a16:1Mat 12:38; Luk 11:16
b16:4Mat 12:39; Luk 11:29
c16:6Luk 12:1
d16:9Mat 14:17-21
e16:10Mat 15:34-38
f16:14Mat 14:1-2; Mak 6:14-15; Luk 9:7-8
g16:16Ioa 6:69
h16:17Xal 1:15-16
i16:18Ioa 1:42; Ep 2:20
j16:19Mat 18:18; Ioa 20:23
k16:24Mat 10:38; Luk 14:27
l16:25Mat 10:39; Luk 17:33; Ioa 12:25
m16:26Mat 4:8-9
n16:27Lex 62:12; Xav 24:12; Mat 25:31; Rom 2:6; Pal 22:12

Matthew 16

Ta Palisaio Mivikalanu Iesu sou Lexe U'oxonu Sosovo Vile

(Mak 8:11-13; Luk 12:54-56)

a Xe ta Palisaio ilo'a ta Sadokaio mine'e noxou Iesu la i'oxo lexe itovo lexe itali'isou, la mivikalanu lexe u'oxonu sosovo vile mo ane'i imaisou lexe Anu molu noxou Lataua. Anu muavuti la mukoline'i aloxo 'o, “‘No mine aso u'una xe ngingi ngamaisou loxotolo lauolaouinu,’ la ngingi nga'oxo lexe, ‘Ne'iela la voxo vile laixe la.’ Xe no kakao la ngamaisou loxotolo lauolauoinu ia tamuxala utomu la ngingi ngavikala lexe, ‘Maasi la nenge la'iua usili.’ Ngingi ngelavusou sosovo se'i teitexi no loxotolo, musosovosou mii ma'ia. Ia ngingi ngalavusou mii ma'ia ane uxali vaimomo 'o uasi. b Ngingi ta mitema ta masumasua mo ta mitemasou nga'oxo'oxonu 'ili'ilixo sou vote'i. Ngingi ngamasaxa lexe ngamaisou sosovo vile ia umomomo sou ngamaisou vile uasisi manina, sosovo vilesisi ane noxou Iona nesi.” Xe Iesu mu'umesi'a la mixoxolu ne ia Anu mulai.

Iesu Mupeletotosi'a ta Molomolo Noxou no Anu Isi Noxi'a ta Palisaio Xe ta Sadokaio

(Mak 8:14-21)

Xe no mine Iesu ilo'a ta molomolou mixisa'i milai no kupa xalee vile, la ta molomolo noxou Iesu tane'i vulusi la ino'u xa'a veleti uasi. c La Iesu muvikalane'i lexe, “Ngasaxila'inge laixe no anu isi ('ilixo) noxi'a ta Palisaio mo ta Sadokaio.” Ane'i milomu sou aloxo ne la mivikalane'i ngatongato'o lexe, “Anu muvikalanenge aloxo ne xo nenge tano'u nenge veleti uasi.” Ane'i milai la ialimolosou vaikala ne, la Anu mulavu. La sou mutali'isi'a aloxo 'o, “Tava'u loxovaa la ngingi ngevikala ngatongato'o lexe ngingi ngano'u nenge veleti uasi? Ngingi ngamuxaxu tangengi uasi? d Loxovaa, ngingi ngalavusou uao? Mo ngaxavutalanu uasi? No voxo ane eni ese'ise'inu veleti ta'uve ilou sinana ta tamei xa'a ta mitema (5,000) itemaxu mavulovexa mavulovexa tamei mo itemaxu mavulovexa ta'uve, la ngetaanu pa'upa'usou lakela sou ta'ei? 10  e Mo no voxo ane eni ese'ise'inu veleti muxatele tamei xa'a ta mitema (4,000) itemaxu mavulovexa mavulovexa tamei, la ngetaanu pa'upa'usou lakela ta'ei? 11 La sou ngingi nganava e ngalavu sou uao 'o? Eni alelemolu veleti uasi, ia eni avivikala ngengi lexe ngasaxila'inge laixe no anu isi noxi'a ta Palisaio ilo'a ta Sadokaio.” 12 Ane'i milomu sou la sou milamana lexe anu ulelemolu isi e imulaxu no anu veleti sou u'oxoo usoxo uasi. Ia Anu mupeletotosi'a, so lexe isaxila'a laixe no anu 'ilixo noxi'a ta Palisaio ilo'a ta Sadokaio. Xo ilosoie'i no anu 'ilixo noxi'a.

Palapala'alixu Noxou Pita

(Mak 8:27-30; Luk 9:18-21)

13 Xe ili'i no mine Iesu ilo'a ta molomolo mixali no xalee ne Kaisalia Pilipai, la Anu mutali'isi'a ta molomolo noxou aloxo 'o. “Ta mitema mimaisou Itema 'Olu la mi'oxo lexe 'ena'ei.” 14  f Ane'i miavuti la mikolinu lexe, “Se'i mivikala lexe nini Ioanesi itema sou u'ulosi'a ta mitema mose'i ivikala lexe nini Eliasi, mose'i la ivikala lexe nini Elemia, xe se'i ivikala lexe nini vile noxi'a ta mitema sou palomatana.” 15 Xe Anu muavuti la mutali'i vaxa noxi'a lexe, “Ia ngingi la ngingi ngavikala lexe eni 'ena'ei?” 16  g Xe Saimoni Pita muavuti la mukolinu aloxo 'o, “Nini Kalisito, Lataua umauli utotomu 'Olu.” 17  h Xe Iesu muavuti la muvikalanu aloxo 'o, “Saimoni, Ioanesi 'olu nini na'osa. Xo itema vile upala'alixu noxine uasi, Mamilo anu uxolu teitexi no opo loxotolo, Anusisi ane mupala'alixu noxine ne. 18  i Mo eni avikalaneni manina aloxo. Nini Pita, mo teitexi no anu lavo'o ne la eni atulusou taasou lalotu noxilo. La umomomo sou xavi no anu soli u'una no nano no anu aitengaxu lalotu ne uasi. 19  j Mo eni alosine lakii sou aitenga sou saxisaxila'u noxou Lataua teitexi no opo loxotolo. Mii ma'ia nini nasakiinu no lia 'o la Lataua usakiinu teitexi kalumo. Xe mii ma'ia nini nalulusou no lia 'o la Lataua ululusou teitexi kalumo.” 20 Xe muavuti la mupela'a ta molomolo noxou lexe umomomo sou ia'aloxu noxou evile lexe anu Kalisito uasi.

Iesu Mutotokala sou Solixu

(Mak 8:31–9:1; Luk 9:22-27)

21 Ioxe, no voxo ane ne la Iesu musolonu vaivaikala noxou sou mupela'a ta molomolo noxou lexe, anu laixe lexe Anu ulai ne Ielusalemu. Mo utavulenu tu'utu'umaxu tavu'alo no avo'a ta tatila sou lalotu ilo'a ta aili'i, xe ta tisa sou lapuloto. Mo ivau usoli la i'asixu uai voxo tamei, xe no anu voxo tatalusou la Anu utulu. 22 Xe Pita muavuti la mutila'u Iesu la mulailixu va'axu sou mulavixu. La muvikalanu lexe, “Tila umomomo sou mimii ane ne uxali noxine mamu.” 23 Iesu muxiu la muvikalanu Pita aloxo 'o, “Satani naxexesilo! Natalutaluxu vote'i silo uasi. Xavutala e muxolu noxine ne, nini namulinu masaxa noxou Lataua uasi, nemulinu xavutala noxi'a ta mitemasi.” 24  k Xe Iesu muavuti la muvikalane'i ta molomolo noxou aloxo 'o, “Lexe 'ei ane umasaxa lexe umulileli la anu umulinu masaxa noxou uasi, ia une'e mo utavulenu ovu valautu loxo eni etavulenu 'o mo umulileli, mo usoli loxo eni asoli no ovu valautu. 25  l Xo itema ane tanuxu maulixu ne, ili'i la uxovulaunu. Ia itema ane tanuxu maulixu uasi, ia uitalonu maulixu silo ne ili'i la uxali sou mauli. 26  m Ia lexe itema vile uno'u mimii latala sou lia 'o ukalusi, xe uxovulaunu uleenu, la sou mimii sou lialia ane anu muno'u ne usu'ulinu a loxovaa? Male uasi. Mo mii ma'ia ane sou anu ulotonu uleenu no anu sou ulivulixu. 27  n Xo Itema 'Olu ulivu une'e la une'e no anu xavi noxou Momu, ilo'a ta angelo noxou. Mo ulosi'a ta mitema ulusou 'ili'ilixo ma'ia ane ane'i mi'oxo'oxonu. 28 La sou eni avikalangengi manina musuku lexe, se'i noxinge e itulutulu no taingengi 'o isoli uasi ixoxolu mo imaisou Itema 'Olu ulivu une'e no anu xavi mo saxisaxila'u noxou.”

Copyright information for `ATA