a9:1Mak 13:30
b9:2-7Apo 3:22; 2Pi 1:17-18
d9:11Mal 3:1
e9:12Lex 22:1-18; Ais 53:3; Mal 4:5-6
f9:13Mat 11:14
g9:23Mat 21:21; Mak 11:23
h9:26Mak 1:26
i9:30Ioa 7:1
j9:31Mak 8:31, 10:32-34
k9:32Luk 9:45
l9:35Mat 20:25-27; Mak 10:43-44; Luk 22:24-26
m9:37Mat 10:40
n9:40Mat 12:30; Luk 11:23
o9:41Mat 10:42
p9:43-44Mat 5:30
q9:47Mat 5:29
r9:48Ais 66:24
s9:50Mat 5:13; Luk 14:34

Mark 9

a Xe muavuti la muvikalane'i aloxo 'o la, “Eni avikalangengi manina aloxo 'o, ta mitema se'i ane itutulu 'o, ulai ili'i la umomomo sou isoli uao, ixoxolu sio mo imaisou saxisaxila'u noxou Lataua uxali ilou xaviinu.”

Iesu Vasimolu Muxali Iou Vilemo

(Mat 17:1-13; Luk 9:28-36)

b Ioxe ilo'a mixolu xe voxo muxatele vile mukalu, la sou anu Iesu muno'a Pita ilou Iakovo mo Ioanesi sou muulaxune'i sou ilo'a milai no laxa'ilu vile teitexi manina mole ane'isisi milai mixolu ane. Ilo'a mixoxolusi xe mimalei loxo 'o, la Iesu vasivasimolu ne muxiu mo muxali iou vilemo manina. Tokolomoxu ne, muxali iou vilemo mo muxali lamanaxu. Evile sou tuala no lia 'o umomomo sou u'uinu tokolomo ane ne, la uxali maenaxu laixe manina aloxo ne uasi. Xe mimalei loxo 'o, la mimaisi'a Eliasi ilou Mosesi mipaa mixali mitulu no pa'umolu Iesu sou ilo'a mivivikala.

Pita muavuti la muvikala vaxa noxou Iesu aloxo 'o, “Rabi,
9:5Rabi: Vaikala ane ne, anu vaikala noxi'a ta Iutaia ilemolu lexe Evalaio. Ia laaxu ane ne, lexe itema sou ulosi'a ta mitema lavulavu.
anu laixe noxixe lexe nexi taxolu ano 'o mo ta'alaxu tani alelexu tatalu. Nini sine vile, Mosesi sou vile xe Eliasi sou vile.”
Pita muvikala aloxo ne, xo anu ilo'a tamei ne mimama'u misevile.

Xe tamuxala vile mune'e la mukupone'i mukalusi, la ane'i milomusou vaikala mupaa no nano no anu tamuxala tanu la muvikala aloxo 'o, “Eni 'alixeni ano, amasaxau misevile. Ngalomuxu vaikalau.”

Alaxu vilesisi 'o, la ane'i mimamalei ia imaisou evile la uasi, Iesusi 'a ututulu.

Ioxe, ilo'a miavuti, la sou ilo'a misuku sou laxa'ilu ne sou milu'e. Xe no mine ilo'a milulu'e, la Anu mupela'a lexe mamu sou ia'alou evile no anu mii ane ane'i mimaisou ne, mole ulai utalo no voxo ane Itema 'Olu utulu molu no anu lousou. 10 Ane'i milomu noxou aloxo ne, la ivikalanu vile uasi, mii sou tane'i vilevilesi. Ia ane'i mivivikalasou vaikala mautunu e lexe, “Utulu molu no anu lousou.” lexe laaxu a loxovaa.

11  d Xe miavuti la mitali'isou aloxo 'o, “Tava'u loxovaa, la ta mitema sou lapuloto ivikala lexe Eliasi anu uxali tei?”

12  e Xe Iesu muavuti la mukoli tali'i noxi'a aloxo 'o, “Vaikala ane ne manina. Eliasi ne, uxali tei sou umomosou mimii latala ne ukalusi. Ia tava'u loxovaa la mikaukavunu no anu Lavuku Tavuna teinu lexe, Itema 'Olu ne utavulenu navunavu tatila mo ta mitema ixiu tumali'au? 13  f Ia avikalangengi aloxo 'o. Eliasi ne, mune'e muxali mo ta mitema mikalusou masaxa noxi'a sou mi'oxonu 'ili'ilixo se'i mulai noxou aloxo Lavuku Tavuna teinu mua'aloxusou.”

Molomolo Vile Uleenu Masua Muxolu Noxou, Ia Iesu Mupamaulinu

(Mat 17:14-20; Luk 9:37-43a)

14 Ilo'a milu'e xe mixali noxi'a ta molomolou ane pa'usi'a, la mimaisi'a ta mitema tapiena misevile mine'e mitulu mixaliliie'i, ia mitomu loxo. Xe milomusi'a ane'i ta molomolo noxou ne ilo'a ta mitema sou lapuloto ne i'oto'otosou anaxa'a. 15 Xe ta mitema mimalei loxo 'o, la mimaisou Iesu la mikuluke, la alaxu vilesisi miiave milai noxou sou misexelaxu.

16 Xe Anu muavuti la mutali'isi'a ta mitema ne aloxo 'o, “Ma'ia ane ngingi ngongi'a nga'oto'otosou anangenge sou loxo ne?”

17 Itema vile no nano no taiine'i ne, muavuti la mukolinu Iesu tali'iu aloxo 'o, “Itema sou ulosixe lavulavu, eni ene'enu 'alixeni mulu 'o, xo uleenu vile masua uxoxolu noxou la u'oxo uvivikala uasi. 18 Voxovoxo piena musuku ne, utelosou la xavi misevile, la uleanu ulu'e no lia mole livilivixu upaipasinga mo anaxu ukalakikiki mole utoto'eke loxo 'o. Elingai'a ta molomolo noxine lexe ikusau uleenu ane muxolu noxou 'alixeni 'o, ia imomomo uasi.”

19 Xe Iesu muavuti la muvikalane'i aloxo 'o, “Ngingi ta mitema sou ngamuxaxu tangengi noxou Lataua uasi! Tauu ie ta 'ei ane sou eni axolu noxinge? Mo alaxu ta 'ei ane sou eni atavulenu tu'utu'umaxu noxinge? Ngano'u molomolo ne une'e noxilo.”

20 La sou ane'i mino'u mulai noxou. Xe uleenu masua ne mumaisou Iesu, la alaxu vilesisi 'o, la mu'oxonu molomolo ne mu'olo'olo mole muleanu mulu'elai no lia. La mupipaopao la livilivixu muxalixali no anaxu.

21 Xe Iesu muavuti la mutali'isou momu aloxo 'o, “Mii e uxolu noxou 'o musoko a talu?”

La momu mukolinu lexe, “No molomoloxu mo.
22 U'oxonu no voxo tavu'alo, la uleanu ulai no navu xe no lexa sou lexe uvau usoli. Ia lexe nini namomomo sou na'oxonu mii vile noxou, la taneninexe mo nasu'ulinexi.”

23  g Xe Iesu muavuti la muvikala aloxo 'o, “Tava'u loxovaa la nini nevikalaleli, lexe eni amomomo sou a'oxonu? Lexe nini namuxaxu taneni, la nini namomomo sou na'oxonu mimii latala ne ukalusi.”

24 Xe muavuti la alaxu vilesisi, mu'ava aloxo 'o, “Eni emuxaxu taleli noxine manina, ia nasu'ulileli xo muxaxu taleli noxilo ulai noxine ne, kitu'asi.”

25 Xe Iesu mumalei loxo 'o, la ta mitema tavu'alo a iiaveiave inene'e loxo noxou, la sou Anu mukaitolonu uleenu masua la muvikalanu aloxo 'o, “Nini uleenu ane saxavou mo ane uvivikala uasi e naxoxolu noxou molomolo 'o ne, eni avikalaneni pekia'u lexe naxexesou, ia nalivu nane'e natelo noxou la uasi.”

26  h La sou uleenu ne, muungaunga xe muvaxa muxaluxalu molomolo la mu'oki'oki tani manina, sila muxexesou. Uleenu ne muxexesou io, ane'i ie'i muvaxa la loxo musoli, sila ane'i tavu'alo mivikala lexe, “Anu musoli.” 27 Sixe Iesu mukasi vaxa no avolu xe mutulusou, sila anu mutulu.

28 Iesu mupamaulinu mukalu, io sou Anu mulai no tani. Xe no tani, la ane'i ta molomolo noxou ne milutu vaxa la mitali'isou se'isisi aloxo 'o, “Tava'u loxovaa, la nexi tamomomo sou takusau uleenu masua ne uasi o?”

29 Iesu mukoline'i aloxo 'o, “Linga anusisi ane umomomo sou ukusau uleenu ane loxo 'o.”

30  i Xe ilo'a miavuti la misukusou tuala ane ilo'a mixolu no anu ne, sou minuna mimuamua'i no nano no xalee lia tila ne Xalilaia. Iesu umasaxa lexe evile ulavu no anu xalee ane ane'i ixolu no anu uasi, 31  j xo Anu ulosi'a ta molomolou lavulavu. Muvikalane'i aloxo 'o, “Ulai ili'i, la ta mitema i'italonu Itema 'Olu no avo'a ta mitema sou ivau usoli. Uai no nano no lulu voxo vile mo tamei, xe no voxo tatalusou, la sou Anu utulu.” 32  k Ia ane'i ilamana no anu vaikala laaxu ane anu mulemolu noxi'a uasi. Mimama'u la itali'isouxu uasi.

'Ei Ane Tila Noxi'a

(Mat 18:1-5; Luk 9:46-48)

33 Ilo'a mimuamua'i xe milai mixali ne Kapenaumu, la mi'unalai no tani. Xe Iesu muavuti la mutali'isi'a aloxo 'o, “Mii ma'ia ane ngingi nge'oto'otosou anangenge no vote'i 'o?” 34 Anu mutali'isi'a aloxo ne, la ane'i mita'olu tasia'usi xo ane'i milavu lexe no vote'i, la ane'i mi'oto'otosou anaxa'a lexe 'ei ane tila noxi'a.

35  l Xe Anu muavuti la muxolu no lia, io sou Anu mu'avali'a ta molomolo noxou ane'i mulelia tamei ne, mine'e noxou la sou muvikalane'i aloxo 'o, “Lexe itema vile umasaxa lexe uuli, la laixe lexe anu uili'i mo uxali loxo itema vile vitanisi sou ipalupalusou.”

36 Mutila'u molomolo vile kitu'a ka mulai mutulusou no taiine'i, xe muavuti la muvo'onu io sou muvikalane'i aloxo 'o, 37  m “'Ei ane lexe uxavutalaleli mo u'osa sou uno'u molomolo vile kitu'a loxo 'o, la anu ane u'osa sou uno'ilo. Xe 'ei ane lexe u'osasilo sou uno'ilo, la anu ane u'osasou uno'u ane mupalusilo ene'e 'o.”

Anu Ane U'apinenge Uasi ne, Anu Noxinge Ane

(Luk 9:49-50)

38 Xe Ioanesi muavuti la muvikalanu Iesu aloxo 'o, “Itema sou ulosixe lavulavu, nexi temaisou itema vile ukukusai'a ta uleenu masua no anu xavi noxine, la nexi te'apixu, xo anu vile noxinge nenge'a uasi.”

39 Xe Iesu muavuti la muvikalane'i aloxo 'o, “Nga'apixu mamu, xo lexe itema vile u'oxonu mii vile xaviinu no anu xavi noxilo, la umomomo sou upasipaa uleanu vaikala vile masua une'e noxilo uasi, 40  n xo anu ane u'apinenge uasi ne, anu noxinge ane. 41  o Eni avikalangengi manina aloxo 'o, ‘Anu ane uiengengi no anu lexa xo ngingi noxou Kalisito, la anu uno'u lakolisou manina.’”

Mii sou Uolexa'a ta Mitema sou Isusu

(Mat 18:6-9; Luk 17:1-2)

42 Xe muavuti la muvikalane'i aloxo 'o la, “Lexe itema vile uolexu vile noxi'a ane'i ta mitema vitanisi ane imuxamuxaxu tane'i noxilo, sou ususu no anu 'ilixo masua, la anu laixe lexe isakii lavo'o kulu vile no xolanu ka ilea ulu'elai no luaki, ia laixe uasi lexe Lataua ulosou navunavu. 43  p Mo lexe avone vile ususulixene, la nalixinu mo uxexee. Laixe lexe nini na'unalai no tuala sou mauli no anu avone vilesisi, ia laixe uasi lexe nini avone tamei ne uxolusi, la nini na'unalai no tuala sou navunavu e navu u'ani'ani ia usisita uasi. 45 Mo lexe tava'ine vile ususulixene, la nalixinu mo uxexee. Laixe lexe na'unalai no tuala sou mauli no anu tava'ine vilesisi, ia laixe uasi lexe nini tava'ine tamei ne uxolusi, la nini na'unalai no tuala sou navunavu. 47  q Mo lexe ieni vile ususulixene, la naluvu uxexee. Laixe lexe nini na'unalai no tuala noxou Lataua no anu ieni vilesisi, ia laixe uasi lexe nini ieni tamei ne uxolusi, la nini na'unalai no tuala sou navunavu e, 48  r  ‘ta polikokasi'a imomomo sou isoisoli uasi mo navu umomomo sou usisita uasi.’

49 Laixe lexe anu Lataua u'uisi'a ta mitema vilevilesi no anu navu, loxo ta mitema i'uisou la'ilali no anu au.

50  s Au ne laixe, ia lexe tu'axu ne tasiau la ngingi ngalivulixu tu'axu ne loxovaa la? Laixe lexe ngingi latala ne, ngatetelisou au tu'axu lailaixe no anu maulingenge mo xoluxolu noxinge ngongi'a ane'i ane va'ava'axu ne laixesi.”

Copyright information for `ATA