a19:4Tav 1:27, 5:2
b19:5Tav 2:24; Ep 5:31
c19:7Lap 24:1-4; Mat 5:31
d19:9Mat 5:32; 1Ko 7:10‑11
e19:14Mat 18:2-3
f19:17Liv 18:5; Luk 10:28
g19:18Mul 20:13-16; Lap 5:17-20
h19:19Mul 20:12; Liv 19:18
i19:26Iop 42:2
j19:28Mat 25:31; Luk 22:30; Pal 3:21
k19:30Mat 20:16; Luk 13:30

Matthew 19

Iesu Muvivikala no Anu 'Ilixo sou Itema Usu'ane Semau

(Mak 10:1-12)

Iesu muvivikalane'i aloxo ne xe mukalu, la Anu musuku no xalee lia tila ne Xalilaia la muxisa'isou lexa ne Ioridani mulaia xalee vile no xalee lia tila ne Iutaia. La ta mitema tavu'alo mimulinu mine la Anu mupamauline'i. Ioxe ta Palisaio se'i mine'e noxou sou lexe itovonu. Mine'e mixali noxou la mitali'isou lexe, “Itema vile umasaxa lexe usu'ane semau no anu masaxa noxou, la loxovaa, 'ilixo ane ne mumomomo no anu lapuloto noxinge?” a Iesu muavuti la mukoline'i aloxo 'o, “Loxovaa ngingi ngamaisou uai no nano no anu vaikala noxou Lataua uasi? Lexe tatei manina no voxo ane Lataua musokou mukoinu mimii latala, la Anu mukoine'i ta mitema kalumo. La mukoine'i ta mulu xe ta sema. b Mo muvikala lexe, tava'u aloxo ne la sou mulu u'umesi'a momu ilee nenu la ulai ilee semau ipita la ixali vasime'a vilesisi. La ane'i ixali ta tamei la ua 'a, ia ixali vilesisi. Aloxo ne la sou mii ma'ia Lataua mupitanu muxali vilesisi ne umomomo sou itema vile ukalipalanu uasi.” c Ane'i milomusou aloxo ne la mivikala lexe, “Ia Mosesi muvikala lexe itema vile umasaxa lexe uxotonu taula'i noxi'a ilee semau la anu molu ukaukavu ulai noxie la sou upalusie ilai.” La Iesu mukoline'i aloxo 'o, “Xo ngingi opongengi pekia'u la sou Mosesi mupelemasaxangengi sou ngaxotonu taula'ingenge ngongi'a ta semasemamengi. Ia tatei manina no mine Lataua musokou mukoinu mimii latala uasi. d La sou eni avikalangengi aloxo 'o, lexe mulu vile ukusaie semau no anu masaxa noxou ia i'oxonu susu vile uasi, ia ulai u'uluxe sama vile la, la anu mu'oxonu 'ilixo sou vote'i.” 10 Ta molomolo noxou Iesu milomusou aloxo ne la mivikalanu Iesu aloxo 'o, “Xo 'ili'ilixo aloxo ne uxali noxi'a mulu ilee semau, la sou anu laixe lexe ta mulu itaula'i uasi.” 11 Ioxe Iesu muavuti la mukoline'i aloxo 'o, “Umomomo sou ta mitema tavu'alo imulinu vaikala ane ne uasi. Ia ane'i ane Lataua mulosi'a xavi sou itaula'i uasisi imulinu. 12 Ta mulu mose'i ilavusou itaula'i uasi. Xo se'i ne no mine ta neni'a mivo'one'i la vasime'a uxolu uasi xe se'i ne ta mitema mipalane'i. Xe se'i ne, ane'i me'a imasaxa lexe itaula'i uasi, ia ixolu aloxo ne sou i'oxonu xaixai no anu saxisaxila'u noxou Lataua teitexi no opo loxotolo. La sou 'ei ane umasaxa lexe uno'u vaikala ane 'o la anu uno'u.”

Iesu Mualusi'a ta Molomolo

(Mak 10:13-16; Luk 18:15-17)

13 No voxo ane ne la ta mitema mino'a ta molomolo mine'e noxou Iesu sou lexe Anu umulaxu avolu no kisi'a xe ukilakasi'a. Ia ta molomolo noxou miavuti la mikusai'a ta mitema ne. 14  e Xe Iesu muavuti la muvikalane'i lexe, “Iengi uvaxai'a ta molomolo ne si mo ine'e noxilo. Xo saxisaxila'u noxou Lataua teitexi no opo loxotolo anu noxi'a ta molomolo aloxo ne.” 15 Anu mumulaxu avolu no kisi'a sou mukilakasi'a mukalu la Anu musuku sou mulai.

Maulu Vile sou Lavuluti Ilou Iesu Mivivikala

(Mak 10:17-31; Luk 18:18-30)

16 Xe Iesu mulai la itema vile mune'e noxou la mutali'isou lexe, “Tisa, eni a'oxonu 'ilixo ma'ia ulapu la sou ano'u mauli ane kaluxu uasi no anu?” 17  f Xe Iesu muavuti la mukolinu aloxo 'o, “Tava'u loxovaa la sou nini netali'isilo no anu 'ilixo mulapu 'o? Lataua anusisi Anu mulapu, ia lexe nini namasaxa sou nano'u mauli ane kaluxu uasi, la namulinu lapuloto noxou Lataua.” 18  g Xe itema ne muavuti la mutali'i mulivu noxou Iesu lexe, “Lapuloto ma'ia?” La sou Iesu muvikalanu lexe, “Lapuloto ne aloxo 'o, ‘Navau itema vile usoli mamu mo na'oxonu 'ili'ilixo sou vote'i mamu mo napakali mamu xe nakalavoi sou itema vile vitanisi mamu.’ 19  h Mo natoxone'i mamine ilee nenine xe tanenixa'a ta mitema va'axu loxo nini tanenixene.” 20 Xe anu maulu ne muavuti la mukolinu Iesu aloxo 'o, “Lapuloto ne eni emulinu mukalusi, ia mii ma'ia ane eni pa'usilo no anu?” 21 Xe Iesu muavuti la mukolinu aloxo 'o, “Lexe nini namasaxa naxali itema mulapu manina la nalai mo nasovanu mimemimeni mo ta mitema ilotonu. Xe lamolisou la nalai nalosi'a ta mitema ane i'a mimii uasi. Nini na'oxonu aloxo ne la sou mimii lailaixe ane uai teitexi no opo loxotolo ne nini na'anini. Mo nane'e namulileli.” 22 No mine maulu ne, mulomusou aloxo ne la iou ne mupalulu, la mumuamua'isi mole mulai avile.Opoonu u'osa uasi xo anu muxavutala no anu miumiu tavu'alo 'ole.

23 Xe Iesu muavuti la muvikalane'i ta molomolo noxou aloxo 'o, “Eni avikalangengi manina lexe itema sou lavuluti ne pekia'u noxou sou u'unalai no nano no anu saxisaxila'u noxou Lataua teitexi no opo loxotolo. 24 Mo avikalangengi lexe kameli umasaxa u'unalai no anu 'umo taxanu ne la anu se'isisi. Ia itema sou lavuluti anu pekia'u noxou sou u'unalai no anu saxisaxila'u noxou Lataua.” 25 No mine ta molomolo noxou milomusou aloxo ne la mikuluke manina la mivikala lexe, “La sou 'ei manina ane anu uno'u mauli ane kaluxu uasi?” 26  i Iesu iou mulai noxi'a la mumatakisi'a, la muvikalane'i aloxo 'o, “Mimii tavu'alo ne se'isisi noxou Lataua ia noxi'a ta mitema la anu pekia'u.” 27 Xe Pita muavuti la muvikalanu lexe, “Nexi tavu'alo ne texiu tumalixeu mimii ne ia tene'e sou temulineni ne. La sou nini nalosixe mii ma'ia?” 28  j La Iesu muvikalane'i lexe, “Eni avikalangengi manina aloxo 'o, no voxo ane mimii uxali alavua xe Itema 'Olu uno'u uala tila la uxolu no anu puloulou noxou. No voxo ane ne la ngingi ane ngemulileli ne, ngingi kalumo ngaxolu no anu puloulou ane laixe mavulovexa mo mulelia tamei, la ngaxolu sou ngatilovosi'a ta mata mavulovexa mo mulelia tamei ne Isilaeli. 29 Mo ane'i ane mixavutala no anu ualasilo la mi'umesou taataasi'a mo mi'umesi'a ta vimovimo'a ta mulu mo ta vimovimo'a ta sema ilo'a ta mami'a mo ta neni'a xe ta 'ili'ili'a ilou xaixaixa'a ne ino'u lakolisou alaxu itemaxu ta'uve. Xe ino'u mauli ane kaluxu uasi. 30  k Ia ta mitema tavu'alo e miuliuli, ulai la ane'i ilai ili'i, ia ane'i ane itoxone'i vaimomo uasi 'o ne ilai la iuli.”

Copyright information for `ATA