a15:4Mul 20:12, 21:17; Lap 5:16
b15:8-9Ais 29:13
c15:11Mat 12:34
d15:14Luk 6:39; Rom 2:19
e15:24Mat 10:6
f15:31Mak 7:37
g15:32Mat 14:14

Matthew 15

Lapuloto Noxou Lataua Muuli no Anu Lapuloto Noxi'a ta Mitema

(Mak 7:1-13)

Alaxu vile la ta Palisaio ilo'a ta tisa sou lapuloto me'a ne Ielusalemu mine'e noxou Iesu, la mitali'isou aloxo 'o. “Tava'u loxovaa, la sou ta molomolo noxine imulinu lapuloto noxi'a ta xaixaisinge ua, mo i'uinu avo'a ka sou i'ani ua?” Iesu muavuti la muvikalane'i aloxo 'o, “Tava'u loxovaa la sou ngingi ngamulinu lapuloto noxou Lataua ua, ia ngemulinu noxinge 'o? a Xo Lataua muvikala lexe, ‘Ngatoxone'i mamine ilee nenine.’ Mo ‘Anu ane uleanu vaikala se'i masumasua ulai noxi'a momu ilee nenu, la itema ne ivau usoli.’ Ia ngingi ngavikala lexe, itema vile uvikalane'i momu ilee nenu lexe, ‘Su'uli ma'ia ane lexe ngingi ngongou ngano'u noxilo ne anu ulai noxou Lataua.’ Anu u'oxonu aloxo ne la utoxone'i momu ilee nenu uasi. Ngingi ngepolovilenu vaivaikala noxou Lataua laaxu la ngelai nge'unanu no anu lapuloto noxi'a ta xaixasinge. La sou Aisaia itema sou palomatana muvikalasinge ne manina. Iesu muvikala lexe, ‘Ngingi ta mitema sou kalakalavoi!’ Anu mukaukavunu singe aloxo 'o,

b  ‘Ta mitema ano 'o ne i'itinu ualasilo no anaxa'asi,
ia opone'i ne muxolu va'axu noxilo manina.
Mo ilotu noxilo ne, ia lalotui'a ne maninasou uasi.
Xo ilosie'ixu ta mitema no anu lapuloto molu noxou Lataua uasi,
lapuloto ane molu noxi'asi.’”

Mimii Ane Molu no Nano no Opoo Itema La U'oxo Masua

(Mak 7:14-23)

10 Xe Iesu muavuti la mu'avali'a ta mitema tavu'alo ne mine'e noxou mukalusi la muvikalane'i aloxo 'o, “Ngingi latala ne ngalomu laixe noxilo mo ngalavusou laixe no anu mii ano 'o. 11  c Mii ma'ia ane u'una noxou itema anaxu ne ulavusou u'oxo masuanu uasi, ia mii ma'ia ane ulaa uatu no anaxusi ane u'oxoo masuanu.” 12 La sou ta molomolo noxou mine'e mitali'isou lexe, “Nini nelavusou lexe ta Palisaio milomusou vaikala noxine la opone'i tu'umaxu uasi?” 13 Anu mukoline'i aloxo 'o, “Lexe ovuovu ane Mamilo teitexi no opo loxotolo utounu uasi, la anu uluvusou ilou uliuli'u. 14  d Ngaxavutala noxi'a ta mitema aloxo ne uasi, ane'i loxo ta mitema ie'i seleveenu iulaxune'i ta menexi'a. Ia lexe itema e iou seleveenu ulaxunu itema iou seleveenu kalumo, la ane'i ilou ilapau ulu'elai no taxa ukei.” 15 Xe Pita muavuti la muvikala lexe, “Nalulusou vaikala latilovo ne noxixe.” 16 Xe Iesu muavuti la mutali'isi'a lexe, “Loxovaa ngingi kalumo ngalamana uasi? 17 Ngingi ngelavusou lexe mii ma'ia e u'una noxou itema anaxu ne ulai uai no nano no opoonusi ka ulaa uatu la ulai no ale. 18 Ia mii ma'ia muxolu no nano noxou itema tanu, ia ulaa uatusi ane u'oxoo masuanu itema ne. 19 Xo no nano no tanu itema ne 'ili'ilixo loxo xavutala masumasua, mo 'ilixo sou vote'i, mo pakali, mo uvau itema usoli, mo 'ilixo ane mulu ulai noxie sema mitaula'i, xe sema ilai noxou mulu mutaula'i, xe 'ilixo sou ikalavoisi'a ta mitema la itulusi'a no anu vaivaikala, mo uvikalasi'a ta mitema masumasua. 20 La sou mimii e u'oxo masuanu itema ane. Ia ane itema u'uinu avolu uasi ia u'ani ne u'oxonu masuanu itema ne uasi.”

Sema sie Kenani Mimuxaxu Tane Noxou Iesu

(Mak 7:24-30)

21 Xe Iesu muavuti la musuku no tuala e mune'e muxolu no anu ne, sou mulai no xalee lia tila ne Taia xe Saidoni. 22 La sema Kenani vile e mixoxolu no xalenu lia ne mine'e la mi'ava noxou lexe, “Tila Deviti 'Olu, tanenixo! Xo 'alixeni sema ne uleenu masua vile muxolu noxie la mu'oxoo masuane manina.” 23 La Iesu ukolinu vaikalaie vile uasi. La sou ta molomolo noxou mine'e la mivikalanu lexe, “Sema 'o ane a i'ava'ava xe imulimulinengesi 'o, la sou nakusaie mo ilai.” 24  e La sou Anu mukoline'i lexe, “Lataua mupalusilo ene'e sou akamuline'i ta Isilaeli e loxo ta sipsip ane milai mixolu mixovulaulau. Ia eni ene'e sou akamuline'i ane'i ane ta Isilaeli uasi. Uasi.” 25 Ia sema ne mine'e la mixola'u tava'e vo'uxu mulu'elai no talaxu Iesu la mivikalanu lexe, “Tila, nasu'ulileli.” 26 Anu muavuti la muvikalane aloxo 'o, “Anu laixe sou talosi'a ta a'aa ta molomolo la'ilalixa'a uasi.” 27 Xe ane miavuti la mikolinu vaikalau lexe, “Tila, vaikala noxine ne manina, ia ta a'aa ne la'ilali utu'utuxu ulapalapau noxou tatanane'i no luu la ane'i ino'u sou i'ou.” 28 La sou Iesu muvikalane lexe, “Nini sema 'o ne muxamuxaxu taneni mutila musuku. La sou mii ma'ia nini nemasaxau ne anu uxali aloxo nini nemasaxau ne.” La sou no anu aso iou anesi la 'ilie mimauli.

Iesu Mupamauline'i ta Mitema Tavu'alo

29 Ioxe Iesu muvula la mulutu mulai no luaki ne Xalilaia pa'umolu la mutelai muxolu no laxa'ilu vile. 30 Ia ta mitema tavu'alo mine'e noxou. Ane'i mine'e la mitavulene'i ta mitema tava'a ilou avo'a musoisoli, mo ane'i ane ie'i seleveenu, mo tava'a mukilikalu, mo ane'i ane ivivikala uasi xe ane'i ane vovolea iouiou mu'oxone'i la mine'e misu'a la'oluxa'a no tava'u la Anu mupamauline'i. 31  f Xe ta mitema mimaisou la mikuluke manina. Xo mimaisi'a ane'i ane ivivikala uasi mivikala mo ane'i ane imuamua'i uasi, mimuamua'i xe ane'i ane ie'i seleveenu mimalei, la mi'itinu Lataua noxi'a ta Isilaeli.

Iesu Mulosi'a ta Mitema 4,000 'Ani

(Mak 8:1-10)

32  g Xe Iesu mu'avali'a ta molomolo noxou mine'e noxou la muvikalane'i aloxo 'o, “Eni talelixa'a ta mitema 'o misevile xo mine'e mixolu noxilo 'o voxo tatalu mukalu, ia xa'a mii loxo 'o sou i'ou uasi. La eni amasaxa lexe apalusi'a ilivu ilai no tuatualasi'a uasi xo loxo 'o io ilai la ilapalapau no vote'i.” 33 Ta molomolo noxou miavuti la mikolinu aloxo 'o, “La sou nenge taxalisou veleti ne'ei sou umomomosi'a ta mitema latala 'o? Nenge texolu 'o ne no xalee tani vitanisi ano 'o.” 34 Xe Anu muavuti la mutali'isi'a lexe, “Xo ngingi veleti ta'ei e ngenono'u ne?” Ane'i mikolinu lexe, “Muxatele tameisi xe ta sinana ta kitukitu'a tavu'alo uasi.” 35 Anu muavuti la muvikalane'i ta mitema tavu'alo sou mixolu no lia. 36 Ane'i mixolu no lia mukalu la Anu muno'u veleti muxatele tamei xe ta sinana moso ne, sou muvikala laixe noxou Momu. Xe mukalu la muse'ise'inu la mulosi'a ta molomolo noxou sou mimila'anu noxi'a ta mitema. 37 Ta mitema mi'ani'ani xo mole mi'ana'ana manina. Xe ili'i, la sou ta molomolo noxou mino'u lakela muxatele tamei la mitaataa la'ilali pa'upa'usou no anu. 38 Ta mitema e mi'ani ne itiitisi'a muxali loxo 4,000. Ane ne itiitisi'a ta mulusi ia ta sema ilo'a ta molomolo uasi. 39 Xe ili'i no mine Iesu mupalusi'a ta mitema milailai mukalu la sou Anu mutelo no anu uaxa sou mulai no xalee lia ne Maxatani.

Copyright information for `ATA