a7:2Luk 11:38
b7:4Mat 23:25
c7:6-7Ais 29:13
d7:10Mul 20:12, 21:17; Lap 5:16
e7:15-16Apo 10:14-15
f7:36Mak 1:43-45
g7:37Ais 35:5

Mark 7

Lapuloto Noxou Lataua Muuli no Anu Lapuloto Noxi'a ta Mitema

(Mat 15:1-9)

Alaxu vile, la ta Palisaio ilo'a ta mitema sou lapuloto se'i me'a loxo ne Ielusalemu mine'e mita'olu mixaliliiou Iesu. a La mimaisi'a ta molomolo noxou se'i i'ani'ani, ia imulinu lapuloto noxi'a ta Iutaia sou i'uinu avo'a tei o ka i'ani'ani uasi. Xo ta Palisaio ilo'a ta Iutaia ne, ilavusou i'ani vitanisi uasi, i'uinu avo'a tei o ka sou i'ani. Ane'i imulinu lapuloto noxi'a ta xaixasi'a tatei. Ia lexe i'uinu avo'a uasi, la umomomo sou i'ani uasi. b Mo ilai no tani sou ilotoloto la'ilali no anu ne, xe ilivu ixali ia i'ulo uasi, la umomomo sou i'ani uasi. 'Ili'ilixo se'i piena kalumo a imumulinu loxo, i'uinu pakuxa'a ilou lexa vexasou mo latotope.

La sou ta Palisaio ilo'a ta mitema sou lapuloto ne, miavuti la mitali'isou Iesu aloxo 'o, “Tava'u loxovaa, la ta molomolo noxine imulinu lapuloto noxi'a ta xaixasinge mo i'uinu avo'a o ka i'ani ua, io i'ani no anu avo'a nuni'u loxo 'o?”

c Xe Anu muavuti la mukoline'i aloxo 'o, “Itema sou palomatana, Aisaia muvikalangengi ngingi ta mitema sou kalavoi, la vaikala noxou ne manina. Anu mukaukavunu aloxo 'o,

‘Ta mitema ano 'o ne, i'itinu ualasilo no anaxa'a vitanisi,
ia tane'i ne muxoo no paxa noxilo manina.
Ilotu noxilo ne, ia lalotui'a ne maninasou uasi, kalavoisi.
Xo ilosieixu ta mitema lapuloto, ia lapuloto ane ne
molu noxou Lataua uasi, molu noxi'a ta mitemasi.’
Mo ngexovulaunu lapuloto noxou Lataua ne, ia lapuloto noxi'a ta mitemasi ane ngetetelisou pekia'u ne.”

Xe muavuti la muvikalane'i la aloxo 'o, “Ngingi ngexiu tumalingeu lapuloto noxou Lataua, ia ngemulinu lapuloto noxi'a ta xaixasinge. 10  d Mosesi muvikala tatei aloxo 'o, ‘Natoxone'i mamine ilee nenine.’ Mo ‘Anu ane uleanu vaikala se'i masua ulai noxi'a momu ilee nenu, la anu uulua.’ 11 Ia ngingi ngevikala lexe, itema vile uvikalane'i momu ilee nenu lexe, ‘Su'uli ma'i ane lexe ngingi ngongou ngano'u noxilo ne anu ulai noxou Lataua.’ 12 io ngingi iengi uvaxausi mo anu u'oxonu mii vile loxo 'o xa'a momu ilee nenu ua, 13 ngingi ngepolovilenu vaivaikala noxou Lataua laaxu sou ngelai nge'unanu no anu lapuloto noxi'a ta xaixasinge ilou lavulavui'a ane ngeno'u muxolu noxinge mo ngemulinu mutalo vaimomo 'o. Mo mimii piena ne nge'oxo aloxo ne mukalusi.”

14 Xe muavuti la, la mu'avali'a ta mitema tavu'alo ne mine'e noxou mukalusi, sou muvikalane'i aloxo 'o, “Ngingi latala ne, ngalomu laixe une'e noxilo, mo sou ngalavu laixe no anu mii ano 'o. 15  e Mii ane molu va'axu, ia u'unalai noxou itema vile, la mii ane ne umomomo sou u'oxonu itema ne masua uasi manina. Ia lexe mii ulaa noxou itema tanu ulai no ale, la sou anu mii ane ne, anu u'oxo masuanu itema ne.”

17 Iesu mulosi'a ta mitema latala ne lavulavu ane ne xe mukalu, la sou mu'umesi'a sou mu'unalai no tani. Xe ta molomolo noxou miavuti la mitali'isouxu laaxu vaikala latilovo ane ne. 18 Xe Anu muavuti la mutali'isi'a aloxo 'o, “Loxovaa, kisinge mutomu? Ngalavu lexe mii molu va'axu ia u'unalai noxou itema vile, la anu umomomo sou u'oxonu itema ne masua uasi? 19 Xo mii ane ne, u'unalai noxou itema tanu uasi, u'unalai no opoonu mole ulai la ulaa uuatu no ale la.” Vaikala ane Iesu mulemolu 'o, anu laaxu lexe la'ilali tavu'alo ne lailaixe mukalusi.

20 Xe Iesu muavuti la musolo vaikala aloxo 'o la, “Mii ane molu noxou itema tanu, ia ulaa uuatu, ane u'oxo masuanu itema ane ne. 21 Xo no nano no tanu itema ne, 'ili'ilixo loxo, xavutala masumasua, mo 'ilixo sou vote'i mo pakali mo uvau itema usoli mo 'ilixo ane loxo mulu ulai noxie sema mitaula'i xe sema ilai noxou mulu mutaula'i 22 mo umasaxau mimii tavu'alo mo opoo masua mo kalavoi mo uisuxu mimii iouiou mo usa'isa'isou itema mo u'iti ualasou mo uxovulaulau. 23 'Ili'ilixo masumasua ane ne, uxolu no nano noxou itema, ia ulaa uuatu la u'oxonu anu itema ne uxali masua.”

Sema sie Ponisia Mimulaxu Tane Noxou Iesu

(Mat 15:21-28)

24 Xe Iesu muavuti, la musukusou tuala e mune'e muxolu no anu ne, sou mulai loxo 'alai no tuala ne Taia. Mulai xe muxali, la mu'unalai no tani vile. Ia Anu umasaxa lexe evile ulavusou lexe Anu a uxolu no nano no tani uasi. Ia, umomomo sou Anu uxolu utalume uasi. 25 Ioxe, sema vile lai ne, milomu lexe Iesu a mune'e muxolu no tani ne, la alaxu vilesisi, milai noxou ka mitangatulu mulu'elai no talaxu, xo 'ilie sema vile kitu'a ne uleenu vile masua muxolu noxie. 26 La milingau pekia'u sou lexe Anu ukusau uleenu masua e uxoxolu noxie 'ilie ne. Ane sema ne, sema Xiliki. Mivo'one no xalee lia tila ne Ponisia no tuala tila ne Silia.

27 Xe anu Iesu muavuti la muvikalane sema ne aloxo 'o, “Ieni uvaxai'a ta molomolo mo i'ou la'ilali e mimasaxa lexe i'ou ne ukalusi. Xo anu umomomo sou tano'u la'ilalixa'a ta molomolo ne ka taleanu ulu'elai noxi'a ta a'aa uasi.”

28 Xe ane sema miavuti la mikolinu vaikala noxou aloxo 'o, “Ani, Tila, ia ta a'aa ane ixolu no laaxu luu sou la'ilali ne, i'o'ou ta molomolo la'ilalixa'a utuutuxu.”

29 Xe Iesu muavuti la muvikalane aloxo 'o la, “Tava'u xo nini nevikala aloxo ne sou nekolinu vaikala noxilo, la anu laixe nini nalai, uleenu masua e muxolu noxie 'iline ne, muxexe noxie.”

30 Ane milutu la milai no taasie xe mi'unalai, la 'ilie ne, 'a iai no luusie, ia uleenu masua ne muxexesie.

Iesu Mupamaulinu Itema Vile Sangalou Ilou Anaxu Mutomu

31 Xe ili'i, la sou anu Iesu musuku sou muto'o loxo ne Saidoni ka mulivu mununalai loxo no kupa ne Xalilaia, la sou mulai loxo no xalee lia tila ne Dekapolisi. 32 Mulai xe muxali, la ta mitema se'i mino'u itema vile, sangalou ilou anaxu mutomu sou mine'enu noxou. Mine'enu la milingau sou lexe umuxaxu avolu uvaxa no vasimolu.

33 Iesu muavuti la muno'u itema ne mulailixu va'axu noxi'a ta mitema ane mine'e mipita ne. Xe muavuti la mutaloxu avolu simisou vaxa no sangalou taxataxanu. Xe mu'oxonu aloxo ne mukalu, la sou mutuve vaxa no avolu simisou ka mumuxaxu avolu simisou ne vaxa no levexu. 34 Ka sou Anu iou mulai teitexi no opo loxotolo xe muee muaxu tila, la sou muvikalanu lexe, “Epata!” Vaikala ne, laaxu lexe, “Nakisi!” 35 Xe alaxu vilesisi 'o, la itema ne, sangalou mukisi sou mulomu, xe levexu ne papaxe sou muvikala laixe.

36  f Iesu muavuti la muvikalane'i pekia'u lexe mamu sou ivikalanu itema vile no anu mii ane ane'i mimaisou. Ia ilomuxu uasi. Iesu muvikalane'i aloxo ne alaxu tavu'alo, ia ane'i ia'aloi'a mo ia'aloi'a ta mitema alaxu tavu'alo. 37  g Ta mitema milomusou a'alo sou xaixai noxou Iesu ne, la mikuluke no anu, la mivikala lexe, “Mimii tavu'alo e mu'oxonu ne, mu'oxonu la muxali laixesi. Ane'i ane ilolomu mo ivivikala uasi ne, mupamauline'i mukalusi.”

Copyright information for `ATA