uleenu masua noxi'a xalee se'i. Ia ta uleenu masua ne milavusou Iesu, la sou Iesu iou muvaxa noxi'a la muvikalane'i lexe mamu sou ivivikala lexe Anu 'ei.

Iesu Mulinga Mulai Noxou Momu

35  o Xe no kakau no mine lamana upau lailaixe uao, la Iesu mulaa sou mulai mulinga no xalee tani vile e ta mitema se'i ixolu no anu uasi. 36 La sou Saimoni ilo'a ta menexu, milutu sou milai mikamulinu. 37 Xe mixalisou la mivikalanu aloxo 'o, “Ta mitema te tavu'alo 'a ikakamulineni!”

38 Xe Anu muavuti la muvikalane'i aloxo 'o, “Ioxe, nenge'a talai no xalee tuala se'i ane uxolu se 'ala'alai. Xo eni emasaxa lexe aa'aloxu a'alo noxou Lataua noxi'a kalumo. Xo xaixai e eni ene'e sou lexe a'oxonu ane.” 39  p La sou Anu muxixaoxao no xalexalee tuatuala no nano no xalee lia tila ne Xalilaia sou mua'alo no taasou lalotu noxi'a ta Iutaia xe mukusai'a ta uleenu ta masumasua e mixolu noxi'a ta mitema.

Iesu Mupamaulinu Itema E Vulukali Mu'oxonu

(Mat 8:1-4; Luk 5:12-16)

40 Xe ili'i, la itema vile vulukali mu'oxonu ne, mune'e noxou Iesu la muxola'u tava'u vo'uxu mo mutangatulu no talaxu ka mulinga xaviinu sou lexe upamaulinu. La sou muvikalanu aloxo 'o, “Lexe nini nemasaxa, la napamaulileli mo eni axali malemalenga no iou Lataua.”

41 La sou Iesu tanuxu misevile la mukasi vaxa no vasimolu la muvikalanu aloxo 'o, “Eni emasaxa lexe nini naxali malemalenga.” 42 Xe alaxu vilesisi 'o, la vulukali ne muxexesou avile, mole anu malemalenga.

43 Xe Iesu muavuti la mupalusou mupasipaa mulai, la mulosou vaikala pekia'u aloxo 'o, 44  q  “Nalai, ia umomomo sou naa'alou evile no anu mii ane eni e'oxonu noxine 'o uasi manina. Ia nalai namaxainesi noxi'a ta aili'i mo nalosi'a mii ane ulai noxou Lataua loxo Mosesi mulemolu sou napala'alixu lexe nini nexali malemalenga no iou Lataua mukalu. Mo sou ta mitema imaisou, la ilavu lexe nini ane vasimene laixe mukalu.” 45 Ia, itema ne ulomu ua. Mulai ne la mua'aloi'axu ta mitema mii ma'ia ane muxali noxou. Mole a'alo ne, ta mitema no xalexalee tuatuala milomusou mukalu. Tava'u xo ta mitema milomusou a'alo ka mine'e noxou Iesu, la sou ane Iesu u'unalai no tuala vile mo iou upala'a noxi'a ta mitema la ua. Uxoxolu no ale no xalexalee tani ane evile uxolu no anu uasi. Ia ta mitemasi ne, ilutu no xalexalee tuatuala va'ava'axu sou inene'e noxou ukalusi.

Copyright information for `ATA