a2:16Mat 11:19
b2:24Lap 23:25
c2:251Sa 21:1-6
d2:26Liv 24:5-9
e2:27Lap 5:14

Mark 2

Iesu Mupamaulinu Itema Vile Vasimolu Musoisoli

(Mat 9:1-8; Luk 5:17-26)

Ioxe, voxo se'i mukalu, la Iesu mulivu mune'e ne Kapenaumu la, sou mulai muxolu no tani vile. Xe ta mitema milavu aloxo ne, la mixali mipita no nano no tani ne, mole tani ne mu'ana'ana mo no ale no aitenga ne, tani mutomu manina. Mine'e sou Anu mua'a'aloi'a no anu vaikala noxou Lataua. Mine'e la ta mitema tami'a noxi'a mitavulenu itema vile ne vasimolu musoisoli mukalu mo umomomo sou umuamua'i uasi. Tava'u xo ta mitema te tavu'alo e mine'e mixali ne, la tani mutomu mukalu. La ane'i imomomo sou imuamua'ilixu ulai noxou Iesu uasi. La sou mitelailixu no tani e Iesu muxolu no anu ne laxa'u ka mi'elixu taxa mumomomo noxou itema ne io, sou mitaloxolixu ilou luusou e muai no anu mulu'e noxou Iesu. Xe Iesu mumaisou mii ane ta mitema tami'a ne mi'oxo noxou menexi'a ne, la Anu mulavu lexe ane'i mimuxamuxaxu tane'i maninasou. La sou muavuti la muvikalanu itema e vasimolu musoisoli ne aloxo 'o, “Vivilo, eni exiu tumalilou 'ili'ilixo masumasua noxine ne.”

No voxo ane ne, la ta mitema sou lapuloto se'i a italupexa ne, la milomusou Iesu muvikalanu itema ne, la xavutalai'a muvikala lexe, “Loxovaa ane itema 'o mu'oxonu vaikala ane loxo 'o? Anu muvikala masua mulai noxou Lataua ne. 'Ei ane umomomo sou uxiu tumalouu 'ili'ilixo masumasua o? E, Lataua anusisi!”

Alaxu vilesisi 'o, la Iesu uleenu mulavusou xavutalai'a. La sou Anu mutali'isi'a aloxo 'o, “Loxovaa ane ngingi ngexavutala piena no anu mimii ane 'o? Vaikala anevaa ane laixe sou eni alemolu ulai noxou itema e vasimolu musoisoli, sou lexe eni amaxa'u xavi noxilo? Eni avikalanu lexe 'ili'ilixo masumasua noxou a exiu tumalilou ne, uasi? Eni avikalanu lexe utavulenu mo'esou mo ulai? 10 Mo sou ngingi ngalavu lexe Itema 'Olu ne, Anu muno'u xavi kalumo sou uxaxai no lia 'o sou uxiunu tumalouu 'ili'ilixo ane masumasua.” Xe muavuti la muvikalanu itema e muai no mo'esou ne aloxo 'o, 11 “Avikalaneni, natulu mo nano'u mo'esine mo nalai no taasine.” 12 Xe itema muavauti no lia 'o, la mutulu sou muno'u mo'esou alaxu vilesisi, la mulaa muuatu no ie'i ane'i latala ne, sou mulai. Ane'i latala ne, mimaisou la mikuluke manina la mi'itinu Lataua ualasou. Mivikala aloxo 'o, “Nexi talavusou tamaisou mii vile loxo 'o tatei uasi!”

Iesu Mu'avalou Levi

(Mat 9:9-13; Luk 5:27-32)

13 Xe ili'i, la Iesu mulivu sou mulai no kupa pa'umolu ne Xalilaia la. La ta mitema tavu'alo mine'e mixali noxou, la Anu muavuti sou mua'aloi'a no anu vaikala noxou Lataua. 14 Xe mumuamua'i musuku mulai, la mumaisou itema vile ualasou lexe Levi, e Alipaio 'olu uxoxolu no nano no tani ane ta mitema i'una xe iuatu no xalee lia tila ne Xalilaia, la ilea lamoli no anu, la mu'avalou aloxo 'o, “Nane'e mo namulileli.” La sou Levi muavuti sou mumulinu.

15 Ilou milai mixali no taasou Levi, la sou ane'i ilo'a Iesu mixolu sou mi'ani. Se'i noxi'a ne, ane'i ta mitema sou itaxusou lamoli mose'i ane'i ta mitema sou ilavusou i'oxonu 'ilixo masumasua misevile xe ta molomolou Iesu kalumo. Ane'i ta mitema ane aloxo ne, tavu'alo noxi'a ilavusou imulinu Iesu utotomu. 16  a Xe ta mitema sou lapuloto, ane'i ta Palisaio mimaisou Iesu ilo'a ta mitema ane ilavusou i'oxonu 'ilixo ane masumasua mo ta mitema sou itaxusou lamoli i'ani ipita loxo ne, la mitali'isi'a ta molomolou Iesu aloxo 'o, “Loxovaa ane Anu ilo'a ta mitema sou itaxusou lamoli mo ta mitema ane ilavusou i'oxonu 'ilixo masumasua i'ani ipita loxo ne?”

17 Xe anu Iesu mulomu aloxo ne, la muvikalane'i aloxo 'o, “Itema e pipiena u'oxonu uasi ne, umomomo sou ulai umaisou itema sou pamauli uasi. Ia itema ane pipiena u'oxonusi, anu ulai umaisou itema sou pamauli. Anu aloxo ne, la sou eni ene'e 'o sou a'avali'a ta mitema mulapu uasi, eni ene'e 'o sou a'avali'a ta mitema ane ilavusou i'oxonu 'ilixo masumasua.”

Talitali'isou Pelemu

(Mat 9:14-17; Luk 5:33-39)

18 Alaxu vile, la ta molomolou Ioanesi xe noxi'a ta Palisaio ipepelemu. La sou ta mitema se'i mine'e noxou Iesu, la mitali'isou aloxo 'o, “Loxovaa la ta molomolou Ioanesi mo noxi'a ta Palisaio a ipepelemu, ia ta noxine uasi 'o?”

19 Xe Anu muavuti la mukolinu tali'ii'a aloxo 'o, “Ia xo lexe, itema vile utaula'i alavua loxo vaimomo 'o, la ta minuminu e mine'e sou mimaisouxu taula'ixu ne, umomomo sou ipelemu? Uasi, ane'i i'ani. Voxo ane anu itema e utaula'i a ilo'a ixoxolu ne 'o, la ane'i umomomo sou ipelemu sou la'ilali uasi. 20 Ia lexe no voxo ane ane'i ino'u itema e mutaula'i alavua ulai, ia ilo'a ixolu la uasi, la sou no voxo ane ne, ane'i ipelemu sou i'ou la'ilali ua.

21 Itema vile umomomo sou uno'u lavalava xasixu sevile alavua, ka ulai usimenu vaxa no anu ane mamuxanu mukakaa ne uasi. Xo lexe anu u'oxo aloxo ne, xe lavalava xasixu alavua ne utaxulapu la ukakaa lavalava ane mamuxanu ne u'okinu la. 22 Mo itema vile umomomo sou utau uaini alavua u'una no anu uaini vexasou ane mamuxanu uasi. Xo lexe anu u'oxo aloxo ne, la uaini ne upaunoxu vexasou mamuxanu, la uaini ilou vexasou ne masua avile. Uasi, anu utau uaini alavua ne, u'una no anu vexasou alavuasi.”

Mi'elexu Ame Temanu no Voxo Tavuna

(Mat 12:1-8; Luk 6:1-5)

23 No voxo Tavuna vile, la Iesu ilo'a ta molomolou milai mimuamua'i no nano no xai sou ame. Ilo'a mimuamua'i milalai, la ta molomolou misoko sou mi'elexu ame temanu se'i. 24  b Xe ta Palisaio mimaisi'a la mitali'isou Iesu aloxo 'o, “Ae, loxovaa ane ta molomolomeni 'o mi'oxonu 'ilixo ane umomomo sou ta'oxonu uasi no voxo Tavuna loxo 'o?”

25  c Xe Anu muavuti la mukolinu tali'ii'a aloxo 'o, “Xo loxovaa, ngaitisou a'alo sou Deviti ilo'a ta mitema noxou uasi? Ane'i xa'a la'ilali sou ino'u uasi xe misolixa'a, la mi'oxo ma'i? 26  d No tauu ie ane itema vile ualasou lexe Aviata muxolu loxo kisi'a ta aili'i, la anu Deviti ne mulai mu'unalai no taasou Lataua ne, sou muno'u la'ilali noxou Lataua sou ilo'a ta mitemau mino'u. La'ilali ane ne, umomomo sou ta mitema vitanisi i'ou uasi. Ta aili'i aloxo Aviata ne, imomomo sou i'ou.”

27  e Xe muavuti la muvikalane'i la aloxo 'o, “Voxo Tavuna ne, Lataua musosovosou sou usu'uline'i ta mitema, ia sou ta mitema isu'ulinu voxo Tavuna uasi. 28 La sou Itema 'Olusi ne, Anu mutila manina misevile no anu voxo Tavuna ne.”

Copyright information for `ATA